Jesús tsipaeba pijajiwijawabelia pecuenecataeliwaisi, diez papejanawabeje pijalámparabëxi pecaponaewaxi peliwaisicuenia
25
Jesús pepatsijawanexatsica pijajiwi jamatabëcuene-aitawaya pecopia-ewetawanapaenexatsi, jumaitsi pijajiwijawabelia mapacueniaje:
—Dioso, athëbëtatsia pe-ecaenë, pijajiwi peyanacua-ewetsimatacabinexa, cuenejëpa diez papejanawayobeje pecopiapitsijawa pejananacojiobinë, pijawa yajawa. Nexata, daxita bajarapapejanawaxi, caewa canacujitsia, capona picani pijalámparabëxi, penatsiwajënae-itayotsinexa penamata-enenaejawata bajarapajiwibeje penajetarucaejawata, pebi pijaboyaberena, itsajota barë-exanaejitsia penacojiobifiesta.
2 Bajarapowaxiyajuwënëwi, cinco powabeje, xaniawaetsia liwaisi pecanaëjëtsiwaxi. Itsacinco powabeje bijiaya pecanaëjëtsiwaxi.
3 Nexata, apopecanaëjëtsiwaxi, yapëtae-ata picani petsicaponaejawanexa aceiteranë pijalámparabëxinexa, itsiata, apotsicaponae. Nexata, pijalámparabëxi aceitera itsa towerewerecatsi, apoxainae pe-epatsinexa icatsia pijalámparabëxijawabelia.
4 Cinco pijinia powabeje, xaniawaetsia liwaisi pecanaëjëtsiwaxi, aceiteranë tsicapona pijalámparabëxinexa.
5 Nexata, bajarapadiez powabeje merawi itayotena pijalámparabëxita. Bajayajebi picani wajënae-ewetena pejananacojiobinë pepatsijawa. Nexata, bajaraponë pecuenenajematsixae, belia pijalámparabëxita pa-aceiteranë capona, towerewerecaponatsi baja. Nexata, daxita bajarapapetiriawi belia baja itamajitsipana. Nexata, majita.
6 Bajaraxuacujinae, ayaimerawituatuajëta, jumetane pewawajaijawa. «¡Najetaruca rajane baja pejananacojiobinë! ¡Papitsaparemena jane baja, panecopiapitsinexa!», pejaijawa jumetane.
7 Nexata, daxita bajarapapetiriawi nonobapuna, pecopiapitsinexa jane baja. Papetiriawi aceiteranë tsicapona, epaca pijalámparabëxijawabelia. Xaneba petajue-upijawanë pequiobimaëjawa. Jutsinanua ayaicotia pexanaenexa.
8 Nexata, papetiriawi apotsicaponae aceiteranë, jumaitsi aceiteranë pexainaewijawabelia: «¡Panenarajure tsiquiri-aceiteraxi, tsipaji patajalámparabëxi paneto-itacaënapona!», jai bajarapamonae.
9 Itsiata, aceiteranë pexainaewi jumaitsi: «Jume. Apocaëjëpae. Paxanë-ata meta apopanetocaëjëpae tsipae. ¡Paponaremelia, panenacomuacaenexa itsajotalia canajetabiaba aceiteranë!», jai.
10 Nexata, papetiriawi aceiteranë apotsicaponae pijalámparabëxinexa, itacarajeta ponalia aceiteranë pecomuacaenexa. Pecowëta pejananacojiobinë patanajetaruca. Nexata papetiriawi aceiteranë tsicapona pijalámparabëxinexa, napona baja penacojiobifiesta pexanaebojawabelia. Pejonecujinaelia daxita jiwi baupaxatata bajarapabo.
11 Bajaraxuacujinae, aceiteranë pijalámparabëxi petsicomuacaewaxi pata. Jumaitsi pejananacojiobinëjawabelia: «¡Panetobaupare! ¡Panetobaupare!» jai tsanubenae bojumapënëwelia.
12 Nexata, pejananacojiobinë bo-ënëwerena jumaitsi: «Xaniajanë pacuenia pacatsipaebijitsiatsi. Apopacayapëtaetsi cajena paxamë», jai bajarapapetiriawijawabelia.
13 ¡Paxamë, patajajiwimë, jamatabëcuene-aitawaya panecopia-ewetawanapare, bajarapacuenia papecatocopiapatsiyaniwa, tsipaji caejiwi-ata apoyapëtae tsane pamatacabita, paepatota-ata, Xanë, Daxitajiwi Pematapijinënë, patsianicajë! —jai Jesús pijajiwijawabelia.
