Juan, jiwibautizabinë, liwaisi tsipaebanajetaruca jiwijawabelia petusatonacuata
3
Pamatacabijawa Jesús abaxë itsa ponapona Nazaret tomarata, Juan, jiwibautizabinë, najetaruca Judea nacuatusatojawa.
2 Nexata, Dioso pitorobicueniatsi, jiwijawabelia paebanajetaruca mapaliwaisicueniaje: «Imoxoyo rabaja pewajënae pecopiapatsijawanexa Dioso, athëbëtatsia pe-ecaenë, pijajiwi peyanacua-ewetsimatacabinexaa mapanacuataje. ¡Nexata baja, pacopabare pibisiacuene pane-exanabiabijawa! ¡Panajamatabëcuenepënëyorore Diosojawabelia!», jai tsanajetarucae Juan pepaebijawata.
3 Bajarapacuenia Juan jiwi itsa tsipaebanajetaruca, copiapata jane baja, pacuenia profeta Isaías-pijinë bajayata tajëwelia yaquina Juan yabara. Jumaitsi mapacueniaje:
«Tanejumeliwaisipaebinë wawajaiya jumaitsi tsane petusatonacuajawa mapacueniaje: ‘¡Pacuenia jiwi baxaneba panamutowerena najetarucaejitsia petuxanenë, batorowia-exananua namuto, bajarapijinia pacuenia paxamë-ata panajamatabëcuenexaniawaere pepoPetuxanenë pepatsiwajënaeyarena!’, jai tsane tanejumeliwaisipaebinë», jai profeta Isaías-pijinë peyaquinaeliwaisita.
4 Juan naxatata camellona̱ta pexanaejawa. Na-epacëta cuerobocoto. Xaeyabiaba bosese, jabëra yajawa.
5 Juan petsipaebiliwaisi pejumetaenexatsi, muxunapatabiabatsi Jerusalén tomarapijiwi, Judea nacuapijiwi, Jordán mene imoxoyopijiwi-ata.
6 Nexata, bajarapamonae pejumetaecujinae Juan pepaebiliwaisi, itsa natoyapëtane pibisiacuene pexanaejawa, rowialia Diosojawabelia nawecuapaebapona. Nexata, bajarapamonae Juan bautizabapona Jordán meneta.
7 Juan itsa tane ayaibitsaëto, fariseoyajuwënëwi,b saduceoyajuwënëwi-ata,c pepatsijawa pebautizabinexa picani, bajaraponë jumaitsi bajarapamonaejawabelia:
—¡Panejamatabëcuenenawëxaniabiwi! Paxamë pajamatabëcuenejëpame saya jomo, bitso pianaepanaewi. ¿Jipatsa pacacujaruba panewecuapanepaejawanexa Dioso papecananeconitsia-exanaejawanexa panenabautizabijawata? Pacuenia jomo barëcëpeca, itsa tane isoto petajuenajetarucaejawa pewecuapanepaenexa, bajarapijinia pacuenia paxamë-ata pa-exaname picani, itsa papatame xanëjawaberena patacabautizabinexa, panajamatabëcuenepënëyorotsinejewamë Diosojawabelia, pibisiacuene pane-exanawanapaejawawecua. Bajarapacuenia pajamatabëjumaitsi-atamë, apopawecuapanepaemë tsane Dioso papecananeconitsia-exanaejawanexa panijaneconijamatabëcuene. Biji rajane, caranata paca-imoxoyotapona Dioso papecananeconitsia-exanaematacabinexa.
8 ¡Itsa pajitsipame Dioso papecacapanepaejawa, panajamatabëcuene-itajëre Diosojawabelia panenajamatabëcuenepënëyorotsijawa panecopabijawata pibisiacuene pane-exanabiabijawa, juya Dioso pejitsipaecuenia pane-exanawanapaenexa! Nexata, daxitajiwi pacayapëtaena pepacuene panenajamatabëcuenepënëyorotsijawa Diosojawabelia.
