Jesús liwaisi petsipaebijawata, caecuenia canacueneba siete pacuenecataeliwaisibeje
Jesús tsipaeba jiwijawabelia pecuenecataeliwaisi, pabi pe-ubinë peliwaisicuenia
13
Jesús baja itsa najumewereta jiwijawabelia liwaisi petsipaebijawa, pitsapa baja bajarapabowecua, peponaenexa Galilea pucaxanetojawabelia. Pepatsicujinae, ecojopa bajarapapucaxaneto-itapata.
2 Bajarajota, jiwi ayaibitsaëtoxaneto itaxutuanacaetuanatsi. Nexata, Jesús runareca jera-ënëabereca, pe-ecaenexa. Daxita jiwibitsaëtoxaneto nubena tajetabowelia.
3 Nexata Jesús daxitacueneliwaisianë tsipaeba pecuenecataeliwaisianëcuenia. Jesús pepaebijawa taxuxuaba pabi pe-ubinë peliwaisi mapacueniaje:
—Pe-ubinë pona pabiabelia pe-ubinexa.
4 Pabita pepatsicujinae, ubanajetaruca pexucayajabajarabicuenia. Nexata, itsaxu othopa pabituatuajëjawa penajetarucaenamutojumata. Bajarapaxu tsiwëpata baratsui. Xane juwinejewa.
5 Itsaxu pijinia othopa ibopananëjumata, itsajota bitso ira apo-aitayaë. Bepijia picani juwa.
6 Itsiata, itsa icotia bitso ataju, bajarapaxu juwi-ata, tsaquenapona, tsipaji irabereca bitso apo-atabunepepiareca.
7 Itsaxu pijinia othopa pa-irajawata xaina bëpënëa pe-ejuwijawanë pejuwinexa. Nexata, pe-ubixu, pe-ejuwijawanë-ata, caecuenia peyajawajuwixae, bitso matacënënatsi pe-ubijawanëmi.
8 Itsaxu pijinia othopa pexania-irata. Bajarapaxu pejuwicujinae, xaniawaetsia nacuaita. Itsabotonë capitsapa cien paxutoyobeje tsaponae, itsabotonë sesenta paxutoyobeje tsaponae, itsabotonë-ata treinta paxutoyobeje tsaponae.
9 Patacatsipaebiliwaisi, pajiwi jamatabënejumeyapëtane, nenamuxuna-ewetsi xaniawaetsia —jai Jesús petsipaebiwijawabelia.
Jesús xaniawaetsia tsipaeba pijajiwijawabelia xua yabara canacueneba pecuenecataeliwaisianë
10 Jesús pijajiwi imoxoyotatsi peyanijobinexatsi. Jumaitsi mapacueniaje:
—Patajatuxanenë, jiwijawabelia liwaisi itsa tsipaebame, ¿detsa xuajitsia ëpecuenecataeliwaisianëcuenia tsipaebabiabame? —jai Jesús pijajiwi.
11 Nexata, Jesús jumaitsi pijajiwijawabelia:
—Paxamë rabaja, Dioso papijajiwixaemë, pacatocopata paneyapëtaejawa muetsia pexainabuatsiliwaisimi, bajaraPonë, athëbëtatsia pe-ecaenë, papecayanacua-ewetsijawa yabara. Itsiata, itsamonae apoyapëtaeya-exanaetsi bajarapacuene.
12 Pajiwi xaniawaetsia nenamuxuna-eweta tatsipaebiliwaisi, bajarapajiwi jumeyapëtaena. Nexata, Dioso tocopatsianatsi pematatsënëa peyapëtaeponaenexa. Itsiata, pajiwi aponenamuxuna-ewetsi tsane tatsipaebiliwaisi, bajarapajiwi xaniawaetsia apojumeyapëtae tsane. Nexata, Dioso tocopatsianatsi penacofënëtsinexa, xuayowajëto jumeyapëtane picani.
13 Bajaraxuata, liwaisi itsa tsipaebajë bajarapamonae, pecuenecataeliwaisianëcuenia paebajë, tsipaji namuxuna-ewetsi-ata tatsipaebiliwaisi, itsiata apojumeyapëtaecapanepae pajamatabëcuene xaina. Necuenetae-atanua Dioso pesaëta pinijicuene ta-exanaejawa, itsiata apoyapëtaecapanepae pajamatabëcuene yabara exanajë.
