Jesús pijajiwi yanijoba, peyapëtaenexa pajiwi ayaijamatabëcuenejiwi tsane Dioso peyanacua-ewetsinacuata
18
Bajarapacuenia impuesto yabara Jesús pejumaitsicujinae Pedrojawabelia, daxita Jesús pijajiwi imoxoyorenatsi, peyanijobinexatsi. Jumaitsi:
—Patajatuxanenë, ¿detsa ponë paxanëyajuwënënë bitso ayaijamatabëcuenenë tsane daxitawecua, Dioso, athëbëtatsia pe-ecaenë, pijajiwi peyanacua-ewetsinacuata? —jai.
2 Nexata Jesús junata pejewaxinëyo, pimoxoyotsinexatsi. Pijajiwituatuajëta nuteta bajaraponëyo.
3 Nexata jumaitsi pijajiwijawabelia:
—Xaniajanë pacuenia pacatsipaebijitsiatsi. Paxamë itsa apopanajamatabëcuenepënëyorotsimë tsane ayaijamatabëcuene panenataejawawecua, beweliajamatabëcuene panexainaenexa, pacuenia mapapejewaxinëyo itsije, nexata apopajonemë tsane Dioso, athëbëtatsia pe-ecaenë, pijajiwi peyanacua-ewetsinacuata.
4 Bajaraxuata, ponë beweliajamatabëcuene natane pacuenia mapapejewaxinëyo jamatabëcuene-itsije,a bajaraponë rajane ayaijamatabëcuenenë tsane daxitawecua, Dioso, athëbëtatsia pe-ecaenë, pijajiwi peyanacua-ewetsinacuata.
5 Pajiwi tawënëta copiapita xanëjawaberena tanesiwanajamatabëcuenecopatsijiwiyo, beweliajamatabëcuenejiwi, pacuenia mapitsijiwiyo jamatabëcuene-itsije, bajaraxua xanë taniji tanecopiapitsijawa —jai Jesús pijajiwijawabelia.
Jesús pijajiwi muxujioba itsajiwi-ata pibisiacuene pexanaeya-exanaeyaniwa
6 Jesús jumaitsi pijajiwijawabelia:
—Pajiwi pibisiacuene exanaeya-exanaejitsipa, xanëjawaberena tanesiwanajamatabëcuenecopatsiyajuwënëjiwiyo, beweliajamatabëcuenejiwi-ata pacuenia mapapejewaxinëyo, bajarapajiwi Dioso ayaicuenia naneconitsia-exanaejitsipatsi. Bajaraxuata, pajiwi najamatabëxaina pibisiacuene pexanaeya-exanaenexa xanëjawaberena tanesiwanajamatabëcuenecopatsijiwiyo, abaxë pibisiacuene exanaeya-exanaenejewa, bajarapajiwi pijacuata benawësicëta ibotoxaneto, peyajawajopaenexareca pucaxanetotuatuajëareca.
7 Mapanacuataje nawita jiwi pejamatabëcuene-ëjëbijawanëtsi, pejitsipaeya-exanaenexatsi pibisiacuene. Bajaraxua jiwi apocaëjëpaetsi penawecua-ajibia-exanaejawa. Itsiata, pajiwi pejamatabëcueneta pibisiacuene exanaeya-exana xanëjawaberena tanesiwanajamatabëcuenecopatsijiwiyo, bajarapajiwi Dioso ayaicuenia naneconitsia-exanaenatsi.
8 ¡Bajaraxuata, panecobeta, panetaxuta-ata, pibisiacuene itsa paca-exanaeya-exanaena, panawecuacaucure! ¡Tajë panawecuaxuare! Bitso biji, pacatoxanepana panejonejawa cobemataxucaeya, taxumataxucaeya-ata, Dioso peyanacua-ewetsinacuajawabelia, Dioso papecaxuabiyaniwa anijacobebeje, anijataxubeje-ata yajawa, apopewerewerecae-isotojawabelia.
9 ¡Paneitaxutota panetaejawa, pibisiacuene itsa paca-exanaeya-exanaena, pana-itaxutocajure! Bitso biji, pacatoxanepana panejonejawa pacae-itaxutojiwimë Dioso peyanacua-ewetsinacuajawabelia, Dioso papecaxuabiyaniwa anija-itaxutobeje yajawa apopewerewerecae-isotojawabelia —jai Jesús pijajiwijawabelia.
Jesús tsipaeba pijajiwijawabelia pecuenecataeliwaisi, oveja penaxuabinë peliwaisicuenia
10 Jesús jumaitsi pijajiwijawabelia:
—¡Panayajiwitaema, beweliacuenia panetaeyaniwa mapitsipejewaxijiwiyo,b xanëjawaberena tanesiwanajamatabëcuenecopatsijiwiyo, tsipaji bajarapamonae ángelewi yajawajinawanapa peyawenonabiabinexatsi! Bajarapa-ángelewi taxa Dioso, athëbëtatsia pe-ecaenë, pitabarata jinawanapa.
