Pacuenia Jesús pijajiwituatuajëta nanajetarubena petiriawi-ata
8
Simón pijabota Jesús penaxaecujinae, tsipaebanajetaruca pinijitomaranëjawa, tsiquiritomaraxijawa-ata, Dioso pijajiwi peyanacua-ewetsijawa yabara. Yajawanajetarucanua pijajiwi doce ponëbeje, apóstolewi.
2 Bajarapamonaeta nanajetarubena petiriawi. Bajarapapetiriawiyajuwënëwaxi dowathi pewecuacapitsapaewaxitsi, itsawaxi-ata piawitanejawawecua Jesús pejamatejemaya-exanaeyajuwënëwaxi. Bajarapapetiriawiyajuwënëwa, María, Magdala tomarapijiwa. Bajarapowa Jesús wecuacapitsapa siete padowathiwibeje.
3 Itsawa pewënë Juana, Chuza pijawa. Bajaraponë nacua-ewetsinë Herodes pijajiwitonë. Itsawa pewënë Susana. Bajarapapetiriawi pematatsënëa, itsapetiriawi, ayaibitsaëto, yajawanajetaruca Jesús. Bajarapapetiriawi pexainaepalatayajuwënëjawa, rajuta Jesús-jawabelia, pijajiwi yajawa, xua namatawenona pebarëcomuatsinexa bajarapapalatata.
Jesús tsipaeba jiwijawabelia pecuenecataeliwaisi pe-ubinë peliwaisicuenia
4 Imoxoyo pe-enaetomaranëwerena, ayaibitsaëto jiwi patapona Jesús-jawaberena petaenexatsi. Bajarajota, ayaibitsaëto penacaetuatsicujinae, Jesús pecuenecataeliwaisicuenia tsipaeba pe-ubinë peliwaisicuenia bajarapamonaejawabelia. Jumaitsi mapacueniaje:
5 —Pe-ubinë pona pabiabelia, pexu pe-ubinexa. Nexata, itsa pata pabita, pabituatuajëjawa ubanajetaruca pexu cayajabajarabicuenia. Nexata, itsaxu othopa namutojumawereca, pabituatuajëjawa panamuto najetaruca. Nexata, bajarapanamutojawa penajetarubenaewi bajarapaxu taxunanonoba. Itsaxu pijinia juwinejewa baratsui xane.
6 Itsaxu pijinia othopa ibopananëjumata, itsajota bitso ira apo-aitayaë. Nexata, bajarapaxu juwi-ata, tsaquenapona, tsipaji ira tsewa.
7 Itsaxu pijinia othopa pa-irajawata xaina bëpënëa pe-ejuwijawanë pejuwijawanexa. Nexata, pe-ubixu itsa juwa, caecuenia najuajuwabeje pe-ejuwijawanë. Itsiata, pe-ejuwijawanë bitso matacënëna pe-ubijawami.
8 Itsaxu pijinia othopa pexania-irata. Bajarapaxu pejuwicujinae xaniawaetsia witsabapona. Nexata, penacuaitsijawata, itsabotonë capitsapa cien paxutoyobeje-ata —jai Jesús jiwi ayaibitsaëtoxanetojawabelia.
Bajarapaliwaisi petsipaebiweretsicujinae, Jesús pinijijumeta jumaitsi: «Pajiwi jamatabëjumeyapëtane patacatsipaebiliwaisi, nenamuxuna-ewetsi xaniawaetsia», jai Jesús.
Pajamatabëcuene yabara, Jesús jiwijawabelia liwaisi tsipaeba ëpecuenecataeliwaisianëcuenia
9 Nexata, Jesús pijajiwi yanijobatsi. Jumaitsi:
—¡Paliwaisi jiwijawabelia tsipaebame pe-ubinë peliwaisicuenia, pajamatabëcuene xaina bajarapaliwaisi, panetsipaebare, patayapëtaenexa! —jai Jesús-jawabelia.
