Jesús jiwi liwaisi tsipaeba penacojiobinë pijawa pexuabiyaniwa
19
Jesús baja pemuxujiobiweretsicujinae pebarajamatabëcuenexanepanaenexa itsamonae itsacueniabi-atatsi, pona baja Galilea nacuawecua, peponaenexa Judea nacuayabelia. Nicaba Jordán-mene itsapanabelia.
2 Jiwi ayaibitsaëtoxaneto pënaponatsi. Bajarajotalia, Jesús jamatejemaya-exana daxita pamonae piawitanewi.
3 Nexata fariseowiyajuwënëwi Jesús imoxoyorenatsi. Jamatabëcuene-ëjëbiaya yanijobatsi mapacueniaje:
—¿Xanepana tsaja penacojiobinë pijawa pexuabinexa itsacueneliwaisixi yabara-ata? —jai fariseowi
4 Nexata, Jesús jumaitsi:
—¿Apopalebimë tsaja cajena Dioso pejumeliwaisibaxuto, paneyapëtaenexa bajaraxua yabara pejumaitsijawa? Bajarapabaxutota yaquinaruta pejumaitsijawa, pamatacabi Dioso taxuxuaba nacua pexanaejawa, exana caenë pebi. To-exananua caewa petiriwa pijawanexa, penajuaponaponaenexabeje.
5 Bajaraxua yabara Dioso pejumeliwaisibaxutota jumaitsi mapacueniaje: «Pebi itsa pita petiriwa pijawanexa, bawecuanatsataa paxa, pena-ata, saicaya pebarëponaponaenexa pijawa. Nexata, anijajiwimibeje naexana becaejiwi peperabëtocuenia», jai.
6 Nexata, pajiwibeje napitabeje Dioso apotae be-anijajiwibeje. Biji rajane, tane becaejiwi. Bajaraxuata, apoxanepanae itsanë-ata pijawa pexuabijawa, tsipaji Dioso pejamatabëcueneta napitsia-exanatsibeje —jai Jesús fariseowijawabelia.
7 Nexata, icatsia fariseowi jumaitsi:
—¿Detsa xuajitsia bajayata Moisés-pijinë jumaitsi mapacueniaje: «¡Ponë pijawa jamatabëwecuanawiata, toyaquinae pewecuanawiatsiliwaisi, xuacujinae pijawa pecapitsapaenexa pijabowecua!»,b pijajai bajaraponë? —jai fariseowi.
8 Nexata Jesús jumaitsi:
—Bajarapacuenia Moisés-pijinë pacatocopata pane-ajamatabëcuenetajaxae, panijawajiwi panexuabaponaenexa. Itsiata baitsi jane, Dioso pexanaejiwibejejawaweliacujinae, apotocopatsi pebi pijawa pewecuanawiatsinexa.
9 Itsiata baitsi jane, xanë mapacuenia pacatsipaebatsije. Ponë pijawa xuaba, pibisiacuene apowecua-exanae-atatsi itsanëjawabelia, bajaraponë itsa nacojioba icatsia itsawajawabelia, pibisiacuene exana pewitota. Nexata, naneconita Diosojawabelia. Dioso cajena abaxë bajaraponë pexuabiwa pijawacuene totanetsi. Ponë-ata itsanë pexuabicowëwa pitsipa, bajaraponë-ata pibisiacuene exanaejitsipa pewitota, tsipaji bajarapowa abaxë Dioso tanetsi itsanë pijawacuene —jai Jesús fariseowijawabelia.
10 Nexata, Jesús pijajiwi jumaitsitsi bajarapaliwaisi yabara:
—Itsa bajarapacuenia pebi apotocopatsitsi itaxutejema pijawa pexuabinexa, nexata meta bajarapajiwibejec najëpaeya apobenacojiobi —jai Jesús pijajiwi.
11 Nexata, Jesús jumaitsi pijajiwijawabelia:
—Daxitajiwi apocuenecaëjëpaetsi tsane pejumecowënëtsijawa xua yabara jumaitsinë. Pamonae saya Dioso cuenecaëjëpaeya-exanatsi, jamatabëcuenecaëjëpaenatsi nacojiobinejewa pejinawanapaejawa.
