Jesús wecuacapitsapa pebi, dowathiwi peyajawaponaponaenë, Gerasa nacuata
5
Jesús pitawetsicujinae jowibo, malatacaxaneto yajawa, pijajiwi barëpata jane baja pucaxaneto itsapanabelia, Gerasa nacuayabelia.
2 Nexata, Jesús jerajawawetsina itsa nonotajunaina, bajarapaepatota pebi, dowathiwi peyajawaponaponaenë, mata-enenarenatsi jiwimëthëanëjawawerena.
3 Bajaraponë baja cajena ponaponabiaba jiwimëthëanëjawa. Apocaëjëpaetsi cajena itsajiwi-ata, pecëtsinexatsi cadenamaëtota.
4 Apocaetoyo picani taxucëbabiabatsi, cobecëbabiabatsinua cadenamaëtonëta. Itsiata cajena, bajarapamaëtonë ucubabiaba pesaëta. Pecobeta epatanacabiabanua. Itsajiwi-ata cajena apocaëjëpaetsi pecëtsinexa, tsipaji bitso asaëbeje.
5 Bajaraponë ponaponabiaba petsutonëjawa, petëpaewi pemëthëanëjawa, matacabijebi, merawijebi-ata. Wawajai tsabiabaponaponae. Ibotonëjawabelia natsaquibajarababiabaponapona.
6 Bajaraponë itsa wajënaetane tajëwerena Jesús penajetarucaejawa, nexata cujinaeponalia. Pematabacabëta nucajunua Jesús pitabarata.
7-8 Nexata, Jesús pitawetsijawata, dowathijawabelia jumaitsi:
—¡Dowathiwi, maponëje baja pawecuapitsapare! —jai.
Bajarapaepatota, dowathi aëjai pinijijumeta. Jumaitsi Jesús-jawabelia:
—¡Jesús, Dioso, Pepo-ayaijamatabëcuenenë, pexënatomë! ¿Detsa xua jaitame xanëjawaberena? Pexaniacuene cawajëtatsi Dioso pewënëta, tanebejiobia-exanaeyaniwamë —jai dowathi.
9 Bajarapacuenia dowathi pejumaitsixae, nexata Jesús jumaitsi dowathijawabelia:
—¿Detsa pawënëmë? —jai.
Nexata, dowathiwi nawënëpaeba.
—Patawënë raja Legión, tsipaji raja bitso pa-ayaibitsaëtoxanetonë —jai dowathi.
10 Nexata, dowathiwi pinijicuenia wajëca Jesús-jawabelia, itsa-irabelia pejutsiyaniwatsi bajarapa-irawecua.
11 Bajarajota, imoxoyo petsutojawata, marranobitsaëtoxaneto xaewanapa.
12 Nexata, dowathiwi bitso wajëca Jesús-jawabelia. Jumaitsi
—¡Pane-itorobare marranobitsaëtoxanetojawabelia, patajonenexa! —jai dowathiwi.
13 Jesús tocopata pacuenia dowathiwi wajëcatsi. Nexata, bajarapadowathiwi baja pebi wecuapitsapecatsi, marranobitsaëtoxanetojawabelia pejonenexa. Bajarapamarranobitsaëtoxaneto, jinawanapa dos mil ponëbeje. Dowathiwi pejonecujinae bajarapamarranobitsaëtoxanetojawabelia, cujinaeyeca daxitabitsaëto. Pucaxaneto-itapajanituareca othopareca. Daxita bajarapabitsaëtomi meneta bubuna.
14 Pamonae marranobitsaëto ewetawanapa rëcëpeca. Pona, pacuene tane petsipaebinexa tomarapijiwijawabelia, wayafotusatojawa pe-enaewijawabelia-ata. Nexata, jiwi ponarena petaenexa bajarapacuene.
15 Nexata, bajarapamonae itsa pata Jesús peponaponaejawata, taeyeta pemuxuneneta dowathiwi peyajawaponaponaenëmi. Bajaraponë penaxatatsijawa baja naxatateca. Jamatejema baja. Xaniawaetsia eca. Nexata, bajarapamonae cujunawa Jesús.
