Jesús tsipaeba jiwijawabelia, acueyabi pacuenecataeliwasibeje, peyapëtaeya-exanaenexa xua yabara aponaneconitsi Diosojawabelia
Jesús tsipaeba jiwijawabelia pecuenecataeliwaisi oveja penaxuabinë peliwaisicuenia
15
Impuestojamatabëcuene pematamoyanijobabiabiwi, itsamonae piajamatabëcuenebejewi-ata, pata Jesús-jawaberena, penamuxuna-ewetsinexatsi petsipaebiliwaisi.
2 Petaejawata bajaraxua, fariseowi, judíowi pecujarubiwi-ata, Jesús cuenecarapuabiaya baracuaicuaijaitsi mapacueniaje:
—Mara ponëje naneconita Diosojawabelia, tsipaji copiapitabiaba piajamatabëcuenebejewi-ata. Naxaeyabiabanua pexaejawa bajarapamonaeta —najai Jesús yabara.
3 Bajarapacuenia pebaracuaicuaijaixaetsi, bajarapamonaejawabelia pecuenecataeliwaisicuenia Jesús tsipaeba mapaliwaisije:
4 —Paxamëyajuwënënë xainaejitsipa cien ponëbeje oveja. Itsa toyajuwënënaxuabijitsipatsi caenë, oveja pexainaenë petusatota puenetsipa noventa y nueve ponëbeje. Jaitsipa petonaxuabinëtsi, pecaxitajarabijawabelianexa.
5 Itsa baja caxitajarabijitsipa petonaxuabinëmitsi, barëyataejitsipa. Boyaberena wëtacarapatsipa.
6 Itsa capatsipa boyaberena, junatsipa peyapëtaewitsi, pijabomuxuneneta imoxoyo pe-enaewi-ata. Nexata, jumaitsi tsipae bajarapamonaejawabelia: «¡Panecobenabarëyamëre, tsipaji taja-ovejayo, tanetonaxuabinëyomi picani, caxitajarabajë baja!», jai tsipae oveja pexainaenë bajarapamonaejawabelia.
7 Xaniajanë pacuenia pacatsipaebijitsiatsi. Pacuenia oveja pewetsinë bitso siwajamatabëcuenebarëya pecaxitajarabixae petonaxuabinëmitsi, noventa y nueve ponëbeje pesiwajamatabëcuenebarëyajawawecua, bajarapijinia pacuenia bitso siwajamatabëcuenebarëya tsabiabi tsane athëbëtatsia pejinawanapaewi, pacujinae pijaneconi pexainaejiwi copatsiana pibisiacuene pexanabiabijawa, penajamatabëcuenepënëyorotsixae Diosojawabelia pesiwajamatabëcuenebarëyajawawecua noventa y nueve pajiwibeje Dioso pitabarata pianeconijibitsawanapaewi matatoxenetsia —jai Jesús fariseowijawabelia, judíowi pecujarubiwijawabelia-ata.
Jesús tsipaeba jiwijawabelia pecuenecataeliwaisi, penaxuabipalatanëyo peliwaisicuenia
8 Itsaliwaisi pecuenecataecuenia Jesús tsipaeba fariseowijawabelia, judíowi pecujarubiwijawabelia-ata:
—Petiriwa xainaejitsipa diez ponëbeje palatanëanë, bitso penamatamotsinëanë. Itsa toyajuwënënaxuabijitsipatsi caenë, itanojotsipa lámpara pejaitsinexa. Bo-ënë-ata ira cajuetsipa petonaxuabipalatanëmitsi pecaxitajarabijawabelia. Matapania itsa pitabuatsipa, copatsipa baja pejaitsijawa.
9 Itsa baja caxitajarabijitsipa petonaxuabipalatanëmitsi, junatsipa peyapëtaewitsi, pijabomuxuneneta imoxoyo pe-enaewi-ata. Nexata, jumaitsi tsipae bajarapamonaejawabelia: «¡Panecobenabarëyamëre, tsipaji tajapalatanëyo, tanetonaxuabinëyomi picani, caxitajarabajë baja!», jai tsipae.
10 Xaniajanë pacuenia pacatsipaebijitsiatsi. Bajarapijinia pacuenia, pajiwi copatsiana pibisiacuene pexanabiabijawami, itsa najamatabëcuenepënëyorotsiananua Diosojawabelia, athëbëtatsia pejinawanapaewi, ángelewi, siwabarëyatsi tsane —jai Jesús fariseowijawabelia, judíowi pecujarubiwijawabelia-ata.
Jesús tsipaeba jiwijawabelia pecuenecataeliwaisi, juyapijinë, paxawecua penaxuabaponaponaenë, peliwaisicuenia
11 Icatsia, Jesús tsipaeba itsapecuenecataeliwaisicuenia fariseowijawabelia, judíowi pecujarubiwijawabelia-ata. Jumaitsi mapacueniaje:
—Pebi xaina anijanëbeje pexënatobeje.
12 Itsamatacabi, juyapijinë jumaitsi paxajawabelia: «Axa, xuanë picani netocopatsiapaebame tapitsinexa newënamuto, bajaraxuanë, abaxë apotëpae-atamë, jitsipajë aeconoxae tanerajutsijawamë», jai juyapijinë. Nexata, pexënatobejejawabelia tsicobetsata daxita pexainaejawanëmi.
13 Paxa perajutsicujinaetsibeje, caematacabibejecujinae, juyapijinë xuanë rajutatsi canajeta, pecaetuatsinexa palata. Bajaraxuacujinae jane baja, pona tajënacuayabelia. Bajarajotalia, pijapalatami werebiaba bijiaya pecanacuenebixae, pibisiacuene pexanaponaponaejawata.
