Jesús tsipaeba jiwijawabelia fariseowi, judíowi pecujarubiwi-ata, penaneconitsijawa Diosojawabelia
23
Jesús jumaitsi jiwi ayaibitsaëtojawabelia, pijajiwijawabelia-ata:
2 —Judíowi pecujarubiwi, fariseowi-ata, Dioso tocopatatsi jiwi xaniawaetsia peyapëtaeya-exanaponaenexa pajamatabëcueneliwaisi xaina Dioso penajumecopatsiliwaisi Moisés-pijinëmita.
3 Nexata, pajumecowënëtsianame, pa-exanawanapaenamenua daxita pacuenia bajarapamonae pacatsipaebapona bajarapaliwaisita. ¡Itsiata baitsi jane, pëtsa pacuenejëpame pacuenia bajarapamonae exanawanapa, tsipaji xua bajarapamonae paca-itaweta pane-exanaeyaniwa, bajaraxua itsiata bajarapamonae exanabiaba!
4 Bajarapamonae piayapëbejeliwaisianëta itorobabiaba jiwi pejumecowënëtabiabinexa. Itsiata baitsi jane, bajarapaliwaisianëyajuwënëjawa, caeliwaisiyo-ata, pijacuata apojumecowënëtsi.
5 Daxita xua bajarapamonae exana, exanabiaba saya jiwi bepexaniajamatabëcuenewi petaenexatsi. Nexata, bajarapamonae na-itapacëbabiaba, nacofiacëbabiabanua, becajonixicuenia pexanaejawaxi. Xuaxi xaina Diosojumeliwaisi peyaquinaebaxutoxi.a Naxatababiabanua pexaniapitabëjawanë. Mataropotabiabanua piapiafleco pijanawatabuyalia perutsinexa.
6 Bajarapamonae itsa junatatsi fiestajawabelia penaxaenexa, jaitabiaba pe-enaenexa peyaiyataetaxunaejawata. Bajarapamonae itsa najoneyabiaba judíowi pijasinagogabota,b jitsipabiaba pe-enaenexa peyaiyataewitsi petsinubijawanëta.
7 Bitso jitsipabiaba jiwi pebajacobijawatsi yaiyataeya callejawa: «Patanecujarubinë, patanecujarubinë», pejaijawatsi.
8 »¡Pëtsa paxamë pajitsipame jiwi papecajumaitsinexa: «Pecujarubinë», papecajainexa, tsipaji baja caenënë, panexainame Mesíasnë, patacacujarubinënexa! Paxamë saya daxita bepanacaemonaemë, najëpaeya patacacujarubixae.
9 ¡Bajarapijinia pacuenia, itsanëjawabelia mapanacuapijinëje: «Axa», pajamë pëtsa, tsipaji caenë pane-axa paxainame, ponë eca athëbëtatsia!
10 ¡Pëtsa pajitsipame itsamonae papecajumaitsinexa: «Jiwi pewetsinë», papecajainexa, tsipaji xanë, caenënë Mesíasnë, pataca-ewetaponaponaenë!
11 Ponë, paxamëyajuwënënë, pacawecua-ayaijamatabëcuenenë, bepacayawenonabiaba padaxitamë, bepanijajiwitonëcuenia.
12 Pajiwi daxitajiwiwecua natane ayaijamatabëcuenejiwi, itsamatacabi Dioso beweliajamatabëcuenejiwi exanaenatsi. Pajiwi pijinia daxitajiwiwecua natane beweliajamatabëcuenejiwi, itsamatacabi Dioso ayaijamatabëcuenejiwi exanaenatsic —jai Jesús jiwi ayaibitsaëtoxanetojawabelia, pijajiwijawabelia-ata.
