Pacuenia Simón-bana bitso ayaijawaxaneto dujuai yamatajuta, yabara peliwaisi
5
Itsamatacabi, Jesús penucaponaejawata Genesareta pucaxaneto-itapaya, jiwi ayaibitsaëtoxaneto cënënaponatsi, imoxoyo pejumetaenexatsi Jesús petsipaebijawa Dioso peliwaisi.
2 Nexata, Jesús anijajerabeje taeruta puca-itapata. Bajarapamobeje dujuai peyamatajucaewi Simón-bana wecuanonobajunarëcëpa, pequiatsinexa dujuai peyamatajucaejawanë.
3 Nexata, Jesús runareca Simón pijajera-ënëabereca. Itoroba Simón, jeraxainaenë, peyatorotsinexatsilia pucatuatuajëyojawabelia. Jesús jera-ënëjawawerena liwaisi tsipaebeca bajarapajiwibitsaëtoxanetojawabelia.
4 Itsa baja Jesús copata jiwi liwaisi petsipaebijawa, nexata jumaitsi Simón-jawabelia:
—¡Jera pawaeremelia piawajubuajawabelia! ¡Pacoparemeca paneyamatajucaejawa, dujuai paneyamatajutsinexa! —jai.
5 Nexata, Simón jumaitsi Jesús-jawabelia:
—Necujarubinë, payamatajucajë rabaja picani merawijebi. Apopayamatajutsinë caenëyo-ata. Itsiata, pacuenia pane-itorobame, pacopatsiarecajë dujuai patayamatajucaejawa —jai Simón.
6 Nexata, copareca pitorobicueniatsi. Itsa jutsina peyamatajucaejawa, ayaijawaxaneto bitso dujuai yajutsina. Nexata, bajaraxua imoxoyo peyamaë-ucu-ucucae.
7 Nexata, itacowaebarena penajuayamatajucaewi, penubenaewi puca-itapatalia, peponaenexarena itsamota, peyawenonaenexatsi. Nexata, bajarapamonae ponarena. Wënëta bajarapamobeje dujuai. Imoxoyo peyabubunae bajarapamobeje.
8 Nexata, Simón Pedro itsa tane bajarapacuene, pematabacabëta tonuca Jesús pitabarata. Jumaitsi Jesús-jawabelia:
—¡Tajatuxanenë, newecuanatixire, tsipaji xanë pibisiacuene ta-exanaenë! —jai Simón.
9 Bajarapacuenia Simón jumaitsi, tsipaji penajuayamatajucaewi yajawa bitso jamatabëcuenenabenajaca, bitso ayaijawaxaneto dujuai peyamatajutsixae.
10 Bajarapacuenia peyanatsinëtsibeje Santiago, Juan-beje, Zebedeo pexënatobeje, jamatabëcuenenabenajacabeje. Itsiata, Simón pematabacabëta penucaejawata Jesús jumaitsitsi mapacueniaje:
—¡Pëtsa najunawiacame! Ajena mapamatacabijawaweliacujinaeje, naexanaename jiwi nejucaenënexa. Nexata, pacuenia dujuai jucabiabame, bajarapacuenia jiwi jucaename Dioso pijajiwinexa —jai Jesús Simón-jawabelia.
11 Nexata, bajarapamonae perobobocaecujinae jerabeje tajetabojawabelia, pecajinawanapaejawaximi pueneba itsamonaejawata. Bajaraxuacujinae, pënapona baja Jesús.
Jesús jamatejemaya-exana bajayajebi bitso peperabëtsabanaenë
12 Jesús itsa ponapona Galilea nacuata, bajarapanacuapijitomaranëyajuwënë, patajopa Jesús-jawaberena bajayajebi bitso peperabëtsabanaenë. Itsa bajaraponë tane Jesús, pematabacabëta irataeya bocajunua pitabarata. Wajëta pinijicuenia Jesús-jawabelia. Jumaitsi:
—Tajatuxanenë, yapëtaniji pecacuenecaëjëpaejawa tanejamatejemaya-exanaenexamë mapawitanewecuaje. ¿Apojitsipaemë meta tanejamatejemaya-exanaenexamë? —jai.
13 Nexata, Jesús pecobeta perabëjayalia bitso peperabëtsabanaenë. Jumaitsi bajaraponëjawabelia:
—Jãjã, jitsipajë cajena. Jamatejemamë rabaja —jai.
Bajarapaepatota, peperabëtsabanaenëmi perabëxanepananajereca.
