Jesús pacuenia jamatabëcuene-ëjëbatsi dowathi
4
Jesús pebautizabicujinaetsi, Espíritu Santo tsijamatabëcuenewënëcatsi. Jordán menewecua nawiataponarena. Nexata, Espíritu Santo ponaeya-exanatsi petusatonacuayabelia.
2 Bajarajotalia, Jesús ponapona cuarenta pamatacabibeje, pexaejawa xaenejewa. Bajarapamatacabibeje pepanepaecujinae, Jesús bitso piajani. Nexata, piajanijawata dowathi jamatabëcuene-ëjëba,a pibisiacuene picani pexanaeya-exanaenexa.
3 Dowathi jumaitsi Jesús-jawabelia:
—¡Itsa pepacuene Dioso pexënatomë, itorobare mapa-ibotoyoje penaexanaenexa panbë! —jai.
4 Nexata, Jesús jumaitsi dowathijawabelia:
—¡Jume raja! Dioso raja pejumeliwaisibaxutota jumaitsi mapacueniaje: «Jiwi raja aponamatawenonae ëpexaejawata piasaëtsawanapaenexa. Biji rajane, namatawenona daxita Dioso peliwaisi pejumexaniataejawa piajamatabëcuenesaëtsawanapaenexa. Namatawenonanua pejumecowënëtsijawa»,b jai raja Dioso pejumeliwaisibaxutota —jai Jesús dowathijawabelia.
5 Bajaraxuacujinae, Jesús barëliatsi dowathi pinijitsutoxanetojawabetsia, pebarëjunaenexatsi. Bajarawetsica Jesús tsitajëtatsi bepijiacuenia daxitanacuanë, papexaniacuenenua xaina.
6 Nexata, jumaitsi Jesús-jawabelia:
—Xanë raja carajutsianatsi daxita mapanacuanëje, neyanacua-ewetsinënexa daxita bajarapanacuanë. Ayaijamatabëcuenenëmë nenaexanaenamenua. Daxita bajaraxuanë Dioso nerajuta. Nexata, necaëjëpa juya tarajutsinexa pajiwijawabelia jamatabërajutajë.
7 Daxita bajaraxuanë nijajawa tsane, itsa baitsi jane, nematabacabëta netonucajonename ayaijamatabëcuenenënë netaeya taitabarata —jai dowathi.
8 Nexata, Jesús jumaitsi dowathijawabelia:
—¡Satanás,c newecuanatixire! Dioso raja pejumeliwaisibaxutota jumaitsi mapacueniaje: «Daxitajiwi asiwaya, yaiyataeya, pematabacabëta nubenae caenë, pepopetuxanenë Dioso pitabarata. Tonacuenebinua bajara-ëPonënexa»,d jai raja Dioso pejumeliwaisibaxutota —jai Jesús dowathijawabelia.
9 Bajaraxuacujinae abaxë, icatsia Jesús barëliatsi dowathi Jerusalén tomarabelia. Bajarajota, barëjunayatsi temploboxanetomatatuyabetsia. Bajarajotatsia dowathi icatsia jumaitsi Jesús-jawabelia:
—Itsa pepacuene Dioso pexënatomë, jirewaremeca irabereca,
10 tsipaji xamë ne-itsacueneyaniwa peca-ewetsinexa, Dioso pejumeliwaisibaxutota jumaitsi mapacueniaje: «Dioso itorobianica pija-ángelewi peca-ewetsinexa.
11 Nexata, pecobeta cayotsiana pecataxutsaquitsiyaniwa ibotonëjawabelia»,e jai raja Dioso pejumeliwaisibaxutota —jai dowathi.
12 Jesús nexata, icatsia jumaitsi dowathijawabelia:
—¡Jume raja! Dioso raja pijinia pejumeliwaisibaxutota jumaitsi mapacueniaje: «¡Pëtsa jamatabëcuene-ëjëtame petuxanenë Dioso, neyapëtaenexa itsa xaniajai pecato-exanaejawanexa pejumaitsicuenia!»,f jai raja Dioso pejumeliwaisibaxutota —jai Jesús dowathijawabelia.