13 Icatsia, Jesús jumaitsi fariseowijawabelia, judíowi pecujarubiwijawabelia-ata:
—¡Paxamë saya jiwi paneyamaxë-itojorobiwi! Paxamë judíowi panecujarubiwi, pafariseowimënua, ayaineconi panatsixainame Diosojawabelia. Pacuenia bo babaupaxatata jiwi pejoneyaniwa, bajarapacuenia paxamë bepane-exanae. Itsamonae jitsipae-ata pejonenexa Dioso, athëbëtatsia pe-ecaenë, pijajiwi peyanacua-ewetsinacuajawabelia, apopacopatsimë pejonenexa, saicayaliwaisi panecujarubixae. Paxamë-ata apopajitsipaemë panejonenexa bajarapanacuajawabelia.
14 »¡Paxamë saya jiwi paneyamaxë-itojorobiwi! ¡Paxamë, judíowi panecujarubiwi, pafariseowimënua, ayaineconi panatsixainame Diosojawabelia! Papetiriawi yabara Dioso paca-itoroba itaxutotsoniataeya pane-ewetsinexa,d pamonajiwi pewecuatëpaewanëtsi, paxamë caranata yamaxë-itojorobiaya pawecuanotabiabame pecobecowëjawaximi. Bajarapijinia pacuenia, Dioso bepapijajiwimë itajara jiwi papecataenexa, daxitajiwi pitabarata pinijicuenia patsitanawajëcabiabame Diosojawabelia. Bajaraxuata, paxamë bitso ayaicueniae Dioso pacananeconitsia-exanaena, pamatacabi naneconitsia-exanaena pamonae pijaneconi pexainaewi.
15 »¡Paxamë, judíowi panecujarubiwi, pafariseowimënua, jiwi saya paneyamaxë-itojorobiwi! Ayaineconi cajena panatsixainame Diosojawabelia, tsipaji daxitanacuanëjawa pacujarubarutame panajumetsënëtsiliwaisi pacajinawanapame. Panecujarubiwi pejumexaniataexae panenajumetsënëtsiliwaisi, nexata paxamëwecua matatoxenetsia pibisiacuene exanawanapa. Bajaraxuata, Dioso matatoxenetsia naneconitsia-exanaena bajarapamonae, pamatacabi pacayajawaxuabiana apopewerewerecae-isotojawabelia.
16 »Paxamë saya apopaneyapëtaexae Dioso pejumeliwaisi, bepane-itaxutotsëcënaewi panaexaname panecujarubijawata, tsipaji pacuenejëpame pitaxutotsëcënaenë pematacaponaejawa itsa pitaxutotsëcënaejiwi. Nexata, panecujarubijamatabëcueneta bajarapamonae payajawananeconitame Diosojawabelia. Paxamë jiwijawabelia pajumaitsimë tsabiabi: «Pajiwi itsanëjawabelia najumecapanepaeya jumaitsi pejumexaniataenexatsi: ‘Cato-exanaenatsi pepacuene. Cajumaitsitsi cajena templobo pewënëta,’ jai-ata, apo-itsacuene. Bajarapajiwi pejumaitsicuenia apo-exanae-ata, itsiata aponaneconitsi Diosojawabelia», pajamë tsabiabi. «Pajiwi rajane itsanëjawabelia jumaitsi pejumexaniataenexatsi: ‘Cato-exanaenatsi pepacuene. Cajumaitsitsi cajena templobopiji-orojawanë pewënëta,’ jai, bajarajane xua abeje. Nexata, bajarapajiwi exanae pejumaitsicuenia, penaneconitsiyaniwa Diosojawabelia», pajamë tsabiabi jiwijawabelia.
17 Pajamatabëcuenenawëxaniabame raja saya bajarapacuenia itsa pajumaitsimë. Biji rajane, templobo beyaiyatanetsi bajarapatemplobopiji-orojawanë matatoxenetsia. Bajarapa-orojawanë-ata beyaiyatanetsi, tsipaji bajarapa-orojawanë yanamatamotsia-exana bajarapatemplobo.
