Jesús tajëwelia wajunupaeba xuanë copiapatsijitsia, pamatacabi itsa baja imoxoyo pewajënae nacua pecopiarucaejawanexa
13
Itsa baja Jesús, pijajiwi yajawa, pitsaparena templobowecua, pijajiwiyajuwënënë jumaitsi Jesús-jawabelia:
—¡Tajatuxanenë, jica, nataema mapaboxanetonëje, pa-ibotoxanetonëta catsananuba bajarapabonë! —jai.
2 Nexata, Jesús tajëwelia jumaitsi pijajiwitonëjawabelia:
—Daxita raja mapaboxanetonë tanemeje, itsamatacabi, itsanacuapijiwi penetsianica irabetsica. Bajarapabonëmi pecatsanae-ibotoxanetonëmi, cae-iboto-ata apobocae tsanea itsa-ibotojumawereca —jai Jesús tajëwelia pijajiwitonëjawabelia.
3 Bajaraxuacujinae, Jesús, pijajiwi yajawa, pona Olivobacabotsutojawabelia. Nexata, petsutojumata pe-enaejawata, taeyena templobo canacujitsijawalia. Nexata, Pedro, Santiago, Juan, Andrés-bana, pija-epatojawata yanijoba Jesús-jawabelia. Jumaitsi:
4 —Patajatuxanenë, pajitsipajë patanetsipaebijawamë patayapëtaenexa paepatota copiapatsijitsia xua wajunupaebame. ¿Detsa peneta pitsicuene pataenajë xua jumaitsimë pecopiapatsijawanexa templobo yabara? —jai bajarapamonae.
5-6 Jesús nexata tajëwelia wajunupaeba pacuenia copiapatsijitsia mapanacuataje. Jumaitsi mapacueniaje:
—¡Xania baja! ¡Panayajiwitaema! ¡Pëtsa panacopatame itsajiwi-ata papecayamaxë-itojorobinexa, tsipaji raja peyamaxë-itojorobiwinexa ayaibitsaëto pataponaena bexanë itajara tsane! Najumetsënëtsiaya jumaitsi tsane: «Xanë raja Cristonë, Dioso athëbëwetsica tane-itorobinëtsica, pijajiwi tayanacua-ewetsinexa», jai tsane. Bajarapacuenia jiwi, ayaibitsaëto yamaxë-itojorobiana.
7 »¡Pawënëliwaisitae-atamë tsane wajabitsaë pexanaejawa imoxoyonacuanëjawa, tajënacuanëjawa-ata, itsiata, pëtsa pajunawame! Bajarapeneta itsi tsane mapanacua pewerewerecaewajënaeje. Itsiata baitsi jane, mapanacuaje bepijia abaxë apowerewerecajuni tsane.
8 Mapanacuaje pewerewerecaewajënae peneta copiaya itsawiriawi nabena itsawiriawijawabelia. Itsanacuanëpijiwi pijinia nabena itsanacuanëpijiwijawabelia. Ira ayaicuenia najëabiana nacuanëjawa. Ayaijaniboxaneto najetarucaena nacuanëjawa. Daxita bajarapacuene itsa pataename, saya abaxë taxuxuabaponaena piayaicuenejawanë. Pacuenia petiriwa, a̱jena̱ itsa wixaenotatsi, apotaetsi penacueto, bajarapijinia itsi tsane panetaeponaejawata xuanë copiapataponaena. Abaxë itsiata, mapanacuaje apocopiarucae tsane.
9 »¡Nexata, paxamë xania panayajiwitaename, tsipaji raja xanë patajajiwixaemë, tomara pewetsiwijawabelia pacacaponabiabiana! Pacajumaconibabeyabiabiana judíowi pijasinagogabonëjawa.b Pacanubiananua nacua-ewetsiwi, presidentewi-ata, pitabarata. Bajarapacuenia paca-exanae-ata tsane, pacacuenecaëjëpaena panetsipaebinexa xanë taliwaisi.
10 Pecopiapatsiwajënaeya mapanacua pewerewerecaejawa, pacatsicarubena taliwaisi panetsipaebanajetarubenaenexa daxitanacuanëpijiwijawa, jiwi pecapanepaeliwaisinexatsi.
