Pacuenia Jesús pijajiwi ayaibitsaëtoxanetoyajuwënëwi itapeta saya doce ponëbeje apóstolewinexa, yabara peliwaisi
10
Itsamatacabi, Jesús pijajiwi caetuata. Bajarapamonaeyajuwënëwi itapeta saya doce ponëbeje pija-apóstolewinexa. Nexata, Jesús pitorobiwajënaeya bajarapamonae, pepaebanajetarubenaejawa pexanialiwaisi Israel nacuapijiwijawabelia, jamatabëcuenecaëjëpaeya-exana dowathi peyajawajinawanapaewi pewecuacapitsapaponaenexa, pejamatejemaya-exanaponaenexanua daxitawiriawitane pexainaewi.
2 Bajarapadoce ponëbeje, apóstolewi, mapewënëanëje: Simón, itsawënë Pedro. Itsanë Andrés, Simón pejuyapijinë. Itsanëbeje pijinia nacaebananëbeje, Zebedeo pexënatobeje, Santiago, Juan-beje.
3 Itsanë Felipe, Bartolomé, Tomás, Mateo-ata, ponë impuestojamatabëcuene pematamoyanijobinëmi jiwijawabelia. Itsanë Santiago, Alfeo pexënato. Itsanë Lebeo, ponë wënëbijiarubatsi Tadeo.
4 Itsanë Simón, celotenë.a Itsanë Judas Iscariote, ponë bexëajawabelia canajetsijitsiatsi Jesús pijawajabitsaë pecobeyabelia, pebeyaxuabinexatsi.
Jesús pija-apóstolewi itoroba, petsipaebanajetarubenaenexa pexanialiwaisi jiwijawabelia
5 Jesús pija-apóstolewi, doce ponëbeje, pitorobijawata, yajawanajumecopata mapacueniaje:
—¡Pëtsa paponame apojudíowi pejinawanapaenacuanëjawa, Samaria nacuata penaetomaranëjawa-ata!
6 ¡Paponare jane Israel nacuapijiwijawabelia, tsipaji pacuenia ovejabitsaëtoxaneto pewetsinëtsi wecuanaxuabawanapa, bajarapijinia itsi Israel nacuapijiwi Diosowecua naxuabiaya jinawanapa!
7 ¡Nexata, paponare baja, panetsipaebanajetarubenaenexa bajarapamonae imoxoyo baja pewajënae pecopiapatsijawanexa Dioso, athëbëtatsia pe-ecaenë, pijajiwi peyanacua-ewetsijawanexa!
8 Nexata jiwi papecajumexaniataenexa panetsipaebiliwaisi, pajamatejemaya-exanaponaename piawitanewi, leprawitaneb pexainaewi-ata. Pasaëya-exanaponaename petëpaewimi. Pawecuacapitsapaponaename dowathi peyajawajinawanapaewi-ata. ¡Pëtsa pamatamoyanijobame bajarapacuenia paneto-exanaejawa yabara, tsipaji raja, xanë amoneya pacacuenecaëjëpaeya-exanatsi!
9 »¡Pëtsa pacaponamenua penamatamotsijawanë, palata-ata, panijanamutonexa!
10 ¡Pëtsa pacaponame panijadoro-ata! Saya pajumaponaename caenaxatatsi. Caenataxuxatatsijawa-ata, pataxunaponaename. ¡Naeboyo-ata pëtsa pacaponame! Pamonaejawabelia liwaisi patsipaebianame, pacarajutsiana panexaejawa. Pajiwi baja cajena tonacuenebaponapona pijatuxanenë pitorobicueniatsi,c bajarapajiwi xaniawaetsia biabatatsi.
11 »Itsa papatabiabianame pinijitomarata, tsiquiritomarayojawata-ata, bajarajota pajaitabiabianame ponë peyaiyataenëtsi. Nexata bajaraponë pijabota pamajitabiabianame, panepitsapaejawabelia bajarapatomarawecua.