12 Itsamonae yajawa naexana pena pecototojawawerenacujinae apopecuenecaëjëpaewitsi penacojiobijawa, pe-ëthëjibiwi penaexanaexae. Itsamonae pijinia apocaëjëpaetsi penacojiobijawa pewëna pebijiwi pe-ëthëjucaexaetsi. Itsiata, itsamonae jinawanapa bepe-ëthëjucaewitsi, pejitsipaexae ëDioso pijacuene peto-exanawanapaewinexa. Bajarapitsiwi jamatabëcuenecaëjëpatsi nacojiobinejewa pejinawanapaejawa. Nexata, pajiwi jamatabëcuenecaëjëpatsi peponaponaejawa patacatsipaebiliwaisicuenia, bajarapacuenia be-exanaponapona —jai Jesús pijajiwijawabelia.
Jesús pexaniacuenia cuenewajunupaeba pejewaxijiwixi
13 Itsamatacabijawa pexi pexainaewi capatapona tsiquirijiwixi Jesús-jawaberena, pecobeta pejayataponaenexa, petowajëtaponaenexatsi Diosojawabelia. Itsiata baitsi jane, Jesús pijajiwi itaweta pexi pexainaewi pecapatsiyaniwa Jesús-jawaberena.
14 Nexata, Jesús jumaitsi pijajiwijawabelia:
—¡Pëtsa pa-itawetame! ¡Pacopare pejewaxijiwixi pepatsinexa xanëjawaberena! Mapitsipejewaxijiwixije jume-aebinejewa, xaniawaetsia bajumexaniatane paliwaisi tsipaebatsi. Nexata, pamonae jitsipa pejonejawa Dioso, athëbëtatsia pe-ecaenë, pijajiwi peyanacua-ewetsijawata, bejumexaniatane, jume-aebinejewa pacuenia mapapejewaxijiwixije —jai Jesús pijajiwijawabelia.
15 Nexata, Jesús tsimatanacobebuatapona caepejewaxijiwiyo canacujitsia. Cuenewajunupaebapona, Dioso pexaniacuenia peyawenonaenexatsi. Bajaraxuacujinae, Jesús baja pona, pijajiwi yajawa, bajarapanacuawecua.
Pewëjëato, bitso pexainaenë, barëcuaicuaijai Jesús-jawabelia
16 Jemata pewëjëato patajopa Jesús-jawaberena, peyanijobinexatsi. Jumaitsi:
—Petuxanenë, pexaniajamatabëcuenenëmë. ¿Detsa pitsipexaniacuene, exanaenajë taxainaenexa matacabi apopewerewerecaejawa? —jai pewëjëato.
17 Nexata, Jesús jumaitsi pewëjëatojawabelia:
—¿Detsa xuajitsia neyanijobame xua pexaniajamatabëcuene yabara? Ajibi cajena itsajiwi-ata pexaniajamatabëcuene pexainaejiwi. Caenë rabaja Dioso pexaniajamatabëcuene pexainaenë. ¡Itsiata, itsa jitsipame nexainaenexa matacabi apopewerewerecaejawa, jumecowënëre pacuenia ca-itoroba Dioso penajumecopatsiliwaisi Moisés-pijinëta! —jai Jesús.
18 Nexata, pewëjëato jumaitsi Jesús-jawabelia:
—¿Detsa paliwaisi nexata jumecowënëtsianajë? —jai.
Nexata, Jesús jumaitsi:
«¡Pëtsa beyaxuabame jiwitonë! ¡Pëtsa jaitame itsawa nijawawecua! ¡Pëtsa nacobetoxotame! ¡Pëtsa itsamonae pexanaejawa yabara najumetsënëtsiaya baracuaicuaijamë!
19 ¡Axa, ena-ata, yaiyataema! ¡Asiwamëre itsajiwi-ata pacuenia xamë nijacuata nasiwamë!» —jai Jesús pewëjëatojawabelia.
20 Pewëjëato nexata jumaitsi:
—Daxita rabaja bajarapaliwaisianë jumecowënëtsiaponaponajë, pejewaxinënëjawawerenacujinae. ¿Detsa xua netosaica abaxë ta-exanaenexa? —jai pewëjëato.
