Juan jiwibautizabinë jiwi liwaisi tsipaebanajetaruca petusatonacuajawa
3
Emperador, Tiberio, itsa xaina quince pawaibeje peyanacua-ewetsijawa Imperio Romano nacua, bajarapijinia pamatacabijawa, Poncio Pilato, gobernador-nëcuenia, yanacua-eweta Judea nacua. Herodes pijinia yanacua-eweta Galilea nacua. Herodes pejuyapijinë-ata, Felipe, pijinia yanacua-eweta anijanacuabeje, Iturea nacua, Traconite nacua-ata. Lisanias pijinia yanacua-eweta Abilinia nacua.
2 Bajarapijinia pamatacabi Anás, Caifás-beje, Israel nacuata sacerdotewi pepopenamatacaitorobinëbeje tsaponaponae. Pamatacabi bajarapapewetsiwi ewetawanapa pijanacuanëpijiwi, bajarapamatacabijawa Dioso yapëtaeya-exanapona Juan, Zacarías pexënatojawabelia, petusatonacuata peponaponaejawata, paliwaisi tsipaebanajetarucaejitsia jiwijawabelia.
3 Nexata, Juan tsipaebanajetaruca bajarapaliwaisi daxita Jordán-mene imoxoyo pe-enaenacuanëjawa pejinawanapaewi. Jumaitsi tsanajetarucae jiwijawabelia: «¡Panajamatabëcuenepënëyorore Diosojawabelia, pibisiacuene pane-exanabiabijawawecua, juya Dioso pejitsipaecuenia panejinawanapaenexa! Nexata, pacabautizabianatsi Dioso papecawecua-ajibia-exanaenexaa pibisiacuene pane-exanaeneconimi», jai tsanajetarucae jiwijawabelia.
4 Bajarapacuenia Juan jiwi itsa tsipaebanajetaruca, copiajopa jane baja, pacuenia profeta Isaías-pijinë bajayata tajëwelia yaquina bajarapacuene yabara. Jumaitsi mapacueniaje:
«Tanejumeliwaisipaebinë wawajaiya jumaitsi tsane petusatonacuata mapacueniaje: ‘Tsiwajënaexanebi, Tsiwajënaerowia-exanaenua panamutowerena najetarucaejitsia petuxanenë.
5 »Daxita namutua perubenaefotonë, atsa othocae penamatajëpaeya-exanaenexa. Daxita petsutonëmi, piniji-ibotsutoxanetonëmi-ata, namatajëpaeya-exanae. Rowia-exanae penatoxorobinamutonëmi-ata. Namutua pebobenaemëthëanëmi acabinua, penamatajëpaeya-exanaenexa.
6 »Nexata, daxitanacuanëpijiwi taena Dioso peto-itorobijawatsi pecapanepaenënexatsi pijaneconiwecua’»,b jai baja cajena profeta Isaías-pijinë bajayata peyaquinaeliwaisita, Juan pexanaecuenenexa yabara.
7 Bajarapamatacabi, jiwi ayaibitsaëtoxaneto patapona Juan-jawaberena pebautizabinexatsi picani, Dioso pewecua-ajibia-exanaenexatsi pijaneconi, aponajamatabëcuenepënëyorotsi-ata Diosojawabelia, pibisiacuene pexanaejawawecua. Nexata, Juan jumaitsi bajarapamonaejawabelia:
—¡Panejamatabëcuenenawëxaniabiwi cajena! Pacuenia jomo rëcëpeca itsa tane isoto petajuenajetarucaejawa, bajarasaya pajamatabëcuene-itsimë. Patacabautizabijawata picani pajitsipame panewecuapanepaenexa Dioso papecananeconitsia-exanaematacabi. Itsiata baitsi jane, paca-imoxoyota baja Dioso pamatacabi pacananeconitsia-exanaejitsia.