9 ¡Pëtsa pajamatabëjumaitsimë: «Waxaitsi raja Dioso aponacananeconitsia-exanae tsane, Abraham-pijinë pemomoxixaetsi»,d pajamatabëjamë pëtsa! Dioso itsa siwajamatabëcuenebëjai tsipae Abraham-pijinë pemomoxi pexainaenexa, caëjëpatsi raja ayaibitsaëto pecapitsapaejawa mapa-ibotonëmijawawerenaje. Bajaraxuata, Abraham-pijinë papemomoxixaemë apopawecuapanepaemë tsane Dioso papecananeconitsia-exanaejawanexa panijaneconijamatabëcuene.
10 Biji rajane, tsiteca Dioso pacananeconitsia-exanaena. Pacuenia pe-ubinaenë pexainaenë, ponaenë apotonacuaitsitsi pexaniacuai, bajaraponaenë nicata sipalita. Yatabutopa cajucanua, petajuitsinexa isotota. Bajarapijinia pacuenia, paxamë-ata Dioso pacaxuabiana apopewerewerecae-isotojawabelia papecatajuenexa, apopanecapitsapaexae pexanaicuenejawanë pane-exanaejawata, bajaraPonë pejitsipaecuenejawanë.
11 »Xanë raja saya jiwi bautizabaponajë merata,e penajamatabëcuenepënëyorotsicujinae Diosojawabelia, pibisiacuene pexanabiabijawawecua, juya Dioso pejitsipaecuenia pejinawanapaenexa. Itsiata baitsi jane, Ponë tacowëwerena najetarucaena, ayaijamatabëcuenenë xanëwecua. BajaraPonë rajane baja pacatsijamatabëcuenejoneya-exanaena Espíritu Santo. Itsamonae pijinia naneconitsia-exanaenatsi isotota pijaneconijamatabëcuene. BajaraPonëwecua, xanë saya beweliajamatabëcuenenënë. Wecua-auranënua pijazapato-ata tatocaponaenexa, bepijajiwitonëcuenianë.
12 Nexata, bajaraPonë xaniawaetsia pacacuenecanaëjëtsiana. Pacuenia arroz-xainaenë baja itsa wereta pesiricaejawa, jëaba pepitsinexa ëpexu. Pejëabijawata saicaya tsatapona ëpexu pesiwecua. Nexata, ëpexu xaniawaeteta pe-etsibojawabelia. Pesi pijinia penetapona wayafuabelia, petajuitsinexa isotota. Bajarapijinia pacuenia, paxamë-ata tacowëwerena penajetarucaenë pacacuenecanaëjëbiana. Nexata pamonae Dioso pejitsipaecuenia jinawanapa, capanepaenatsi pejinawanapaenexa Dioso pijanacuatatsia. Pamonae pijinia Dioso apopejitsipaecuene exanawanapa, naneconitsia-exanaenatsi daxitamatacabijawabelianexa apopewerewerecae-isotojawabelia —jai Juan fariseowi, saduceomonaejawabelia-ata.
Pacuenia Juan bautizaba Jesús, yabara peliwaisi
13 Pamatacabi Juan bautizabaponapona jiwi Jordán meneta, Jesús naropota Galilea nacuajawawerena, peponaenexa Jordán menejawabelia. Nexata, itsa pata mene-itapata, imoxoyota Juan-jawabelia, pebautizabinexatsi.
14 Juan picani apojitsipae pebautizabijawa Jesús. Bajaraxuata, jumaitsi Jesús-jawabelia:
—¿Detsa xuajitsia patame tacabautizabinexa? Biji rajane, xamë benebautizabame —jai Juan.
15 Itsiata, Jesús jumaitsi bajaraponëjawabelia:
—Aeconoxae itsiata, pacuenia baja cawajëtatsi, neto-exanaename. Xanepana waja-exanaenexa daxita Dioso wajanaca-itorobicuenia —jai.
Nexata baja, Juan jejai.
16 Jesús pebautizabicujinaetsi, nonotajuna menewetsina. Bajarapaepatota, Jesús tane athëbëtatsia itaboxo penapatsijawa, Espíritu Santo perunaejawatsica be-ucucuto. Nexata tsimatarunaicatsi.
17 Bajarapaepatota, Juan jumetane athëbëwetsica Dioso pejumaitsijawa: «Mara ponë taxënato ta-asiwanëje. Siwajamatabëcuenebarëyanë bitso», pejaijawa.