Jiwi benajamatabëcuenepënëyorota Diosojawabelia, pibisiacuene pexanabiabijawawecua
13
Itsamonae pata Jesús-jawaberena abaxë pecujarubaponaponaejawata, peyapëtaeya-exanaenexa Pilato pitorobijawa pijajiwi pebeyebia-exanaejawa Galilea nacuapijiwimi Jerusalén tomarata. Yapëtaeya-exanatsi pacuenia bajarapamonaemi pebeyebatsi, paepatota dajubi tajuitanubena altar-jumata, templobopijipanabota. Nexata, jiwi petëpaewimi pejana, yajawanamatajërëata dajubijana.
2 Bajarapaliwaisi pejumetaecujinae, Jesús jumaitsi bajarapamonaejawabelia:
—¿Bajarapacuenia petëpaexae,a paxamë meta pacatsita bitso pibisiacuene pexanaewi itsamonae Galilea nacuapijiwiwecua?
3 ¡Jume baja cajena! Dioso tocopatatsi bajarapamonaemi bajarapacuenia pebeyejebinexatsi, paxamë abaxë panenacopabiwi, panenatocanaëjëtsinexa Diosojawabelia panenaneconitsijawa. Nexata, itsa apopacopabimë tsane pibisiacuene pane-exanabiabijawa, panenajamatabëcuenepënëyorotsinexa Diosojawabelia, nexata, paxamë-ata panaxuabianame Diosowecua panetëpaejawata.
4 ¡Panajamatabënapire pematacënëbijawatsi dieciocho pajiwibeje, papiapiaboxaneto jopanucaya Siloé pucayo imoxoyojawata, Jerusalén tomarata penucaejawami! ¿Pamonaemi tsaja matacënëbatsi, bitso pibisiacuene pexanaexae itsamonae Jerusalén tomarapijiwiwecua?
5 ¡Jume baja cajena! Bajarapamonaemi-ata picani bitso pibisiacuene apo-exanae pijatomarapijiwi matatoxenetsia. Bajaraxua yabara, paxamë bepayapëtaneme pacuenia itsa apopacopabinë tsane pibisiacuene pane-exanaejawa, panenajamatabëcuenepënëyorotsinexa Diosojawabelia, daxita paxamë-ata bajarapacuenia panaxuabianame Diosowecua itsa patëpaename —jai Jesús bajarapamonaejawabelia.
Jesús tsipaeba jiwijawabelia pecuenecataeliwaisi piacuaijibihigueranae peliwaisicuenia
6 Jesús jiwi liwaisi tsipaeba piacuaijibihigueranae peliwaisicuenia, peyapëtaeya-exanaenexa Dioso petojitsipaejawa penajamatabëcuenepënëyorotsinexa Diosojawabelia, pexaniacuene pexanawanapaenexanua. Jumaitsi mapacueniaje:
—Pebi pijapabituatuajëta caenae pe-ubinae xainanuta, higueranae. Nexata, picani taeyojopabiaba bajaraponae penacuaitsijawa. Itsiata baitsi jane, aponacuaitsi.
7 Nexata, jumaitsi pijapabi peto-ewetsinëtsijawabelia: «¡Taema maponaeje! Acueyabi picani pawaibeje taeyopajë itsa nacuaita pecuai, tanotabiabinexa. Itsiata, aponacuaitabiabi. ¡Nexata baja, nicataxuare! Apobecopatanutsitsi bajaraponae. Ira caranatanuca saya», jai pijapabi pexainaenë.
8 Itsiata baitsi jane, pijapabi peto-ewetsinëtsi jumaitsi: «Copatanutsianatsibeje abaxë mapawaije. Nexata, yabacamonaenajë. Tsibaca-othocaenajënua vacatasitoxita.
9 Baja raeta xuacujinae, xanepanaena. Nexata, aeconoxae pawai itsa nacuaitsiana, abaxë nucaena. Itsa aponacuaitsi tsane, nexata jane baja, nicataxuabianajë», jai pijapabi peto-ewetsinëtsi —jai Jesús.
