Pacuenia Jesús naexana, yabara peliwaisi
2
Jesús baja itsa imoxoyo penaexanaejawanexa, pewajënaeyota Romano nacua pepopewetsinë, Augusto, itoroba pijajiwi petonamata-ëjëtsinexatsi jiwi, peyanacua-ewetsinacuanëjawa.
2 Bajarapanamata-ëjëtsicuene copiaya exana pamatacabi Cirenio yanacua-eweta gobernador-nëcuenia Siria nacuata, Augusto peyanacua-ewetsinacuanëyajuwënëjawa.
3 Nexata, nacua-ewetsinë Augusto pitorobixae, caejiwi canacujitsia nawiabapona pijasalinaiwimi pejinawanapaetomaranëjawa, bajarajota penawënëjucaenexa penamata-ëjëtsijawatatsi.
4 Bajaraxuata, José-ata barëpitsapa David-pijinë pemomoxae, Nazaret tomarawecua, Galilea nacuata pe-ecaetomarayo. Barëpona Belén tomarabelia, Judea nacuata pe-ecaetomarayo, patomarata José pijasalinainëmi, David-pijinë, bajayata ponapona.
5 José barëpona pijawa María, pebarënawënëyaquinaenexa bajarajota. Bajarapowa yacotapona penacueto.
6 Bajarapajiwibeje peponaponaejawatabeje Belén tomarata, María jane baja, wixaenotatsi, pewecuanaexanaenexatsi pejewaxinacueto.
7 Nexata, wecuanaexanatsi matapijinacuetonëyo. Bajarapamatacabi, ponaponabeje dajubi pewetabiabibota, tsipaji pabota jiwi patabiaba, pewajënaebeje jiwi yawënëca. Bajaraxuata, barë-eca penacuetonëyo bajarapabota. Jumaquioneta papaëbërëpanaxita. Buateta dajubi pexaejawa pemitsa-othocabiabimo-ënëta.
Ángelewi patsica, Jesús penaexanaejawa yabara petsipaebinexa oveja pewetsiwijawabelia
8 Belén tomara imoxoyo wayafotajawata, oveja pewetsiwi merawi ewetabiabawanapa pija-ovejabitsaëtonë.
9 Jemata bajarapamonae tsitanaitajëtatsi Dioso pija-ángelnë. Nexata, Dioso pijapeniweniwenaecotia matatoyorotsia-itayotatsi. Bajarapamonae pinijicuenia najunawiaca.
10 Nexata, ángelnë jumaitsi bajarapamonaejawabelia:
—¡Pëtsa panajunawiacame, tsipaji raja pexanialiwaisi pacatocanajetarucatsi, xua yabara daxitajiwi siwajamatabëcuenebarëyajitsia!
11 Ajena rabaja, mapamerawitaje, naexana baja daxitajiwi pecapanepaenënexa Belén tomarata, patomarata bajayata nacua-ewetsinëmi David-pijinëmi ponapona. Ponë naexana, bajaraponë pepoPetuxanenë Cristo, Dioso athëbëwetsica pitorobinëtsitsica.
12 Paneyapëtaenexa panacueto yabara pacatsipaebatsi, pacaxitajarabianame mapacueniaje: Bajarapanacuetonëyo pataeyabuatetsianame papaëbërëpanaxita pejumaquionaenacuetonëyotsi. Boquecaena dajubi pemitsa-othocabiabimota —jai ángelnë oveja pewetsiwijawabelia.
13 Bajarajota jemata ángelewi ayaibitsaëtoxaneto tsitanaitajëtatsi oveja pewetsiwi, pa-ángelnëjawata copiaya tsitanaitajëtatsi. Penaxëanaejawata, wënëxaniata Dioso mapacueniaje:
14 «¡Diosomë, athëbëtatsia ne-ecaenë, bitso cajena ayaijamatabëcuenenëmë! Pamonae asiwaya taneme, jamatabëcuenexanepanaeya jinawanapa», jai ángelewi pewënëxaniatsijawata.
15 Itsa baja ángelewi nawiaba athëbëabetsia, oveja pewetsiwi pecowëta najumaitsi:
—Ponaliatsi Belén tomarabelia, wajataenexa xua copiapata, pacuene yabara petuxanenë Dioso pitorobi-ángel-nëtsica nacatsipaeba —najai.