11 Bajarapacuenia pane-exanawanapaejawata, itsamonae pacataicaena papecaneconitsinexa nacua-ewetsiwijawabelia. ¡Pëtsa pajamatabëcuenebëjamë panenayajiwicuaicuaijainexa bajarapanacua-ewetsiwijawabelia! Bajarapaepatota Espíritu Santo pacacuaicuaijaiya-exanaena paliwaisi pajumaitsimëjitsia bajarapamonaejawabelia. Paxamë raja, panejamatabëcueneta apopacuaicuaijamë tsane.
12 Bajarapamatacabi patajajiwixaemë, panacaemonae-atamë, itsajiwi panijamonaejiwi-ata pacacanajetsiana nacua-ewetsiwijawabelia papecabeyaxuabinexa. Pane-axa, pane-ena, panexi-ata, pacacanajetsiana nacua-ewetsiwijawabelia papecabeyaxuabinexa.
13 Daxitajiwi paca-itoya tsabiabi tsane, patajajiwixaemë. Pajiwi itsiata ajamatabëcuenesaë tsane Diosojawabelia pitaxutuajamatejemajawa nacua pecopiarucaejawabelianexa, bajarapajiwi Dioso capanepaenatsi —jai Jesús pijajiwijawabelia.
14 Icatsia, Jesús tajëwelia wajunupaeba papiayaicuene itsamatacabi copiapatsijitsia Jerusalén tomarata. Jumaitsi mapacueniaje:
—Profeta Daniel-pijinë tajëwelia wajunupaeba papibisiacuenejawac nucaejitsia templobota, panijatomara pewerewerecaewajënaeya. Paxamë itsa pataename bajarapapibisiacuenejawa penucaejawa templobota, pataxunaeta picani apobenucae, nexata caecuenia parëcëpecaename. (Pajiwi lebiana mapaliwaisije, yapëtaena papibisiacuenejawa wajunupaeba mapaliwaisitaje.) ¡Bajaraxuata, Judea nacuata pejinawanapaewi-ata, itsa wënëliwaisitaena, pëtsa nubena! Bepijiayo rëcëpecaena ibotsutonëjawabelia.
15 ¡Pajiwi pijabojumata athëbëyo ecaya, pëtsa runaica pijabojawabelia, pejonenexa pecobecowë pejutsinexa!
16 ¡Pajiwi pijinia nacuenebaponapona pijapabita, pëtsa nawiata pijaboyabelia, pejutsinexa penaxatatsijawa!
17 Bajarapamatacabi, bitso bejiobi tsane peyacotajinawanapaewaxi, papetiriawi-ata mito-apaenacuetoxi isajinawanapa, tsipaji to-ayapëbejetsi tsane bepijiayo penajetabijirawijawa.
18 ¡Bajaraxuata, tajëwelia Diosojawabelia pawajëcare emarapaematacabita papecatocopiapatsiyaniwa bajarapapiayaicuene,
19 tsipaji raja bajarapapiayaimatacabita bitso jiwi bejiobi tsane! Pabejiobicuene abaxë jiwi caeto-ata apotae Dioso nacua pexanaecujinae, mapamatacabijawaberena-ataje. Bajaraxuacujinae, pematatsënëa apotae tsane bajarapitsijunawicuene.
20 Dioso epatua itsa apoyatu-ucutsi tsipae, bitso jiwi nabejiobitsiaya pejinawanapaematacabianëminexa, caejiwi-ata apo-asaë tsipae. Itsiata baitsi jane, Dioso piasiwaxae pijajiwi, pitapetsiwi, epatua wecuayatu-ucutsiana bajarapamatacabi.
21 »Nexata, itsajiwi yamaxë-itojorobiaya itsa pacajumaitsi tsane: «¡Pataema! Mara Cristo nucaje» itsa jume, «Bajarajota nuca Cristo», ¡itsa pacajai tsane, pëtsa pajumexaniataneme!
22 Bajarapamatacabi, itsamonae naitajëtsiana, apopexaniajaiwi, Cristo pewënëta, Diosojumepaebiwi pewënëta-ata. Itsiata, jemajai tsane. Bajarapamonae itajara tsita-exanaena pinijicuene pexanaejawanë, jiwi saya peyamaxë-itojorobinexa. Belia, paxamë-ata Dioso papijajiwimë, papeca-itapetsiwitsi, jaitsipa papecayamaxë-itojorobinexa.
