Jesús pijajiwi tajëwelia tsipaeba itsamatacabi itsanacuapijiwi templobo pebijianaejawanexa
24
Jesús itsa pitsaparena templobowecua, pijajiwi imoxoyorenatsi, pecanaëjëtsia-exanaenexatsi templobo pexaniabocuene yabara, pemuxuneneta pe-enaebonë-ata.
2 Bajarapabonë petaejawata, Jesús tajëwelia wajunupaeba itsamatacabi bajarapaboxanetonëmi pepenetsijawanexatsica. Jumaitsi mapacueniaje:
—Xaniajanë pacuenia pacatsipaebijitsiatsi. Daxita raja paboxanetonë pataneme, bajarapaboxanetonëmi itsamatacabi itsanacuapijiwi penetsianica irabetsica. Nexata, pa-ibotonë catsanaruba mapaboxanetonëtaje, itsa-iboto-ata pejumawereca apobocae tsane —jai Jesús tajëwelia pijajiwijawabelia.
Pacuenia itsijitsia Jerusalén tomarata, daxitanacuanëjawa-ata, mapanacua pecopiarucaewajënaeje, yabara peliwaisi
3 Jesús eca Olivobacabotsutojumata, itsajota olivonaenë apaxayo. Bajarajota, pijajiwi pija-epatojawata imoxoyorenatsi, peyanijobinexatsi. Jumaitsi Jesús-jawabelia:
—Patajatuxanenë, pajitsipajë patanetsipaebinexamë patayapëtaenexa, paepatota copiapatsijitsia xua wajunupaebame. ¿Detsa peneta pitsicuene pataenajë itsa icatsia patsijitsiamëtsica? ¿Detsa peneta pitsicuene pataenajë mapanacua-ata itsa werewerecaejitsiaje? —jai Jesús pijajiwi.
4 Nexata, Jesús jumaitsi pijajiwijawabelia:
—¡Xania, panayajiwitaename! ¡Pëtsa panacopatame itsajiwi-ata papecayamaxë-itojorobijawa!
5 Ayaibitsaëto tawënëta patsiana. Bexanë itajara tsane. Najumetsënëtsiaya jumaitsi tsane: «Xanë raja Mesíasnë», jai tsane. Nexata, bajarapamonae jiwi ayaibitsaëto yamaxë-itojorobiana.
6 Paxamë pawënëliwaisitaename wajabitsaë pexanaejawa imoxoyo nacuanëjawa, tajë nacuanëjawa-ata. ¡Itsiata, pëtsa pajunawame! Bajarapacuenia peneta copiapataponaena mapanacua pewerewerecaewajënaeya. Itsiata baitsi jane, abaxë bepijia apowerewerecae tsane.
7 Mapanacuaje pewerewerecaewajënaeya peneta copiaya itsawiriawi nabena itsawiriawijawabelia. Itsanacuanëpijiwi pijinia nabena itsanacuanëpijiwijawabelia. Ayaijaniboxaneto, witanecuene-ata najetarucaena itsanacuanëjawa. Ira najëabiana ayaicuenia itsanacuanëjawa.
8 Daxita bajarapacuene itsa pataename, abaxë saya petaxuxuabijawa tsane bajarapapiayaicuenejawanë —jai Jesús.
9 Icatsia, Jesús jumaitsi pijajiwijawabelia:
—Bajarapamatacabi pijinia paxamë pacacaponaena nacua-ewetsiwijawabelia, papecabejiobia-exanaenexa, papecabeyejebinexa-ata. Daxitanacuanëpijiwi paca-itoya tsabiabi tsane patajajiwixaemë.
10 Bajaraxuata, jiwi ayaibitsaëtonë nawecuacopabiana tanejumexaniataejawami. Namata-enetsia naitoya tsane. Nacanajetsiananua nacua-ewetsiwi pecobeyabelia.
11 Najetarubenaena ayaibitsaëtonë, itajara bepexaniajailiwaisi pepaebiwi, Dioso pewënëta. Bajarapamonae yamaxë-itojorobiana jiwi ayaibitsaëtoxanetonë petsipaebiliwaisita.
12 Jiwi ayaibitsaëtoxaneto tsaponae tsane pewajënaeyabelia pibisiacuene pexanawanapaejawa. Nexata baja, ayaibitsaëto namata-enetsia pena-asiwacuene werewerecaponaena.