13 Bajaraxuacujinae, itsa baja dowathi daxitacuene Jesús jamatabëcuene-ëjëbiweretatsi pibisiacuene picani pexanaeya-exanaenexatsi, nexata abaxë copatatsi, itsamatacabijawabeliag icatsia pejamatabëcuene-ëjëtsinexatsi.
Jesús taxuxuaba pexanaponaponaejawa Dioso pijacuenejawanë, Galilea nacuata
14 Jesús baja itsa nawiata petusatonacuawerena, Galilea nacuayaberena, Espíritu Santo tsijamatabëcuenewënëcatsi, Dioso pijacuene pexanaponaponaenexa. Nexata, daxita Galilea nacuapijiwi wënëliwaisitanetsi.
15 Judíowi pasinagogabonëjawa nacaetuatabiaba, Jesús cujarubanajetaruca jiwijawabelia Dioso peliwaisi. Daxitajiwi pexaniacuenia wënëxaniatatsi pecujarubicuene yabara.
Jesús nawiata pijatomara, Nazaret-jawabelia
16 Penajetarucaejawata Galilea nacuajawa, Jesús pata pewitsabitomarata, Nazaret-jawata. Nexata, pexanabiabicuenia, judíowi penacuera-ewetsimatacabita, Jesús najoneya judíowi pasinagogabota nacaetuatabiaba. Bajarajota nonotapuna, Dioso pejumeliwaisibaxuto petsimuxulebinexa, daxita pejumetaenexa, bajarajota pe-enaewi.
17 Nexata, Jesús tsicoberutatsi profeta Isaías-pijinë bajayata peyaquinaebaxuto. Nexata, Jesús pebaxupatsijawata caxitajaraba paliwaisi tsimuxulebijitsia. Nexata jane baja, tsimuxulebanuca itsajota Mesías yabara jumaitsi mapacueniaje:
18 «Dioso petuxanenë pija-Espíritu Santo nejamatabëcuenecaëjëpaeya-exana, pijacuene tato-exanaponaponaenexa. Nexata, tane-itapetsixae, tsipaebaponajë pexanialiwaisi pijapibisiacuene bepeyajamatabëcuenejiobiwijawabelia. Tatsipaebiliwaisita, jamatabëcuene-isicaenajë bepejamatabëcuenecëbiwitsi pijaneconi, jamatabëcuene-itayotsianajë piajamatabëcuene-itaquiriwimi, apopeyapëtaexae pexaniajailiwaisi, jamatabëcueneyawenonaenajënua tacapanepaenexa pejamatabëcuenebejiobitabiabiwitsi pijawajabitsaë.
19 Nexata, tsipaebanajetarucajë pacuenia copiapata jane baja, pamatacabi Dioso tsiwajënaenajamatabëcuenewereta pecapanepaenexa pijajiwi»,h pejaijawata Isaías-pijinë peyaquinaebaxutota, Jesús tsimuxulebanuca.
20 Bajarapabaxuto pebaxu-acatsicujinae, tocanawiata penacuenebabiabinëjawabelia sinagogabojawata. Bajaraxuacujinae, Jesús baja ecareca pelebicujinae penajumeliwaisipaebinexai pelebiliwaisi. Daxita bajarapabota pe-enaewi, asaëya taeyenatsi.
21 Nexata, icatsia Jesús jumaitsi bajarapamonaejawabelia:
—Aeconoxae, xua pacatsimuxulebatsi Dioso pejumeliwaisibaxutota, mapamatacabitaje copiapata jane baja —jai bajarapamonaejawabelia.
22 Nexata, daxitajiwi pexaniacuenia wënëcacuaicuaijai Jesús yabara. Jamatabëcuenenabenajaca, Jesús petsipaebixae pexanialiwaisi. Itsiata, bajarapacuenia cuenetae-ata, bajarapamonaeyajuwënëwi jamatabëcuene-aebiatanetsi. Nexata, nayanijobenaeya najumaitsi:
—Apoxaniajai cajena. ApoMesías. Biji rajane, saya Josépijinë pexënato —najai tsenae Jesús yabara.