10 Nexata, Jesús jumaitsi pijajiwijawabelia:
—Paxamë rabaja xaniawaetsia Dioso pacatocopata xanë patacayapëtaeya-exanaenexa, pajamatabëcueneliwaisi xaina tatsipaebiliwaisianë Dioso pijajiwi peyanacua-ewetsijawanexa yabara. Itsiata, Dioso apotocopatsi abaxë daxitajiwi bajarapajamatabëcueneliwaisi peyapëtaenexa. Bajaraxuata, bajarapamonae itsa tsipaebajë liwaisi, ëpecuenecataeliwaisianëcuenia tsipaebaponajë. Nexata, bajarapamonae tae-ata Dioso pesaëta pinijicuene ta-exanaejawa, apoyapëtaecapanepae pajamatabëcuene yabara exanajë. Namuxuna-ewetsi-ata tatsipaebiliwaisinua, itsiata, apojumeyapëtaecapanepaea pajamatabëcueneliwaisi xaina tatsipaebiliwaisi —jai Jesús pijajiwijawabelia.
Jesús yapëtaeya-exana pijajiwijawabelia pajamatabëcueneliwaisi xaina pecuenecataeliwaisi, pe-ubinë peliwaisicuenia
11 Icatsia, Jesús jumaitsi pijajiwijawabelia:
—Mara pajamatabëcueneliwaisi xainaje, paliwaisi pacatsipaebatsi pabita pe-ubinë peliwaisicuenia. Pe-ubixu nacatocuene-itajëta Dioso peliwaisi. Pe-ubinë nacatocuene-itajëta Dioso peliwaisi pepaebinë. Pa-irajumata pexu othopa nacatocuene-itajëta jiwi pejamatabëcuene yabara.
12 Nexata, paxu othopa namutojumawereca, nacatocuenecatane pamonae baja picani jumetane Dioso peliwaisi petsipaebijawatsi. Itsiata baitsi jane, bepijia dowathi najetaruca bajarapamonaejawaberena, pewecuapitsinexatsi pejumetaeliwaisimi, penacofënëtsia-exanaenexatsi, pejumexaniataeyaniwa bajarapaliwaisi, pepanepaeyaniwanua Diosojawabelia.
13 Paxu pijinia othopa ibopananëjumata, itsajota bitso ira apo-aitayaë, nacatocuene-itajëta pamonae Dioso peliwaisi pejumetaejawata, jamatabëcuenebarëya picani. Itsiata, bajarapaxu ibopananëjumata pejuwixae, irabereca apo-atabunepepiareca. Nexata, bepijia tsaquena icotiata. Bajaratsijamatabëcuene-itsitsi pamonae jamatabëcuenebarëyaya copiapita picani petsipaebiliwaisitsi, jamatabëcuenewitsabinejewa Dioso peliwaisita. Nexata, paepatota bajarapaliwaisi yabara tocopiapatatsi piayapëbejecuene, nawecuacopaba, apopiajamatabëcuenesaëxae. Cae-epatoyonexa saya itaxutuajamatejema bajarapaliwaisi.
14 Paxu pijinia othopa pa-irajawata xaina bëpënëa pe-ejuwijawanë pejuwinexa, nacatocuene-itajëta pamonae jumetane picani Dioso peliwaisi petsipaebijawatsi. Itsiata baitsi jane, pejamatabëcuene-enaexaetsi mapanacuapijicuene yabaraje, ayaijawa pecobecowë pexainaenexa, barëyaya pejinawanapaenexanua, nexata aponacuene-itajëtsi pacuenia Dioso peliwaisi yapëtaeya-exanatsi. Pacuenia pe-ubijawanë matacënënatsi pe-ejuwijawanë, bajaraxua peyajawajuwixae apoxainae penacuaitsicuene, bajarapijinia pacuenia jamatabëcuene-itsi pamonae mapanacuapijicuenejawanë jamatabëcuene-enatsi Dioso peliwaisiwecua, tsipaji siwabarëyatsabiabinua ëpexainaecuene. Nexata, jiwi pejamatabë-ëthëtojawawetsina apocapitsapabiabi Dioso pejitsipaecuene pexanawanapaejawata.