11 Xanë, Daxitajiwi Pematapijinënë, patajopajë tacapanepaenexa daxita Diosowecua naxuabiaya pejinawanapaewimi.
12 »¡Pacanaëjëre mapacueneje! Pebi xainaejitsipa cien ponëbeje oveja. Nexata, itsa toyajuwënënaxuabijitsipatsi caenë, oveja, pexainaenë puenetsipa abaxë noventa y nueve ponëbeje, pejaitsinexa petonaxuabinëtsi.
13 Xaniajanë pacuenia pacatsipaebijitsiatsi. Bajaraponë pija-oveja itsa caxitajarabijitsipa, bitso barëyataejitsipa. Nexata bitso siwajamatabëcuenebarëya tsipae petonaxuabinëmitsi, noventa y nueve ponëbeje apopetonaxuabiwitsiwecua.
14 Bajarapijinia pacuenia, pane-axa-ata, athëbëtatsia pe-ecaenë, apojitsipae pewecuanaxuabinexatsi caejiwi-ata, mapitsipejewaxijiwixi-ataje, xanëjawaberena tanesiwanajamatabëcuenecopatsijiwi —jai Jesús pijajiwijawabelia.
Diosojawabelia pesiwanajamatabëcuenecopatsijiwi bebarajamatabëcuenexanepana pajiwi itsacueniabatsi
(Lc 17:3)
15 Icatsia, Jesús jumaitsi pijajiwijawabelia:
—¡Itsanë nijamonaenë, Diosojawabelia pesiwanajamatabëcuenecopatsinë, pibisiacuene itsa cato-exana, nexata ponare bajaraponëjawabelia, xaniawaetsia nebarëcuaicuaijainexa, caenëjawata, bajaraxua yabara! Nexata, itsa canamuxuna-ewetsiana, najamatabëcuenepënëyorotsiana pecato-exanaejawawecua, icatsia panenabarajamatabëcuenexanepanaenexabeje, bepanacaemonaejiwimëbejecuenia asiwaya panenataenexabeje.
16 Itsiata, xaniawaetsia itsa apocanamuxuna-ewetsi tsane, nexata natsicueyajunatsianame caenë nebarëponaenexa, itsa jume, anijanëbeje, papecajumetaenënexabeje panenabarëcuaicuaijaijawatabeje, pibisiacuene pecato-exanaenëjawabelia. Bajarapacuenia pane-exanaejawatabeje, pajumenamatamotsianame panenatoxanebijawabeje. Pajumecowënëtsianamebejenua pacuenia paca-itoroba Dioso penajumecopatsiliwaisi Moisés-pijinëta.c
17 ¡Nexata, bajaraponë itsa tsiteca aponamuxuna-ewetsi tsane neyajawaponaenëbeje-ata pemuxujiobijawatsi, nexata pabarëponare tawënëta penacaetuatabiabiwijawabelia,d papecayawenonaeyamuxujiobinexa! Bajarapamonae-ata itsa apojumecowënëtsi pemuxujiobiliwaisitsi, nexata bajaraponë pataename Diosojawabelia apopesiwanajamatabëcuenecopatsinëcuene. Nexata baja, panawecua-itawetsianame pepatsiyaniwa panenacaetuatsijawata.
18 »Xaniajanë pacuenia pacatsipaebijitsiatsi. Paxamë patajajiwimë mapanacuataje pacuenia patocaëjëtame panenaneconitsia-exanaenexa pijaneconi pexainaejiwiyo, Dioso, athëbëtatsia pe-ecaenë, caejamatabëcuene xainaena bajarapajamatabëcuene yabara. Pajiwi pijinia patocaëjëtame pianeconijibijawa, Dioso, athëbëtatsia pe-ecaenë, caejamatabëcuene xainaena bajarapajamatabëcuene yabara.
19 »Orijibia, pacatsipaebianatsi: Mapanacuataje pa-anijanëmëbeje itsa panajamatabëcuenejëpamebeje xua yabara pawajëtsijitsiamëbeje Diosojawabelia, nexata taxa, athëbëtatsia pe-ecaenë, pacato-exanaenabeje xua pawajëtamebeje,
20 tsipaji itsajota anijajiwibeje, acueyabi pajiwibeje-ata, tajajiwi, tawënëta nacaetuata, bajarajota xanë yajawa-ecaenajë —jai Jesús pijajiwijawabelia.
21 Nexata Pedro imoxoyolia Jesús peyanijobinexa. Jumaitsi:
—Tajatuxanenë, itsajiwi, Diosojawabelia patanajuasiwanajamatabëcuenecopatsijiwibeje, apotajitsipaecuene, piabejejawa, itsa neto-exanabiabijitsipa, ¿detsa nexata xuabeje siwajamatabëcaewabiabianajë? Itsa jume, ¿siete tsaja xuabeje? —jai Pedro.