Jesús jamatejemaya-exana judíowi penacuera-ewetsimatacabita penajumafurutsiwami
10 Itsamatacabi, judíowi penacuera-ewetsimatacabita, Jesús jiwi liwaisi tsipaeba judíowi pijasinagogabota.b
11 Bajarajota na-eca petiriwa. Dowathi pejamatabëcueneta bajarapowa dieciocho pawaibeje xaina penajumafurutsicujinae. Nexata, apocaëjëpaetsi tsiquirijawayo-ata pena-epasirowitsijawa.
12 Itsa Jesús taeyeta bajarapowa, nexata junarena. Jumaitsi bajarapowajawabelia:
—Niatanejawa rabaja cawecua-ajibia-exanatsi —jai Jesús.
13 Nexata, tsimatanacobebuata bajarapowajawabelia. Bajarapaepatota, na-epasirowitsixanepana baja. Nexata, bajarapowa pexaniacuenia wënëxaniatapona Dioso ayaijamatabëcuenenë yabara, bitso pexaniacuene peto-exanaexaetsi.
14 Itsiata baitsi jane, judíowi penacaetuatabiabibo pewetsinë, bara-anaepana Jesús, judíowi penacuera-ewetsimatacabita pejamatejemaya-exanaexae penajumafurutsiwa. Jesús pexanaecuene petsita-abejexaetsi, judíowi penacaetuatabiabibo pewetsinë jumaitsi bajarapabota penacaetuatsiwijawabelia:
—Caesemana canacujitsia Dioso nacatocaëjëta seis pamatacabibeje wajanacuenebinexa. Nexata, bajarapamatacabijawa nacatoxanepana wajapatsijawa, wajanacajamatejemaya-exanaenexa. Itsiata baitsi jane, penacuera-ewetsimatacabita apobepatsitsi wajanacajamatejemaya-exanaenexa —jai judíowi penacaetuatabiabibo pewetsinë, najumejematsiaya jiwijawabelia.
15 Nexata, Jesús jumaitsi judíowi penacaetuatabiabibo pewetsinëjawabelia:
—Paxamë, jiwi panecujarubiwi, apopa-exanabiabimë xua pacuene-itawetabiabame itsamonae pexanaeyaniwa. Penacuera-ewetsimatacabita-ata paxamë panacuenebabiabame, tsipaji pa-isinabiabame panijavaca, panijaburro-ata, panecaponaenexa merajawabelia piapaenexa.
16 Biji rajane, mapowaje, Abraham-pijinë pemomoxiyajuwënëwa, dowathi pejamatabëcueneta najumafuruta. Xaina baja dieciocho pawaibeje peponaponaejawa Satanás bepecëbiwatsicuenia. Nexata, pacuenia paxamë pexaniacuenia pa-isinabiabame panijadajubi penacuera-ewetsimatacabita-ata, ¿bajarapacuenia tsaja aponetoxanepanae ta-isinaejawa mapowaje Satanás pecobewecua? Jãjã, bajarapacuenia xanepana ta-exanaenexa —jai Jesús judíowi penacaetuatabiabibo pewetsinëjawabelia.
17 Bajarapacuenia Jesús itsa jumaitsi, nexata pamonae pecuene-itoyawitsi moya ena. Aura tsenae. Itsamonae pijinia Jesús siwajamatabëcuenebarëyatsi pinijicuene Dioso pesaëta pexanaponaejawanë yabara.
Jesús tsipaeba jiwijawabelia pecuenecataeliwaisi, bepijiayo pewitsabijawa mostazanaemëcuenia
18 Orijibia, Jesús jumaitsi jiwijawabelia:
—¿Demeta paliwaisi jëpa Dioso pijajiwi bepijia ayaibitsaëtoxaneto penaexanaponaejawanexa, bajaraPonë peyanacua-ewetsiwinexa? ¿Depaliwaisicuenia meta pacatocuenecataenatsi? Mostazaxutoyo meta peliwaisicuenia.
