Jesús jamatejemaya-exana pebi, bitso daxitanë peyajinaenë
14
Itsamatacabijawa, Jesús pona fariseowi penamatacaitorobinë pijaboyabelia, penaxaenexa judíowi penacuera-ewetsimatacabita. Bajarajota, itsamonae fariseowi Jesús naitaxutocaewetatsi.
2 Jesús pitabaracanacujitsialia eca pebi, daxitanë peyajinaenë.
3 Jesús nexata jumaitsi pamonae bitso peyapëtaewijawabelia Dioso penajumecopatsiliwaisi Moisés-pijinëta, fariseowijawabelia-ata:
—¿Aponaca-itawetsi tsaja penacuera-ewetsimatacabita wajajamatejemaya-exanaenexa piawitanewi? —jai Jesús bajarapamonaejawabelia.
4 Itsiata, bajarapamonae apojumecanawiatsi. Moya saya ena. Nexata, Jesús cobepita peyajinaenë. Jamatejemaya-exana baja. Bajaraxuacujinae, itoroba peponaenexa bajarapabowecua.
5 Nexata, Jesús jumaitsi bajarapamonaejawabelia:
—Itsa panijaburro, panijavaca-ata, pacatojopaejitsipareca meramëthëjawareca, nexata, ¿penacuera-ewetsimatacabixae, bepijia apopajutsimë tsipae? —jai Jesús pamonae bitso peyapëtaewijawabelia Dioso penajumecopatsiliwaisi Moisés-pijinëta, fariseowijawabelia-ata.
6 Nexata, to-ayapëbejetsi bajarapamonae pejumecanawiatsijawa Jesús-jawabelia.
Jesús jiwi muxujioba ayaijamatabëcuenewi penataeyaniwa
7 Fariseonë pijabota penapatsicujinae, Jesús tane pacuenia fariseonë pejunatsiwi, natsi-itapeta pena-enaenexa peyaiyataewitsi petsinubijawanëta mesa muxuneneta. Nexata, Jesús muxujioba bajarapamonaejawabelia beweliajamatabëcuenewi penataenexa. Nexata jumaitsi:
8 —¡Itsa pacajunata panenaxaenexa penacojiobinë pijafiestajawabelia, pëtsa panatsi-itapetame panena-enaenexa peyaiyataewitsi pena-enaenexa petsinubijawanëta, tsipaji itsanë, ayaijamatabëcuenenë, paxamë matatoxenetsia, itsa najunatatsi, napatsipa!
9 Nexata, papecajunatsinë pacacujitsiparena papecajumaitsinexa: «¡Tocopare bajarapape-ecaejawa maponë pe-ecaenexaje!», pacajai tsipae. Nexata, paxamë pa-auramë tsipae, itsa pacanatixitsia-exana pane-ecaenexa beweliajamatabëcuenewi petsinubijawanëta.
10 Bajaraxuata, itsa pacajunata, pa-enaename saya beweliajamatabëcuenewi petsinubijawanëta. Matapania, itsa pacajumaitsi tsipae papecajunatsinë: «¡Natixiremena! ¡Ecare peyaiyataewitsi tatsinubijawanëta!», itsa pacajai tsipae, nexata daxita mesa muxuneneta panenajua-enaewi pacataena papecayaiyataejawa papecajunatsinë.
11 Pajiwi ayaijamatabëcuenejiwi natane, bajarapajiwi beweliajamatabëcuenejiwi taenatsi Dioso. Pajiwi pijinia beweliajamatabëcuenejiwi natane, bajarapajiwi ayaijamatabëcuenejiwi taenatsi Dioso —jai Jesús judíowi pecujarubiwijawabelia, fariseowijawabelia-ata.
12 Nexata, Jesús icatsia jumaitsi pejunatsifariseonëtsijawabelia:
—¡Itsa junatame itsamonae nebarëxaenexa nijabota matonejepijijawa, itsa jume, caniwiyopijijawa-ata, pëtsa junatame ëneyapëtaewi, ënijamonae, ënijamonaewiriawi, ëdaxitacuene bitso pexainaewi, pamonae nijabomuxuneneta pejinawanapaewi, bajarapamonae juya canamatamojunatsipa pijabota pecabarëxaenexa! Pacuenia bajarapamonae to-exaname, itsamatacabi juya camatamojunatsiana, pijabota pecabarëxaenexa.
13 Biji rajane, itsa fiesta exaname nebarëxaenexa, junatsianame bepejiobiwi, penabejenaewi, pejayujayunaewi, bitso pitaxutotsëcënaewi-ata.