16 Bajarapamonae bepijiayo ponalia Belén tomarabelia. Nexata jane baja, caxitajaraba itsajota ponaponabeje María, Josébeje, penacuetonëyo-ata, peboquecaejawa dajubi pemitsa-othocabiabimota.
17 Nexata, oveja pewetsiwi petaeyabuatetsijawata penacuetonëyo, tsipaeba José, Maríabejejawabelia, pacuenia ángelnë yapëtaeya-exanatsi bajarapanacuetonëyo yabara.
18 Daxita pamonae jumetane oveja pewetsiwi pepaebiliwaisi, jamatabëcuenenabenajaca.
19 María baja cajena pejamatabë-ëthëtota jamatabënaponapona nacofënëtsinejewa daxita bajarapacuene yabara.
20 Oveja baja pewetsiwi penawiabaponaejawatalia, pexaniacuenia wënëxaniatanajetarubena Dioso. Pexaniajamatabëcuenenua rajutanajetarubena Doisojawabelia pijamuxucujaya pejumetaexae, pitaxutocuajaya-ata petaexae. Daxita baja copiapata pacuenia ángelnë tsipaebatsi.
Pacuenia Jesús-nëyo itajëtatsi Diosojawabelia templobota
21 Bajarapanacuetonëyo penaexanaecujinae, itsa baja xaina ocho pamatacabibeje, bo-upiperabëcaucutatsi judíowicuenia. Wënërubatsinua jane baja, «Jesús», pacuenia tajëwelia jumaitsi ángelnë Maríajawabelia, penacoxitsiwajënaeya.
22 Nexata jane baja, tocopiajopatsibeje José, Maríabeje, pexanaenexabeje pacuenia Dioso penajumecopatsiliwaisi Moisés-pijinëta itorobatsi penawecua-ajibia-exanaenexa bepenaxuirabicuenemia Dioso pitabarata, pewecuanaexanaecujinaetsi copiayapijinacuetonëyo. Nexata, Jerusalén tomarabelia barëponabeje bajarapanacuetonëyo petsitajëtsinexabeje Diosojawabelia templobota. Rajutabejenuab penacuetonëyo Diosojawabelia, pijajiwitonëcuenia petonacuenebinexa, itsa penaweretsinë.
23 Bajarapacuene yabara Dioso penajumecopatsiliwaisi Moisés-pijinëta jumaitsi mapacueniaje: «Daxita copiaya penaexanaenacuetonëxi, totsatsiana Dioso pijajiwitonënexa»,c jai.
24 Bepenaxuirabicuene yabara, itorobatsinua pecapatsinexa dajubi, itsa jume, tsiquiriwiria ucucutoyobeje, itsa jume, pinijiwiria ucucutobeje pejananëbeje, petajuitsinexa altar-jumata Diosojawabelia. Nexata, José, Maríabeje, bepejiobijiwixaebeje, rajutabeje anija-ucucutobeje altar-jumata petotajuitsinexatsibeje Diosojawabelia.
25 Bajarapamatacabi, ponapona Jerusalén tomarata Simeón-wënënë, piasiwanë Dioso. Pejumecowënëtsinë pacuenia Dioso pejumeliwaisibaxutota jumaitsi. Copia-ewetaponaponanua Dioso piajamatabëcuenesaëya-exanaenexa Israel nacuapijiwi, pitorobijawata Cristo, ponë capanepaejitsia pijajiwi. Simeón baja cajena yajawaponaponatsi Espíritu Santo.
26 Nexata, Espíritu Santo tajëwelia yapëtaeya-exanatsi pacuenia petëpaewajënae taejitsia Cristo, Dioso ponë athëbëwetsica itorobiapaebica jiwi pecapanepaenexa.
27 Simeón Espíritu Santo jamatabëcuenematacaponatsi peponaenexa temploboyabelia. Bajaraxuata, tane María, Josébeje, pebarëjonejawatabeje Jesús-nëyo temploboyarena, pexanaenexabeje pacuenia Dioso penajumecopatsiliwaisi Moisés-pijinëta itorobatsibeje.
