Jesús tsipaeba jiwijawabelia pecuenecataeliwaisi, uvapabita penacuenebiwi peliwaisicuenia
20
Jesús tsipaeba itsa pecuenecataeliwaisicuenia pijajiwijawabelia. Jumaitsi:
—Dioso, athëbëtatsia pe-ecaenë, pijajiwi peyanacua-ewetsijawa, cuenejëpa ponë pexainaenë uvapabixaneto. Bajayacunua naropota, jiwi pejaitsinë petonacuenebiwinexatsi pijapabita.
2 Nexata baja, itsa caxitajaraba jiwi petonacuenebiwinexatsi, yapëtaeya-exana pematamotsijawanexa caedenario caematacabi. Nexata, bajarapamonae bajarapamatamo tsitaxanepanatsi pematamotsinexatsi. Bajaraxuacujinae, pabi pexainaenë itoroba pijapabiabelia petonacuenebinexatsi.
3 Bajaraxuacujinae, icatsia naropota, bejamatabëcuene a las nuevejawa. Taenuba tomaratuatuajëta pebijiwi, itsajota jiwi nacaetuatabiaba itsacuenejawa apopecuene-enaewitsi.
4 Nexata, pabixainaenë jumaitsi bajarapamonaejawabelia: «¡Paxamë-ata paponaremelia tajapabiabelia, patanetonacuenebinexamë! Pacamatamotsianatsi raja xaniawaetsia», jai pabixainaenë.
5 Nexata, bajarapamonae-ata ponalia petonacuenebinexatsi. Pabixainaenë, matoneje-epatota, junata icatsia itsamonae. Xuacujinae, caniwiyo-epatota bejamatabëcuene a las tres-jawa, junata itsamonae. Bajarapamonae-ata ponalia petonacuenebinexatsi.
6 Bitso baja pepuacaniwiyo, bejamatabëcuene a las cincojawa, pabixainaenë icatsia pona tomaratuatuajëareca. Caxitajarabaxuaba pebijiwi, itsacuenejawa apopecuene-enaewitsi. Nexata, pabixainaenë jumaitsi bajarapamonaejawabelia: «¿Detsa xuajitsia saya daxitamatacabi jema pajinawanapame panacuenebinejewamë?» jai.
7 Nexata, bajarapamonae jumaitsi: «Tsipaji itsajiwi-ata apopanejunatsi patatonacuenebinexa», jai. Nexata, pabixainaenë jumaitsi: «¡Paxamë-ata paponaremelia tajapabiabelia patanetonacuenebinexamë! Pacamatamotsianatsi raja xaniawaetsia», jai pabixainaenë. Nexata, bajarapamonae jejai. Ponalia petonacuenebinexatsi.
8 »Nexata baja, juameto itsa pëcaewaya, pabixainaenë jumaitsi pijajiwitonë penamatacaitorobinëjawabelia: «¡Junare baja tanetonacuenebiwi! ¡Matamobare baja! ¡Copiaya matamobare pamonae cotocaewi junatajë! ¡Bajarapacuenia matamotaponare caebitsaëto canacujitsia tajunatsiwi tanetonacuenebiwinexa! Nexata, juya cotocaewi matamobianame copiaya tajunatsiwi », jai pabixainaenë pijajiwitonëjawabelia.
9 Nexata, pamonae cotocaewi pata a las cincojawa penacuenebinexa, parena pematamobinexatsi. Caenë canacujitsia rajutaponatsi caedenario.
10 Nexata, daxita pamonae bajayacunua copiaya pata penacuenebinexa, cotocaewi juya parena pematamobinexatsi. Nexata, bajarapamonae jamatabëjumaitsi: «Caedenario meta pematatsënëa waxaitsi nacamatamobiana, tsipaji copiaya waxaitsi patatsi wajanacuenebinexa», jamatabëjai picani. Itsiata baitsi jane, bajarapamonae-ata, caenë canacujitsia, rajutaponatsi caedenario.
11 Nexata, bajarapamonae penacuenebimatamo itsa nota baja, bara-anaepana pabixainaenëjawabelia.
12 Jumaitsi bajarapamonae: «Mapamonae cotocaewi pepatsiwije, nacueneba saya caehora. Paxanë baja cajena ayaicuenia icotia daxitamatacabi panetsajawa. Itsiata, mapamonaeje najëpaeya panenajuamatamobame», jai bajarapamonae.
13 Itsiata baitsi jane, pabixainaenë jumaitsi bajarapamonaeyajuwënënëjawabelia: «Itsacuenejawayo-ata pibisiacuene apopacato-exanaetsi. Patacajunatsijawata patanetonacuenebinexamë, pacatsipaebatsi caematacabi patacamatamotsinexa caedenario.
