Pamona pewecuatëpaewatsi pa-ofrenda rajuta Diosojawabelia
21
Jesús abaxë templobota peponaponaejawata, cobetane bitso pexainaewi ayaijawa palata pejeponaejawa, pacajonijawabelia jiwi jeyabiaba Dioso pija-ofrendanexa.
2 Cobetanenua bepejiobiwa, pamona pewecuatëpaewatsi, penajejawa bajarapacajonijawabelia anijapalatanëyobeje, piamatamobinëyobeje.
3 Jesús nexata jumaitsi pijajiwijawabelia:
—Xaniajanë pacuenia pacatsipaebijitsiatsi. Mapowaje, pamona pewecuatëpaewatsi, bitso bepejiobiwa-ata, pa-ofrendayo jia cajonita ofrendacuenia perajutsinexa Diosojawabelia, Dioso bitso siwajamatabëcuenebarëya daxita xua itsamonae pejejawawecua,
4 tsipaji pamonae pexainaewi, xua aponamatawenonae jia bajarapacajonita, ofrendacuenia perajutsinexa Diosojawabelia. Itsiata baitsi jane, mapowaje, bepejiobiwa-ata, daxitajawayo pena-ewetsijawayotaminexa jia bajarapacajonita. Bajaraxuata, Dioso ayaicuenia siwajamatabëcuenebarëyatsi, pexainaewiwecua, ayaijawa pejewiwecua-ata —jai Jesús pijajiwijawabelia.
Jesús tajëwelia tsipaeba pijajiwijawabelia pacuenia itsijitsia Jerusalén tomarata, daxitanacuanëjawa-ata, mapanacuaje pecopiarucaewajënaeya
5 Itsa abaxë cobetaenubena ofrenda perajutaponaewi, Jesús pijajiwiyajuwënëwi nabarëcuaicuaijai tsaponae templobo pitabëtetsijawa yabara. Tsitapexaniatemplobotsi, tsipaji exaneta pexaniawiria ibotonëta, itsamonae pijinia ofrendacuenia perubixae pitabëtsijawanë, Diosojawabelia perajutsijawanë. Pejumetaejawata pexaniacuenia templobo peyabaracuaicuaijaijawa, Jesús tajëwelia wajunupaeba pacuenia itsamatacabi itsanacuapijiwi xuabijitsiatsica bajarapatemplobo, pebijianaenexa. Jumaitsi mapacueniaje:
6 —Itsamatacabi, itsanacuapijiwi xuabianica mapatemplobomije. Nexata, daxita xua pataneme, pitabëcuene yajawa, penetsianica. Bajarapabopiji-ibotonë, cae-iboto-ata, pejumawereca apobocae tsane —jai Jesús pijajiwijawabelia.
7 Jesús pijajiwi jumaitsi:
—Patajatuxanenë, pajitsipajë patanetsipaebijawamë, patayapëtaenexa paepatota copiapatsijitsia xua wajunupaebame. ¿Detsa pitsicuene peneta pataenajë, itsa copiapatsijitsia xua jumaitsimë templobo yabara? —jai.
8 Jesús nexata jumaitsi mapacueniaje:
—¡Xania baja! ¡Panayajiwitaema papecayamuxu-itojorobiyaniwa! ¡Pëtsa panacopatame itsajiwi-ata papecayamaxë-itojorobiyaniwa, tsipaji raja ayaibitsaëto tawënëta najetarubenaena, jiwi peyamaxë-itojorobinexa! Najumetsënëtsiaya jumaitsi tsaponae tsane: «Xanë raja Cristonë, athëbëwetsica Dioso tane-itorobinëtsica, jiwi tacapanepaenexa. Imoxoyo rabaja pewajënae nacua pewerewerecaenexa», jai tsaponae tsane. ¡Itsiata, pëtsa pajumexaniataneme, bajarapamonae pepaebiliwaisi!
9 ¡Nexata, pawënëliwaisitae-atamë tsane wajabitsaë pexanaejawa imoxoyonacuanëjawa, tajënacuanëjawa-ata, pëtsa pajunawame! Bajarapacuenia peneta copiaya copiapatsiana mapanacuaje pewerewerecaewajënaeya. Itsiata baitsi jane, bepijia mapanacuaje abaxë apowerewerecajuni tsane —jai Jesús pijajiwijawabelia.
10 Icatsia, Jesús jumaitsi:
—Mapanacuaje pewerewerecaewajënaeya, peneta copiaya itsawiriawi nabena itsawiriawijawabelia. Itsanacuanëpijiwi pijinia nabena itsanacuanëpijiwijawabelia.