28 Nexata, Simeón isapita Jesús-nëyo. Pexaniajamatabëcuene perajutsijawata Diosojawabelia, jumaitsi mapacueniaje:
29 «Tajatuxanenë, baja rajane netocopatsianame jamatabëcuenexanepanaeya tatëpaenexa nijajiwitonënë. Netaeya-exaname tatëpaewajënaeya pacuenia tajëwelia najumecapanepaeya nejumaitsimë.
30 Taja-itaxutocujaya rabaja taniji maponëje, nitorobinëtsica jiwi pecapanepaenënexa xamëjawabelia.
31 Ponë itorobimica jiwi pecapanepaenënexa, daxitanacuanëpijiwi.
32 BajaraPonë petsipaebiliwaisita, jamatabëcuene-itayotsiana apojudíowi, bajarapamonae-ata peyapëtaeya-exanaenexa pacuenia jamatabëcuene-itsimë. Nexata, apojudíowi paneyaiyataena panijajiwinë, pajudíowinë, bajaraPonë pejamatabëcueneta», jai Simeón Diosojawabelia pexaniajamatabëcuene perajutsijawata Jesús-nëyo yabara.
33 Nexata, José, Maríabeje, jamatabëcuenenabenajacabeje pejumetaejawatabeje, Simeón pejumaitsijawa Jesús-nëyo yabara.
34-35 Bajaraxuacujinae, Simeón pexaniacuenia cuenewajunupaeba Dioso peyawenonaenexatsibeje José, Maríabeje, Jesús-nëyo yajawa. Icatsia, Simeón jumaitsi María, Jesús penajawabelia:
—Dioso itapeta mapanacuetonëyoje, peliwaisipaebinexatsi Israel nacuapijiwijawabelia. Bajarapaliwaisi pejamatabëcueneta, ayaibitsaëto Dioso naneconitsia-exanaenatsi, apopejumexaniataexae tsane petsipaebiliwaisi. Ayaibitsaëtoxaneto pijinia Dioso capanepaenatsi, pejumexaniataexae tsane petsipaebiliwaisi. Dioso nutsianatsinua pecuenecaranatsinëcuenia jiwi pibisiacuene pexanaeyaniwa, xua jiwi exana apotsitapibisiacuene-atatsi picani. Nexata, bajaraPonë itajëtsiana pacuenia jiwi ayaibitsaëtoxaneto, caejiwi canacujitsia, bëpënëa pibisiajamatabëcuene najamatabëxainabiaba. Bajaraxuata, pibisiacuenia saya baranatsipaebianatsi. Xamë, penamë, nexata peponejamatabë-ëthëtojawawetsina bitso siwajamatabëcuenebëjamë tsane, itsa yapëtaename pacuenia exanaejitsiatsi —jai Simeón Maríajawabelia, tajëwelia pewajunupaebijawata pacuenia Jesús exanaejitsiatsi.
36-37 Bajarapijinia pamatacabi, templobota ponapona Ana, Diosojumepaebiwa, profetawa. Bajarapowa Fanuel-pijinë pexënatoyo, Aser-pijinë pemomoxibitsaëtoyajuwënëwa. Bajarapowa bitso baja perujuwa. Ochenta y cuatro pawaibeje baja xaina. Nacojioba picani abaxë itsa pejanawa, itsiata penacojiobicujinae wecuatëpatsi, siete pawaibeje pepuaxainae pamonajawabelia. Itsajawabelia apowecuaponabiabi templobo, tsipaji matacabijebi, merawijebi-ata, Dioso tonacuenebabiaba. Itsajawata, pexaejawa apoxaeyabiabi pamatacabibeje wajëcabiaba Diosojawabelia.
38 Nexata, bajarapowa patajopa itsajota José, Maríabeje, nucabeje, paepatota Simeón wajunupaebanuca Jesús-nëyo yabara. Nexata, bajarapowa-ata pexaniajamatabëcuene rajuta Diosojawabelia Jesús-nëyo yabara. Xuacujinae, tsipaebabiaba Jesús-nëyo peliwaisi Jerusalén tomarata pejinawanapaewijawabelia, pamonae copia-ewetawanapa Dioso pitorobijawanexa ponë capanepaejitsiatsi pijawajabitsaëwecua.