14 Nexata, panacuata ponapona, daxita bajarapanacuapijiwi janibocuene tsipatatsi. Bajaraponë peweretsicujinae daxita pijapalatami, piajani bitso tsabiabi.
15 Nexata, jaita penacuenebinexa bajarapanacuata pe-ecaenëjawabelia. Bajaraponë itorobatsi pija-iranëjawa peto-ewetaponaponaenexa pijamarrano.
16 Nexata, bajaraponë bitso piajanixae, pepenenexa picani ayaijawa jamatabëxaeyabiaba bopocuai, marrano pexaeyabiabijawa. Bajarajota, itsajiwi-ata aporajutsitsi pexaejawanexa.
17 Nexata, belia bajaraponë xaniawaetsia najamatabëxaina. Jamatabëjumaitsi: «Taxa pijabota pexaejawa ayaijawa xaina pijajiwi, ayaibitsaëto, piabatsinexa. Tonacopatabiabatsi ayaijawa pexaejawa. Itsiata, xanë majotaje tëpaejitsianë baja, tajani.
18 Nexata, taxajawabelia nawiatsianajë. Jumaitsinë meta tsane taxajawabelia: ‘Axa, pibisiacuene exanajë Diosojawabelia, xamëjawabelia-ata.
19 Abejenë raja. Auranë baja cajena xamëjawabelia: «Apoxanepanaenë taxënato», tanejamëjawa. ¡Nexata, saya netaema tacatonacuenebinëcuenia!,’ janë meta tsane taxajawabelia», jamatabëjai juyapijinë.
20 »Nexata jane baja, nawiata paxajawabelia. Itsa abaxë tajëwerena najetaruca, pexënato pexainaenë pewajënaetaejawata, bitso itaxutobejiobiatane. Nexata, mata-enetsia cujinaejinalia pecopiapitsinexa pexënato. Nacoxiwaetabarucapona. Copiapitsiaya itabaratsutsunexuaba.
21 Nexata, pexënato jumaitsi paxajawabelia: «Axa, pibisiacuene raja exanajë Diosojawabelia, xamëjawabelia-ata. Abejenë raja. Nexata baja, apoxanepanaenë taxënato tanejamëjawa», jai paxajawabelia.
22 Itsiata baitsi jane, pexënato pexainaenë bajarajota jumaitsi pijajiwijawabelia: «¡Naxatsia! ¡Bepijiayo taxënato patocaponaremena daxita matatoxenetsia pexaniapana, penajumaxuabipana! ¡Pajuma-acare! ¡Anillonua pacobesixatare! ¡Zapatonua pataxuxatare!
23 ¡Penasitsinë becerro papiremelia! Pabeyaxuabianame wajaxaenexa. ¡Fiesta exanaenatsi wajabarëyanexa!
24 Barëyatsi tsane, tsipaji raja maponë taxënatoje: ‘Tëpa meta baja,’ siwajamatabëjanë picani. Itsiata, tsaena ponapona. ‘Naxuaba meta baja,’ siwajamatabëjanë picani. Itsiata baja, icatsia patajopa», jai pexënato pexainaenë pijajiwijawabelia. Nexata jane baja, taxuxuaba fiesta pexanaejawa.
25 »Bajarapamatacabi, matapijinë pabiabelia nacuenebaponapona. Nexata, penawiatsinë bo itsa imoxoyotanajetaruca, jumetane música. Jumetanenua peyawajibijawa.
26 Nexata, bajaraponë junata paxa pijajiwiyajuwënënë. Jumaitsi: ‘¿Detsa pitsicuene yabara fiesta pa-exaname?’ jai matapijinë.
27 Nexata, paxa pijajiwitonë jumaitsi: ‘Nejuyapijinë baitsi patajopa. Axa nexata pane-itoroba patabeyaxuabinexa becerro, penasitsinë. Jamatejema tsaena ponapona nejuyapijinë,’ jai bajaraponë matapijinëjawabelia.
28 Nexata, matapijinë bitso anaepana. Apojitsipae boyabelia pejonejawa. Nexata, paxa siwapitsaparenatsi. Jumaitsi pexënatojawabelia: «¡Naxatsia! ¡Najonemeya!», jai pexënatojawabelia.
29 Itsiata, matapijinë jumaitsi paxajawabelia: «¡Jume! ¡Xanë baja cajena bajayajebi catonacuenebaponaponatsi! ¡Caeto-ata cajena apocajumexuabitsi! Itsiata baitsi jane, caeto-ata aponerajutsimë chivoyo-ata, fiesta tabarë-exanaenexa tayapëtaewi.
30 Itsiata, aeconoxae patajopa baja nexënato, ponë wereta nijapalatami petiriawijawabelia. Nexata, tobeyaxuabame becerro, penasitsinë», jai paxajawabelia.
31 Nexata, bajaraponë jumaitsi pexënatojawabelia: «Taxënato, xamë cajena xanëjawata ponaponame daxitamatacabi. Nexata, daxita xua taxainaejawa nijajawa baja cajena.
32 Itsiata, aeconoxae namatawenonatsi wajabarëyanexa, tsipaji nejuyapijinë: ‘Tëpa meta baja,’ tasiwajamatabëjainëmi, itsiata tsaena asaë abaxë. Penaxuabaponaponaenëmi icatsia baja patajopa», jai pexënatojawabelia —jai Jesús fariseowijawabelia, judíowi pecujarubiwijawabelia-ata.