14 Pacarajutatsi baja panijamatamo. ¡Papire baja! ¡Paponare baja panijabonëjawabelia! Pamonae cotocaewi pata tanetonacuenebinexa, bajarapamonae-ata matamobajë pacuenia pacamatamobatsi paxamë, xanë tajitsipaecuenia.
15 Xanë baja cajena tajapalataxae, netoxanepana pacuenia jitsipajë patacarajutsinexa. ¿Pacobeca-ëbame tsaja bajarapamonae ayaijawa tamatamotsixae?», jai pabixainaenë.
16 Bajarapijinia pacuenia, Dioso-ata exanaena pijajiwijawabelia. Caejiwiyo canacujitsia matamotaponaena pejitsipaecuenia. Nexata, Dioso najëpaeya matamobiana petonacuenebiwitsi, cotocaewi pepatsiwi, copiaya pepatsiwi-ata.a Pamonae ayaijamatabëcuenewi penataewi, itsamatacabi Dioso beweliajamatabëcuenewi exanaenatsi. Pamonae pijinia beweliajamatabëcuene penataewi, itsamatacabi Dioso ayaijamatabëcuenewi exanaenatsi. Bajarapacuenia Dioso exanaena, tsipaji jiwi ayaibitsaëtoxaneto junatsi-ata petonacuenebiwinexa, caejiwiyobeje saya jumecowënëta —jai Jesús pijajiwijawabelia.
Icatsia Jesús tajëwelia nawajunupaeba pebeyaxuabijawanexatsi
17 Jesús, pijajiwi, jiwi ayaibitsaëto yajawa, penajuanajetarubenaejawata Jerusalén tomarabelia, namutua Jesús junata pijajiwi, doce ponëbeje, pimoxoyotsinexatsi. Nexata, ëpijajiwi pebarënacaetuatsijawata saicaya bajarapamonaewecua, Jesús icatsia tajëwelia nawajunupaeba pebeyaxuabijawanexatsi. Jumaitsi mapacueniaje:
18 —¡Panejumetaema! Mara Jerusalén tomarabelia ponatsije. Bajarajotalia Xanë, Daxitajiwi Pematapijinënë, newaetabiana, tanecanajetsinexa sacerdotewi penamatacaitorobiwi pecobeyabelia, judíowi pecujarubiwi pecobeyabelia-ata. Nexata xanë, neneconitsiana tanebeyaxuabinexa.
19 Bajaraxuacujinae, icatsia apojudíowi pecobeyabelia necopatsiana, bajarapamonae tanecapo̱capo̱naenexa, tanejumatitibabenexanua penaneconitsiwi pejumaconitabiabimacata. Bajaraxuacujinae, cruzajawabelia necobematabiabarutsiana tatëpaenexa. Itsiata baitsi jane, tatëpaecujinae, acueyabi matacabita, icatsia asaënë tsane —jai Jesús pijajiwijawabelia.
Santiago, Juan-beje, pena towajëtatsibeje Jesús-jawabelia penamamotsitaxunae perajutsinexatsibeje
20 Santiago, Juan-beje, paxa pewënë Zebedeo. Nexata bajaraponëbeje pena barëliatsibeje Jesús-jawabelia. Bajarapowa pematabacabëta nucajunua Jesús pitabarata, pewajëtsinexa pexaniacuene peto-exanaenexatsi pexënatobeje yabara.
21 Nexata Jesús jumaitsi bajarapowajawabelia:
—¿Detsa pitsicuene jitsipame tacato-exanaenexa? —jai Jesús.
Nexata bajarapowa jumaitsi Jesús-jawabelia:
—Pamatacabi daxitacuene ewetsianame, tocopatsianame taxënatobeje nemuxuneneta pena-ecaenexabeje panenajua-ewetsinexa. Caenë tocopatsianame necujuanenia pe-ecaenexa. Itsanë pijinia ecaeya-exanaename netsawenoneniab —jai bajarapowa.
22 Nexata, Jesús jumaitsi Santiago, Juan-bejejawabelia:
—Paxamëbeje apopayapëtaemëbeje xua pawajëcaeya-exanamebeje ena xanëjawaberena. ¿Pacacaëjëpabeje tsaja, panenacaewetsinexabeje ayaicuenia papecabejiobia-exanaenexabeje pacuenia xanë Dioso netocaëjëta jiwi tanebejiobia-exanaenexa? —jai Jesús bajaraponëbejejawabelia.