23 ¡Xania baja tsane! Xanë rabaja pacatsipaebatsi tajëwelia daxitacuene panenayajiwitaenexa —jai Jesús pijajiwijawabelia tajëwelia pewajunupaebijawata pacuenia itsamatacabi mapanacuataje copiapatsijitsia.
Jesús tajëwelia nawajunupaeba icatsia pepatsijawanexatsica
24 Jesús tajëwelia nawajunupaeba pijajiwijawabelia itsamatacabi icatsia pepatsijawanexatsica yabara. Jumaitsi mapacueniaje:
—Jiwi nabejiobitsiaya pejinawanapaematacabianë pepanepaecujinae, jiwi taena athëbëtatsia pecujunawicuene. Matacabipijijuameto, merawipijijuameto-ata aitaquiri tsane.
25 Tulupu-ata othopaenica irabetsica. Daxitacuene, xua rubena athëbëtatsia, najëabiana. Xaniawaetsia aporubenae tsane.
26 Nexata bajarapaepatota, Xanë, Daxitajiwi Pematapijinënë, jiwi netaena athëbëwetsica itarërëbota tanajetarucaejawa, daxitacuene ta-ewetsinexa. Taniweniwenaecotia yajawapatsianicajë.
27 Bajaraxuacujinae, ángelewi itorobianajë, tanetocaetuatsinexa daxitanacuanëpijiwi xanëjawaberena, pamonae tajajiwi, Dioso pitapetsiwitsi.
28 »¡Pacanaëjëre pacuenia itsi higueranae! Pacujinae pemaxëranajawa pejanabaxu pitsapa, payapëtaneme wai baja imoxoyo pewajënae pejonejawanexa.
29 Bajarapijinia pacuenia, peneta itsa pataename pecopiapatsijawa, xua yabara pacatsipaebatsi, nexata payapëtaename imoxoyo baja tawajënae tsane tapatsijawanexatsica.
30 Xaniajanë pacuenia pacatsipaebijitsiatsi. Pamonae taena pecopiapataponaejawa patacawajunupaebijawa, bajarapamonae apotëpae tsane copiarucaenejewa daxita xuanë tajëwelia wajunupaebajë pecopiapatsijawanexa.
31 Itaboxo, ira yajawa, werewerecaena. Itsiata baitsi jane, tajumeliwaisi apowerewerecae tsane.
32 »Itsajiwi-ata apoyapëtae pamatacabita, paepatota-ata, copiapatsijitsia daxita xua yabara tajëwelia pacatsipaebatsi. Athëbëpijiwi-ata, ángelewi, apoyapëtae. Xanë, Dioso pexënato-atanë, apoyapëtaenë. Caenë taxa Dioso yapëtane.
33 ¡Nexata, xania baja tsane! Daxitamatacabi saya panecopia-ewetawanapaename, tsipaji raja apopayapëtaemë tsane paepatota patsijitsianëtsica.
34 Pacuenia bo pexainaenë, tajënacuayabelia peponaewajënaeya, pijabo ewetsia-exana pijajiwi, bajaraxanë-ata itsinë tsane. Bajaraponë pijajiwi, caejiwi canacujitsia, rajutapona petocanacuenebawanapaejawanexatsi pecowëta. Nexata, pijajiwiyajuwënënë itoroba baupa peto-ewetabiabinexatsi, pamatacabi pata petobaupatsinexatsi.
35 Nexata, paxamë-ata bajarapacuenia panecopia-ewetawanapaename matapania tapatsimatacabitsicajawabelianexa, tsipaji raja apopayapëtaemë tsane pamatacabita patsijitsianëtsica. A̱jena̱ meta merawijitsia, patsipajë. Itsa jume meta, patsipajë merawituatuajëta. Belia meta, patsipajë matacabiwëpata. Itsa jume meta, bajayacunua patsipajë.
36 ¡Nexata baja, xania tsane! Daxitamatacabi saya panecopia-ewetawanapaename. Belia raja patsipajë paepatota apopanecopia-ewetsimë, jemata patacacaxitajarabiyaniwa panejamatabëcuenemajitsijawata.
37 Paliwaisi pacatsipaebatsi paxamëjawabelia, daxitajiwinexa jumaitsinë. ¡Daxitamatacabijebi jamatabëcuene-aitawaya panecopia-ewetawanapare! —jai Jesús pijajiwijawabelia.