Tulupu perubenaejawa pecanaëjëbiwi najetarubena petaenexa Jesús-nëyo
2
Jesús naexana Belén tomarata, Judea nacuata pe-ecaetomara, pamatacabijawa nacua-ewetsinë, Herodes, Judea nacua ewetaponapona. Nexata penaexanaecujinae, bexëajawabelia pebijiwi, tulupu pecanaëcobaponaejawata pecanaëjëbiwi, pata tajënacuajawawetsina, Jerusalén tomarajawabetsina, patomarata Herodes yanacua-ewetaponapona.
2 Bajarapamonae yanijobapona Jerusalén tomarapijiwijawabelia:
—¿Detsa jota barë-ecatsi panacuetonëyo naexana judíowi pepopeyanacua-ewetsinënexa? Payapëtaniji bajaraponëyo penaexanaejawa, tsipaji baja cajena, patajanacuatareca pataniji bajaraponëyo penaexanaejawata patuluputoa naitajëta. Bajaraxuata, paponainajë mabetsinaje, patataenexa bajaraponëyo, pitabarata yaiyataeya patamatabacabëta patatonubenaenexa —jai tsaponae tulupu pecanaëjëbiwi jiwijawabelia.
3 Nexata, peyanacua-ewetsinë, Herodes, itsa wënëliwaisitane tulupu pecanaëjëbiwi bajarapacuenia pejumaitsitsaponaejawa, bitso jamatabëcuenebëjai, daxita Jerusalén tomarata pejinawanapaewi-ata.
4 Bajaraxuata, itoroba pejunatsia-exanaenexa daxita sacerdotewi penamatacaitorobiwi, judíowi pecujarubiwi yajawa. Penacaetuatsijawata pijabota, Herodes yanijoba pepatsiwijawabelia, peyapëtaeya-exanaenexatsi itsajota bajayata Diosojumepaebiwi, profetawi, tajëwelia wajunupaeba Mesías penaexanaejawanexa.
5 Nexata bajarapamonae jumaitsi Herodes-jawabelia:
—Belén tomarata raja naexanaeyapaeba, Judea nacuata pe-ecaetomara. Bajarapacuenia bajayata baja cajena profeta Miqueas-pijinë, tajëwelia wajunupaeba peyaquinaeliwaisibaxutota. Jumaitsi mapacueniaje:
6 «Xamë, Belén, Judea nacuata ne-ecaetomarayo, bitso newënëjonetomara tsane. Tsiquiritomarayo-atamë, daxita itsatomaranëwecua Judea nacuata, bajarapacuenia mapanacuapijiwi pematatsënëa beweliacuenia apocatae tsane, tsipaji xamëjawata naexanaena Ponë jiwi pepopewetsinënexa. BajaraPonë oveja pewetsinëcuenia, pexaniacuenia, ewetsiana Dioso pijajiwi, Israel nacuapijiwi»,b jai baja cajena profeta Miqueas-pijinë peyaquinaeliwaisibaxutota, Dioso pitorobinëtsica, Mesías penaexanaejawanexa Belén tomarata —jai penacaetuatsiwi Herodes-jawabelia.
7 Bajarapamonae peyapëtaeya-exanaecujinaetsi, nexata Herodes muetsia junata pamonae tajënacuawetsina pepatsiwi, tulupu pecanaëjëbiwi, peyanijobinexa pamatacabi copiaya naitajëta bajarapatuluputo.
8 Nexata, peyapëtaeya-exanaecujinaetsi, Herodes itorobalia Belén tomarabelia. Jumaitsi bajarapamonaejawabelia:
—¡Paponaremelia Belén tomarabelia! Xaniawaetsia pajaitsianame bajarapapejewaxinëyo. Itsa baja pacaxitajarabianame, panewajunucaponaeremena patanetsipaebinexamë, tsipaji xanë-ata jitsipajë taliajawa, yaiyataeya tamatabacabëta bajaraponëyo pitabarata tatonucaenexa —jai Herodes.
9 Bajarapamonae, bajarapacuenia pejumaitsicujinaetsi, ponalia Belén tomarabelia. Nexata namutualia penajetarubenaejawata, jemata icatsia napebeta patuluputo tane pijanacuatareca. Nexata, bajarapatuluputo bajarapamonae matacanajetarucatsi. Bajarapamonae bajarapatuluputo matacanajetarucatsi.
10 Itsa tane bajarapatuluputo perucaejawa, bitso jamatabëcuenebarëya.
11 Nexata bajarapamonae boyalia itsa joneya, tane pejewaxinëyo, Jesús, pena yajawa. Bajarapaepatota, yaiyataeya pematabacabëta tonubenajunua pitabarata, penajamatabëcuene-itajëtsinexa bitso peyaiyataejamatabëcuene bajaraponëyojawabelia. Bajaraxuacujinae, pecapatsicajonixi matapana, itsajota cajinawanapa penamatamotsijawanë. Nexata, pejewaxinëyojawabelia rajuta orojawa, anijawiriapetuxujuwijawabeje-ata; inciensopërëjawanë, mirrajawanë-ata.
12 Bajaraxuacujinae, tulupu pecanaëjëbiwi, merawi majitsinaebota, Dioso itawetatsi penawiabiyaniwa peyanacua-ewetsinë Herodes-jawabelia. Nexata, bajarapamonae saicaya namutua baja nawiaba pijanacuayabereca.