Nexata, Santiago, Juan-beje jumaitsibeje:
—Jãjã, panecaëjëpabeje cajena —jaibeje.
23 Nexata, icatsia Jesús jumaitsi bajaraponëbejejawabelia:
—Paxaniajamëbeje cajena. Pacuenia xanë Dioso netocaëjëta jiwi tanebejiobia-exanaenexa, paxamëbeje-ata ayaicuenia pacabejiobia-exanaenabeje. Itsiata baitsi jane, xua panewajëtamebeje panena-ecaenexabeje, itsanë tacujuanenia, itsanë tatsawenonenia, bajaraxua Dioso aponetocopatsi patacatocopatsinexabeje, tsipaji raja taxa Dioso ëpitapetsiwinexa abaxë bajaraxua toxaniawaeta —jai Jesús bajaraponëbejejawabelia.
24 Nexata, diez ponëbeje Jesús pijajiwi, itsa wënëliwaisitane pepëya bajaraxua Santiago, Juan-beje Jesús-jawabelia pewajëcaejawabeje, bajarapamonae jamatabëbara-anaepana bajaraponëbejejawabelia.
25 Nexata, Jesús daxita pijajiwi junata. Jumaitsi bajarapamonaejawabelia:
—Payapëtaneme rabaja pacuenia nacua-ewetsiwi ba-exana mapanacuataje. Ajumesaëya itorobabiaba pijanacuapijiwi itaxutotsoniataenejewa. Bajarapijinia pacuenia, exanabiaba pamonae yajawanacueneba. Ayaijamatabëcuenewi penataexae, ajumesaëya itorobabiaba xua jamatabë-itoroba pewetsinacuanëjawa pejinawanapaewi peto-exanaenexatsi.
26 ¡Pëtsa paxamë bajarapacuenia pa-exaname, pane-ewetsijawata tajajiwi! Biji rajane, ponë paxamëyajuwënënë jitsipa ayaijamatabëcuenenë penaexanaejawa paxamëtuatuajëta, bajaraponë daxita paxamë bepanijajiwitonëcuenia bepacayawenonabiaba.
27 Ponë paxamëyajuwënënë jitsipa penaexanaejawa papecanamatacaitorobinënexa, bajaraponë daxita paxamë panijajiwitonë benaexana papecayawenonabiabinexa.
28 Bajarapacuenia itsa pa-exanabiabianame, nexata xanë-ata ta-ewetsicuene panecuenejëpaename, tsipaji raja Xanë, Daxitajiwi Pematapijinë-atanë, apopatajopaenë jiwi taneyawenonaenexa. Biji rajane, xanë patajopajë daxitajiwi tayawenonaenexa, tasiwatëpaenexanua, ayaibitsaëtoxaneto pibisiacuene pexanaeneconimi yabara tatomatamotsinexa —jai Jesús pijajiwijawabelia.
Jesús itaxutoxanepanaeya-exana bitso pitaxutotsëcënaenëbeje
29 Jesús, pijajiwi yajawa, pepitsapaejawata Jericó tomarawecua, jiwi ayaibitsaëto pënaponatsi.
30 Panamutojawa Jesús najetaruca, namutomuxuneneta ecabeje bitso pitaxutotsëcënaenëbeje. Nexata, bajaraponëbeje, itsa jumetanebeje bajarapanamutua imoxoyo Jesús penajetarucaejawa, wawajaibeje tsecae.
—¡Petuxanenë, David-pijinë pemomomë, pane-itaxutotsoniataemabeje! —jai tsecaebeje.
31 Jiwi picani jume-itawetatsibeje, pemoyatsecaenexabeje. Caranata biji, saya bitsoyo wawajai tsecaebeje.
—¡Petuxanenë, David-pijinë pemomomë, pane-itaxutotsoniataemabeje! —jai tsecaebeje Jesús-jawabelia.
32 Nexata, Jesús muxunanucojopa. Junata pitaxutotsëcënaenëbeje. Jumaitsi bajaraponëbejejawabelia:
—¿Detsa xua pajitsipamebeje patacato-exanaenexabeje? —jai.
33 Nexata, bajaraponëbeje jumaitsibeje:
—Petuxanenë, pajitsipajëbeje pata-itaxutoxanepanaejawabeje —jai tsecaebeje.
34 Nexata, Jesús pitaxutotsoniataejawatabeje, itaxutojayata bajaraponëbeje. Bajarajota, caecuenia itaxutoxanepanabeje baja. Nexata, bajaraponëbeje Jesús pepëta naponabeje baja.