14 Nexata bajarapacuenia, pepacuene Dioso casiwajamatabëcuenebarëya tsane, tsipaji bajarapitsiwi acuenebi juya pecanamatamojunatsijawa tsane. Nexata, nijamatamo xainaename pamatacabi Dioso asaëya-exanaena pamonae tëpa, pexaniacuene pexanawanapaewimi —jai Jesús pejunatsifariseonëtsijawabelia.
Jesús tsipaeba jiwijawabelia pecuenecataeliwaisi, pinijifiesta pexanaenë peliwaisicuenia
15 Pejumetaejawata Jesús petsipaebiliwaisi, bajarajota pe-enaewiyajuwënënë mesa muxuneneta jumaitsi Jesús-jawabelia:
—Jamatabëcuenebarëya tsane pajiwi naxaena Dioso peyanacua-ewetsinacuatatsia —jai fariseowiyajuwënënë.
16 Nexata, Jesús pejumecanawiatsijawata, tsipaeba pecuenecataeliwaisicuenia. Jumaitsi:
—Itsamatacabi, itsanë siwanajamatabëcuenewereta pexanaenexa pinijifiestaxaneto. Nexata, tajëwelia junatsia-exana jiwi ayaibitsaëtoxaneto petopatsinexatsi, pejunatsiwi pebarëxaenexa.
17 Pexaejawa baja pexanaeweretsicujinae, fiesta pexanaenë itoroba pijajiwitonë, peponaenexa pejunatsiwijawabelia: «¡Naxatsia baja! Pexaejawa rabaja wereta», pejainexa.
18 Itsiata baitsi jane, daxita pejunatsiwi apotopatsitsirena. Itsanë saya peponaeyaniwa, pijajiwitonëta tonajume-itorobarenatsi pejumaitsiliwaisi mapacueniaje: «Xanë aeconoxaeta ira comuatabajë. Nexata, ponaejitsianë bajarabelia, tataenexa bajarapa-ira. Pexaniacuene neto-exanaename. ¡Pëtsa jamatabëcuene-anaepaname xanëjawaberena!», pejailiwaisi tonajume-itorobarenatsi pijajiwitonëta.
19 Itsanë pijinia saya peponaeyaniwa, pijajiwitonëta tonajume-itorobarenatsi mapacueniaje: «Xanë comuatajë diez ponëbeje bueyu, tanetorobobocaewinexa. Nexata, ponaejitsianë ta-ëjëtsinexa bajarapabueyu. Pexaniacuene neto-exanaename. ¡Pëtsa jamatabëcuene-anaepaname xanëjawaberena!», pejailiwaisi tonajume-itorobarenatsi pijajiwitonëta.
20 Itsanë pijinia saya peponaeyaniwa, pijajiwitonëta tonajume-itorobarenatsi mapacueniaje: «Xanë raja aeconoxaeta nacojiobajë. Bajaraxuata, acuenebi taponaejawa», pejailiwaisi tonajume-itorobarenatsi pijajiwitonëta. Bajarapacuenia fiesta pexanaenë pejunatsiwi apopatsi. Peponaeyaniwa saya tonajume-itorobatsi pijajiwitonëta.
21 Nexata, fiesta pexanaenë pijajiwitonë nawiarena pijatuxanenëjawaberena. Tsipaeba baja, daxita pacuenia tonajume-itorobatsi. Nexata, fiesta pexanaenë anaepana. Jumaitsi pijajiwitonëjawabelia: «¡Naxatsiayo, liamëre tomarabelia! Junatanajetarucaename jiwi pinijicallexanetonëjawa, tsiquiricallexijawa-ata. Junatsianame bepejiobiwi, penabejenaewi, pejayujayunaewi, bitso pitaxutotsëcënaewi, penaxaenexa tajabota», jai. Nexata baja, pijajiwitonë pona pejunatsinexa jiwi.
22 Jiwi pebarëpatsicujinaerena, jumaitsi pijatuxanenëjawabelia: «Tajatuxanenë, exanajë rabaja tane-itorobicueniamë. Itsiata, abaxë sajinanubena itsamesanë itsamonaenexa», jai bajaraponë.
23 Nexata, petuxanenë icatsia jumaitsi pijajiwitonëjawabelia: «¡Liamëre icatsia carreteranëjawabelia, namutonëjawabelia-ata! Junatanajetarucaename asaëyata carreterajawa peponaewi, namutojawa-ata, penaxaenexa tajabota, jamatejema jiwi pewënëcaenexa.
24 Pamonae picani copiata junatajë penaxaenexa, caenë-ata bajarapamonaeyajuwënënë, aponaxae tsane bajarapapexaejawa», jai petuxanenë pijajiwitonëjawabelia —jai Jesús fariseowiyajuwënënëjawabelia peyapëtaeya-exanaenexa pacuenia Dioso itsamonae junatsi-ata, apopejumecowënëtsijawanexa.
