Jesús tsipaeba jiwijawabelia pecuenecataeliwaisi, pe-ubinë peliwaisicuenia
4
Icatsia, itsamatacabi Jesús taxuxuaba liwaisi petsipaebijawa Galilea pucaxaneto-itapajawata. Nexata, bajarajota jiwi ayaibitsaëtoxaneto penacaetuatsixae, Jesús runareca jera-ënëabereca. Bajarapajera-ënëwerena tsipaebeca Dioso peliwaisi tajetabota penubenaewijawabelia.
2 Nexata, cujaruba pecuenecataeliwaisicuenia bajarapamonaejawabelia. Jumaitsi tsaponae mapacueniaje:
3 —¡Panenamuxuna-ewere xaniawaetsia mapaliwaisije! Pe-ubinë pona pabiabelia, pe-ubinexa.
4 Nexata, pe-ubijawata pabita xucayajabajarabanajetaruca. Itsaxu othopa pabituatuajëjawa penajetarucaenamutojumata. Nexata, bajarajota pata baratsui. Xane bajarapaxumi, juwinejewa.
5 Itsaxu pijinia othopa ibopananëjumata, itsajota bitso ira apo-aitayaë.
6 Nexata, bajarapaxu juwi-ata, icotia bitso piatajuxae, tsaquenapona, tsipaji irabereca bitso apo-atabunepepiareca.
7 Itsaxu pijinia othopa pa-irajawata xaina bëpënëa pe-ejuwijawanë pejuwinexa. Nexata, pe-ubixu, pe-ejuwijawanë-ata, caecuenia penajuajuwixaebeje, bitso matacënënaenatsi pe-ubijawanëmi. Nexata, pe-ubijawa aponacuaitsi.
8 Itsaxu pijinia othopa pexania-irata. Bajarapaxu pejuwicujinae xaniawaetsia witsabapona. Xaniawaetsia nacuaita. Itsabotonë capitsapa treinta paxutobeje tsaponae. Itsabotonë capitsapa sesenta paxutobeje tsaponae. Itsabotonë capitsapa cien paxutobeje tsaponae —jai Jesús bajarapaliwaisi petsipaebiwijawabelia.
9 Nexata, icatsia Jesús jumaitsi jiwibitsaëtoxanetojawabelia:
—Patacatsipaebiliwaisi, pajiwi jamatabënejumeyapëtane, nenamuxuna-ewetsi xaniawaetsia —jai Jesús.
Jesús pajamatabëcuene yabara ëpecuenecataeliwaisianëcuenia tsipaeba jiwijawabelia
10 Jesús liwaisi petsipaebicujinae, jiwibitsaëtoxaneto baja wecuanawiabatsi. Nexata, pija-epato barënacopata doce ponëbeje pijajiwi, itsamonae-ata yajawa. Bajarapamonae yanijobatsi pajamatabëcuene yabara pecuenecataeliwaisicuenia paebabiaba.
11 Nexata, Jesús jumaitsi bajarapamonaejawabelia:
—Paxamë rabaja Dioso pacatocopata xaniawaetsia panejumeyapëtaenexa Dioso papijajiwixaemë papecayanacua-ewetsijawanexa yabara. Pamonae abaxë apotajajiwi, Dioso apotocopatsi pejumeyapëtaenexa. Bajaraxuata, tsipaebabiabajë ëpecuenecataeliwaisianëcuenia.
12 Nexata, bajarapamonae tae-ata Dioso pesaëta pinijicuene ta-exanaejawa, apoyapëtae pajamatabëcuene yabara exanajë. Nenamuxuna-ewetsi-ata, apojumeyapëtae pajamatabëcuene xaina tatsipaebiliwaisi. Bajarapacuenia tocopatatsi pejumeyapëtaejawanexa, penajamatabëcuenepënëyorotsiyaniwa Diosojawabeliaa pibisiacuene pexanaeneconimi pesiwajamatabëcuenecaewiyaniwatsi —jai Jesús.
