Pacuenia Jesús jamatabëcuene-ëjëbatsi dowathi, yabara peliwaisi
4
Jesús pebautizabicujinaetsi, Espíritu Santo ponaeya-exanatsi petusatonacuayabelia, bajarajotalia dowathi pejamatabëcuene-ëjëbinexatsi.
2 Nexata petusatonacuata, Jesús ponapona cuarenta pamatacabibeje, cuarenta pamerawibeje yajawa, pexaejawa xaenejewa. Nexata, Jesús bitso piajani.
3 Nexata dowathi, ponë jiwi pejamatabëcuene-ëjëbabiabinë, Jesús imoxoyotatsi pejamatabëcuene-ëjëbinexatsi, picani pibisiacuene pexanaeya-exanaenexatsi. Jumaitsi Jesús-jawabelia:
—¡Itsa pepacuene Dioso pexënatomë, itorobare mapa-ibotonëje penaexanaenexa panbëxi! —jai dowathi.
4 Nexata, Jesús jumecanawiata mapacueniaje:
—¡Jume raja! Dioso raja pejumeliwaisibaxutota jumaitsi mapacueniaje: «Jiwi raja ëpexaejawa apowëna-asaë tsawanapae. Biji rajane, namatawenona Dioso peliwaisi pejumexaniataejawa, pejumecowënëtsijawanua, piajamatabëcuenesaëtsawanapaenexa»,a jai raja Dioso pejumeliwaisibaxutota —jai Jesús dowathijawabelia.
5 Bajaraxuacujinae, icatsia Jesús barëliatsi dowathi Jerusalén tomarabelia. Barëjunayatsi templobo matatuyabetsia.
6 Nexata, templobo matatutatsia, dowathi icatsia jumaitsi Jesús-jawabelia:
—Itsa pepacuene Dioso pexënatomë, jirewaremeca irabereca, tsipaji xamë nitsacueneyaniwa peca-ewetsinexa Dioso pejumeliwaisibaxutota jumaitsi mapacueniaje:
«Dioso itorobianica pija-ángelewi peca-ewetsinexa. Nexata, pecobeta cayotsiana pecataxutsaquitsiyaniwa ibotonëjawabelia»,b jai raja Dioso pejumeliwaisibaxutota xamë peca-ewetsinexa ángelewi —jai dowathi.
7 Nexata, Jesús icatsia jumaitsi dowathijawabelia:
—¡Jume raja! Dioso raja icatsia pejumeliwaisibaxutota jumaitsi mapacueniaje: «¡Pëtsa jamatabëcuene-ëjëtame petuxanenë Dioso, neyapëtaenexa itsa xaniajai pecato-exanaenexa pejumaitsicuenia!»,c jai Dioso pejumeliwaisibaxutota —jai Jesús.
8 Jesús icatsia barëliatsi dowathi pinijitsutoxanetojawabelia. Barëjunayatsi petsutojumabetsia. Nexata, bajarapatsutojumawetsica dowathi Jesús tsitajëtatsi daxitanacuanë, daxitacuene bajarapanacuanëta pexainaejawanë yajawa.
9 Nexata, icatsia jumaitsi Jesús-jawabelia:
—Ayaijamatabëcuenenënë netaeya taitabarata nematabacabëta itsa netonucaename, nexata daxitacuene xua catsitajëtatsi, carajutsianatsi —jai dowathi.
10 Nexata Jesús jumecanawiata mapacueniaje:
—¡Dowathi, newecuanatixire! Dioso raja pejumeliwaisibaxutota jumaitsi mapacueniaje: «¡Daxitajiwi asiwaya, yaiyataeya, pematabacabëta nubenae caenë, pepoPetuxanenë Dioso pitabarata! ¡Tonacuenebinua bajara-ëPonënexa!», jai raja Dioso pejumeliwaisibaxutota —jai Jesús dowathijawabelia.
11 Nexata baja, dowathi wecuapona Jesús. Bajaraxuacujinae, ángelewi patsica Jesús peyawenonaenexatsi.
Jesús taxuxuaba Galilea nacuata penacuenebijawa Dioso pijacuene
12 Jesús itsa wënëliwaisitane Juan, jiwi pebautizabinë, pe-etsijawatsi penaneconitsiwi pejebabiabibota,d bajaraPonë caewëalia pona Galilea nacuayabelia.
13 Pepatsicujinae Nazaret tomarata, aponacopatsi bajarajota peponaponaenexa. Icatsia pona Capernaúm tomarajawabelia peponaponaenexa. Bajarapatomara eca pucaxaneto-itapata, Zabulón-pijinë, Neftalípijinëbeje pemomoxi, pejinawanapaenacuata.