Jesús tsipaeba pijajiwijawabelia pecuenecaetaeliwaisi, pijapalata pewetsia-exanaenë peliwaisicuenia
14 Pijajiwi xaniawaetsia petonacuenebawanapaenexatsi xua tocopatatsi peto-ewetsinexatsi, Jesús jumaitsi pijajiwijawabelia mapacueniaje:
—Dioso, athëbëtatsia pe-ecaenë, pijajiwi peyanacua-ewetsijawa cuenejëpa petuxanenë pijajiwi petsicopatsijawa palata, bajarapamonae petocanacuenebinexatsi pecowëta.
15 Bajarapamonae ewetsia-exanapona petocanacuenebinexatsi pecowëta, pacuenia caenë canacujitsia cuenecaëjëpatsi. Nexata, copiayapijinë ewetsia-exana cinco mil ponëbeje palatanëanë, bitso penamatamotsiwi. Xuacujinae itsanë ewetsia-exana dos mil ponëbeje. Xuacujinae itsanë pijinia ewetsia-exana mil ponëbeje. Bajaraxuacujinae, petuxanenë pona tajënacuayabelia.
16 Nexata jane baja, ponë ewetsia-exana cinco mil ponëbeje, canacueneba jane baja pecowëta bajarapapalata. Nexata, pematatsënëa topitsapatsi icatsia itsacinco mil ponëbeje. Nexata baja, daxitata toxaina diez mil ponëbeje.
17 Bajarapijinia pacuenia, itsanë canacueneba dos mil ponëbeje. Nexata, pematatsënëa topitsapatsi icatsia itsados mil ponëbeje.
18 Itsiata baitsi jane, ponë to-eweta mil ponëbeje, pijatuxanenë pijapalata pona pematayatsinexa. Irata saya mëthëteta.
19 »Ayaibexëacujinae, nawiatanajetaruca jane baja petuxanenë. Junata pijajiwi peyapëtaenexa pacuenia to-ewetatsi pecowëta pijapalata.
20 Copiaya pata ponë cinco mil ponëbeje ewetsia-exanatsi. Jumaitsi bajaraponë pijatuxanenëjawabelia: «Ne-ewetsia-exaname cinco mil ponëbeje tacato-ewetsinexa. Bajarapapalatata tacanacuenebijawata tsimatapitajë itsacinco mil ponëbeje. Bajarama nijapalataje. Catocanawiatatsi diez mil ponëbeje», jai pijatuxanenëjawabelia.
21 Nexata petuxanenë jumaitsi: «Xanepana rabaja. Xaniawaetsia neto-ewetaponaponame, itsajamatabëcuene xainaenejewamë. Xaniawaetsia taneto-ewetsixaemë, tsiquirijawayo-ata, nexata aeconoxae ca-ewetsia-exanaenatsi pematatsënëa ayaijawa. ¡Naxatsia! Najuabarëyatsi tsane», jai pijajiwitonëjawabelia.
22 »Bajaraxuacujinae, pata ponë dos mil ponëbeje ewetsia-exanatsi. Nexata, bajaraponë jumaitsi pijatuxanenëjawabelia: «Ne-ewetsia-exaname dos mil ponëbeje tacato-ewetsinexa. Bajarapapalatata tacanacuenebijawata tsimatapitajë itsados mil ponëbeje. Bajarama nijapalataje. Catocanawiatatsi cuatro mil ponëbeje», jai bajaraponë pijatuxanenëjawabelia.
23 Nexata petuxanenë jumaitsi: «Xanepana rabaja. Xaniawaetsia neto-ewetaponaponame, itsajamatabëcuene xainaenejewamë. Xaniawaetsia taneto-ewetsixaemë, tsiquirijawayo-ata, nexata aeconoxae ca-ewetsia-exanaenatsi pematatsënëa ayaijawa. ¡Naxatsia! Najuabarëyatsi tsane», jai pijajiwitonëjawabelia.