13 Itsiata, pajiwi ajamatabëcuenesaë tsaponaponae tsane tane-itaxutuajamatejemajawa pebeyaxuabijawabeliatsi, bajarapajiwi capanepaenatsi Dioso pijanacuayabetsia.
14 Itsamonae daxita nacuanëjawa tsipaebanajetarubenaenaa pexanialiwaisi, jiwi peyapëtaenexa imoxoyo baja pewajënae Dioso, athëbëtatsia pe-ecaenë, pijajiwi peyanacua-ewetsijawanexa. Bajaraxuacujinae jane baja, mapanacua werewerecaenaje.
15-16 »Nexata, itsa pataename Dioso pijatemplobo-ënëjawata penucaejawa Dioso piataejitsibijawa, pacuenia profeta Daniel-pijinë, bajayata tajëwelia wajunupaeba pecopiapatsijawanexa, nexata parëcëpecaename. (Pajiwi lebiana mapaliwaisije, yapëtaena papiayaicueneb wajunupaeba Daniel-baxutota wajunupaeba.) ¡Nexata, paxamë itsa pataename bajarapapiayaicuene, bajarapamatacabi Judea nacuata pejinawanapaewi pëtsa nubena! Naxatsiayo rëcëpecaena petsutonëjawabelia.
17 Pajiwi pijabojumata athëbëyo ecaya, itsa wënëliwaisitaena bajarapaliwaisi, bajarapajiwi bepijia runaenica, penajetabijirawinexa. ¡Pëtsa joneya pijaboyalia, pejutsinexa pecobecowë!
18 Pajiwi pijinia nacuenebaponapona pijapabita, itsa wënëliwaisitaena bajarapaliwaisi, bepijia najetabijirawiana. ¡Pëtsa nawiata pijaboyabelia, pejutsinexa penaxatabijawa!
19 ¡Bitso bejiobi tsane bajarapamatacabi peyacotajinawanapaewaxi! ¡Papetiriawi-ata isajinawanapa mito-apaenacuetoxi, bitso nabejiobitsiaya jinawanapaena!
20 ¡Bajaraxuata, tajëwelia Diosojawabelia pawajëcare piayapëbejematacabita papecatocopiapatsiyaniwa bajarapapiayaicuene! Nexata, pamatacabi parëcëpecaename, Dioso pacatocopatsiana pexaniamatacabi, bitso nabejiobitsiaya paneponaeyaniwa. ¡Pawajëcarenua penacuera-ewetsimatacabita bajarapapiayaicuene papecatocopiapatsiyaniwa, papecato-ayapëbejeyaniwa!
21 Bajarapacuenia pawajëcaename, tsipaji raja bajarapamatacabi bitso jiwi bejiobi tsane. Pabejiobicuene abaxë jiwi caeto-ata apotae Dioso nacua pexanaecujinae, mapamatacabijawaberena-ataje, bajarapanabejiobitsicuene taena. Bajaraxuacujinae, pematatsënëa itsajiwi-ata apotae tsane caeto-ata bajarapitsibejiobia-exanaecuenetsi.
22 Dioso epatua itsa apoyatu-ucutsi tsipae bitso jiwi nabejiobitsiaya pejinawanapaematacabianëminexa, caejiwi-ata apo-asaë tsipae. Itsiata baitsi jane, Dioso piasiwaxae pijajiwi, pitapetsiwi, epatua yatu-ucutsiana bitso jiwi nabejiobitsiaya pejinawanapaeyaniwa —jai Jesús pijajiwijawabelia.
23 Icatsia, Jesús jumaitsi:
—Bajarapamatacabi, itsajiwi yamaxë-itojorobiaya itsa pacajumaitsi tsane: «¡Pataema, mara Mesías nucaje!», ¡itsa pacajai tsane, pëtsa pajumexaniataneme! ¡Itsa pacajumaitsinua tsane: «Bajarajota nuca Mesías», itsa pacajai tsane, pëtsa pajumexaniataneme!
24 Itsamonae pijinia naitajëbiana beMesías-wicuenia, itsamonae pijinia beDiosojumepaebiwi, profetawicuenia-ata. Bajarapamonae tsita-exanaponaena pinijicuenejawanë, peyamaxë-itojorobinexa jiwi. Cuene-ëjëbiana Dioso pijajiwi, pitapetsiwitsi, itsa cuenecaëjëpatsi peyamaxë-itojorobinexa.