14 Bajarapacuenia Jesús itsa patajopa Capernaúm tomarata, Dioso peliwaisi jiwi petsipaebinexa, copiapata jane baja pacuenia bajayata profeta Isaías-pijinë tajëwelia peyaquinaeliwaisita, Mesías pexanaejawanexa. Jumaitsi mapacueniaje:
15-16 «Zabulon, Neftalí nacuapijiwibeje, pucaxanetomuxuneneta pejinawanapaewi, pexaniajailiwaisi, Dioso peliwaisi, apopeyapëtaexae, bepitaquirinacuanëjawa jinawanapa. Bajarapijinia pacuenia, Galilea nacuata, Jordán-mene itsapanawetsina pebocaenacua, apojudíowi pejinawanapaenacua, bajarapamonae-ata bepitaquirinacuanëjawa jinawanapa. Nexata pacuenia pinijicotiaxaneto itayotsipa, petaenexa xaniawaetsia, bajarapijinia pacuenia bajarapamonae jamatabëcuene-itayotsianatsi, itsa tsipaebianatsi Diosojawabelia pecapanepaeliwaisinexatsi»,e jai tajëwelia profeta Isaías-pijinë peyaquinaeliwaisita Mesías petsipaebijawanexa.
17 Nexata Capernaúm tomarata, Jesús copiaya jane baja taxuxuaba jiwi petsipaebijawa Dioso peliwaisi. Jumaitsi tsaponae mapacueniaje: «Imoxoyo rabaja pewajënae pecopiapatsijawanexa Dioso athëbëtatsia pe-ecaenë papijajiwimë papecayanacua-ewetsimatacabinexa mapanacuataje. ¡Nexata baja, pacopabare pibisiacuene pane-exanabiabijawa! ¡Panajamatabëcuenepënëyorore Diosojawabelia!», jai tsaponae Jesús jiwijawabelia.
Pacuenia Jesús junata cuatro ponëbeje dujuai peyamatajucabiabiwi, yabara peliwaisi
18 Itsamatacabi penajetarucaejawata Galilea pucaxaneto-itapaya, Jesús taenuta anijanëbeje nacaebananëbeje, Simón, Andrés-beje. Simón itsawënë Pedro. Bajaraponëbeje dujuai peyamatajucabiabinëbeje. Mallata yamatajucabiababeje dujuai, pecanajetabiabinexabeje.
19 Nexata Jesús jumaitsi bajaraponëbejejawabelia:
—¡Naxatsia! ¡Panepënaponarebeje! Pacacujarubianatsibeje jiwi panejucaenexabeje. Pacuenia dujuai payamatajucabiabamebeje, bajarapacuenia jiwi panecujarubijawatabeje tajumeliwaisi, pajucaenamebeje mapanacuapijicuenewecuaje, Dioso pijajiwinexa —jai Jesús.
20 Nexata, bajaraponëbeje dujuai peyamatajucabiabijawamibeje, bajarajota puenetabuatabeje. Nexata baja, naponabeje Jesús pepëta.
21 Bajaraxuacujinae, icatsia webeliayo pewajënaeyabelia Jesús barëpona. Icatsia taenuta anijanëbeje, nacaebananëbeje, Zebedeo pexënatobeje; Santiago, Juan-beje. Pijajera-ënëta paxa yajawa xanebaponaponabeje dujuai peyamatajucaejawanënexabeje. Icatsia, bajaraponëbeje-ata Jesús junata.
22 Nexata bajarajota, paxa puenetanutabeje, jera yajawa. Naponabeje baja Jesús pepëta.
Pacuenia Jesús liwaisi tsipaeba jiwi ayaibitsaëtoxanetojawabelia, yabara peliwaisi
23 Jesús jane baja, najetaruca daxita Galilea nacuajawa. Nexata caetomara canacujitsia, judíowi pijasinagogabonëjawa,f jiwijawabelia tsipaebapona pexanialiwaisi, paliwaisi yapëtaeya-exana imoxoyo pewajënae Dioso pijajiwi pewetsimatacabijawanexa.g Jamatejemaya-exanaponanua daxitawiriawitane pexainaewimi.
24 Bajarapacuenia pexananajetarucaexae, belia daxita Siria nacuajawa pejinawanapaewi-ata wënëliwaisitanetsi Jesús. Nexata bajarapanacuata pejinawanapaewi, Jesús tocapatatsi daxitawiriawitane pexainaewi, itsamonae dowathi peyajawajinawanapaewi, petëpajoneyabiabiwi, petabusipacuenabiwitsinua, bajaraponë pejamatejemaya-exanaenexa. Jesús jamatejemaya-exanapona daxita bajarapamonae.
25 Nexata Jesús pënaponatsi jiwi ayaibitsaëtoxaneto Galilea nacuapijiwi, Decápolis nacuapijiwi, Jerusalén tomarapijiwi, Judea nacuapijiwi, Jordán-mene itsapanawerenapijiwi-ata.