24 »Icatsia, pata ponë ewetsia-exana mil ponëbeje. Bajaraponë jumaitsi pijatuxanenëjawabelia: «Cacueneyapëtanetsi. Xamë nijajiwi apo-itaxutobejiobiataeyabiabimë. Bajarapamonae ne-ubia-exanaejamatabëcuene ayaijawa palata catopitsapabiaba. Bajarapijinia pacuenia, xanë-ata newecuapitsipame xua pematatsënëa nacanabijitsipajë, tacanacuenebijamatabëcuene nijapalatata.
25 Bajaraxua yabara cacujunawatsi. Nexata, ponajë, tamëthëtetsinexa irata nijapalata. Bajarama nijapalataje. Catocanawiatatsi», jai bajaraponë pijatuxanenëjawabelia.
26 Nexata, petuxanenë jumaitsi: «Tajajiwitonë-atamë, itsiata ajamatabëcuenebejemë. Afaetabimënua. Xamë baja cajena yapëtaneme tajajiwi ta-ubia-exanabiabijawa, bajarapamonae pejamatabëcueneta ayaijawa palata tanetopitsapaenexa.
27 Bajaraxuata, xanepanaejitsipa picani itsa netocanacuenebia-exanaejitsipame tajapalata banco pewetsiwijawabelia. Nexata, aeconoxae banco pewetsiwi tajapalata pecacowaetsijamatabëcuene netocanawiatsipa pematatsënëa», jai pijajiwitonëjawabelia.
28 Nexata, petuxanenë jumaitsi bajarajota penubenaewijawabelia: «¡Pawecuapire bajarapamil ponëbeje, juya panerajutsinexa diez mil ponëbeje pexainaenëjawabelia, tsipaji bajaraponë caëjëpatsi taneto-ewetsinexa pematatsënëa!», jai pijajiwitonëjawabelia.
29 »Bajarapijinia pacuenia, exanaena Dioso, athëbëtatsia pe-ecaenë, pijajiwi peyanacua-ewetsimatacabita. Pajiwi xaniawaetsia canacueneba xua Dioso ewetsia-exanatsi, pematatsënëa icatsia itsajawa rajutsianatsi. Nexata, xainaena ayaijawa. Itsiata, pajiwi bijiaya canacueneba xua Dioso ewetsia-exanatsi, patsiquirijawayomi picani xaina wecuapitsianatsi —jai Jesús pijajiwijawabelia, xaniawaetsia pecanacuenebinexa xua Dioso ewetsia-exanatsi petonacuenebinexa.
30 »Icatsia, petuxanenë jumaitsi bajarajota penubenaewijawabelia: «¡Maponë tajajiwitonëje, itsacuenejawayonexa-ata aponetoxanepanae! ¡Nexata, paxuabaremelia pitaquirijawabelia! Bajarajota natsinuena. Nawonosiniananua bitso penawixaetaexae», jai petuxanenë, xaniawaetsia apopetonacuenebixae —jai Jesús pijajiwijawabelia, pemuxujiobinexa xaniawaetsia pecanacuenebijawanexa xua Dioso rajutatsi.
Dioso naneconitsia-exanaena pijaneconi pexainaewi
31 Icatsia, Jesús jumaitsi pijajiwijawabelia mapacueniaje:
—Xanë, Daxitajiwi Pematapijinënë, icatsia itsa najetarucaenajë, tacotiatuatuajëta, taja-ángelewi yajawa. Nexata, ecaenajë tajapeniweniwenaetronojawata, ta-ewetsinexa daxitanacua.
32-33 Nexata, daxitanacuanëpijiwi caetuatsianatsi taitabarata. Tsataponaenajë bajarapamonae. Pacuenia oveja pewetsinë ovejawecua saicaya tsatapona, bajarapacuenia-exanaenajë jiwijawabelia. Nexata, pamonae taniji betaja-oveja, Dioso pejitsipaecuenia pexanawanapaexae, nubianajë tacujuanenia. Pamonae pijinia taniji bechivocuenia, Dioso apopejumecowënëtsixae, nubianajë tatsawenonenia.
34 »Nexata xanë, tayanacua-ewetsinë, jumaitsinë tsane tacujuanenia penubenaewijawabelia, Dioso panejumecowënëtsiwi: «¡Naxatsia, paxamë taxa pexaniacuenia papecayawenonaewi, panecanacopatsiwinexa panacua taxa Dioso baja cajena tajëwelia pacatsiwajënaexaniawaeta, nacua pexanaejawaweliacujinae!
35 Itsa tajani, paxamë taxaejawa panerajutame. Itsa mera jitsipajë, panerajutame ta-apaenexa. Itsanacuawerena itsa patajë, xaniawaetsia panecopiapitame.