Jesús yapëtaeya-exana peyanijobiwitsi, pajamatabëcuene xaina pe-ubinë peliwaisi
13 Jesús icatsia jumaitsi pijajiwijawabelia:
—Itsa apopajumeyapëtaemë pajamatabëcuene xaina paliwaisi pacatsipaebatsi pe-ubinë peliwaisicuenia, ¿detsa nexata pacuenia pajumeyapëtaename daxita paliwaisianë pacatsipaebijitsiatsi pecuenecataeliwaisicuenia? Ayapëbeje cajena.
14 Itsiata, pacayapëtaeya-exanaenatsi, pajamatabëcuene xaina pe-ubinë peliwaisi:
»Pe-ubinë raja pexu, cuene-itajëta pepaebinë Dioso peliwaisi, pexanialiwaisi.
15 Paxu othopa pabituatuajëjawa penajetarucaenamutojumata, baratsui xane. Bajarapaxu cuene-itajëta pamonae tsijamatabëcuene-ubatsi Dioso peliwaisi, pexanialiwaisi, itsiata pejumetaecujinae, bepijia dowathi najetaruca bajarapamonaejawaberena. Nexata, pejumetaeliwaisimi Pejumetaeliwaisimi tsijamatabëjonenejewatsi dowathi wecuapita penacofënëtsia-exanaenexatsi.
16 Paxu pijinia othopa ibopananëjumata, itsajota bitso ira apo-aitayaë, cuene-itajëta pamonae Dioso peliwaisi, pexanialiwaisi, pejumetaejawata barëyaya picani natocopiapita.
17 Itsiata, apo-ajamatabëcuenesaë bajayajebinexa, itsa tocopiapatatsi pebejiobia-exanaejawatsi bajarapaliwaisi yabara. Nexata, bepijiayo nawecuacopaba pesiwajamatabëcuenebarëyajawami bajarapaliwaisi, pepacuene apopejumexaniataexae.
18 Paxu pijinia othopa pa-irajawata, xaina bëpënëa pe-ejuwijawanë pejuwinexa, cuene-itajëta pamonae Dioso peliwaisi, pexanialiwaisi, pejumexaniataecujinae, itsiata, bepijiayo nacofënëta.
19 Nexata, Dioso peliwaisi apotsijamatabëcuenewitsabitsi, tsipaji bitso yajawajamatabëcuene-enatsi mapanacuapijicuenejawanëje. Nexata, siwanajamatabëxainabiaba ayaijawa palata pexainaenexa. Itaxutuajinabiabanua itsacuenejawanë pexainaenexa, petsisajinaejawanëtsi. Bajarapajamatabëcuenejawanë apocopatsi Dioso peliwaisi petsijamatabëcuenewitsabinexatsi, tsipaji jamatabëcueneliwaisimatacënënatsi pe-ejuwijawanëcuenia.
20 Paxu pijinia othopa pexania-irata, cuene-itajëta pamonae pepacuene jumexaniatane Dioso peliwaisi, pexanialiwaisi. Nexata, bajarapaliwaisi xaniawaetsia penato-itapetsixae, tsijamatabëjunuatsi. Nexata, nawitsia capitsapapona Dioso pejitsipaecuenejawanë. Pacuenia pe-ubijawa capitsapa itsabotonë treinta paxutobeje, itsabotonë sesenta paxutobeje, itsabotonë cien paxutobeje, bajaratsijamatabëcuene-itsitsi bajarapamonae Dioso pejitsipaecuenejawanë pexanaejawa, Dioso peliwaisi petsijamatabëcuenewitsabaponaexaetsi —jai Jesús pijajiwijawabelia.