23 Nexata, Jesús pejamatabëcueneyapëtaexae pacuenia siwajamatabëjumaitsitsi, jumaitsi bajarapamonaejawabelia:
—Yapëtaniji cajena patanejumaitsijawanexamë panijanacuapijiwi pejumaitsicuenia, xanëjawaberena: «Xamë jiwi newaëbinë, copiaya nijacuata nawaëbianame patacajumexaniataenexa», patanejamëjawanexa. Bajarapacuenia panejumaitsimë tsane, tsipaji pajitsipame patacatsita-exanaejawa papinijicuenejawanë panewënëliwaisitaneme tatsita-exanaejawa Capernaúm tomarapijiwijawabelia, jamatejema patanejumexaniataenexamë patacajumaitsijawa —jai sinagogabota pe-enaewijawabelia.
24 Mataropotsia Jesús jumaitsi:
—Xaniajanë cajena pacuenia pacatsipaebijitsiatsi. Itsanë-ata, Diosojumepaebinëmi, profetanë, pijanacuapijiwi xaniawaetsia apojumexaniataeyabiabitsi petsipaebiliwaisi. Jamatabëcuene-aebiataeyabiabatsi, pacuenia paxamë patajanacuapijiwimë panejamatabëcuene-aebiataneme.
25 ¡Paneyapëtaenexa pexaniajailiwaisicuene patacatsipaebijawa, pacanaëjëre xua profetawimi exana! Bajayata, pamatacabi profeta, Elíasj ponapona Israel nacuata, bajarapamatacabi, emarapae-ata, itsiata ema apojopae acueyabi pawaibeje pematatsënëa. Bajaraxuata, daxita nacuanëjawa bitso janibo. Bitso bejiobi tsawanapae. Bajarapamatacabita, jinawanapa pamonajiwi pewecuatëpaewanëtsi ayaibitsaëto Israel nacuata.
26 Itsiata, profeta Elías Dioso apo-itorobitsi peyawenonaenexa bajarapamonaeyajuwënëwa. Biji rajane, itorobatsi peponaenexa Israel nacuawecua, Sarepta tomarajawabelia, itsajota ponapona powa apojudíowa, pamona pewecuatëpaewatsi, peyawenonaenexa. Sarepta tomara eca Sidón nacuata.
27 Bajarapijinia pacuenia, profeta Eliseopijinë peponaponaematacabita, jinawanapa ayaibitsaëto bajayajebi bitso peperabëtsabanaewi Israel nacuata. Itsiata, bajarapamatacabi profeta Eliseopijinë bajarapamonaeyajuwënëwi-ata, caenë-ata apojamatejemaya-exanae. Biji rajane, caenë bajayajebi bitso peperabëtsabanaenë Naamán, Siria nacuawerena pepatsinë, jamatejemaya-exana —jai Jesús sinagogabota pe-enaewijawabelia.
28 Bajarapamonae itsa jumetane bajarapacuenia Jesús pejumaitsijawa, bitso bara-anaepanatsi.
29 Bajaraxuata, tsimaxënonobapunatsi. Jesús baja waetabatsi. Caponaliatsi tomarapënëyabelia. Cajunayatsinua patsutoyenepanata eca Nazaret tomara, petorotajarabinexatsireca picani bajarapabëxëfotuareca.
30 Itsiata baitsi jane, Jesús bajarapamonaetuatuajëta najetarucae-ata, wecua-ajibi tsarucae. Pona Capernaúm tomarabelia, pëtaenejewatsi. Bajarapacuenia Jesús wecuapanepa bajarapamonae.
Jesús wecuacapitsapa dowathi peyajawaponaponaenë
31 Jesús itsa pata Capernaúm tomarata, Galilea nacuata pe-ecaetomara, nexata jiwi liwaisi tsipaebabiaba, caesábado canacujitsia, pamatacabi judíowi nacuera-ewetabiaba.
32 Itsa bajarapamonae jumetane Jesús petsipaebijawa, jamatabëcuenenabenajaca, tsipaji peyapëtaenëcuenia xaniawaetsia tsipaebabiaba, Dioso pitorobinëtsicuenia.