14 Nexata, Jesús jume-itaweta bajaraponë petsipaebiyaniwa itsajiwiyojawabelia-ata, pacuenia jamatejemaya-exanatsi. Jumaitsi:
—¡Sacerdotenëjawabelia tsitanaitajëremelia, templobota penacuenebabiabinë, pecataenexa pecawecua-ajibijawa neperabëtsabanaejawami! Yajawacapatsianamenua dajubi pacuenia ca-itorobab nexanaenexa Dioso penajumecopatsiliwaisi Moisés-pijinëta. Nexata, sacerdotenë catotajuitsiana altar-jumata Diosojawabelia, pecawecua-ajibinexa nenaxuirabicuenemi Dioso pitabarata, niawitanejamatabëcuene. Nexata, jiwi yapëtaena pepacuene baja pecawecua-ajibijawa nenaxuirabicuenemic —jai picani bajaraponëjawabelia jiwi ayaibitsaëto pewënëliwaisitaeyaniwatsi.
15 Itsiata, Jesús pewajënaeyabelia wënëliwaisitaeponatsi daxita bajarapanacuapijiwi. Bajaraxuata, ayaibitsaëtoxaneto patapona bajaraPonëjawaberena, penamuxuna-ewetsinexatsi petsipaebiliwaisi, pejamatejemaya-exanaenexanua piawitanejawanëwecua.
16 Itsiata, Jesús itsajawata jiwi wecuaponabiaba pesaicayojawabelia, pewajëtabiabinexa Diosojawabelia.
Jesús jamatejemaya-exana petabusipacuenabinëtsi
17 Itsamatacabi, Jesús jiwi liwaisi petsipaebijawata, bajarajota na-ena fariseowi, itsamonae-ata peyapëtaeya-exanaewi pajamatabëcueneliwaisi xaina caejawa canacujitsia Dioso penajumecopatsiliwaisi Moisés-pijinëta. Bajarapamonae pata Galilea nacuata pe-enaetomaranëjawawerena, Judea nacuata pe-enaetomaranëjawawerena, Jerusalén tomarawerena-ata. Nexata, bajarapamatacabi Jesús Dioso pesaëta caëjëpaeya-exanatsi jiwi pejamatejemaya-exanaenexa piawitanejawawecua.
18 Bajarapaepatota, capatabuatapona itsamonae, pebijiwi, piawitanenë, ponë petabusipacuenabinëtsi, camayota peyawëtacaranajetarubenaewi. Bajarapamonae picani bajaraponë boyalia yawëtacarajonejitsialia, peyabuatsinexa Jesús pitabarata.
19 Itsiata, acuenebi boyalia pecajonejawa, tsipaji bitso jiwi bajarapabo yawënëca. Nexata, bajarapamonae petabusipacuenabinëtsi bojumabetsia cajunaya. Bomatatujawawetsica wojo-exana. Nexata, bajarapawojotuatsica petabusipacuenabinëtsi camayota yacopatsicatsi jiwituatuajëatsica, Jesús pitabarayatsica.
20 Jesús jamatabëcueneyapëtane pacuenia bajarapamonae siwanajamatabëcuenecopatatsi, petojamatejemaya-exanaenexa ponë yacopatsicatsi. Nexata, Jesús petabusipacuenabinëtsijawabelia jumaitsi mapacueniaje:
—Pibisiacuene rabaja nexanaeneconimi Diosojawabelia cawecua-ajibia-exanatsi —jai bajaraponëjawabelia.
21 Nexata, judíowi pecujarubiwi, fariseowinua, itsa jumetaeyena Jesús pejumaitsijawa bajarapacuenia, najamatabëxainena bëpënëa mapacueniaje: «¿De meta maponëje? ¡Dioso apopejitsipaecuenia pecuaicuaijainë! Diosowecua itsanë-ata cajena apocaëjëpaetsi itsajiwi pibisiacuene pexanaeneconimi pewecua-ajibia-exanaenexa. Caenë Dioso cuenecaëjëpatsi bajarapacuenia pexanaejawa», jamatabëjai tsenae Jesús yabara.
22 Nexata, Jesús pejamatabëcueneyapëtaexae bajarapacuenia bëpënëa pesiwanajamatabëxainaejawatsi, jumaitsi bajarapamonaejawabelia:
—¡Pëtsa patanecuene-aebicueniamë panesiwanajamatabëxainame, tsipaji baja cajena xanë Dioso necopata jiwi pibisiacuene pexanaeneconi tawecua-ajibia-exanaenexa!