14 Bajarapacuenia itsa exana, copiapata jane baja, bajayata tajëwelia Diosojumepaebinë, profeta Isaías-pijinë paliwaisi yaquina bajarapamonae yabara. Jumaitsi mapacueniaje:
«Bajarapamonae picani jumetaena. Itsiata, apojumeyapëtae tsane xua yabara tsipaebianatsi. Bajarapamonae taena picani. Itsiata, apoyapëtae tsane pajamatabëcuene xaina petaejawata.
15 »Bepijiayo apojumeyapëtae tsane, tsipaji ajamatabëcuenetaja tsane. Bepenamuxu-acabiwi tsane, pejumetaeyaniwa tatsipaebiliwaisi. Bepewecua na-itaxutotsaquebiwi tsane, petaeyaniwa ta-exanaecuenejawanë. Bajarapejamatabëcuene-itsitsawanapaexae, xua taena, apoyapëtae tsane pajamatabëcuene xaina. Paliwaisi jumetaena, apojumeyapëtae tsane pejamatabë-ëthëtojawawetsina. Nexata, xanëjawaberena aponajamatabëcuenepënëyorotsi tsane pijaperujujamatabëcuenewecua. Xanëjawaberena itsa najamatabëcuenepënëyorotsipa, nexata jamatabëcuenexanepanaeya-exanaejitsipajë bajarapamonae»,a jai bajayata tajëwelia Isaías-pijinë peyaquinaeliwaisita, bajarapamonae apopejumetaejawanexa yabara.
16 »Itsiata baitsi jane, paxamë baja pajamatabëcuenebarëyamë, tsipaji payapëtaneme pajamatabëcuene xaina xua pataneme. Pajumeyapëtanemenua pajamatabëcuene xaina paliwaisi pajumetaneme.
17 Xaniajanë pacuenia pacatsipaebijitsiatsi. Bajayatami ayaibitsaëto Diosojumepaebiwimi, profetawi, itsamonae-ata Dioso pejitsipaecuenia pejinawanapaewi, necopia-ewetawanapa tanetaenexa picani tapatsijawatsica. Itsiata, aponetaenejewa daxita bajarapamonaemi tëpa baja. Jamatabëjumetaeyabiabanua picani paliwaisianë baja aeconoxae paxamë pacatsipaebaponatsi. Itsiata, bajarapamonaemi apojumetaenejewa bajarapaliwaisianë, tëpa baja —jai Jesús pijajiwijawabelia.
Jesús yapëtaeya-exana pijajiwi pajamatabëcuene xaina pe-ubinë peliwaisi
18 Icatsia, Jesús jumaitsi pijajiwijawabelia:
—¡Xaniawaetsia panenamuxuna-ewere, panejumeyapëtaenexa pajamatabëcuene xaina paliwaisi pacatsipaebatsi, pabita pe-ubinë peliwaisicuenia!
19 Pamonae jumetae-ata tatsipaebiliwaisi Dioso, athëbëtatsia pe-ecaenë, pijajiwi peyanacua-ewetsijawa yabara, itsiata, itsa apojumeyapëtae, nexata dowathi najetaruca pewecuapitsinexa pejumetaeliwaisimi, penacofënëtsia-exanaenexatsi. Bajarapamonae jamatabëcuenejëpa bepe-othopaexutonë namutojumata, piataja-irajawata.
20 Itsamonae pijinia jamatabëcuenejëpa bepe-othopaexutonë ibopananëjumata, itsajota bitso ira apo-aitayaë. Nexata bepijiayo juwa. Bajaratsijamatabëcuene-itsitsi itsamonae tatsipaebiliwaisi yabara. Pejumetaejawata, bepijiayo picani siwajamatabëcuenebarëya.
21 Itsiata baitsi jane, paxu juwa itsajota ira apo-aitayaë, irabereca apo-atabunepepiareca, tsaquenapona bepijiayo piatajujawata, bajaratsijamatabëcuene-itsitsi bajarapamonae. Jamatabëcuenebarëyaya jumetae-ata, apo-ajamatabëcuenesaë tsawanapae piasiwajawa bajarapaliwaisi, tsipaji pepacuene apojumexaniatae pejamatabë-ëthëtowetsina. Nexata itsa tocopiapatatsi daxita piayapëbejecuene, itsa yaliwaisibatsinua tatsipaebiliwaisi yabara, nexata bepijiayo copaba piasiwajawa bajarapaliwaisi.