Jesús-nëyo pijamonaejiwibeje barënawiarenatsibeje Nazaret tomaraberena
39 José, Maríabeje, Jerusalén tomarata, templobota pexanaeweretsicujinaebeje daxita pacuenia Dioso penajumecopatsiliwaisi Moisés-pijinëta itorobatsi, bajaraxuacujinae baja, barënawiarenabejed Jesús-nëyo pijatomaraberena, Nazaret tomara, Galilea nacuata pe-ecaetomara.
40 Bajarapatomarata, Jesús-nëyo witsabanajetaruca. Bajaraponëyo Dioso pesaëta ajamatabëcuenesaë tsaponae pewajënaeyabelia pecanaëjëtsijamatabëcuene, jamatabëcuenewitsabaponanua. Dioso yawenonaponatsi ayaicuenia.
Jesús-nëyo templobota barëcuaicuaijai judíowi pecujarubiwijawabelia
41 Caewai canacujitsia José, Maríabeje, ponabiababeje Jerusalén tomarabelia, Pascuafiesta penataeyabiabinexabeje.
42 Nexata baja, Jesús-nëyo doce pawaibejee itsa xaina, barëponabeje icatsia Jerusalén tomarabelia, Pascuafiesta penataenexa.
43 Itsa baja copiaruca Pascuafiesta, daxita baja penataewi, nawiaba baja pijabonëjawabelia. Itsiata, Jesús-nëyo nacopatanucalia Jerusalén tomarata. José, Jesús penabeje, abaxë apoyapëtaebeje pewecuanacopatsijawatsiliabeje.
44 Jamatabëjumaitsibeje saya: «Bajaraponëyo raeta nanajetaruca wajanajuaponaewita», jamatabëjaibeje. Bajaraxuata, caematacabi baja pepuaponaebeje namutua, itaxanabeje. Nexata, yanijobabeje pijamonaejawabelia, peyapëtaewitsibejejawabelia-ata.
45 Itsiata, apocaxitajarabibeje. Nexata, nawiatecabeje Jerusalén tomarabelia, pejaitsinexabeje bajaraponëyo.
46 Acueyabimatacabita, caxitajarababeje templobota. Jesús-nëyo na-eca judíowi pecujarubiwituatuajëta. Jumetaeyeca bajarapamonae penabarëcuaicuaijailiwaisi. Yanijobaponanua bajarapamonae penabarëcuaicuaijailiwaisi yabara.
47 Nexata, Jesús-nëyo xaniawaetsia peyapëtaejamatabëcuene yabara, xua-ata judíowi pecujarubiwi yanijobapona, itsa xaniawaetsia jumecanawiataponatsi, itaxutuanabenajaquena bajaraPonëyo.
48 José, Maríabeje, itsa tanebeje bajarajota Jesús-nëyo pena-ecaejawa, nexata itaxutuanabenajacabeje. Nexata, Jesús pena jumaitsi:
—Taxënato, ¿detsa xuajitsia panewepënacoparemenabeje? Paxanëbeje patacajaitarutsijawatabeje. Bitso paca-itaxanatsibeje —jai pena.
49 Nexata, Jesús-nëyo jumaitsi penajawabelia:
—¿Detsa xuajitsia bajarapacuenia panejaitarutamebeje? Panejaitsipamebeje raja majotaje, tsipaji raja xanë taxa Dioso pijacuene ta-exanaenexa mapabotaje, nejamatabëcuene-enabiaba —jai.
50 Itsiata, bajarapajiwibeje apojumeyapëtaebeje pajamatabëcuene yabara jumaitsi Jesús-nëyo.
51 Itsiata baja cajena, María pejamatabë-ëthëtota jamatabënaponapona daxita bajarapacuene yabara. Nexata baja, bajarapajiwibeje pepëta Jesús-nëyo napona baja Nazaret tomarabelia. Bajarapatomarata xaniawaetsia jumecowënëtsiaponapona pacuenia José, Maríabeje, itorobabiababeje.
52 Jesús pewitsabanajetarucaejawata, ayainë baja tsaponae. Yajawajamatabëcuenewitsabanajetaruca, xaniawaetsia pecanacuenebinexa peyapëtaecuene. Nexata, pexaniajamatabëcuenia tanetsi, Dioso. Bajarapacuenia jiwi-ata asiwaya tanetsi.