25 Tajëwelia rabaja maje pacatsipaebatsije.
26 ¡Bajaraxuata, itsamonae itsa pacajumaitsi tsane: «Cristo raja ponapona petusatonacuatalia ¡Naxatsia, panataename!», itsa pacajai tsane, pëtsa paponaremelia! ¡Itsa pacajumaitsinua tsane: «Cristo raja ponapona mapa-ënëyatu-ucutsibotaje! ¡Naxatsia, panataema!», itsa pacajai tsane, pëtsa pajumexaniataneme!
27 Pacuenia yamaxë itsa niwejai tsajuni athëbëwetsica, caecuenia jiwi bacotiatane daxitajawa. Bajarapijinia peneta pacuenia, daxitanacuanëpijiwi caecuenia netaena pamatacabi patsianicajë Xanë, Daxitajiwi Pematapijinënë.
28 Pacuenia quequeremonae bepijia bayapëtane itsajota petuxutsaebinë boca, bajarapijinia pacuenia daxitanacuanëpijiwi yapëtaena tapatsijawatsica —jai Jesús pijajiwijawabelia tajëwelia penawajunupaebijawata icatsia pepatsijawanexatsica.
Jesús tajëwelia nawajunupaeba icatsia pepatsijawanexatsica mapanacuajawabetsicaje
29 Jesús jumaitsi pijajiwijawabelia mapacueniaje:
—Jiwi penabejiobitsicuene pepanepaecujinae, matacabipijijuameto aitaquiri tsane. Merawipijijuameto-ata aponaitayotsi tsane. Tulupu-ata othopaenica irabetsica. Daxitacuene, xua rubena athëbëtatsia, najëabiana. Xaniawaetsia aporubenae tsane.
30 Bajaraxuacujinae jane baja, daxita jiwi taena itaboxotatsia papinijicuenejawa naitajëtsiana Xanë, Daxitajiwi Pematapijinënë, tapatsijawanexatsica. Nexata itsa netaena athëbëwetsica itarërëbota tanajetarucaejawa, daxitawiriawi, mapanacuapijiwi, natsinuena pecajunawi pijaneconi yabara. Necujunawiana, tsipaji yajawapatsianicajë bitso tanamatacaitorobisaë, tajapeniweniwenaecotia-ata.
31 Bajaraxuacujinae, trompeta itsa najumetsiana ayaijumeta, itorobianajë taja-ángelewi, daxitanacuanëjawawerena xanëjawaberena tanetocaetuatsinexa tajajiwi, pamonae Dioso pitapetsiwitsi —jai Jesús pijajiwijawabelia.
32 Icatsia, Jesús jumaitsi:
—¡Xaniawaetsia paneyapëtaenexa tapatsimatacabinexa yabara, pacanaëjëre pacuenia itsi higueranae! Bajaraponae itsa maxëranajuwanajetaruca, pejanabaxu pepitsapaenexa, payapëtaneme baja wai imoxoyo pewajënae pecopiapatsinexa.
33 Bajarapijinia pacuenia, peneta itsa pataename pecopiapataponaejawa xua tajëwelia wajunupaebajë, nexata payapëtaename imoxoyo baja tawajënae tapatsijawanexatsica.
34 Xaniajanë pacuenia pacatsipaebijitsiatsi. Pamonae taena pecopiapataponaejawa tawajunupaebijawa, bajarapamonae apotëpae tsane daxita xuanë tajëwelia wajunupaebajë, copiarucaenejewa.
35 Itaboxo, ira yajawa, werewerecaena. Itsiata baitsi jane, tajumeliwaisi apowerewerecae tsane.
36 »Xua yabara pacatsipaebatsi, itsajiwi-ata apoyapëtae pamatacabita, paepatota-ata, copiapatsijitsia. Athëbëpiji-ángelewi-ata, apoyapëtae. Xanë, Dioso pexënato-atanë, apoyapëtaenë. Caenë taxa Dioso yapëtane.
37 Pacuenia bajayata Noépijinë peponaponaematacabita, jiwi jamatejema pibisiacuene exanawanapa, bajarapijinia pacuenia exanawanapaena pamatacabi Xanë, Daxitajiwi Pematapijinënë, patsianicajë.
38 Noépijinë peponaponaematacabi, ira pebubutsiwajënaeya, jiwi picani xaniawaetsia jamatejema pexaejawa xaewanapa. Apaewanapanua. Nacojiobapona itsamonae. Canajetaponanua pexënatowaxi pebijiwijawabelia, petonacojiobinexatsi. Bajarapacuenia jamatejema exanawanapa pamatacabijawa Noépijinë, pijamonae yajawa, barëjunua pinijibarcoxanetojawabelia.