22 »Paxu pijinia othopa pa-irajawata xaina bëpënëa pe-ejuwijawanë pejuwinexa. Pejuwicujinae, bitso matacënënatsi pe-ejuwijawanë. Bajaratsijamatabëcuene-itsitsi itsamonae tatsipaebiliwaisi yabara. Jumetane picani bajarapaliwaisi. Itsiata baitsi jane, bitso jamatabëcuenecënënatsi mapanacuapijicuenejawanëje, pejitsipaexae-ata ayaijawa palata pexainaenexa. Nexata, tatsipaebiliwaisi juwi-ata pejamatabë-ëthëtota, apojamatabëcuenexanetsitsi pijaperujujamatabëcuenewecua. Pacuenia pabita pe-ubibotonë acuaijibi pe-ejuwijawanë pematacënënaexaetsi, bajaratsijamatabëcuene-itsitsi pamonae, jamatabëcuenecënënatsi mapanacuapijicuenejawanëje Dioso pijacuenejawanëwecua.
23 Pacuenia pijinia pexania-irajawata pejuwixu nawitsia nacuaitabiaba, bajaratsijamatabëcuene-itsitsi pamonae xaniawaetsia jumetane, jumeyapëtanenua tatsipaebiliwaisi. Nexata, pewajënaeyabelia jamatabëcuenexanetaponatsi pijaperujujamatabëcuenewecua, pexanawanapaenexa Dioso pejitsipaecuenia, pacuenia pexania-irata pejuwibotonë capitsapa cien paxutoyobeje, sesenta paxutoyobeje, treinta paxutoyobeje-ata tsaponae —jai Jesús pijajiwijawabelia.
Jesús tsipaeba jiwijawabelia pecuenecataeliwaisi, trigoxu pe-ubituatuajëjawa peto-ubijawatsi pibisiawiriajawa peliwaisicuenia
24 Icatsia, Jesús itsa pecuenecataeliwaisi tsipaeba tajetabota penubenaewijawabelia. Jumaitsi mapacueniaje:
—Dioso, athëbëtatsia pe-ecaenë, pijajiwi peyanacua-ewetsijawa yabara cuenejëpa pabi pexainaenë, pe-ubijawa pexaniawiriatrigoxu pijapabita.
25 Itsiata baitsi jane, pamonae penacuenebiwi pemajitsijawata, pabi pexainaenë pijawajabitsaënë tojunuatsi pijapabijawata. Nexata, trigotuatuajëjawa to-ubatsi pibisiawiriajawanë, pejëpaejawanë trigobotonë. Bajaraxuacujinae, wemaxëpona baja.
26 Nexata trigo juwa baja. Witsabanua. Itsa baja trigobotonë namatonota, nexata, matapania bajarajota nayapëtane pibisiawiriajawanë peyajawanamatonotsijawa.
27 Nexata pabi pexainaenë pijajiwi pata petsipaebinexatsi. Bajarapamonae jumaitsi: «Nijapabita ubame ëpexaniawiriatrigoxu. ¿Detsaeta pacuenia pitsapa trigojawata, peyajawajuwinexa pibisiawiriajawa?», jai bajaraponë pijajiwi.
28 Nexata, pabixainaenë jumaitsi: «Tajawajabitsaënë raeta bajaraxua uba», jai. Nexata, pijajiwi jumaitsitsi: «¿Jitsipame tsaja bajaraxua pataxunaejawa?», jai.
29 Itsiata baitsi jane, pabixainaenë jumaitsi: «Jume, tsipaji panexunaejawata payajawaxunaejitsipame trigobotonë.
30 Copatsianatsi abaxë penacuaitsinexa. Nexata penotsimatacabi itorobianajë tanetonotsiwi copiaya pecaetuatsinexa pibisiawiriajawanë. Pepacunuanë exanaena. Bajaraxuacujinae, bajaraxua tajuitsiana. Bajaraxuacujinae, ëtrigoxu netonotsiana,b ta-etabiabibota taneto-etsinexa», jai pabixainaenë pijajiwijawabelia —jai Jesús jiwi ayaibitsaëtoxanetojawabelia.