12 Nexata, pabojawata papatame, a̱jena̱ pajonejitsiamëlia, panebajacobijawata pajumaitsimë tsabiabi tsane: «Dioso pewënëta, pacatojitsipatsi jamatabëcuenexanepanaeya panenajuajinawanapaejawa», pajamë tsabiabi tsane.
13 Itsa bajarapabopijiwi xaniawaetsia pacacopiapitsiana, nexata panejumaitsicuenia Dioso yawenonaenatsi. Itsiata baitsi jane, xaniawaetsia itsa apopacacopiapitsi tsane, nexata panejumaitsicuenia Dioso apoyawenonaetsi tsane.
14 Nexata, pabopijiwi, patomarapijiwi-ata, xaniawaetsia apopacacopiapitsi tsane, apojitsipaenua tsane papecanamuxuna-ewetsinexa panetsipaebiliwaisi, bajarapamonae pawecuaponaename. Pitabarata panataxu-atsapërëwarëbianame, bajarapamonae peyapëtaenexa Diosojawabelia penaneconitsijawa, bajarapacuenia pexanaexae.
15 Xaniajanë pacuenia pacatsipaebijitsiatsi. Pamonae apopacacopiapitsi tsane, Dioso ayaicuenia naneconitsia-exanaenatsi, Sodoma, Gomorra tomarapijiwimibeje, penaneconitsia-exanaejawa matatoxenetsia, pamatacabi naneconitsia-exanaena daxita pijaneconi pexainaewi —jai Jesús pijajiwijawabelia pitorobiwajënaeya.
Pacuenia Jesús pijajiwi bejiobia-exanaejitsiatsi, yabara peliwaisi
16 Icatsia, Jesús jumaitsi pijajiwijawabelia:
—¡Xania, panayajiwitaename! Ajena paca-itorobatsi paneponaenexa bitso pibisiacuene pexanabiabiwijawabelia. Pacuenia ovejaxi tsiayaitsi itsa jinawanapaejitsipa pianaepanaelobomonaetuatuajëta,d bajarapacuenia pacatsiayai tsane pianaepanaewituatuajëta panejinawanapaexae. ¡Nexata, nayajiwitaeya pajinawanapare pacuenia jomo! ¡Itsiata baitsi jane, pajinawanapare beweliajamatabëcuenewi nataeya panecuenecanawiatsiyaniwa, Apopanejitsipaecuene pacato-exanae-ata, pacuenia ucucu aponayamatamocuanae itsacueniabi-atatsi!
17 ¡Xania baja tsane! Patajajiwixaemë, bajarapamonae pacaneconitsiana papecananeconitsia-exanaenexa. Nexata itsajota, nacaetuatabiaba tomara pewetsiwi, bajarabelia pacacaponaena. Judíowi pijasinagogabonëjawae pacajumatitibabeyabiabiana penaneconitsiwi pejumaconitabiabimacata.
18 Orijibia, patajajiwixaemë pacanubiananua nacua-ewetsiwi pitabarata , gobernadorwi pitabarata-ata. Bajarapacuenia pacatoyapëxanepanaena xanë taliwaisi panetsipaebinexa bajarapamonaejawabelia, apojudíowi-ata pitabarata.
19 ¡Itsiata baitsi jane, bajarapacuenia pacato-exanae-ata, pëtsa panasiwajamatabëcuenebëjamë panenayajiwicuaicuaijainexa bajarapamonaejawabelia! Bajarapaepatota, Dioso pejamatabëcueneta pacacuaicuaijaiya-exanaena.
20 Nexata, itsa panayajiwicuaicuaijamë tsane, paxamë panijacuata apopacuaicuaijaimë tsane. Espíritu Santo raja pacacuaicuaijaiya-exanaena.
21 »Itsamatacabijawabelia tajajiwi itsamonae canajetsianatsi nacua-ewetsiwijawabelia, pebeyejebinexatsi. Nacaemonaejiwibeje nacanajetsianabeje. Itsamonae pijinia pexijiwi canajetsiana. Itsamonae pijinia paxa, pena-ata, canajetsiana.