18 Bajarapijinia pacuenia, jamatabëcuenenawëxaniabiaya pajumaitsimë tsabiabinua: «Pajiwi itsanëjawabelia najumecapanepaeya jumaitsi pejumexaniataenexatsi: ‘Cato-exanaenatsi pepacuene. Cajumaitsitsi altar-jawa pewënëta,’ jai-ata, apo-itsacuene. Bajarapajiwi pejumaitsicuenia apo-exanae-ata, itsiata aponaneconitsi Diosojawabelia», pajamë tsabiabi. «Pajiwi rajane pejumexaniataenexatsi itsanëjawabelia jumaitsi: ‘Cato-exanaenatsi pepacuene. Cajumaitsitsi altar-jumata pebuatsi-ofrenda pewënëta,’ jai, bajarajane xua abeje. Nexata, bajarapajiwi pepacuene exanae pejumaitsicuenia, penaneconitsiyaniwa Diosojawabelia», pajamë tsabiabinua jiwijawabelia.
19 Paxamë bepijiayo apopaneyapëtaewi, pane-amatabocotajaxae. Pajumetae-atamë, itsiata apopajumeyapëtaemë. Xaniawaetsia apopanetsiwajënaecanaëjëtsixae, bepane-itatsëcënawanapaewi Dioso peliwaisi yabara. Bajaraxuata, beyaiyatanetsi altar-jawa, bajarapajumata pebuatsi-ofrenda matatoxenetsia. Bajarapa-ofrenda-ata beyaiyatanetsi, tsipaji altar-jumata boca.
20 Nexata, pajiwi jumaitsi: «Cajumaitsitsi altar-jawa pewënëta», jai, caecuenia yajawawënëjona bajarapa-altar-jumata pebocae-ofrenda.
21 Pajiwi pijinia najumecapanepaeya jumaitsi pejumexaniataenexatsi: «Cajumaitsitsi templobo pewënëta», jai, caecuenia yajawawënëjona bajarapatemplobota peponaponaenë Dioso.
22 Pajiwi pijinia najumecapanepaeya jumaitsi pejumexaniataenexatsi: «Cajumaitsitsi athëbëtatsia panacua pewënëta», jai, caecuenia yajawawënëjona Dioso pijatrono. Caecuenia yajawawënëjonanua Dioso, ponë ecabiaba bajarapatronota, pitorobabiabinexa pijajiwi.
23 »¡Paxamë, judíowi panecujarubiwi, pafariseowimënua, jiwi saya paneyamaxë-itojorobiwi! ¡Ayaineconi cajena panatsixainame Diosojawabelia! Daxita xuanë pacatopitsapa pane-ubijawanë, pacuenia mentawiriabaxutoxi, anís-xutoxi, cominoxutoxi-ata, bajaraxuanë diez xuabejeyajuwënëjawa, caejawayo, parajutabiabame ofrendacuenia Diosojawabelia. Bajarapacuenia pajumecowënëtame panerajutabiabinexa ofrendajawanë Diosojawabelia. Caranata, juya apopajumecowënëtsimë mapanamatamotsiliwaisianëje: Aneconijibia panejinawanapaejawanexa Dioso pitabarata, pane-itaxutotsoniataeyabiabijawanexa itsamonae-ata, panesiwanajamatabëcuenecopabijawanexanua Diosojawabelia. Xaniajai, pacatoxanepana ofrendajawanë panerajutabiabijawa Diosojawabelia. Itsiata, apobepanacofënëtsimë panejumecowënëtabiabinexa bajarapapecatonajumecopatsiliwaisianë.
24 Paxamë saya apopaneyapëtaexae Dioso pejumeliwaisi, bepane-itaxutotsëcënaewi panaexaname panecujarubijawata. Pacuenejëpame saya pitaxutotsëcënaenë pematacaponaejawa itsa pitaxutotsëcënaejiwi. Nexata, paliwaisianë Dioso najumecopata panejumecowënëtsinexa, bewelia penamatamotsiliwaisixi, paca-asaëmë tsawanapae pane-exanabiabinexa. Juya, paliwaisianë picani Dioso bitso pacatojitsipa panejumecowënëtsijawa, panamuxujematabiabame, pane-exanaeyaniwa. Nexata, panecujarubiwi papecacuenejëpaexae, exanawanapa panecujarubicuenia. Bajaraxuata, bajarapamonae payajawananeconitame Diosojawabelia.