Jesús tsipaeba jiwijawabelia pecuenecataeliwaisi, bepijiayo pewitsabijawa mostazanaemëyo peliwaisicuenia
31 Icatsia, Jesús itsapecuenecataeliwaisi tsipaeba tajetabota penubenaewijawabelia. Jumaitsi mapacueniaje:
—Pabita mostazaxuto pe-ubicujinae, bepijiayo witsaba, penaexanaenexa pepamëyo. Bajarapijinia pacuenia, Dioso, athëbëtatsia pe-ecaenë, peyanacua-ewetsijawa pijajiwi, bepijia witsabaponaena.
32 Mostazaxu raja bitso tsiquirixutoxi daxitawiria pane-ubixuwecua. Itsiata baitsi jane, pejuwicujinae, bepijia witsaba, penaexanaenexa pinijinaemë itsape-ubijawanëwecua. Nexata, baratsui pata bajarapanaemëanë pemaxërananëjawata, pematapenanë pexanaenexa. Bajarapijinia pacuenia, Dioso pijajiwi, tsiquiribitsaëtoyocuenia taxuxuabi-ata tsane, bepijiayo ayaibitsaëto naexanaena, Dioso peyanacua-ewetsimatacabita —jai Jesús jiwi ayaibitsaëtoxanetojawabelia.
Jesús tsipaba jiwijawabelia pecuenecataeliwaisi, pan pexanaematabënexa, levadura pefufunaeya-exanaejawa peliwaisicuenia
33 Icatsia, Jesús itsapecuenecataeliwaisi tsipaeba tajetabota penubenaewijawabelia. Jumaitsi mapacueniaje:
—Dioso, athëbëtatsia pe-ecaenë, pijajiwi peyanacua-ewetsijawa, cuenejëpa petiriwa pecanacuenebijawa levadura pexainaematabëyo, pematajërëatsijawa acueyabi patarrobejepijijawa trigobenonë pexanaematabë. Nexata, pacuenia levadura pexainaematabëyota, pematajërëatsijawata yacaëjëpa daxita bajarapamatabëjawabelia pefufunaeya-exanaenexa, bajarapijinia pacuenia liwaisi yacaëjëpaena daxita nacuajawa, pijajiwi caejiwiyobeje paebanajetarubenae-ata Dioso, athëbëtatsia pe-ecaenë, pijajiwi peyanacua-ewetsijawanexa —jai Jesús jiwi ayaibitsaëtoxanetojawabelia.
Xua yabara Jesús tsipaebabiaba pecuenecataeliwaisianëcuenia
34 Jesús itsa tsipaeba jiwijawabelia Dioso, athëbëtatsia pe-ecaenë, pijajiwi peyanacua-ewetsijawa yabara, tsipaebapona ëpecuenecataeliwaisianëcuenia.
35 Bajarapacuenia itsa tsipaebapona, copiapata jane baja pacuenia Diosojumepaebinëmi, profetanë, bajayata tajëwelia yaquina Mesías yabara. Peyaquinaebaxutota, profetanë jumaitsi mapacueniaje:
«Jiwi itsa tsipaebajë, liwaisi tsipaebianajë pecuenecataeliwaisicuenia. Tsipaebianajë pitsicuene Dioso nacua pexanaejawaweliacujinae itsajiwi-ata abaxë apoyapëtae»,c jai tajëwelia bajayata Diosojumepaebinëmi, profetanë, peyaquinaebaxutota.
Jesús pijajiwi yapëtaeya-exana pajamatabëcuene xaina trigobotonëtuatuajëjawa pejuwijawa pibisiawiriajawa peliwaisi
36 Penapëjiobicujinae tajetabota penubenaewi, Jesús boya joneya. Bajarapabota Jesús pijajiwi imoxoyorenatsi, peyanijobinexatsi. Jumaitsi:
—¡Patajatuxanenë, panetsipaebare pajamatabëcuene xaina paliwaisi tsipaebame pibisiawiriajawa pejuwijawa trigobotonëtuatuajëjawa! —jai Jesús-jawabelia.
37 Nexata, Jesús jumaitsi pijajiwijawabelia:
—«Ponë uba pexaniawiriatrigoxu», itsa janë, xanë rabaja, Daxitajiwi Pematapijinënë, nayabarajanë.
38 «Pijapabi», itsa janë, mapanacua yabaraje, janë. «Pexaniawiriatrigoxu», itsa janë, Dioso, athëbëtatsia pe-ecaenë, pijajiwi peyanacua-ewetsijawa yabara, janë. «Pibisiawiriajawa pejuwijawa», itsa janë, dowathi pejitsipaecuenia pexanawanapaewi yabara, janë.