Jesús tsipaeba pijajiwijawabelia pecuenecataeliwaisi, lámparabë peliwaisicuenia
21 Icatsia, Jesús jumaitsi pijajiwi, doce ponëbejejawabelia, itsamonaejawabelia-ata:
—Itsajiwi-ata lámparabë pitanojotsicujinae apo-etsi cajoni-ënëalia, cama bëxëpanalia-ata. ¡Jume baja cajena! Biji rajane, athëbëyo etsia daxitabo-ënë pitayotecaenexa.
22 Bajarapijinia itsi paliwaisianë tsipaebaponajë pecuenecataeliwaisicuenia, daxitajiwi picani jitsipajë bajarapacuenia pejumeyapëtaenexa. Najumematayatsia apotsipaebaponaenë. Itsamonae nejumetae-ata, aeconoxae abaxë aponejumeyapëtae pajamatabëcuene xaina tatsipaebiliwaisianë. Itsiata, itsamatacabi, bexëajawabelia, daxitajiwi nejumeyapëtaena pajamatabëcuene xaina paliwaisianë pecuenecataeliwaisicuenia tsipaebaponajë.
23 ¡Pajiwi jamatabënejumeyapëtane patacatsipaebiliwaisi, xaniawaetsia nenamuxuna-ewetsi! —jai Jesús pijajiwijawabelia.
24 Icatsia, Jesús jumaitsi bajarapamonaejawabelia:
—¡Panejumecanaëjëre patacatsipaebiliwaisi! Patanejumecanaëjëtsicueniamë,b bajaraxuawajëto pajumeyapëtaeponaename. Pajiwi pijinia bewelia canaëjëtsiana bajaraxuawajëto jumeyapëtaeponaena. Pajiwi pijinia ayaicuenia canaëjëtsiana, bajaraxuawajëto jumeyapëtaeponaena. Dioso picani xaina ayaijawa papecajumeyapëtaeya-exanaenexa.
25 Pajiwi pijinia xaniawaetsia nejumeyapëtane patacatsipaebiliwaisi, bajarapajiwi pematatsënëa itsaliwaisi Dioso jumeyapëtaeya-exanaenatsi. Itsiata, pajiwi xaniawaetsia aponejumecanaëjëtsi patacatsipaebiliwaisi, bajarapajiwi paliwaisiyowajëto picani jumeyapëtane, nacofënëtsiana —jai Jesús.
Jesús pijajiwi tsipaeba anijapecuenecataeliwaisibeje, pacuenia Dioso pijajiwi bepijiayo ayaibitsaëto naexanaejitsia
26 Jesús icatsia jiwi liwaisi tsipaeba pecuenecataeliwaisicuenia. Jumaitsi mapacueniaje:
—Paliwaisi tsipaebajë Dioso pijajiwi peyanacua-ewetsijawanexa, cuenejëpa pe-ubinë pabita pexucayajabajarabanajetarucaejawa.
27 Pe-ubinë pe-ubicujinae, wemaxëmajitabiaba merawi canacujitsia. Naëcotabiaba matacabita. Bajarapacuenia panepapona matacabianë. Pe-ubijawa baja pabita juwa. Witsabaponanua. Itsiata baitsi jane, pe-ubinë apoyapëtae pacuenia pe-ubixu pijacuata juwa.
28 Ira raja pejamatabëcueneta naxaniaba pe-ubijawa. Copiata pepaboto witsabaya. Xuacujinae, namatonota. Nacuaitanua. Bajaraxuacujinae jane baja, cuainawereta.
29 Peyanionaecujinae, penotsiwi caetuatapona, tsipaji baja penotsimatacabinexa tocopiapatatsi. Bajarapijinia pacuenia, cuenejëpa tatsipaebiliwaisi. Aponayapëtae abaxë pajiwi jumeyapëtane bajarapaliwaisi. Matapania, penacuenecapitsapaejawata Dioso pejitsipaecuenejawanë, nayapëtaena pajiwi tsijamatabëcuenewitsabatsi tatsipaebiliwaisi —jai Jesús jiwijawabelia.