39 Nexata, itsajiwi-ata yapëtaenejewa pamatacabi copiapatsijitsia, jemata ayai-emaxaneto jopa, ira pebubutsinexa. Matapania bajarapacuene petaejawata, yapëtane. Nexata, daxitajiwi bubuna. Bajarapijinia pacuenia, itsajiwi-ata yapëtaenejewa tapatsijawanexatsica, Xanë, Daxitajiwi Pematapijinënë, jemata patsianicajë.
40 Nexata, bajarapamatacabita anijanëbeje, pebibeje, penajuanacuenebanucaejawatabeje tsane pabita, itsanë ángelnë pitsianatsi.c Itsanë copatanutsianatsi.
41 Bajarapijinia itsi tsane petiriwabeje-ata. Caejawata penajuacaquiatanucaejawatabeje tsane, itsawa ángelnë pitsianatsi. Itsawa copatanutsianatsi.
42 Nexata, nejamatabëcuene-ewetsiaya panecopia-ewetawanapaename, tsipaji raja apopanewajënaeyapëtaemë tsane paepatota xanë, panijatuxanenënë, icatsia patsijitsianëtsica.
43 ¡Pacanaëjëre mapacueneje! Bo pexainaenë itsa yapëtaejitsipa paepatota merawi patsijitsia pijaboyaberena petonacobetoxotsinënexatsi, nexata naëcotsiaya wajënae-ewetsipa. Apocopatsi tsipae pijaboyaberena pejonejawa.
44 Bajarapijinia pacuenia, paxamë-ata najamatabëcuenexaniawaetsiaya panecopia-ewetawanapaename, tsipaji Xanë, Daxitajiwi Pematapijinënë, paepatota apopanejamatabënajinaemë tapatsijawanexatsica, jemata icatsia patsianicajë —jai Jesús pijajiwijawabelia tajëwelia penawajunupaebijawata itsamatacabi icatsia pepatsijawanexatsica.
Jesús tsipaeba pijajiwijawabelia pecuenecataeliwaisi petuxanenë, pijajiwitonëbeje peliwaisicuenia
45 Pepatsijawanexatsica pijajiwi xaniawaetsia pecopia-ewetawanapaenexatsi, Jesús tsipaeba mapapecuenecataeliwaisije:
—Petuxanenë, ponë pijajiwitonë, xaniawaetsia pecowëta canaëjëtsiaya nacuenebaponapona, bajaraponë itsajamatabëcuene xainaenejewa, copia-ewetaponaponaena pijatuxanenë pepatsijawabelianexa. Bajaraponë pacuenia pijatuxanenë itorobatsi, pijajiwi pecowëta to-ewetaponapona. Abataponaponanua pexaejawa caematacabi canacujitsia.
46 Bajaraponë bitso barëya tsane pamatacabi pijatuxanenë patsiana, xaniawaetsia pijajiwi peto-ewetaponaponaexae pecowëta.
47 Xaniajanë pacuenia pacatsipaebijitsiatsi. Ponë xaniawaetsia tonacuenebiana pijatuxanenë pecowëta, bajaraponë ewetsia-exanaenatsi daxita xua xaina pijatuxanenë.
48 Itsiata baitsi jane, ponë, pijajiwitonë piajamatabëcuenebejenë, nexata pijatuxanenë pecowëta itsa jamatabëjumaitsi tsipae: «Tajatuxanenë ajibi tsarucae tsane bajayajebi», jamatabëjai tsipae.
49 Nexata, bajaraponë taxuxuabijitsipa petoconibabeyabiabijawa pijatuxanenë pijajiwi. Ayaijawa wecuaxaeyabiabijitsipa. Na-apaeyabiabijitsipanua piaitajibiwita.
50 Nexata, itsajota apojamatabënajinae tsipae pijatuxanenë pepatsijawanexa, jemata patsipa.
51 Nexata, bajaraponë ayaicuenia naneconitsia-exanaejitsipatsi pijatuxanenë. Bajarapijinia pacuenia, Dioso ayaicuenia naneconitsia-exanaena jiwi peyamaxë-itojorobabiabiwi. Nexata, natsinuena. Nawonosiniananua, bitso penawixaetaexae —jai Jesús pijajiwijawabelia.