39 «Pabixainaenë pijawajabitsaënë», itsa janë, dowathi yabara, janë. «Penotsimatacabi», itsa janë, mapanacua pewerewerecaematacabijawanexa yabara janë. «Tanetonotsiwi», itsa janë, ángelewi yabara janë.
40 Nexata, pacuenia pibisiawiriajawanë caetuata pexuabinexa isotojawabelia, bajarapijinia pacuenia itorobianajë tajajiwi, ángelewi, pecaetuatsinexa dowathi pijajiwi, pexuabinexatsi apopewerewerecae-isotojawabeliad mapanacuaje pewerewerecaematacabi.
41 Bajarapamatacabi, Xanë, Daxitajiwi Pematapijinënë, itorobianajë taja-ángelewi peponaenexa daxita tayanacua-ewetsinacuajawa, pecaetuatsinexa daxita pamonae pibisiacuene pexanabiabiwi, pamonae-ata pejamatabëcuenebijianaewi itsamonaejawabelia pibisiacuene pexanaeya-exanabiabinexa.
42 Bajarapamonae xuabianatsie apopewerewerecae-isotojawabelia. Bajarajota nuena. Nawonosiniana bitso penawixaetaexae.
43 Itsiata baitsi jane, pamonae Dioso pejitsipaecuenia exanawanapa perabënaitayotsiana pacuenia matacabipijijuameto cotia-itsi, bajaraperabë-itsi tsane taxa Dioso peyanacua-ewetsinacuata. Pajiwi jamatabënejumeyapëtane xua pacatsipaebatsi Dioso, athëbëtatsia pe-ecaenë, pijajiwi peyanacua-ewetsijawa yabara, nenamuxuna-ewetsi xaniawaetsia —jai Jesús pijajiwijawabelia.
Jesús tsipaeba jiwijawabelia pecuenecataeliwaisi, jiwitonë pecaxitajarabijawa bitso penamatamotsijawanë, pematayatabuatsijawami peliwaisicuenia
44 Icatsia, Jesús itsapecuenecataeliwaisi tsipaeba pijajiwijawabelia:
—Dioso, athëbëtatsia pe-ecaenë, pijajiwi peyanacua-ewetsinacuajawabelia pejonejawanexa cuenejëpa bitso penamatamotsijawanë, pebi irata pematayatetsijawa. Bajaraxuanë bobenae-ata, jiwi apoyapëtae. Nexata, juya itsanë bexëajawabelia bajaraxuanë caxitajarabeta irata. Abaxë bajaraponë caecuenia apojutsi bajaraxua. Saya mata-acateta bajarajota, itsanë pija-irajawata pecaxitajarabetsixae. Nexata, bitso penamatamotsijawanëxae, jamatabëcuenebarëyaya pona pijaboyabelia. Xuacujinae, canajeta daxita pexainaejawaximi, peyacomuatsinexa bajarapa-ira, pecabarëyanexa bajarapapenamatamotsijawanë —jai Jesús pijajiwijawabelia.
Jesús tsipaeba jiwijawabelia pecuenecataeliwaisi, bitso penamatamotsiperlawënëjawa peliwaisicuenia
45 Icatsia, Jesús itsapecuenecataeliwaisi tsipaeba pijajiwijawabelia:
—Pajiwi jaita pejonenexa Dioso, athëbëtatsia pe-ecaenë, pijajiwi peyanacua-ewetsinacuajawabelia, cuenejëpa ponë pejaitsinë, penatocomuatsinexa bitso pexaniawiriaperlajawanë.
46 Nexata, itsa caxitajarabaxuaba pexaniawiriaperlajawa, bitso penamatamotsijawa itsajawanëwecua, pona pijaboyabelia pecanajetsinexa daxita pexainaejawami, penatocomuatsinexa bajarapaperlajawa —jai Jesús pijajiwijawabelia.
Jesús tsipaeba jiwijawabelia pecuenecataeliwaisi, dujuai peyamatajucaejawa peliwaisicuenia
47 Icatsia, Jesús itsapecuenecataeliwaisi tsipaeba pijajiwijawabelia:
—Dioso, athëbëtatsia pe-ecaenë, pijajiwi peyanacua-ewetsinacuajawabelia, cuenejëpa dujuai bepeyamatajucaejawa. Dujuai peyamatajucaejawa itsa xuareca meniareca daxitawiria dujuai yamatajutsina.