33 Itsa sábadomatacabijawa,k judíowi penacaetuatabiabisinagogabota pebi, dowathi peyajawaponaponaenë, na-eca. Nexata, bajaraponë Jesús-jawabelia wawajai tsaxuabi. Jumaitsi:
34 —¡Jesús, Nazaret tomarapijinëmë,l panewecuaponare baja! ¿Detsa xua pane-exanaejitsiamë? ¿Najetarucame tsaja patanewerebiabinexamë? Xanë cajena cayapëtanetsi. Dioso pexënatocuenemë, pepopexaniajamatabëcuenenëmë —jai dowathi peyajawaponaponaenë Jesús-jawabelia.
35 Jesús pejume-itawetsijawata dowathi, jumaitsi:
—¡Moyamëre! ¡Wecuapitsapare baja maponëje! —jai Jesús.
Nexata, dowathi pebi xuabatsi irata, daxita bajarapamonae pitabarata. Itsiata, itsacuene exanaenejewatsi, wecuapitsapatsi.
36 Daxitajiwi, bajarapacuene itsa tane, bitso jamatabëcuenenabenajaca. Najumaitsi mapacueniaje:
—¡Bajaraponë penamatacaitorobisaë xaina! Pitawetsicuenia dowathi jumecowënëtatsi, pepitsapaenexa jiwiwecua. ¿Depitsicuene meta nacacujaruba bajarapacuenia pexanaejawata? —najai bajarapamonae.
37 Nexata, bajarapacuenia Jesús pexanaponaejawa yabara, itsamonae paebapona. Nexata, wënëliwaisitanetsi daxita bajarapanacuapijiwi.
Jesús jamatejemaya-exana Simón Pedro pame
38 Jesús pewecuapitsapaecujinae sinagogabo, pona Simón Pedro pijaboyalia. Itsiata pepatsiwajënae, Simón, pijawa pena bitso romaebanucatsi. Jesús pejonecujinae, bajarapabota pejinawanapaewi wajëca bajaraPonëjawabelia pejematajemaya-exanaenexa bajarapowa.
39 Jesús nexata cujilia bajarapowa. Wecua-itaweta peromaebijawatsi. Nexata baja, bajarapowa jamatejema. Pejamatejemacujinae, Jesús-bana pexaejawa to-exanatsi.
Jesús jamatejemaya-exana ayaibitsaëto piawitanewi
40 Itsa baja a̱jena̱ merawijitsia, daxitawiriawixae pexainaewi, tocapataponatsi Jesús-jawaberena, Pedro pijabojawata. Jesús nexata, caejiwi canacujitsia peperabëjayataponaejawata jamatejemaya-exanapona.
41 Itsamonae ayaibitsaëto, dowathi peyajawajinawanapaewi, Jesús wecuacapitsapapona. Nexata, dowathi itsa pitsapabiaba, wawajai tsabiabi Jesús-jawabelia:
—¡Xamë raja Dioso pexënatomë! —jai tsabiabi.
Nexata, Jesús jume-itawetabiaba bajarapadowathiwi. Apotocopatabiabi pecuaicuaijainexa, petsipaebiyaniwa itsamonaejawabelia, tsipaji dowathi xaniawaetsia yapëtanetsi bajaraPonë Cristonëcuene, athëbëwetsica Dioso pitorobijawatsi jiwi pecapanepaenexa.
Jesús tsipaebanajetaruca pexanialiwaisi Galilea nacuajawa
42 Pepobajayacunua, Jesús pitsapa Capernaúm tomarawecua, peponaponaenexa caenë pija-epato pesaicayojawabelia. Itsiata, jiwi yapëjaitatsi itsajota Jesús eca. Itsa caxitajarabatsi bajarapamonae, asiwatsi pewecuaponaeyaniwatsi itsajawabelia.
43 Nexata, Jesús jumaitsi bajarapamonaejawabelia:
—Itsatomaranëjawa-ata raja netsicaruca tatsipaebijawa pexanialiwaisi, pacuenia Dioso yanacua-ewetsijitsia pijajiwi mapanacuataje. Bajaraxua yabara, Dioso baja cajena nitoroba —jai Jesús.
44 Nexata, Jesús wecuapona bajarapamonae, petsipaebanajetarucaenexa Judea nacuajawa pejinawanapaewi, judíowi pasinagogabonëjawa-ata nacaetuatabiaba.