25 »¡Paxamë, judíowi panecujarubiwi, pafariseowimënua, jiwi saya paneyamaxë-itojorobiwi! ¡Ayaineconi cajena panatsixainame Diosojawabelia! Paxamë saya pasiwabëjamë tsabiabi naniapijicuene yabara, panasiwajamatabëcuenebëjamënejewa bëpënëapijicuene. Pacuenejëpame saya naniawelia pequiatsiwi taza, plato-ata. Itsiata, pexaniacuene patsita-exanabiabi-atamë jiwi pitabarata, biji caranata pajamatabëcuenewënëcame pibisiacuene. Nexata, pajitsipabiabame paneyacajërëbijawa itsajiwi pecobecowë. Panatojitsipabiabamenua ayaijawa panenaxainaeyabijawa panecobecowë, ëpaxamënexa.
26 Paxamë pafariseowimë, bepanejamatabëcuene-itaxutotsëcënaewi Dioso peliwaisi yabara. Pajiwi quiata pecaxaenë, taza, plato yajawa, piaxuirajibinexa, copiaya xaniawaetsia ënëquiata. Bajaraxuacujinae, xaniawaetsia quiata naniawelia. Bajarapijinia pacuenia, paxamë-ata copiaya Dioso pacajamatabëcuenequiatsi, pane-ajamatabëcuenexuirajibinexa. Nexata bajaraxuacujinae, pacacuenecaëjëpaena panetsita-exanaenexa ëpexaniacuene, pacuenia Dioso paca-itoroba.
27 »¡Paxamë, judíowi panecujarubiwi, pafariseowimënua, jiwi saya paneyamaxë-itojorobiwi! ¡Ayaineconi cajena panatsixainame Diosojawabelia! Jiwimëthë itsamonae caiquinae-ata pejumawereca peniojairata, pitabëtsinexa, itsiata bëpënëareca abeje, petëpaewimi petsabanaejawa, pesi yajawa-ata.
28 Bajarapijinia paxamë-ata Dioso patsitajamatabëcuene-itsimë. Itsamonae naniawelia pacatane, itajara patsitapexaniajamatabëcuenewimë. Itsiata baitsi jane, panejamatabë-ëthëtota bëpënëa pajamatabëcuenewënëcame paneyamaxë-itojorobijamatabëcuene, pibisiacuene pane-exanaejamatabëcuene-ata.
29 »¡Paxamë, judíowi panecujarubiwi, pafariseowimënua, jiwi saya paneyamaxë-itojorobiwi! ¡Ayaineconi cajena panatsixainame Diosojawabelia! Paxamë profetawi, pemëthëanëjumawereca bo pa-exanabiabame itabëtsiaya. Pamonaemi-ata bajayata tëpa, aneconijibia pejinawanapaewimi Dioso pitabarata, pemëthëanëjumawereca itabëtsiaya parubabiabame itsacuenejawaxi. Bajarapacuenia pa-exaname itsamonae papecataenexa bepane-asiwawi Dioso pijajiwi.
30 Nexata, jiwijawabelia pajumaitsimë tsabiabi mapacueniaje: «Wajasalinaiwimi bajayata pibisiacuene exana, itsa beyeyebiaba profetawi-ata. Paxanë bajarapamatacabi pajinawanapae-atanë tsipae, apopayawenonaenë tsipae bajarapamonaemi pebeyabiabijawa Diosojumepaebiwimi, profetawi», pajamë tsabiabi.
31 Bajarapacuenia panejumaitsixae, panawajunupaebame papemomoxicuenemë bajayata pamonaemi beyababiaba profetawi. Bajarapamonaemi papemomoxixaemë, pajamatabëcuenejëpame panijasalinaiwimi.