16 Pamonae cuenetane Jesús pejamatejemaya-exanaejawa dowathiwi peyajawaponaponaenëmi, xua-ata exana marranobitsaëtoxanetojawabelia, bajarapamonae paeba daxita pacuene tane pepatsiwijawabelia.
17 Nexata, Gerasa nacuapijiwi, bitso pecajunawi, taxuxuaba pewajëcaejawa Jesús-jawabelia, pewecuaponaenexatsi itsanacuayabelia.
18 Jesús baja itsa runareca jera-ënëabereca, ponë, dowathiwi peyajawaponaponaenëmi, bitso picani nawajëca Jesús pepëta penaponaenexa.
19 Itsiata, Jesús apojejai. Jumaitsi bajaraponëjawabelia:
—¡Ponare nijaboyabelia! ¡Nijamonae tsipaebare papinijicuene Dioso cato-exana! Pacuenia-ata ca-itaxutotsoniatane —jai Jesús dowathiwi peyajawaponaponaenëmijawabelia.
20 Nexata baja, bajaraponë pona pijatomarabelia. Taxuxuaba penawajunupaebijawa, Decápolis nacuajawa pejinawanapaewijawabelia, papinijicuene Jesús to-exanatsi. Decápolis nacuata eca diez patomarabeje. Daxitajiwi jamatabëcuenenabenajaca itsa jumetanetsi bajaraponë penawajunupaebaponaejawa.
Jesús namuto-epatota jamatejemaya-exana piawitanewa, pacuenia-ata Jairo pexënatowayo, petëpaewayomi, to-asaëya-exana
21 Jesús icatsia pecowëyaberena jerata nawiarena, pucaxaneto itsapanawerena. Nexata, tajetabojawatarena jiwibitsaëtoxaneto Jesús matatoyoronatsi.
22 Bajarajota napatajopa Jairo, judíowi pijasinagogabo pewetsiwiyajuwënënë. Itsa taetaba Jesús, pitabarata pematabacabëta yaiyataeya nucajunua.
23 Jairo wajëta pinijicuenia Jesús-jawabelia. Jumaitsi:
—¡Taxënatoyo raja netobitso! Najumalipeneta rabaja petëpaenexa. ¡Pexaniacuene neto-exanare! ¡Naxatsia! Netoperabëjayatsianame necobeta, petëpaeyaniwa —jai.
24 Jejai Jesús. Nexata, napona Jairo pepëta. Jiwibitsaëtoxaneto, Jesús pepënaponaewitsi, matatoyorotsia cënënanajetarubenatsi.
25 Bajarapajiwibitsaëtoxanetotuatuajëta, nanajetaruca petiriwa, doce baja pawaibeje pejanacuene pecapunaewatsi.
26 Bajarapowa baja daxita pexainaejawami wereta pewaëbiwitsijawabelia. Itsiata, bajarapamonae apojamatejemaya-exanaetsi. Biji caranata, pewajënaeyabelia bitso tsaponae. Nexata, bepejiobicueneta ponapona, pewaëbiwitsi pejamatabëcueneta.
27 Nexata, bajarapowa itsa jumetane itsamonae pecuaicuaijaijawa Jesús piawitanewi pejamatejemaya-exanaponaejawa yabara, ponataba Jesús pepënëwelia, jiwibitsaëtoxanetotuatuajëalia. Nexata, bajarapowa tojayataba Jesús penaxatatsijawa,
28 tsipaji jamatabëjumaitsi: «Itsa Jesús penaxatatsijawa tojayatabianajë, tawitanejawami baja newecua-ajibi tsane», jamatabëjai.
29 Nexata, itsa tojayataba Jesús penaxatatsijawa, caecuenia baja wecua-ajibitsi pejanatsabiabijawami. Nayapëtane baja pejana pecaewijawareca.
30 Jesús-ata nayapëtane pejayatabijawatatsi pesaëta pejamatejemaya-exanaejawa pepënëyabelia. Nexata, napënëyorotaxuaba. Naëcobaruta. Yanijoba jiwijawabelia.