8 ¡Itsa pajitsipame Dioso papecacapanepaejawa, panajamatabëcuene-itajëre pexaniacuene pane-exanawanapaejawata, Dioso pejitsipaecuenia pane-exanawanapaenexa! Nexata, daxitajiwi pacayapëtaena pepacuene baja panenajamatabëcuenepënëyorotsijawa Diosojawabelia, pibisiacuene pane-exanaejawawecua. ¡Jamatabëcuenenawëxaniabiaya pëtsa panajumaitsimë: «Waxaitsi cajena Abraham-pijinë pemomoxitsi. Nexata, Dioso tsiteca nacacapanepaena pibisiacuene exanawanapae-atatsi», panajamë pëtsa! Xaniajai rabaja picani Abraham-pijinë papemomoximë. Bajarapacuene itsiata apopacatonamatamotsi tsipae, papecacapanepaenexa Diosojawabelia. Itsa Dioso siwabëjai tsipae bepemomoxi ayaibitsaëto petaenexa, bajaraPonë caëjëpatsi baja cajena jiwi pexanaenexa mapa-ibotonëmi-ataje, Abraham-pijinë bepemomoxi petaenexa. ¡Itsiata, Dioso pesiwabëjaixae jiwi pijaneconi yabara, panajamatabëcuenepënëyorore Diosojawabelia!
9 ¡Xania baja tsane, tsipaji raja, Dioso papecananeconitsia-exanaenexa paca-imoxoyota baja! Pe-ubinaenë pexainaenë, ponaenë itsa apotonacuaitsitsi pexaniacuai, daxita nicata bajaraponaenëmi sipalita. Nexata baja, penionaecujinae, bajaraponaenë caetuata. Xuaba isotojawabelia petajuitsinexa. Bajarapijinia pacuenia, paxamë-ata Dioso pacaxuabiana apopewerewerecae-isotojawabelia papecatajuenexa, apopanenacuene-itajëtsixae pexaniacuene pane-exanawanapaejawa —jai Juan bajarapamonaejawabelia.
10 Nexata, bajarapamonae jumaitsi Juan-jawabelia:
—¿Detsa xua pa-exanaenajë, patanacuene-itajëtsinexa patanajamatabëcuenepënëyorotsijawa Diosojawabelia? —jai.
11 Nexata, Juan jumaitsi bajarapamonaejawabelia:
—¡Pajiwi xaina anijacamisabeje, caecamisa rajutsi apopexainaejiwijawabelia! ¡Pajiwi xaina pexaejawa, tsicobetsatsi pexaejawa apopexainaejiwijawabelia! —jai Juan.
12 Impuestojamatabëcuene pematamoyanijobabiabiwi-ata, pata picani Juan-jawaberena pebautizabinexatsi. Nexata, bajarapamonae jumaitsi:
—Necujarubinë, ¿detsa nexata xua pa-exanaenajë, patanacuene-itajëtsinexa patanajamatabëcuenepënëyorotsijawa Diosojawabelia? —jai.
13 Nexata, Juan jumaitsi bajarapamonaejawabelia:
—¡Itsa pamatamoyanijobame, pëtsa pematatsënëa pawajëcabiabame bajarapamatamowecua! ¡Pa-exanawanapare saya papeca-itorobiwi papecatonajumecopatsicuenia! —jai Juan.
14 Nexata, icatsia wajabitsaë-ata jumaitsi Juan-jawabelia:
—Paxanë pijinia, ¿detsa xua pa-exanaenajë, patanacuene-itajëtsinexa patanajamatabëcuenepënëyorotsijawa Diosojawabelia? —jai.
Nexata, Juan jumaitsi bajarapamonaejawabelia:
—¡Pëtsa itsajiwi-ata palata payacajërëtame paneyabara-atiobicuenia! ¡Pëtsa najumetsënëtsiaya itsajiwi-ata pananeconitsia-exaname, saya palata papecarajutsinexa papecacujunawixae! ¡Pasiwajamatabëcuenebarëyamëre saya pacueneta pacamatamotapona papeca-itorobiwi! —jai Juan wajabitsaëjawabelia.