19 Pebi capona mostazaxutoyo pe-ubinexa pijapabita. Pe-ubicujinae, bajarajota mostazanae bepijia witsaba. Bepijia baja pinijinae naexana. Baratsui-ata exana pematapenanë bajaraponaemaxëranaxijawa. Bajarapijinia pacuenia, Dioso papijajiwimë-ata pa-itsimë tsane.c Patsiquiribitsaëtoyomë-ata, bepijia panaexanaename pa-ayaibitsaëtoxanetomë, Dioso papecayanacua-ewetsinexa —jai Jesús jiwijawabelia.
Jesús tsipaeba jiwijawabelia pecuenecataeliwaisi levadurajawa peliwaisicuenia
(Mt 13:33)
20 Icatsia, Jesús jumaitsi jiwijawabelia:
—¿Depaliwaisicuenia meta pacatocuenecataenatsi, jiwi peyapëtaenexa Dioso pijajiwi pewetsicuene peyacaëjëpaejawa daxitanacuanëjawa?
21 Pacatsipaebianatsi levadurajawa peliwaisicuenia: Petiriwa pan pexanaenexa, canacueneba acueyabi patarrobeje trigobenonë pejanapan-matabënexa. Bajarapapejanamatabëjawabelia matajërëaba levadura pexainaematabëyota. Nexata, tsiquirimatabëyo-ata fufunaeya-exana daxita caecuenia bajarapapan-matabë. Bajarapijinia pacuenia, Dioso pijajiwi peyanacua-ewetsicuene caecuenia yacaëjëpaponaena daxitanacuanëpijiwijawa —jai Jesús jiwijawabelia.
Tsiquiribaupayo peliwaisi
(Mt 7:13-14, 21-23)
22 Jesús penajetarucaejawata Jerusalén tomarajawabelia, namutualia jiwi liwaisi tsipaebanajetaruca pinijitomaranëjawa, tsiquiritomaraxijawa-ata.
23 Liwaisi petsipaebijawata, itsanë yanijobatsi. Jumaitsi Jesús-jawabelia:
—Petuxanenë, ¿Dioso tsaja capanepaena caebitsaëtoyo saya? —jai.
Nexata, Jesús jumaitsi daxita jiwijawabelia:
24 —Xaniajanë pacuenia pacatsipaebijitsiatsi. Ayaibitsaëtonë picani jitsipaena penajonejawa tsiquiribaupayojawalia Dioso pijanacuayabetsia. Itsiata, bajarapamonae apocuenecaëjëpaetsi tsane pejonenexa. ¡Bajaraxuata, pajamatabëcuenesaëmëre bitso panewajënaeyabelia panejonenexa bajarapatsiquiribaupayojawalia!
25 Pacuenia bo pexainaenë, baupa pexatatsicujinae, ayapëbeje wajajonejawa, bajarapacuenia Dioso exanaena. Nexata, pebaupaxatatsicujinae, paxamë bo jumapënëwelia panubenaename. Nexata, picani bitso panejitsipaexae panejonejawanexa, pajumaitsimë tsane: «¡Tajatuxanenë, panetobaupare!», pajamë tsane. Itsiata, bajaraPonë pacajumaitsi tsane: «Apopacayapëtaetsi cajena paxamë. Itsawerena-ata papatame», pacajai tsane.
26 Nexata, paxamë pajumaitsimë tsane: «Xamë baja cajena panebarëxaneme pexaejawa. Panebarëmatawëjëa-apamenua. Patajatomaranëjawa-ata baja cajena jiwi liwaisi tsipaebabiabame», pajamë tsane.
27 Itsiata, bajaraPonë pacajumaitsi tsane: «Apopacayapëtaetsi cajena paxamë papamonaemë. Itsawerena-ata papatame, apoyapëtaenë. ¡Pibisiacuene pane-exanaewi, panewecuanatsare baja!», pacajai tsane.
28 Dioso pijanacuatatsia, pataename penajuajinawanapaejawa Abraham-pijinë, Isaac-pijinë, Jacob-pijinë, daxita profetawi-ata. Itsiata, paxamë bajarajota, bitso panejamatabëcuenebëjaixae, pinijicuenia panatsinuename, panawonosinianamenua, tsipaji Dioso pijanacuawecua pacaxuabiana apopewerewerecae-isotojawabelia.