30-31 Jesús icatsia jumaitsi:
—¿Demeta xua peliwaisi jëpa Dioso pijajiwi bepijia ayaibitsaëtoxaneto penaexanaejawanexa? Tsipaebianajë meta mostazaxutoxi peliwaisi. Mostazaxu raja bitso tsiquirixutoxi daxita pe-ubixuwecua.
32 Itsiata baitsi jane, mostazanae itsa juwa, bepijia witsaba. Caewaita pinijinae naexana, itsape-ubinaenë matatoxenetsia. Nexata, bajaraponae pemaxërananëjawata, baratsui-ata pematapenanë exana. Bajarapijinia itsi tsane Dioso pijajiwi peyanacua-ewetsicuene. Caejiwiyobejejawata taxuxuabi-ata tsane, bepijia ayaibitsaëto naexanaena, Dioso peyanacua-ewetsiwinexa —jai Jesús pijajiwijawabelia, itsamonaejawabelia-ata.
33 Jesús petsipaebanajetarucaejawata Dioso peliwaisi, pexanialiwaisi, tsipaebanajetaruca ëpecuenecataeliwaisianëcuenia. Pacuenia baja jiwi caëjëpatsi pejumeyapëtaenexa, bajarapacuenia Jesús tsipaebabiaba.
34 Jiwijawabelia ëpecuenecataeliwaisianëcuenia tsipaebabiabi-ata, itsiata, saicaya Jesús ëpijajiwijawabelia, xaniawaetsia jumeyapëtaeya-exanabiaba pajamatabëcuene xaina daxita bajarapaliwaisianë.
Jesús pitawetsijawa jowiboxaneto, malatacaxaneto yajawa, piayaijawami
35 Jesús bajarapacuenia pepaebiweretsicujinae, caniwiyotsia baja. Nexata, jumaitsi pijajiwijawabelia:
—Nicabaliatsi mapapucaxaneto itsapanabeliaje —jai.
36 Nexata baja, penapëjiobicujinae bajarapajiwibitsaëtoxaneto, Jesús, pijajiwi yajawa, wecuapona. Pajerata Jesús ecareca, pijajiwi yajawa pona. Itsiata, itsamonae pënaponatsi itsajeranëta.
37 Nexata, pinijijowiboxaneto jemata najetaruca, malataca yajawa. Jera-ënëaberena mera epabajarabapona. Nexata, jera-ënë mera wënëcapona.
38 Bajarapaepatota, Jesús jamatejema majitanuca namatabëxëyaëtanucaeya jeratabufejawawetsina. Nexata, Jesús pijajiwi ya-itawabatsi. Jumaitsitsi:
—¡Patanecujarubinëmë, waxaitsimi rabaja ya-othopaenatsi! ¿Apojamatabëcuenebëjamë tsaja? —jai Jesús pijajiwi.
39 Nexata, Jesús pemajitanucaenëmi naëcotapuna. Pinijijumeta itawetaxuaba jowibo. Jumaitsi pucajawabelia, jowibojawabelia-ata:
—¡Wainae-ecare baja! —jai.
Bajarapacuenia Jesús pejumaitsijawata, jowibo baja ajibi tsaxuabi. Daxitapuca baja wainae-ecaxuaba.
40 Nexata, Jesús jumaitsi pijajiwijawabelia:
—¿Detsa xuajitsia bitso pajunawame? ¿Tsipaji tsaja Dioso apopa-itaxutuajamatejemamë papeca-ewetsijawa? —jai Jesús.
41 Nexata, Jesús pijajiwi najunawiaca bajarapacuene petaejawata. Ëpamonae najumaitsi: «¿Demeta tsipaji maponëje? ¡Itaweta jowibo, malataca-ata! ¡Jumecowënëtatsi baja maponëje! ¡Nexata baja, jowibo, malataca yajawa, ajibi tsaxuabi!», najai Jesús pijajiwi.