José barënajetabijirawa Jesús-nëyo Egipto nacuayabelia
13 Tulupu pecanaëjëbiwi penawiabicujinae, Dioso pija-ángelnë merawi José majitsinaebota tsitanaitajëtatsi. Nexata jumaitsi Joséjawabelia:
—¡José, nonotapunare baja! ¡Barënajetabijiraware baja pejewaxinëyo, pena yajawa, Egipto nacuayabelia, tsipaji raja Judea nacua pewetsinë, Herodes, tsiquirinëyo tsimaxërenajitsiatsi pebeyaxuabinexatsi! Bajarajotalia, barëponaponaename, matapania tacayapëtaeya-exanaejawabelia paepatota icatsia barënawiatsijitsiamërena —jai ángelnë Joséjawabelia.
14 Nexata, José nonotapuna. Piamajitsinaemerawi barënajetabijirawa baja pejewaxinëyo, pena yajawa, Egipto nacuayabelia.
15 Bajarajotalia barëponapona bajayajebi, petëpaejawabelia Herodes nacua-ewetsinëmi. Bajaraxuacujinae, José icatsia barënawiatsiarena Israel nacuayaberena. Nexata itsa barënawiarena Egipto nacuawerena, copiapata jane baja, profeta Oseas-pijinë, xua bajayata tajëwelia jumaitsi Mesías yabara: «‘Taxënato icatsia junatsiarenajë penawiatsinexa Egipto nacuawerena,’ jai raja Dioso»,c pejaijawa tajëwelia profeta Oseas-pijinë Mesías yabara.
Herodes, nacua-ewetsinë, pijajiwi itoroba, pebinacuetoxi pebeponaenexa, Belén tomarata imoxoyo pe-enaetomaranëjawa-ata
16 Nacua-ewetsinë, Herodes, itsa yapëtane tulupu pecanaëjëbiwi peyamaxë-itojorobijawatsi, caxitajarabi-ata pejewaxinëyo, Jesús, apopetsipaebixaetsirena, bajaraponë bitso anaepana. Nexata, pijajiwi tsi-itoroba. Jumaitsi:
—Pabeponaename daxita pebinacuetoxi, pejananaexanaenacuetoxijawaweliacujinae, anijawaibeje pexainaenacuetonëxijawabelia, Belén tomarata pejinawanapaewi, tomarajumawelia pe-enaebonëjawa-ata —jai pianaepanaexae pijajiwijawabelia. Bajarapacuenia itoroba Jesús-nëyo picani peyajawabeyaxuabinexatsi, tsipaji tulupu pecanaëcobaponaewi, pecanaëjëbiwi, Herodes-jawabelia tsipaeba paepatota taxuxuaba petaejawa tuluputo.
17 Copiapata jane baja, xua profeta Jeremías-pijinë, bajayata tajëwelia yaquinabuata, pebeponaejawanexa pebinacuetoxi Belén tomarata. Bajarapabaxutota baja cajena jumaitsi mapacueniaje:
18 «Ramá tomarata,d jumetaena ayaicuenia pematanueyabijawa. Raquel-pijiwa pemomoxi pexi matanueyabiana. Itawetsi-atatsi tsane bitso penajamatabëxainaeyaniwa, itsiata apocopatsi tsane, tsipaji pexi totëpaenatsi», jai bajayata tajëwelia profeta Jeremías-pijinë peyaquinaeliwaisita.
19 Nacua-ewetsinë, Herodes baja, itsa tëpa, Dioso pija-ángelnë merawi majitsinaebota tsitanaitajëta Joséjawabelia Egipto nacuata.
20 Jumaitsi:
—¡José, nonotapunare! Barëponaename baja pejewaxinëyo, pena yajawa, nebarënawiatsinexa icatsia Israel nacuayabelia. Tëpa rabaja ponë picani jamatabëbeyaxuabatsi pejewaxinëyo —jai ángelnë majitsinaebota Joséjawabelia.
21 Nexata baja, José nonotapuna. Barëpona pejewaxinëyo, pena yajawa, icatsia pebarënawiatsinexa Israel nacuayabelia.
22 Peyanacua-ewetsinëmi, Herodes-pijinë pexënato, Arquelao, Judea nacua-eweta paxa pewënamuto. Nexata, José itsa wënëliwaisitane bajaraxua, cujunawa Jesús-nëyo pebarëponaejawa Judea nacuayabelia. Majitsinaebota Dioso pitawetsixaetsi pebarëponaeyaniwa bajarapanacuayabelia, nexata José barëpona bajaraponëyo Galilea nacuayabelia.
23 Bajarapanacuayabelia pebarëpatsicujinae, barëponapona Nazaret tomarata. Bajarapacuenia copiapata jane baja, xua bajayata profeta Isaías-pijinë tajëwelia jumaitsi Mesías yabara: «Ponë Dioso itorobijitsiatsica jiwi pecapanepaenënexa, bajaraponë yabara jiwi jumaitsi tsabiabi tsane: ‘Mara ponëje Nazaret tomarapijinëje,’ jai tsabiabi tsane»,e pejaijawa tajëwelia profeta Isaías-pijinë Mesías yabara.