32 ¡Bajarapanejamatabëcuene-itsiwixae, paneweretsinexaf xua panijasalinaiwimi taxuxuaba, xanë-ata, Dioso tajumepaebinëxae, panebeyaxuare!
33 ¡Paxamë bitso pibisiacuene pane-exanaewi! Pacuenia jomo rëcëpeca itsa tane petajuenajetarucaejawa isoto, bajarapa-itsimë. Itsiata, apopapanepaemë tsane Dioso papecananeconitsia-exanaejawa apopewerewerecae-isotojawata, panijaneconi yabara.
34 Paxamë picani pacato-itorobianatsi Diosojumepaebiwimi, itsamonae profetawi, itsamonae bitso Dioso pijacuene peyapëtaeya-exanaewitsi, itsamonae-ata xanë taliwaisi papecatsipaebiwinexa. Itsiata baitsi jane, paxamë bajarapamonaeyajuwënëwi pabeyaxuabaponaename. Itsamonae cruzajawabelia pacobematabiabaponaename. Itsamonae pajumatitibabeponaename penaneconitsiwi panejumaconitabiabimacata, judíowi pijasinagogabonëjawa. Itsamonae pabarajinabiabianame itsa tomaranëjawabelia-ata, panebejiobia-exanaenexa.
35 Bajarapacuenia pane-exanaexae tsane pianeconijibiwijawabelia, ayaineconi pacatsijumajopaena panenaneconitsinexa Diosojawabelia. Panijasalinaiwimi beyejebapona aneconijibia pejinawanapaewi Dioso pitabarata, Abel-pijinëjawawerenacujinae Zacarías-pijinëjawaberena, Berequías-pijinë pexënatomi. Bajaraponë beyaxuabatsi templobopanabota, templobobeje, altar-jawabejetuatuajëta. Nexata, daxita pamonae bajayata panijasalinaiwimi beyaxuabapona, bajarapaneconimi yajawa paxamë pacatsijumajopaena.
36 Xaniajanë pacuenia pacatsipaebijitsiatsi. Bajarapaneconi pacatsijumajopaena paxamë, maparucaeje panejinawanapaewi, Dioso papecananeconitsia-exanaenexa —jai Jesús judíowi pecujarubiwijawabelia, fariseowijawabelianua.
Jesús najamatabëxainaeya nua Jerusalén tomarapijiwi yabara
37 Bajarapacuenia pejumaitsicujinae, Jesús najamatabëxainaeya penuejawata Jerusalén tomarapijiwi yabara, jumaitsi mapacueniaje:
—Pajerusalén-tomarapijiwimë, pabeyabiabame Diosojumepaebiwimi, profetawi. Ibotonëta patseconabiabamenua panebeyaxuababiabinexa Diosojumeliwaisi pecaponaewi paxamëjawaberena. Pacuenia wacara banacoxicaetuata pecorofetobëxëpanaberena, bajarapijinia pacuenia xanë-ata picani bitso jitsipabiabajë patacacaetuatsinexa, patacacapanepaenexa panijaneconiwecua. ¡Itsiata baitsi jane, paxamë apopajitsipaemë!
38 ¡Panejumetaema! Dioso rabaja panijatomarawecua pacacopata papeca-ewetabiabijawami. Pijatemplobota-ata apoponaponae tsane.
39 Xaniajanë pacuenia pacatsipaebijitsiatsi. Paxamë rabaja apopanetaemë tsane matawëjëa, mapatemplobotaje. Matapania itsa panejumexaniataename Mesías-nëcuenenë, icatsia panetaename. Itsa panesiwajamatabëjumaitsimënua tsane: «¡Dioso pejamatabëcueneta penajetarucaenë, ayaicuenia yawenonae!»,g itsa panesiwajamatabëjamë tsane xanë yabara, nexata jane baja, icatsia panetaename tapatsimatacabita —jai Jesús najamatabëxainaeya penuejawata Jerusalén tomarapijiwi yabara.