22 Nexata, Jesús jumaitsi bajaraponëjawabelia:
—Siete xuabejenexa yabara apojumaitsinë. ¡Biji rajane, siete pasetenta xuabeje aponejitsipaecuene cato-exanae-ata, siwajamatabëcuenecaeware, barajamatabëcuenexanepanaeya netaenexa; baitsi cuatrocientos noventa xuabeje! —jai Jesús Pedrojawabelia.
Jesús tsipaeba jiwijawabelia pecuenecataeliwaisi, Ponë apojitsipae pebarajamatabëcuenexanepanaejawa itsanëjawabelia peliwaisicuenia
23 Jesús tsipaeba itsa pecuenecataeliwaisicuenia pijajiwijawabelia. Jumaitsi:
—Dioso, athëbëtatsia pe-ecaenë, pijajiwi peyanacua-ewetsijawa, cuenejëpa pacuenia nacua-ewetsinë pijajiwi pejunatsijawa, peyapëtaeya-exanaenexatsi pecanacuenebijawa bajaraponë pijapalata.
24 Bajarapacuenia peyapëtaeya-exanaponaejawatatsi, caxitajaraba itsanë bitso ayaijawa piamoneyabinëtsi, millones papesobejecuenia.e
25 Bajaraponë apoxainae pacuenia matamotsijitsia. Nexata, nacua-ewetsinë itoroba pijajiwi bajaraponë pecanajetaxuabinexatsi, daxita pexi, pijawa yajawa, pecobecowë-ata. Bajarapacuenia itsa canajetatsi, canaëjëta pepitsinexa pijamatamo piamoneyabijamatabëcuenetsi.
26 Nexata, piamoneyabinëtsi, nacua-ewetsinë pitabarata pematabacabëta nucajunua. Pinijicuenia wajëta nacua-ewetsinëjawabelia. Jumaitsi: «¡Nebejiobiataema! ¡Nejamatabëcuene-ewere abaxë! ¡Camatamotsianatsi rabaja daxita xua ca-amoneyabatsi!», jai.
27 Nexata, nacua-ewetsinë itaxutotsoniatane piamoneyabinëtsi. Nexata, jumaitsi piamoneyabinëtsijawabelia: «Daxita rabaja tane-amoneyabijawamë, iquinajë. Nexata baja, aponematamotsimë tsane», jai nacua-ewetsinë. Bajaraxuacujinae, copata baja penawiatsinexa.
28 »Nexata, bajaraponë ajena pepitsapaejawatalia nacua-ewetsinë pijabowecua, caxitajarabaxuaba itsanë penajuanacuenebabiabinëbeje nacua-ewetsinë pijajawa. Bajarapanajuanacuenebabiabinëbeje itsanë amoneyabatsi saya cien ponëbeje palatanëanë.f Nexata, asaëyata cuaibosicuetsacaya, jumaitsi bajaraponëjawabelia: «¡Nematamore tane-amoneyabijawamë!», jai.
29 Nexata, piamoneyabinëtsi pitabarata pematabacabëta nucajunua. «¡Nebejiobiataema! ¡Nejamatabëcuene-ewere abaxë! ¡Camatamotsianatsi rabaja daxita xua camoneyabatsi!», jai.
30 Itsiata baitsi jane, bajaraponë piamoneyabinëtsi apo-itaxutotsoniatae. Biji rajane, itoroba pe-etsinexa penaneconitsiwi pejebabiabibojawabelia, bajarapacuenia pematamotsinexatsi daxita piamoneyabijawatsi.
31 Nexata, nacua-ewetsinë pijajiwi itsa tane bajarapacuenia pexanaejawa penajuanacuenebabiabinëbejejawabelia, bajarapamonae bitso najamatabëxaina. Nexata ponalia, petsipaebinexa pijatuxanenëjawabelia.
32 Nacua-ewetsinë pijajiwi itsa tsipaebatsi bajarapacuenia, nexata itoroba icatsia petojunatsinexatsi bajaraponë. Itsa baja tocapatatsi, nacua-ewetsinë jumaitsi bajaraponëjawabelia: «¡Niajamatabëcuenebejenë baja cajena! Cato-iquinatsi rabaja picani tane-amoneyabijawamë, tsipaji pinijicuenia newajëtame tacabejiobiataenexa.
33 Pacuenia xanë ca-itaxutotsoniatanetsi, ¿Detsa xuajitsia bajarapacuenia xamë apo-itaxutotsoniataemë peca-amoneyabinë?»
34 Nexata, nacua-ewetsinë bitso bara-anaepana millones papesobeje piamoneyabinëtsijawabelia. Bajaraxuacujinae, itoroba pecaponaenexatsi penaneconitsiwi pejebabiabibojawabelia, bajarajotalia pebejiobia-exanaenexatsi ëpematamoweretsijawabelia daxita piamoneyabijawa.
35 Bajarapijinia pacuenia, paca-exanaena taxa Dioso, athëbëtatsia pe-ecaenë, paxamë-ata itsa apopabarajamatabëcuenecaewimë tsane panebarajamatabëcuenexanepanaenexa pamonae paca-itsacueniaba —jai Jesús pijajiwijawabelia.