Pamonae jamatabëpënapona Jesús, matatoxenetsia biasiwa bajaraPonë pijamonaewecua
25 Jiwibitsaëtoxaneto Jesús pënajinawanapatsi. Nexata, Jesús jemata napënëyorotojopa bajarapamonaejawabelia. Jumaitsi mapacueniaje:
26 —Pajiwi jitsipa tanepënaponaejawa tajajiwitonënexa, itsiata, itsa aponiasiwa tsane daxita pijamonae piasiwajawa matatoxenetsia, nexata apocuenecaëjëpaetsi tsane tajajiwitonë penaexanaenexa. Nexata, itsa aponiasiwa tsane paxa, pena-ata, pematapijiwi, pejuyapijiwi-ata, piasiwajawa matatoxenetsia, apocuenecaëjëpaetsi tsane tajajiwitonë penaexanaenexa. Itsa aponiasiwa tsane pijawa, pexi, pijacuata-ata pena-asiwajawa matatoxenetsia, nexata apocuenecaëjëpaetsi tsane tajajiwitonë penaexanaenexa.
27 Pajiwi aponacopatsi jiwi pebejiobia-exanaenexatsi, pebeyaxuabinexa-atatsinua xanë yabara, nexata apocuenecaëjëpaetsi tsane tajajiwitonë penaexanaenexa.
28 ¡Pacanaëjëre mapacueneje! Paxamëyajuwënënë bo itsa jamatabë-exana, athëbëabetsia piapiaboxanetotsia, copiaya caëjëtsipa pijapalata itsa tocaëjëpaejitsiatsi xaniawaetsia peweretsijawabelia.
29 Nexata, taxuxuabi-ata pijabo pexanaejawa, itsa apoweretsi tsipae, petaewitsi capo̱capo̱naejitsipatsi apopeweretsixae.
30 Bajarapamonae baracuaicuaijaitsi tsipae: «¡Pataema maponëje! Picani taxuxuaba pijabo pexanaejawa. Itsiata, apotocaëjëpaetsi pijapalata, peweretsinexa», jaitsi tsipae capo̱capo̱naeya petotaewitsi. Bajaraxuata, paxamë-ata pacatoxanepana copiaya panenajamatabëcueneweretsijawa patanepënaponaewajënaeyamë.
31 »Bajarapacuenia exanaejitsipa nacua-ewetsinë-ata. Copiaya najamatabëcueneweretsipa pacuenia petsimaxëponaewitsi itsa tsimaxëpatatsi cuenecanawiatsijitsia, itsanacuawerena pebarënawajabitsaëtsiwajënaeyatsi. Nexata, copiaya cuenecanaëjëtsipa pijajiwi diez mil ponëbeje itsa barëcuene-amoneyabijitsia veinte mil ponëbeje pexainaenëjawabelia.
32 Bajarapacuenia pesiwacanaëjëtsicujinae, itsa natoyapëtaejitsipa apopebarëcuenecaëjëpaejawatsi pebarënabenexa pijawajabitsaënë pijajiwijawabelia, nexata abaxë, itsa tajë pewajënae pepatsijawarena pijawajabitsaënë, najumexuabijitsipalia pijajiwita penabarajamatabëcuenexanepanaenexabeje, wajabitsaëcuene pexanaeyaniwabeje.
33 Bajarapijinia pacuenia, paxamëyajuwënëwi-ata itsa aponajamatabëcueneweretsi copiaya penajamatabëcuenepënëyorotsinexa daxita pexainaejawawecua, nexata apoxanepanae tajajiwi ta-exanaenexa —jai Jesús jiwi ayaibitsaëtoxanetojawabelia.
Jesús tsipaeba jiwijawabelia pecuenecataeliwaisi, yajo peliwaisicuenia
34 Jesús icatsia pecuenecataeliwaisicuenia jumaitsi jiwi ayaibitsaëtoxanetojawabelia mapacueniaje:
—Yajo abaxë itsa xaica, xanepana. Itsiata, pexaicaejawami itsa ajibi tsipae, ¿detsa pacuenia icatsia naxaicaeya-exanaejitsipa? Acuenebi.
35 Itsacuenejawayonexa-ata baja apoxanepanae tsipae, irajawabelia pe-ubijawa-ata petsibaca-othocaenexa. Nexata, saya jiwi xuabijitsipa bajarapayajomi. Pajiwi jamatabënejumeyapëtane patacatsipaebiliwaisi, nenamuxuna-ewetsi xaniawaetsia —jai Jesús Dioso pijacuene penacuenebiwi piacuenematamobiyaniwa.