23 Xaniawaetsia patanejumecanaëjëtsinexamë tajumaitsijume yabara, pacayanijobatsi mapacueniaje: ¿Detsa xua tsiyapëxanepanatsi jiwi pejumaitsinexa, xaniajaiya penacujumataenexa mapatabusipacuenabinëtsijawabelia: «Cawecua-ajibia-exanatsi rabaja pibisiacuene nexanaeneconimi», ¿pejaijawa? Itsa jume, «¡Nonotapunare! ¡Ponare baja!», pejaijawa. Bajarapacuenia jiwi jumaitsi-ata tsipae, pejumaitsicuenia itsa apotopitsapaetsi, ajumematamobi tsipae, tsipaji baja cajena caenë Dioso cuenecaëjëpatsi bajarapacuene pexanaenexa.
24 Nexata, paneyapëtaenexa Dioso tanecuenecaëjëpaeya-exanaejawa, Xanë, Daxitajiwi Pematapijinënë, mapanacuata jiwi pibisiacuene pexanaeneconimi tawecua-ajibia-exanaenexa, pataename pacuenia tajamatejemaya-exanaejawata maponëjawabeliaje —jai Jesús bajarapamonaejawabelia.
Nexata, Jesús jumaitsi petabusipacuenabinëtsijawabelia:
—¡Nonotapunare! ¡Nijacamayo pire! ¡Nijaboyabelia baja ponare! —jai Jesús.
25 Nexata jane baja, bajarapacuenia Jesús pejumaitsijawata, petabusipacuenabinëmitsi nonotabapuna, daxitajiwi pitabarata. Pebocaecamayo pita. Pona baja pijaboyabelia. Penajetarucaejawata, namutua, wënëxaniatanajetaruca Dioso: «¡Diosomë, ayaijamatabëcuenenëmë! ¡Pexaniacuene neto-exaname!», jai tsanajetarucae.
26 Nexata, daxita pamonae tane petabusipacuenabinëmitsi baja pejamatejemajawa, pinijicuenia jamatabëcuenenabenajaca. Bëpënëa bitso junawanua. Nexata, pexaniacuenia wënëxaniatapona Dioso pexanaecuene yabara. Najumaitsi:
—Ajena, mapamatacabitaje, tanetsi Dioso pinijicuene pexanaejawa —najai bajarapamonae.
Jesús junata Leví pijajiwitonënexa
27 Jesús pejamatejemaya-exanaecujinae petabusipacuenabinëtsi, bajarapabowecua pitsapa. Penajetarucaejawata, Jesús taeyeta Leví,d impuestomatamo pematamoyanijobabiabinë. Bajaraponë eca pabota jiwijawabelia matamoyanijobabiaba impuestojamatabëcuene. Nexata, Jesús jumaitsi bajaraponëbelia:
—¡Leví, nepënaponare! —jai Jesús.
28 Jejai Leví. Nexata, nonotapuna. Copata baja daxita pacuene bajarajota nacuenebabiaba. Pënapona baja Jesús.
29 Bajaraxuacujinae, Leví pijabota pinijifiesta to-exana Jesús, pijajiwinexa-ata. Nexata, Jesús napata bajarapabota. Leví yajawa-eca mesamuxuneneta ayaibitsaëto jiwijawabelia impuestojamatabëcuene pematamoyanijobabiabiwi, itsamonae-ata Leví peyapëtaewitsi. Daxita bajarapamonae najuaxane.
30 Nexata, fariseowi, itsamonae-ata peyapëtaeya-exanaewi pajamatabëcueneliwaisi xaina caejawa canacujitsia Dioso penajumecopatsiliwaisi Moisés-pijinëta, pecuenetaejawata anaeya baracuaicuaijai Jesús pijajiwijawabelia. Jumaitsi:
—Jesús rabaja naneconita Diosojawabelia, tsipaji impuestojamatabëcuene pematamoyanijobabiabiwi, piajamatabëcuenebejewijawatanua, naxaeyeca pexaejawa —jai bajarapamonae Jesús yabara.
31 Jesús itsa jumetane fariseowi, judíowi pecujarubiwi-ata, pebaracuaicuaijaijawatsi, jumaitsi bajarapamonaejawabelia mapacueniaje:
—Pajamatabëcuenenawëxaniabame. Pewaëbinë raja apowaëbi pejamatejemawi. Biji rajane, waëba piawitanewi.