15 Paxu pijinia othopa pexania-irata, nacatocuene-itajëta pamonae jumetane Dioso peliwaisi petsipaebijawatsi. Nexata, jumecowënëtsiayab jinawanapa bajarapaliwaisi pexaniajamatabëcueneta peyapëtaeya-exanaecueniatsi. Pacuenia pexania-ira xaniawaetsia witsabia-exana pe-ubijawanë. Capitsapaeya-exananua pexaniacuai, bajarapacuai penaweretsijawabelia, bajarapijinia pacuenia, pamonae Dioso peliwaisita jamatabëcuenetotowa, casaë tsawanapaenua pewajënaeyabelia Dioso pejumeliwaisi. Bajarapaliwaisi pejumaitsicowëya nawitsia capitsapaponaena pexanawanapaejawata pexaniacuenejawanë —jai Jesús pijajiwijawabelia, peyapëtaeya-exanaejawata pajamatabëcueneliwaisi xaina pabita pe-ubinë peliwaisi.
Jesús tsipaeba pijajiwijawabelia pecuenecataeliwaisi lámparabë peliwaisicuenia
16 Icatsia, Jesús jumaitsi ayaibitsaëto penacaetuatsiwijawabelia:
—Itsajiwi-ata lámparabë pitanojotsicujinae, apomata-acatetsi itsacuenejawata. Camabëxëpanalia-ata apo-etsi. Biji rajane, athëbëyo etsia jiwi boyaberena pejonewi petsiwajënae-itayotecaenexa. Pamonae tatsipaebiliwaisi pejumexaniataewi, apobeneliwaisimatayatsi petsipaebiyaniwa itsamonaejawabelia.c
17 Paliwaisianë tsipaebaponajë pecuenecataeliwaisicuenia, najumematayatsia apotsipaebaponaenë picani. Itsiata, itsamonae nejumetae-ata, aeconoxae abaxë aponejumeyapëtae pajamatabëcueneliwaisi xaina tatsipaebiliwaisianë. Itsiata, itsamatacabi bexëajawabelia, daxitajiwi nejumeyapëtaena pajamatabëcuene xaina paliwaisianë pecuenecataeliwaisicuenia tsipaebaponajë.d
18 ¡Bajaraxuata, patanejumetaewimë xaniawaetsia patacatsipaebiliwaisi panenamuxuna-ewere! ¡Panejumecanaëjërenua! Pajiwi nejumeyapëtane, nejumexaniatanenua tatsipaebiliwaisi, Dioso jamatabëcuenecaëjëpaeya-exanaenatsi pewajënaeyabelia peyapëtaeponaenexa pajamatabëcueneliwaisi xaina. Pamonae pijinia aponejumeyapëtae, aponejumexaniataenua tatsipaebiliwaisi, paliwaisiwajëto jumeyapëtane picani, bajarapaliwaisi Dioso nacofënëtsia-exanaenatsi —jai Jesús penacaetuatsiwijawabelia.
Jesús pejuyapijiwi, pena yajawa, ewetanubenatsi bojumawelia, pebarëcuaicuaijainexatsi
19 Jesús pejuyapijiwi, pena yajawa, pata bajaraponëjawaberena. Itsiata, acuenebi bajarapamonae pimoxoyotsijawa, tsipaji bitso jiwibitsaëto Jesús matatoyorotsiacaranatatsi.
20 Nexata, pamonae Jesús petsipaebiliwaisi matatoyorotsia jumetaeyenatsi, jumaitsi bajaraPonëjawabelia:
—Patajatuxanenë, ena raja, nejuyapijiwi yajawa, nubena patapënëwerena. Bajarapamonae pina jitsipa pecataejawa —jai Jesús-jawabelia.
21 Nexata, Jesús jumaitsi daxita bajarapamonaejawabelia:
—Pamonae jumetane Dioso pejumeliwaisi, jumecowënëtanua pacuenia Dioso itorobatsi, bajarapamonae jane baja, tajuyapijiwi, taenajiwinua —jai Jesús bajarapamonaejawabelia.