29 Bajarapamatacabi, patsiana ayaibitsaëto, apojudíowi, daxitanacuanëjawawerena. Bajarapamonae na-enaena mesa muxuneneta, penaxaenexa xua toxaniawaetatsi Dioso pewetsinacuatatsia.
30 Nexata, xaniawaetsia pacanaëjëtsianame itsamonae yabara, xua pacayapëtaeya-exanaejitsiatsi: Pamonae mapamatacabitaje beweliajamatabëcuenewi tanetsi, Dioso pijanacuatatsia ayaijamatabëcuenewi exanaenatsi. Pamonae pijinia mapamatacabitaje ayaijamatabëcuenewid tanetsi, Dioso pijanacuatatsia beweliajamatabëcuenewi exanaenatsi —jai Jesús daxitajiwijawabelia.
Jesús najamatabëxainaeya siwanua Jerusalén tomarapijiwi
31 Itsa baja Jesús najumewereta jiwi liwaisi petsipaebijawa, itsamonae fariseowiyajuwënëwi pata Jesús-jawaberena. Bajarapamonae jumaitsi:
—¡Jesús, majotawecuaje najetabijirabare, tsipaji nacua-ewetsinë, Herodes, cabeyaxuabiapaeba! —jai fariseowi.
32 Nexata, Jesús jumaitsi bajarapamonaejawabelia:
—¡Paponaremelia bajarapanamojawabelia!e Pajumaitsimë tsane mapacueniaje: «Jesús raja jumaitsi: ‘Ajena raja abaxë, icatsia merawia-ata tsane, wecuacapitsapaponaenajë dowathi peyajawajinawanapaewi. Piawitanewi-ata jamatejemaya-exanaponaenajë. Nexata, abaxë pamerawia, bajarapacuenia ta-exanaejawa copatsianajë,’ jai raja Jesús», pajamë tsane Herodes-jawabelia.
33 Itsiata baitsi jane, xanë tsitecaeya najetarucaenajë ajena, merawia, pamerawia-ata, tapatsinexa Jerusalén tomarajawabelia, tsipaji bajarapatomarata profetawimi, beyejebabiabatsi. Bajaraxuata, xanë-ata ponajë bajarabelia, tanebeyaxuabinexa —jai Jesús fariseowijawabelia.
34 Nexata, Jesús najamatabëxainaeya pesiwanuejawata Jerusalén tomarapijiwi, jumaitsi mapacueniaje:
—¡Pajerusalén-tomarapijiwimë, ayaicuenia pataca-asiwawi! Pacuenia wacara banacoxicaetuata pecorofetobëxëpanaberena, bajarapijinia pacuenia xanë-ata picani bitso jitsipabiabajë patacacaetuatsinexa, patacacapanepaenexa picani panijaneconiwecua. ¡Itsiata baitsi jane, paxamë apopajejamë cajena! Pataca-asiwaxae, pacato-itorobabiabatsi picani, profetawi. Itsiata baitsi jane, pabeyejebabiabame. Pacato-itorobabiabatsinua Diosojumeliwaisi pecaponaewi. Bajarapamonae-ata ibotonëta patseconabiabame, panebeyejebinexa.
35 ¡Panejumetaema! Bajarapacuenia pane-exanaexae, Dioso rabaja pacacopata papeca-ewetabiabijawami. Pijatemplobota-ata apoponaponae tsane. Bajarapijinia pacuenia, xanë-ata patanebeyaxuabicujinaemë matawëjëa pepacuene baja apopanetaemë tsane. Matapania pamatacabijawabelia xanë yabara pajumaitsimë tsane: «¡Dioso, bitso yawenonare maponë, penajetarucaenëje, xamë nejamatabëcueneta!», pajamë tsane. Nexata jane baja, icatsia panetaename itsa patsianicajë —jai Jesús mapacueniaje najamatabëxainaeya pesiwanuejawata Jerusalén tomarapijiwi.