36 Itsa ajibi bitso tanaxatatsijawa, panerajutame tanaxatatsijawanexa. Itsa awitanenë, papatame patane-ewetsinexamë. Itsa ne-eta penaneconitsiwi pejebabiabibota, papatame patanetaenexamë», janë tsane tacujuanenia penubenaewijawabelia.
37 Nexata, bajarapamonae nejumaitsi tsaponae tsane: «Tajatuxanenë, ¿detsa pacujinae niajanijawata patajacarajutsi nexaejawa? ¿Detsa pacujinae mera nejitsipaejawata patajacarajutsi?
38 ¿Detsa pacujinae itsanacuawerena nepatsinë patajacacopiapitsi xaniawaetsia? ¿Detsa pacujinae piajibijawata bitso nenaxatatsijawa patajacarajutsi nenaxatatsijawanexa?
39 ¿Detsa pacujinae niawitanejawata patajaponae pataca-ewetsinexa? ¿Detsa pacujinae peca-etsijawata penaneconitsiwi pejebabiabibota patajaponae patacataenexa?», nejai tsaponae tsane.
40 Nexata, xanë jumaitsinë tsane bajarapamonaejawabelia: «Xaniajanë pacuenia pacatsipaebijitsiatsi. Daxita xua pato-exaname paneyawenonaenexa tajajiwiyajuwënëjiwi, beweliajamatabëcuenewi petaewitsijawabelia, bajaraxua xanë taniji bexanëjawaberena pataneto-exanaejawamë», janë tsane.
41 »Nexata, tatsawenonenia penubenaewi, Dioso peliwaisi apopejumecowënëtsiwijawabelia, jumaitsinë tsane: «¡Panewecuanatsare panijaneconi paneyajawajinawanapaewi! ¡Paponaremelia apopewerewerecae-isotojawabelia, pa-isoto Dioso picani tajëwelia toxaniawaeta ëdowathinexa, pija-ángelewi yajawa!a
42 Xanë itsa tajani, paxamë apopanerajutsimë taxaejawa. Itsa mera jitsipajë, apopanerajutsimë ta-apaenexa.
43 Itsanacuawerena itsa patajë, xaniawaetsia apopanecopiapitsimë. Itsa ajibi bitso tanaxatatsijawa, apopanerajutsimë tanaxatatsijawanexa. Itsa awitanenë, apopapatsimë patane-ewetsinexamë. Itsa ne-eta penaneconitsiwi pejebabiabibota, apopapatsimë patanetaenexamë», janë tsane tatsawenonenia penubenaewijawabelia.
44 Nexata, bajarapamonae pijaneconi peyajawajinawanapaewi nejumaitsi tsaponae tsane: «Tajatuxanenë, ¿detsa pacujinae niajanijawata apopacarajutsitsi nexaejawa? ¿Detsa pacujinae mera nejitsipaejawata, apopacarajutsitsi? ¿Detsa pacujinae itsanacuawerena nepatsinë, apopacacopiapitsitsi xaniawaetsia? ¿Detsa pacujinae bitso pecato-ajibijawata nenaxatatsijawa, apopacarajutsitsi nenaxatatsijawanexa? ¿Detsa pacujinae niawitanejawata, apopaponaenë pataca-ewetsinexa? ¿Detsa pacujinae penaneconitsiwi pejebabiabibota peca-etsijawata, apopaponaenë patacataenexa?», nejai tsaponae tsane.
45 Nexata, xanë jumaitsinë tsane bajarapamonaejawabelia: «Xaniajanë pacuenia pacatsipaebijitsiatsi. Bajarapacuenia itsa apopato-exanaemë paneyawenonaenexa tajajiwiyajuwënëjiwijawabelia, nexata bajaraxua xanë taniji bexanëjawaberena apopataneto-exanaejawamë», janë tsane pijaneconi peyajawajinawanapaewijawabelia.
46 Nexata, bajarapamonae ponaena apopewerewerecae-isotojawabelia, naneconitsiaya pejinawanapaenexa daxitamatacabijawabelia. Pamonae pijinia, Dioso pejitsipaecuenia exanawanapa, bajarapamonae rajutsianatsi matacabi apopewerewerecaejawa, pebarëjinawanapaenexatsi daxitamatacabijawabelia —jai Jesús pijajiwijawabelia.