Jesús itaweta piayaijowiboxaneto, malataca yajawa
22 Itsamatacabi Jesús Galilea nacuata, pijajiwi yajawa, runareca jera-ënëabereca. Jumaitsi pijajiwijawabelia:
—Nicabaliatsi mapapucaxaneto itsapanabeliaje —jai.
23 Itsa baja naropobalia, Jesús majitanuca jera-ënëta. Jemata pinijijowiboxaneto najetaruca. Nexata, malataca bitso ayai. Jera-ënëaberena mera epabajarabapona. Belia, wënëcapona jera-ënëaberena. Nexata, bubunaejitsia baja bajarapamo.
24 Nexata, Jesús pemajitanucaenë, pijajiwi ya-itawabatsi. Jumaitsi bajarapamonae:
—¡Patajatuxanenë, waxaitsimi rabaja ya-othopaenatsi! —jai.
Nexata, Jesús, pemajitanucaenëmi, naëcotapuna. Itawetaxuaba jowibo, malataca yajawa. Nexata, jowiboxanetomi baja, ajibi tsaxuabi. Mene-ata baja, wainae ecaxuaba.
25 Xuacujinae, Jesús jumaitsi pijajiwijawabelia:
—Paxamë cajena apopane-itaxutuajamatejemamë. ¿Bajaraxuata bitso pajunawame? —jai.
Nexata, Jesús pijajiwi itsa tane Jesús pecuene-itawetsijawa jowibo, malataca yajawa, jamatabëcuenenajunawiaca bëpënëa. Nexata, Jesús pijajiwi najumaitsi:
—¿Demeta tsipaji maponëje? ¡Peca-itawetsi jowibo, malataca yajawa, pejumecowënëtsinexatsi! ¡Nexata baja, jowibo, malataca yajawa, ajibi tsaxuabi! —najai Jesús pijajiwi.
Jesús wecuacapitsapa dowathiwi peyajawaponaponaenëmi, Gerasa nacuata
26 Jesús, pijajiwi barëyaëta pucaxaneto itsapanabelia, Gerasa nacuayabelia, panacua boca puca itsapanawerena, Galilea nacua canacujitsialia.
27 Itsa Jesús jerawecua nonotajunaya, bajarapanacuapijinë, dowathiwi peyajawaponaponaenë, mata-enenarenatsi. Bajaraponë bajayajebi baja jumasa ponaponabiaba. Pijabota apoponaponae. Jiwimëthëanëjawata saya ponaponabiaba.
28 Nexata, itsa pata Jesús-jawaberena, pematabacabëta nucajunua Jesús pitabarata. Pinijijumeta aëjai. Jumaitsi:
—Jesús, Dioso, pepo-ayaijamatabëcuenenë, pexënatomë, ¿detsa xua jaitame xanëjawaberena? ¡Pexaniacuene bitso cawajëtatsi! ¡Pëtsa abaxë nenabejiobitsia-exaname!e —jai dowathiwi peyajawaponaponaenë Jesús-jawabelia.
29 Bajarapacuenia jumaitsi dowathiwi peyajawaponaponaenë, tsipaji Jesús pemata-enenaejawatatsi, bajaraponë wecua-itaweta dowathiwi pepitsapaenexa. Jumaitsi mapacueniaje: «¡Dowathiwi, bajaraponë baja pawecuapitsapare!», jai. Bajaraponë anijatonë dowathiwi waetababiabatsi. Jiwi cadenamaëtonëta cobecëtabiabi-atatsi, taxucëtabiabi-atatsinua, xaniawaetsia picani pe-ecaenexa, bajaraponë ucubabiaba cadenamaëtonëmi. Dowathiwi pejamatabëcueneta najetabajirawabiaba petusatuabelia.
30 Nexata, Jesús jumaitsi bajaraponëjawabelia:
—¿Detsa pawënëmë? —jai.
Nexata, bajaraponë nawënëpaeba.
—Tawënë raja Legión —jai. Bajarapacuenia nawënëpaeba, tsipaji dowathiwi ayaibitsaëtoxaneto tsijamatabëjinawanapatsi.