11 Ayaicuenia daxita nacuanëjawa ira najëabiana. Yajawanajetarucaena ayaijaniboxaneto, daxitawiria witanecuene-ata. Taena piayaicuenejawanë. Naitajëbiana itaboxotatsia-ata pinijicuene pexanaejawanë.
12 »Itsiata, bajarapacuene pecopiajopaewajënaeya, tane-itoyawi pacataicaena patajajiwixaemë. Pacabejiobia-exanaena. Pacacaponaena judíowi penacaetuatabiabibonëjawabelia, papecaneconitsinexa. Pacajebiananua penaneconitsiwi pejebabiabibota. Patajajiwixaemë, pacanubiana pepopeyanacua-ewetsiwi, gobernadorwi pitabarata-ata.
13 Bajarapacuenia papeca-exanaejawata, pacatoxanepanaena juya pataneliwaisipaebinexamë.
14 ¡Pëtsa tajëwelia panatsiwajënaecanajëtame pacuenia panayajiwicuaicuaijamëjitsia bajarapamonaejawabelia!
15 Bajarapaepatota, xanë pacacuaicuaijaiya-exanaenatsi panenayapijiwicuaicuaijainexa bitso peyapëtaewicuenia. Nexata, caenë-ata panijawajabitsaënë apocuenecaëjëpaetsi tsane papecajumecanawiatsinexa, panejumaitsijawa yabara.
16 Bajarapamatacabi, pane-axa, pane-ena, panematapijiwi, panejuyapijiwi, panijamonaejiwi, papecayapëtaejiwi-ata, pacacanajetsiana nacua-ewetsiwi pecobeyabelia, papecabeyejebinexa patajajiwixaemë. Paxamëyajuwënëwi-ata patajajiwixaemë pacabeyajebiana.
17 Daxitajiwi paca-itoya tsabiabi tsane patajajiwixaemë.
18 Itsiata baitsi jane, bajarapamonae papecabeyaxuabi-ata tsane, apocuenecaëjëpaetsi tsane papecajamatabëcuenebeyaxuabinexa Diosowecua.
19 Itsa pajamatabëcuenesaëmë tsawanapae tsane, nexata matacabi apopewerewerecaejawa paxainaename —jai Jesús pijajiwijawabelia tajëwelia pewajunupaebijawata pacuenia itsamatacabi itsijitsia mapanacuataje.
20 Icatsia, Jesús jumaitsi pijajiwijawabelia Jerusalén tomara yabara:
—Itsa pataename wajabitsaë, itsanacuawerena pepatsiwi, Jerusalén tomaramatatoyorotsia peyacaranatsijawatsi, payapëtaename imoxoyo baja pewajënae Jerusalén tomara pewerewerecaejawanexa.
21 ¡Nexata, bajarapamatacabi Judea nacuata pejinawanapaewi, itsa taena bajarapacuene, rëcëpecae ibotsutonëjawabelia! ¡Jerusalén tomarapijiwi-ata rëcëpecae pijatomarawecua! Pamonae pijinia, Jerusalén tomarapënëyabelia itsa jinawanapa, apobenawiabi pijaboyabelia. ¡Caecuenia rëcëpecae!
22 Bajarapacuenia be-exana, tsipaji, bajarapamatacabi Dioso jane baja, naneconitsia-exanaena pijaneconi pexainaewi, pacuenia baja cajena pepobajayatami tajëwelia wajunupaeba Dioso pejumeliwaisibaxutota.
23 Bajarapawajabitsaëmatacabi, bitso ayaicuenia bejiobi tsane mapanacuapijiwije. ¡Peyacotajinawanapaewaxi, powaxinua isajinawanapa mito-apaenacuetoxi, bitso bejiobi tsane, tsipaji to-ayapëbejetsi tsane perëcëpecaejawa! Daxita mapanacuapijiwije bitso bejiobi tsane, tsipaji pinijicuenia Dioso naneconitsia-exanaenatsi.
24 Nexata, itsabitsaëtomi, Jerusalén tomarapijiwi, pijawajabitsaë beyejebianatsi. Itsabitsaëtomi pijinia, taicaenatsi pecaponaenexatsi daxitanacuanëjawabelia. Bajaraxuacujinae, apojudíowi bejiobia-exanawanapaena Jerusalén tomarata pejinawanapaewi. Bajarapacuenia exanaena pamatacabijawabelia Dioso tocopatsiana apojudíowi pewetsijawanexa Jerusalén tomara —jai Jesús pijajiwijawabelia tajëwelia pewajunupaebijawata papiayaicuene itsamatacabi copiapatsijitsia Jerusalén tomarata.