15 Daxitajiwi jamatabëcuenenabenajaca Juan pecuenetaejawata, pejumetaejawatanua petsipaebiliwaisi yabara. Bajarapamonae pecopia-ewetawanapaexae Cristo, ponë Dioso itorobiapaebica athëbëwetsica, daxitajiwi pecapanepaenënexa, jamatabëcuenenawëxaniabiaya jamatabëjumaitsi: «Baja raeta jane, maCristoje», jamatabëjai Juan yabara.
16 Peyanijobiweretsicujinaetsi, Juan jumaitsi daxita bajarapamonaejawabelia:
—Xanë apobajaraponënë. Xanë raja saya pacabautizabaponatsi merata. Bajaraponë raja ayaijamatabëcuenenë tsane xanëwecua. Xanë raja beweliajamatabëcuenenënë bajaraponëwecua. Nexata, acobe-uranë pijazapato-ata tataxujonotsinexa, bepijajiwitonëcuenianë. Ponë rajane tacowëwerena najetarucaena, pacatsijamatabëjoneya-exanaena Espíritu Santo. Itsamonae pijinia naneconitsia-exanaenatsi isotota pijaneconijamatabëcuene.
17 Nexata, bajaraPonë xaniawaetsia pacatsatsiana, pacuenia jiwi batsata arrozxu pesiwecua. Arroz pexainaenë baja itsa wereta pesiricaejawa, jëaba pewecuatsatsinexa pesijawanë, ëpexu pepitsinexa. Bajarapaxu xaniawaeteta pe-etsibojawabelia. Pesi pijinia penetapona wayafuabelia, petajuitsinexa. Bajarapijinia pacuenia, paxamë-ata tacowëwerena penajetarucaenë tsatsiana pexaniacuene pexanaewi, pibisiacuene pexanaewiwecua. Nexata, pamonae Dioso pejitsipaecuenia exanawanapa, capanepaenatsi, pejinawanapaenexa Dioso pijanacuatatsia. Pamonae pijinia Dioso apopejitsipaecuene exanawanapa, naneconitsia-exanaenatsi daxitamatacabijawabelianexa apopewerewerecae-isotojawabelia —jai Juan daxita bajarapamonaejawabelia.
18 Bajarapacuenia Juan muxujiobapona jiwi pecuenecataeliwaisianëta. Tsipaebanajetaruca pexanialiwaisi pecapanepaeliwaisinexatsi Diosojawabelia.
19 Bajarapacuenia pexananajetarucaexae, jiwijawabelia itsamatacabi Juan muxujioba nacua-ewetsinë Herodes, tsipaji bajaraponë pejuyapijinë pijawa yacajërëta pepitsinexa, Herodías-wa. Orijibia, cuene-itaweta Herodes daxita papibisiacuenejawanë exana.
20 Itsiata baitsi jane, Juan apojumecowënëtsitsi Herodes. Biji saya caranata, pematatsënëa Herodes pibisiacuene exana, tsipaji itoroba pijajiwi Juan pewaetabinexatsi, penaneconitsiwi pejebabiabibota pe-etsinexatsi.
Juan pebautizabijawa Jesús
21 Juan penaneconitsia-exanaewajënaeyatsi, jiwi ayaibitsaëtoxaneto bautizabaponapona. Bajarapacuenia Jesús-ata bautizabatsi. Pebautizabicujinaetsi,c paepatota Jesús wajëta Diosojawabelia, athëbëtatsia itaboxo napata.
22 Athëbëwetsica Espíritu Santo tsimatarunaicatsi be-ucucutocuenia. Nexata, jumetane athëbëwetsica Dioso pejumaitsijawatsi: «Xamë raja taxënatomë, bitso taca-asiwanë. Bitso casiwajamatabëcuenebarëyatsi», pejaijawatsi.