22 Daxita nacuapijiwi paca-itoya tsane, patajajiwixaemë. Pajiwi pebejiobia-exanaejawatatsi, itsa ajamatabëcuenesaë tsaponaponae tsane tane-itaxutuajamatejemajawa pebeyaxuabijawabeliatsi,f bajarapajiwi capanepaenatsi Dioso pijanacuayabetsia.
23 Itsa patomarata pacabejiobia-exanaena, pawecuarëcëpecaename itsatomarabelia. Xaniajanë pacuenia pacatsipaebijitsiatsi. Daxita Israel nacuata pe-enaetomaranëjawa abaxë patsipaebiweretsinejewamë pexanialiwaisi, Xanë, Daxitajiwi Pematapijinënë, itacarajeta icatsia patsianicajë.
24 »Bajarapacuenia pacatsipaebatsi papecabejiobia-exanaejawanexa yabara, tsipaji itsajiwi-ata apojamatabëcuenematatoxenetsi pecujarubinëtsi. Bajarapijinia itsi pijajiwitonë, apojamatabëcuenematatoxenetsi pijatuxanenë.
25 Xanë, patacacujarubinë, jiwi copiaya itsa nebejiobia-exanapona, bajarapacuenia paxamë-ata, patacacujarubiwi, pacabejiobia-exanaena. Bajarapijinia pacuenia, panijatuxanenënë jiwi copiaya itsa nebejiobia-exanapona, bajarapacuenia patajajiwimë-ata, pacabejiobia-exanaena. ¡Pataema! Xanë panijatuxanenënë tanejumaitsitsabiabijawa: «Beelzebú, daxita dowathiwi pijatuxanenë», tanejaitsabiabijawa. Nexata pijinia, patajajiwixaemë bitso pibisiawënëta pacawënëjonabiabiana. Bajarapacuenia pacatocopiapatabiabiana patajajiwixaemë, patanecuenejëpaenexamë.
26 »¡Nexata, pëtsa pacujunawame bajarapamonae! Daxita xua jiwi muetsia pibisiacuene exana, bexëajawabelia cueneyapëtaeponaenatsi daxitajiwi.
27 Paliwaisianë muetsia waja-epatojawata pacatsipaebaponatsi, bajarapaliwaisianë paxamë pinijijumeta patsipaebaponaename jiwi penacaetuatabiabijawata.
28 ¡Pëtsa pacujunawame jiwibewi-ata! Bajarapamonae pacabeyaxuabi-ata tsipae, acuenebi matawëjëa papeca-itsacueniabinexa pepopanejamatabëcuenejawabelia. ¡Biji rajane, pacujunaware Dioso, Ponë caëjëpatsi papecabeyaxuabicujinae papecaxuabinexa apopewerewerecae-isotojawabelia!
29 »Anijanëbeje baratsuitobeje namatamota saya caepalatanëyo. Itsiata baitsi jane, caenë-ata baratsuito, jemata apojopaetsica petëpaenë, pane-axa, Dioso, yapëtaenejewa.
30 BajaraPonë cajena bitso paca-asiwa baratsui matatoxenetsia. Nexata, panematana̱toxi-ata, caematana̱toyo canacujitsia, Dioso namata-ëjëta.
31 ¡Bajaraxuata, pëtsa pacujunawame itsacuenejawayo-ata, tsipaji paxamë Dioso bitso paca-asiwa baratsuitoxi matatoxenetsia! —jai Jesús pijajiwijawabelia.
Jesús pijajiwi apobenayawajunuaxainae penawajunupaebijawa Jesús pijajiwicuene
32 Icatsia, Jesús jumaitsi pijajiwijawabelia:
—Daxita pamonae tajajiwi, jiwi pitabarata itsa nawajunupaebiana tajajiwicuene, xanë-ata wajunupaebianajë bajarapamonae tajajiwicuene taxa pitabarata, athëbëtatsia pe-ecaenë.