Jesús tajëwelia nawajunupaeba icatsia pepatsijawanexatsica
25 Orijibia, Jesús tajëwelia wajunupaeba pacuenia itsijitsia, pepatsiwajënaeyatsica. Jumaitsi pijajiwijawabelia mapacueniaje:
—Xanë tapatsiwajënaetsica, pitothiacuenejawanë naitajëbiana matacabipijijuametojawata, merawipijijuametojawata, tulupujawata-ata. Manuamene pijimalataca bitso penajumetsijawata, daxita nacuanëpijiwi bitso najunawiacaena. Jamatabëcuenebëjainua tsane.a
26 Daxitanacuanëjawa bitso jiwi ajamatabëcuenesaëjibi tsane, petaejawata bajarapapiayaicuenejawanë petocopiapatsijawatatsi. Daxita najëbiananua athëbëtatsia perubenaejawanë, xuanëjawabelia jiwi siwanajamatabëcuenecopaba peyawenonaenexatsi. Xaniawaetsia aporubenae tsane. Nexata, jiwi tëpajoneyabiabiana bitso pecajunawi.
27 Bajarapaepatota jane baja, jiwi netaena, Daxitajiwi Pematapijinënë, athëbëwetsica itarërëbota tanajetarucaejawa, pinijisaë, tajapeniweniwenaecotia yajawa, daxitacuene ta-ewetsinexa.
28 Itsa pataename pecopiajopaejawa bajarapacuene, nexata panajamatabëcuenesaëtsianame, tsipaji rabaja imoxoyo pewajënae tsane Dioso papecacapanepaejawanexa jiwi papecabejiobia-exanabiabijawamiwecua —jai Jesús.
29 Icatsia, Jesús pijajawabelia tsipaeba pecuenecataeliwaisicuenia pepatsimatacabijawanexatsica yabara. Jumaitsi mapacueniaje:
—¡Pacanaëjëre pacuenia itsi higueranae, itsawirianaenë-ata!
30 Pacujinae bajaraponaenë pejanabaxu juwa, payapëtaneme imoxoyo baja pewajënae tsaponae wai pecopiapatsijawanexa.
31 Bajarapijinia pacuenia, peneta itsi tsane, itsa pataeponaename pecopiapatsijawa xuanë yabara pacatsipaebatsi. Nexata, payapëtaename imoxoyo baja pewajënae pecopiapatsijawanexa pamatacabi daxita Dioso pijajiwi ewetsijitsia mapanacuataje.
32 »Xaniajanë pacuenia pacatsipaebijitsiatsi. Pamonae asaë tsawanapae pamatacabi copiapatsianab patacawajunupaebijawanë, bajarapamonae apotëpae tsane copiapatsinejewa daxita xuanë tajëwelia wajunupaebajë pecopiapatsijawanexa.
33 Itaboxo, ira yajawa, werewerecaena. Itsiata baitsi jane, tajumeliwaisi apowerewerecae tsane.
34 »Bajaraxuata, nayajiwitaeya pajinawanapaename. ¡Pëtsa panajamatabëxainame pibisiacuene pane-exanaenexa, pane-aitajibinexa, panesiwajamatabëcuenebëjaiyaniwa ma-ëpanacuapijijamatabëcuene yabaraje! Belia, bajarapacuenia pane-exanawanapaejawata, jemata copiapatsipa tapatsimatacabinexatsica.
35 Baitsi, pacuenia dujuai jemata jopa mallata, aponatsiwajënae canaëjëtsinejewa, bajarapijinia pacuenia apopatanecopia-ewetsijawatamë jemata daxitanacuanëjawa copiapatsiana, xanë tapatsimatacabinexatsica.
36 Bajaraxuata, nayajiwitaeya pajinawanapaename. Caematacabi canacujitsia, panayajiwi wajëcabiabianame Diosojawabelia papeca-ajamatabëcuenesaëya-exanaenexa, panewecuapanepaponaenexanua daxita papiayaicuenejawanë pacatocopiapataponaena tapatsiwajënaeyatsica. Nexata pamatacabi, Xanë, Daxitajiwi Pematapijinënë, patsianicajë, pacacuenecaëjëpaena panenubenaejawa pa-auranejewamë taitabarata —jai Jesús pijajiwijawabelia tajëwelia pewajunupaebijawata pacuenia itsamatacabi itsijitsia mapanacuataje.
37 Caematacabi canacujitsia, Jesús liwaisi tsipaebabiaba templobota. Nexata, icatsia caemerawi canacujitsia, Jesús tomarawecua pitsapabiaba, pemajitabiabinexa Olivobacabowënëtsutojumabelia.
38 Caebajayacunua canacujitsia jiwi patabiaba templobota, penamuxuna-ewetabiabinexatsi Jesús petsipaebiliwaisi.