Jesús pijasalinaiwimi pewënëanë, yabara peliwaisi
23 Itsa baja Jesús xaina treinta pawaibeje, taxuxuaba jane baja jiwijawa pexanaponaponaenexa Dioso pijacuene. Jiwi canaëjëta Jesús yabara, José pepopexënatocuene. José paxapijinë pewënë Elí.
24 Elí paxapijinë pewënë Matat. Matat paxapijinë pewënë Leví. Leví paxapijinë pewënë Melqui. Melqui paxapijinë pewënë Jana. Jana paxapijinë pewënë José.
25 José paxapijinë pewënë Matatías. Matatías paxapijinë pewënë Amós. Amós paxapijinë pewënë Nahum. Nahum paxapijinë pewënë Eslí. Eslí paxapijinë pewënë Nagai.
26 Nagai paxapijinë pewënë Maat. Maat paxapijinë pewënë Matatías. Matatías paxapijinë pewënë Semei. Semei paxapijinë pewënë Josec. Josec paxapijinë pewënë Judá.
27 Judá paxapijinë pewënë Joanán. Joanán paxapijinë pewënë Resa. Resa paxapijinë pewënë Zorobabel. Zorobabel paxapijinë pewënë Salatiel. Salatiel paxapijinë pewënë Neri.
28 Neri paxapijinë pewënë Melqui. Melqui paxapijinë pewënë Adi. Adi paxapijinë pewënë Cosam. Cosam paxapijinë pewënë Elmadám. Elmadám paxapijinë pewënë Er.
29 Er paxapijinë pewënë Josué. Josué paxapijinë pewënë Eliezer. Eliezer paxapijinë pewënë Jorim. Jorim paxapijinë pewënë Matat.
30 Matat paxapijinë pewënë Leví. Leví paxapijinë pewënë Simeón. Simeón paxapijinë pewënë Judá. Judá paxapijinë pewënë José. José paxapijinë pewënë Jonam. Jonam paxapijinë pewënë Eliaquim.
31 Eliaquim paxapijinë pewënë Melea. Melea paxapijinë pewënë Mainán. Mainán paxapijinë pewënë Matata. Matata paxapijinë pewënë Natán.
32 Natán paxapijinë pewënë David. David paxapijinë pewënë Isaí. Isaí paxapijinë pewënë Obed. Obed paxapijinë pewënë Booz. Booz paxapijinë pewënë Sala. Sala paxapijinë pewënë Naasón.
33 Naasón paxapijinë pewënë Aminadab. Aminadab paxapijinë pewënë Admin. Admin paxapijinë pewënë Arni. Arni paxapijinë pewënë Esrom. Esrom paxapijinë pewënë Fares. Fares paxapijinë pewënë Judá.
34 Judá paxapijinë pewënë Jacob. Jacob paxapijinë pewënë Isaac. Isaac paxapijinë pewënë Abraham. Abraham paxapijinë pewënë Taré. Taré paxapijinë pewënë Nacor.
35 Nacor paxapijinë pewënë Serug. Serug paxapijinë pewënë Ragau. Ragau paxapijinë pewënë Peleg. Peleg paxapijinë pewënë Heber. Heber paxapijinë pewënë Sala.
36 Sala paxapijinë pewënë Cainán. Cainán paxapijinë pewënë Arfaxad. Arfaxad paxapijinë pewënë Sem. Sem paxapijinë pewënë Noé. Noé paxapijinë pewënë Lamec.
37 Lamec paxapijinë pewënë Matusalén. Matusalén paxapijinë pewënë Enoc. Enoc paxapijinë pewënë Jared. Jared paxapijinë pewënë Mahalaleel. Mahalaleel paxapijinë pewënë Cainán.
38 Cainán paxapijinë pewënë Enós. Enós paxapijinë pewënë Set. Set paxapijinë pewënë Adán. Adán-pijinë Dioso pexanaenëtsi.