33 Pamonae pijinia moya nayawajunuaxainawanapa jiwi pitabarata tajajiwicuene, xanë-ata pijinia moyanë tsane. Yawajunuaxainaenajë tajajiwicuene taxa pitabarata, athëbëtatsia pe-ecaenë —jai Jesús.
Jiwi apopenajuasiwanajamatabëcuenecopabixae Jesús-jawabelia, nacaemonae-ata, caejamatabëcuene aponajuaxainae tsane
34 Icatsia, Jesús jumaitsi pijajiwijawabelia:
—¡Pëtsa panesiwajamatabëjumaitsimë: «Jesús raeta patsica mapanacuayabetsicaje daxitajiwi najamatabëcuenejëpaeya pejinawanapaeya-exanaenexa», panesiwajamatabëjamë pëtsa! Biji rajane, xanë tapatsixaetsica mapanacuayabetsicaje, jiwi najamatabëcuenejëpaeya apojinawanapae tsane.g Nexata, namata-enetsia nataena benapijawajabitsaëwi.
35 Bajaraxua yabara, pebi, paxabeje caejamatabëcuene apoxainaebeje tsane. Pexënatoyo, penabeje, pame, pecopenabeje-ata, caejamatabëcuene apoxainae tsane.
36 Nexata, xanëjawaberena apotanenajuasiwanajamatabëcuenecopabixae, caejiwi canacujitsia benapijawajabitsaë nataena, nacaebopijiwi-ata.
37 »Pajiwi, asiwaya yaiyatane paxa, pena-ata, xanë tane-asiwajawawecua, bajarapajiwi aponetoxanepanae tajajiwicuenia tataejawa. Bajarapijinia pacuenia, pajiwi asiwaya yaiyatane pexënato, pexënatoyo-ata, xanë tane-asiwajawawecua, bajarapajiwi aponetoxanepanae tajajiwicuenia tataejawa.
38 Pajiwi nayawajunuaxainaena tajajiwicuene, pebeyaxuabiyaniwatsi, pebejiobia-exanaeyaniwatsinua, bajarapajiwi aponetoxanepanae tsane tajajiwicuenia tataejawa.
39 Pajiwi tajajiwicuene nayawajunuaxaina, wecuapanepae-ata petëpaejawawecua, bajarapajiwi itsiata naxuabiana. Itsiata baitsi jane, pajiwi nacaewetsiana pebeyaxuabinexatsi tajajiwixae, bajarapajiwi daxitamatacabijawabelia Dioso yajawaponaponaenatsi —jai Jesús pijajiwijawabelia.
Pacuenia Dioso matamotsijitsiatsi pamonae xaniawaetsia copiapita Jesús pijajiwi
(Mc 9:41)
40 Icatsia, Jesús jumaitsi pijajiwijawabelia:
—Pajiwi pacacopiapitsiana patajajiwixaemë, bajaraxua xanë taenajë tanecopiapitsijawa, taxa, Dioso-ata, pecopiapitsijawatsi.
41 Pajiwi copiapita profetanë pijaboyaberena, petocopatsixaenua pepaebinexa Dioso peliwaisi, bajarapajiwi Dioso matamotsianatsi pecopiapitsijamatabëcuene. Pajiwi copiapita pijaboyaberena Dioso pejitsipaecuenia peponaponaenë, bajarapajiwi Dioso matamotsiana, pacuenia bajaraponë matamotsianatsi Dioso pejitsipaecuenia peponaponaexae.
42 Pajiwi yawenonaena tajajiwi, beweliajamatabëcuenejiwi-ata daxita tajajiwiwecua, tsiquirimerayo-ata itsa rajutsiana piapaenexa, bajarapajiwi pepacuene Dioso matamotsianatsi —jai Jesús pijajiwijawabelia.