31 Bajarapadowathiwi wajëta Jesús-jawabelia, apopewerewerecae-isotojawabelia pitorobiyaniwatsi.
32 Bajarajota, imoxoyo petsutojawata, marranobitsaëtoxaneto xaewanapa. Nexata, dowathiwi bitso wajëta Jesús-jawabelia, petocopatsinexatsi pejonejawanexa marranobitsaëtoxanetojawabelia. Jesús nexata pewajëtsicueniatsi tocopata.
33 Nexata, dowathiwi pebi wecuapitsapecatsi. Junua baja marranobitsaëtoxanetojawabelia. Daxita bajarapamarranobitsaëtoxanetomi cujinaeyeca. Pucaxaneto itapajanituareca othopareca. Nexata, meneta bubuna.
34 Marrano pewetsiwi itsa tane bajarapacuene, rëcëpeca, petsipaebinexa tomarapijiwijawabelia, wayafotusatojawa pe-enaewijawabelia-ata.
35 Nexata, jiwi ponarena petaenexa bajarapacuene. Itsa parena Jesús-jawaberena, taeyeta dowathiwi peyajawaponaponaenëmi pe-ecaejawa Jesús pemuxuneneta. Penaxatatsijawa baja bajaraponë naxatateca. Jamatejema baja. Xaniawaetsia eca. Nexata, bajarapamonae cujunawa Jesús.
36 Pamonae pecuenetaewi Jesús pejamatejemaya-exanaejawa dowathiwi peyajawaponaponaenëmi, paeba pepatsiwijawabelia daxita pacuenia tane.
37 Nexata, daxita Gerasa nacuapijiwi, Jesús pecujunawixaetsi itorobatsi peponaenexa pijanacuawecua. Nexata baja, Jesús runareca jera-ënëabereca, peponaenexa.
38 Nexata, dowathiwi peyajawaponaponaenëmi bitso picani nawajëca Jesús-jawabelia pepëta penaponaenexa.
Itsiata, Jesús apojejai. Jumaitsi bajaraponëjawabelia:
39 —¡Ponare nijamonaejawabelia, netsipaebinexa pacuenia ayaicuene nijatuxanenë Dioso cato-exana! —jai Jesús.
Nexata baja, bajaraponë pona. Tsipaebapona daxita pijatomarapijiwijawabelia pacuenia Jesús jamatejemaya-exanatsi.
Jesús copiaya namuto-epatota jamatejemaya-exana piawitanewa, pacuenia-ata cotocaewi to-asaëya-exana Jairo pexënatoyo, petëpaewayomi
40 Jesús icatsia pecowëyaberena nawiarena jerata, pucaxaneto itsapanaberena. Bajarajota, jiwi ayaibitsaëtoxaneto copiapitatsi barëyaya, tsipaji baja cajena copia-ewetawanapatsi pepatsijawanexarena.
41 Nexata, bajarajota napatajopa Jairo, judíowi pijasinagogabo pewetsinë. Bajaraponë pematabacabëta yaiyataeya Jesús pitabarata nucajunua. Ajumesaëya junata. Jumaitsi Jesús-jawabelia:
—¡Tapëta ponare tajaboyabelia! —jai.
42 Bajarapacuenia Jairo jumaitsi Jesús-jawabelia, tsipaji pexënatowayo, caewayo, pexainaewayo, totëpaejitsiatsi, doce pawaibeje pexainaewayo.
Jesús itsa napona Jairo pepëta, jiwibitsaëtoxaneto pepënaponaewitsi matatoyorotsia cënënanajetarubenatsi.
43 Bajarapajiwibitsaëtoxanetotuatuajëta, petiriwa nanajetaruca, pijanacuene pecapunaewatsi. Bajarapawitane pexainaecujinae, xaina baja doce pawaibeje. Bajarapajana beyajamatabëjiobi tsabiabi. Daxita pexainaejawaximi nawecuawereta, pematamobijawata pewaëbiwitsi. Itsiata baitsi jane, itsanë-ata apocaëjëpaetsi pejamatejemaya-exanaenexatsi bajarapawitanewecua.
44 Nexata, bajarapowa najetabalia Jesús pepënëwelia, jiwibitsaëtoxanetotuatuajëalia. Bajarapowa tojayataba Jesús penaxatatsijawacopia. Bajarapaepatota, pijanacuenemi wecua-ajibitsi baja.