48 Itsa wënëca bajaraxua, nexata juta tajetabojawabelia. Bajarajota, itapetapona pawiriadujuai Dioso tocopatatsi pexaenexa. Bajarapadujuai jebapona bemapirejawabelia. Pawiriadujuai pijinia Dioso jani-itawetatsi pexaeyaniwa xuabapona.
49 Bajarapijinia itsi tsane nacua pewerewerecaematacabi. Ángelewi ponaena, petsataponaenexa pibisiacuene pexanaewi, Dioso pejitsipaecuenia pejinawanapaewiwecua.
50 Nexata, pibisiacuene pexanaewi xuabianatsi apopewerewerecae-isotojawabelia. Bajarajota nuena. Nawonosiniananua, bitso penawixaetaexae —jai Jesús pijajiwijawabelia.
Jesús tsipaeba jiwijawabelia pecuenecataeliwaisi, bitso penamatamotsijawanë, pejanajawanë, perujujawanë-ata peliwaisicuenia
51 Bajarapaliwaisianë petsipaebicujinae, Jesús yanijoba pijajiwijawabelia.
—¿Panejumeyapëtaneme tsabaja daxita xua yabara pacatsipaebatsi? —jai Jesús.
Nexata Jesús pijajiwi jumaitsi:
—Jãjã, pacajumeyapëtanetsi rabaja —jai.
52 Nexata Jesús jumaitsi pijajiwijawabelia:
—Ponë judíowi pecujarubinë-ata, Dioso penajumecopatsiliwaisi Moisés-pijinëta, itsa jumexaniataena tatsipaebiliwaisi, Dioso, athëbëtatsia pe-ecaenë, pijajiwi peyanacua-ewetsijawa yabara, bajaraponë-ata tajajiwitonë tsane. Nexata, pacuenia bo pexainaenë pijabowecua jutapona bitso penamatamotsijawanë, pejanajawanë, perujujawanë-ata, bajarapijinia jamatabëcuene-itsi tsane pejumexaniataenë bajarapaliwaisibeje yabara. Bajaraponë capitsapaena peyapëtaeliwaisianëwecua, pejanaliwaisianë, xanë taliwaisianë, perujuliwaisianë-ata, Dioso penajumecopatsiliwaisi Moisés-pijinëta, pexaniajailiwaisi petsitajëtsinexa jiwijawabelia —jai Jesús pijajiwijawabelia.
Jesús penawiatsijawa yabara pijanacuayaberena, Nazaret tomaraberena
53 Jesús baja penajumeweretsicujinae jiwijawabelia petsipaebijawa pecuenecataeliwaisianë, pona baja icatsia itsajawabelia.
54 Nawiata baja pewitsabinacuayaberena, Nazaret tomaraberena. Nexata, taxuxuaba liwaisi petsipaebijawa judíowi pijasinagogabota.f Pejumetaewitsi siwajamatabëcuenenabenajacatsi. Bajarapamonae Jesús yabara najumaitsi mapacueniaje:
—¿Detsaeta jota maponë nacujaruba peyapëtaenexa mapaliwaisije? ¿Detsaeta pacuenia caëjëpatsi mapacuenia Dioso pesaëta pinijicuene pexanaenexaje?
55 Maponëje carpinteronëmi, Maríabeje, pexënato. Pejuyapijiwi pijinia, Santiago, José, Simón, Judas.
56 Daxita bajaraponë pejuyapijiwaxi wajatomarata jinawanapa. ¿Detsa werena nexata capitsapa paliwaisianë nacatsipaebapona maponëje? —najai bajarapamonae Jesús yabara, pecuene-aebixae ayaijamatabëcuenenëcuene.
57 Nexata, petaexaetsi caetomarata penajuajinawanapaejawa, Jesús petsipaebiliwaisi apomuxujitsipaetsi. Jume-aebatsinua.
Nexata, bajaraxua yabara Jesús jumaitsi bajarapamonaejawabelia:
—Bajarapacuenia itsi tsabiabi. Daxita nacuanëjawa Diosojumepaebiwimi, profetawi, bayaiyatanetsi Dioso pitorobinëtsicuenia. Itsiata, pijanacuapijiwi, pijamonae-ata, apoyaiyataeyabiabitsi —jai Jesús pijatomarapijiwijawabelia.
58 Jesús pijatomarapijiwi pecuene-aebixaetsi, Dioso pesaëta pinijicuene bitso apotsita-exanae.