21 Nexata Jesús jumaitsi:
—¡Itsa jitsipame pepacuene aneconijibia neponaponaejawa, nexata ponare necanajetsinexa daxita xua xainame! Bajarapamatamomi tsicobetsanaename bepejiobiwijawabelia. Nexata, bajarapacuenia bitso xainaename Dioso pijanacuatatsia. Bajaraxuacujinae jane baja, nepënaponaename —jai pewëjëatojawabelia.
22 Nexata pewëjëato itsa jumetane bajarapacuenia Jesús pejumaitsijawatsi, najamatabëxainaeya baja wecuapona, tsipaji daxitacuene bitso pexainaenë. Bajaraponë apojamatabëjumecowënëtsi paliwaisi Jesús tsipaebatsi.
23 Nexata bajaraponë pecowëta Jesús jumaitsi pijajiwijawabelia:
—Xaniajanë pacuenia pacatsipaebijitsiatsi. Ponë bitso pexainaenë daxitacuene, tsi-ayapëbejetsi tsane pejonejawanexa Dioso, athëbëtatsia pe-ecaenë, pijajiwi peyanacua-ewetsicuenejawabelia.
24 Icatsia, matawëjëa pacajumaitsitsi. Pacuenia camello apocaëjëpaetsi pejonejawa paluta-eto-itaxutowojotualia, bajarapijinia pacuenia to-ayapëbejetsi tsane bitso pexainaenë pejonejawanexa Dioso, athëbëtatsia pe-ecaenë, pijajiwi peyanacua-ewetsicuenejawabelia, pejamatabëcuenecaranatsixaetsi pexainaejawa —jai Jesús.
25 Pijajiwi itsa jumetane bajarapacuenia Jesús pejumaitsijawa, bitso jamatabëcuenenabenajaca. Nexata jumaitsi Jesús-jawabelia:
—¿Detsa nexata pitsiwi cuenecaëjëpaenatsi pepanepaenexa, itsa pexainaewi-ata apopanepae tsane Diosojawabelia? —jai.
26 Nexata Jesús pijajiwi asaëya naëcota. Jumaitsi:
—Jiwi raja apocaëjëpaetsi pijacuata penacapanepaenexa Diosojawabelia. Itsiata baitsi jane, xua jiwi to-ayapëbejetsi, caenë Dioso caëjëpatsi pexanaenexa —jai Jesús pijajiwijawabelia.
27 Nexata Pedro jumaitsi Jesús-jawabelia:
—Patajatuxanenë, paxanë rabaja pacopabajë daxitacuene pataxainaejawami, patacapënajinawanapaenexa. ¿Detsa meta xua Dioso panerajutsiana bajaraxuanëjamatabëcuene? —jai Pedro.
28 Nexata Jesús jumaitsi pijajiwijawabelia:
—Xaniajanë pacuenia pacatsipaebijitsiatsi. Pamatacabi Dioso icatsia daxitacuene pejanacuenia exanaena, Xanë, Daxitajiwi Pematapijinënë, ecaenajë tajapeniweniwenaetronojawata, tayanacua-ewetsinexa daxitajiwi. Bajarapamatacabi paxamë-ata, Dioso pacatocopatsiana patacabarë-ewetsinexa Israel nacuapijiwi, doce ponëmibeje, pemomoxibitsaëto. Nexata patanepënajinawanapaewimë, doce paponëmëbeje, pacaenëmë canacujitsia, panijatronota pa-ecaponaename, wajanajua-ewetsinexa xua ewetsianajë, juez-nëcuenia bajarapamonae panetocanaëjëtaponaenexa bajarapamonae pijaneconi.
29 Daxita pamonae tajamatabëcueneta pueneta pijabomi, pematapijiwi, pejuyapijiwi, paxa, pena, pijawa, pexi, pija-iranë-ata. Bajaraxuanëjamatabëcuene Dioso rajutaponaenatsi cien xuabeje, caejawayojamatabëcuene tsaponae. Xainaenanua matacabi apopewerewerecaejawa.
30 Pamonae aeconoxae mapamatacabitaje ayaijamatabëcuenewi tanetsi, palata pexainaewixae, itsamatacabi Dioso beweliajamatabëcuenewi exanaenatsi. Pamonae beweliajamatabëcuenewi tanetsi bepejiobiwixae, itsamatacabi Dioso ayaijamatabëcuenewi exanaenatsi —jai Jesús pijajiwijawabelia.