45 Nexata, Jesús jumaitsi:
—¿Jipatsa tanaxatatsijawa netojayataba? —jai.
Daxitajiwi pejumaitsixae, caejiwi-ata apopetojayatsijawa yabara, nexata Pedrobana jumaitsi Jesús-jawabelia:
—Patajatuxanenë, jiwibitsaëtoxaneto raja camatatoyorotsia cënënanajetarubena. Apobeca-ajayatabijibi. ¿Detsa xuajitsia: «Jipatsa tanaxatatsijawa netojayataba», jamë? —jai Pedrobana.
46 Nexata, Jesús jumaitsi:
—Yapëtaniji cajena itsajiwiyo tanaxatatsijawa tanetojayatabijawa, tsipaji tajamatejemaya-exanaesaëjawa xanëjawawelia pitsapa —jai.
47 Nexata, bajarapowa itsa nayapëtane Jesús peyapëtaejawatsi pejamatejemaya-exanaejawatsi piawitanejawami, neconecojai pecajunawi. Pematabacabëta tonucajunua Jesús pitabarata. Bajarapowa nexata nawajunupaeba daxita jiwituatuajëta pacuene yabara tojayataba Jesús penaxatatsijawa. Tsipaebanua pacuenia jamatejemaya-exanatsi.
48 Nexata, Jesús jumaitsi bajarapowajawabelia:
—Xamë tanesiwanajamatabëcuenecopatsixaemë xanëjawaberena, jamatejemamë baja. ¡Ponare baja jamatejema! —jai Jesús bajarapowajawabelia.
49 Bajarapacuenia Jesús pejumaitsitsanucaejawata, namuto-epatota pataba jiwitonë, Jairo pijabojawawerena peponaenë. Bajaraponë jumaitsi Jairojawabelia:
—Nexënatoyo rabaja tëpa. ¡Pëtsa baja matawëjëa jamatabë-itonotaponame Jesús! —jai bajaraponë Jairojawabelia.
50 Jesús jumetae-ata bajarapajume, itsiata jumaitsi Jairojawabelia:
—¡Pëtsa najamatabëxainame! ¡Nesiwanajamatabëcuenecopare saya ëxanëjawaberena! Nexënatowayo raja wecuapanepaena petëpaejawa —jai Jesús.
51 Itsa Jesús pata Jairo pijabota, apotocopatsi ayaibitsaëto pepënajonejawatsi, petëpaewayo pebocaejawabelia. Barëjunua saya mapamatabëxëyoje: Pedro, Santiago, Juan, petëpaewayo paxa, pena-ata.
52 Pamonae Jesús pewajënae ena Jairo pijabota, pinijicuenia matanueyabena petëpanucaewayo.
Nexata, Jesús jumaitsi pematanueyabiwijawabelia:
—¡Pëtsa pamatanueyabame! Pejanawa raja apotëpae. Saya raja majitanuca, —jai, tsipaji Jesús yapëtane piasaëya-exanaejawanexa bajarapowayo.
53 Bajarapacuenia Jesús pejumaitsijawa, bajarapamonae jumecapo̱capo̱natsi, tsipaji yapëtane bajarapowayo baja picani pepacuene petëpaejawa.
54 Nexata, Jesús petëpaewayo cobepita. Jumaitsi pinijijumeta:
—¡Pejanawayo, nonotabapunare! —jai Jesús.
55 Nexata, bajarapacuenia pejumaitsijawata, petëpanucaewayomi namatacotapuna. Asaë baja icatsia.
Nexata, Jesús jumaitsi pejanawayo penajawabelia:
—¡Nexënatowayo pexaejawa rajure! —jai Jesús.
56 Nexata, bajarapowayo paxa, pena-ata, bitso jamatabëcuenenabenajacabeje.
Nexata Jesús jumaitsi bajarapajiwibejejawabelia:
—¡Pëtsa papaebamebeje itsajiwijawabelia-ata pacuene pacato-exanatsibeje! —jai Jesús.