32 Bajarapijinia xanë-ata itsinë. Apopatajopaenë tajunatsinexa pianeconijibiwi, penajamatabëcuenepënëyorotsinexa Diosojawabelia, pibisiacuene pexanaejawawecua. Biji rajane, patajopajë tajunatsinexa pijaneconi pexainaewi, penajamatabëcuenepënëyorotsinexa Diosojawabelia, bajarapamonae Dioso pejitsipaecuenia pexanawanapaenexa —jai Jesús anaeya pebaracuaicuaijaiwitsijawabelia.
Jesús yanijobatsi xua yabara pijajiwi japasa apojinawanapae Dioso pitabarata
33 Itsamatacabi, itsamonae fariseowi, judíowi pecujarubiwi-ata, jumaitsi Jesús-jawabelia:
—Juan pijajiwi, fariseowi pijajiwinua, japasa jinawanapabiaba, pamatacabibeje jitsipa caejamatabëcuene pexainaejawa Diosojawabelia. Bajarapacuenia wajëcabiabanua Diosojawabelia. ¿Detsa xuajitsia xamë nijajiwi japasa apojinawanapae Diosojawabelia pewajëcaematacabianë-ata? —jai bajarapamonae.
34 Jesús nexata pecuenecataeliwaisicuenia jumaitsi bajarapamonaejawabelia:
—Pamonae junatatsi penapitsijiwibeje pijafiestajawabelia penaxaenexa, japasa apo-enae itsa abaxë yajawa-ecatsi pejananacojiobinë.
35 Itsiata baitsi jane, itsa pejananacojiobinë tsimaxëpatsipatsi pijawajabitsaë pewecuacaponaenexatsi itsajawabelia, nexata pecowëta bajarapamonae apoxae tsipae pexaejawa, tsipaji bitso wënajamatabëxainaejitsipa. Bajarapijinia itsi tajajiwi-ata. Tayajawaponaponae-epato abaxë acuenebi japasa pejinawanapaejawa. Itsiata, pamatacabi xanë necaponaena bajarapamonaewecua, bajarapamatacabi jane baja, japasa jinawanapaena, bitso tane-itaxanaexae —jai Jesús peyanijobiwitsijawabelia.
36 Nexata, bajarapamonae perujujamatabëcuene baja penawecuacopatsinexa, Jesús liwaisi itsa tsipaeba pecuenecataeliwaisicuenia, bajarapamonae pejumexaniataenexa ëpejanaliwaisi. Anijajamatabëcuenebeje pexainaeyaniwa, jumaitsi mapacueniaje:
—Perujunaxatatsijawa itsa wojorucaejitsipa, itsajiwi-ata apocaucutsi tsipae pepanayo pejananaxatatsijawata, pecatsatarutsinexa perujunaxatatsi-esetojawabelia. Bajarapacuenia itsa exanaejitsipa, najëpaeya daxitajawabeje bijianaejitsipa. Nexata, pejananaxatatsijawa pewojoto xainaejitsipa. Pijinia perujunaxatatsijawa pejanapanayo apoyajawaxanepanae tsipae. Bajarapijinia pacuenia, apopacatoxanepanae paneyajawajumecowënëtsijawa papejanaliwaisi pacatsipaebatsi, panijaperujujumecowënëtsicuenee yajawa.
37 »Bajarapijinia pacuenia, itsajiwi-ata apo-epacae pejanavinoranë perujubocodoruanëjawabelia, bajayajebi peyajebinexa, piatanevinoranë pexanaenexa. Bajaraporanë pejumalitsëxë abaxë pexainaexae, yatititibia tsipae perujubocodoruanë apopeyanayeretsixae tsipae xaniawaetsia. Nexata, itsa yatititibia tsipae, naxuabijitsipa vinoranëmi, perujubocodoromi-ata.
38 Bajaraxuata, pejanavinoranë be-epaca pejanabocodoruanëjawabelia, peyatititibiayaniwa, pemenenaxuabiyaniwanua vinoranë, pebocodoruanë-ata.
39 Orijibia, pajiwi piatanevinora apa, apojitsipae piapaenexa pejanavinora, tsipaji jamatabëjumaitsi: «Perujuvinora bitso xanepana pejanavinora matatoxenetsia», jamatabëjai —jai Jesús bajarapamonaejawabelia, pejanaliwaisi pematajërëatsiyaniwa perujujumecowënëtsicuenejawabelia.