—¿Jipatsa tanaxatatsijawa netojayataba? —jai.
31 Nexata, Jesús pijajiwi jumaitsitsi:
—Taneme rabaja jiwibitsaëtoxaneto pecacënënanajetarubenaejawa. ¿Detsa xuajitsia: «¿Jipatsa tanaxatatsijawa netojayataba?», jamë? —jaitsi Jesús pijajiwi.
32 Itsiata, Jesús naëcobaruta daxitajiwijawa, petaenexa pajiwi tojayatabatsi penaxatatsijawa.
33 Nexata, bajarapowa neconecojai tsanucae pecajunawi, penayapëtaexae Jesús pejamatejemaya-exanaejawatsi. Bajarapowa najetabalia. Jesús pitabarata, pematabacabëta nucajunua. Daxita pacuene exana, bajarapowa tsipaeba Jesús-jawabelia.
34 Nexata, Jesús jumaitsi bajarapowajawabelia:
—Xamë, tanesiwanajamatabëcuenecopatsixaemë xanëjawaberena, jamatejemamë baja. ¡Ponare baja jamatabëcuenexanepanaeya! Niawitanejawami rabaja ajibi —jai Jesús bajarapowajawabelia.
35 Bajarapacuenia Jesús pejumaitsitsanucaejawata namuto-epatota, Jairo pijabowerena peponaewi mata-enenatsi. Bajarapamonae jumaitsi Jairojawabelia:
—Nexënatoyo rabaja tëpa. ¡Pëtsa baja matawëjëa jamatabë-itonotaponame Jesús! —jai Jairojawabelia.
36 Jesús jumetae-ata bajarapajume, itsiata jumaitsi Jairojawabelia:
—¡Pëtsa najamatabëxainame! ¡Nesiwanajamatabëcuenecopare saya xanëjawaberena, nexënatowayo pecato-asaënexa! —jai Jesús.
37 Bajarapacuenia pejumaitsicujinae, Jesús, pajiwibitsaëtoxaneto pënanajetarubenatsi, pueneta bajarajota. Jairo pijaboyabelia yajawaponaliatsi saya mapamatabëxëyoje: Pedro, Juan, Santiagobana. Santiago pejuyapijinë Juan-beje.
38 Itsa baja palia Jairo pijaboyabelia, tane jiwibitsaëto pinijijumeta pematanueyabijawa petëpaewayo.
39 Jesús itsa joneya boyalia, jumaitsi bajarapamonaejawabelia:
—¡Pëtsa bitso pamatanueyabame! Pejanawa raja apotëpae. Saya raja majitanuca —jai Jesús, tsipaji yapëtane piasaëya-exanaejawanexa bajarapowayo.
40 Bajarapacuenia Jesús pejumaitsijawa, bajarapamonae saya jumecapo̱capo̱natsi. Pamonae daxita pematanueyabiwi bowecua pitsapaeya-exana. Itsaxuayolia petëpaewayo boca, Jesús barëjoneya saya caejiwiyobeje: petëpaewayo paxa, pena, Jesús pijajiwi, acueyabi ponëbeje yajawa.
41 Nexata Jesús petëpaewayo cobepita. Bajarapowayomi pijajumetaa jumaitsi:
—¡Talita cumi! —jai. (Mapejumaitsijumeje: «¡Pejanawa, nonotapunare!», pejaijume.)
42 Bajarapacuenia Jesús pejumaitsijawata, pejanawayo nonotabapuna. Ponapona baja. Bajarapowayo xaina doce pawaibeje. Nexata, Jesús peyajawajonewilia, itsa tane bajarapacuene, pinijicuenia jamatabëcuenenabenajaca.
43 Itsiata, Jesús pinijicuenia jumaitsi:
—¡Pëtsa itsajiwi-ata patsipaebame mapacueneje! —jai Jesús. Bajaraxuacujinae, Jesús itoroba pejanawayo penajawabelia pexaejawa perajutsinexatsi.b