Mata 26

Gà Əbay gà Yahuda ti yaha vatwa aà magəsa Yesuw

Markus 14:1-2; Luka 22:1-2; Yuhana 11:45-53

1 Aləka i təv ana Yesuw a ndəv aba à mifefile ŋgar ata ya fit dze ka, a gwaɗa a gà ɓəzla mazazama ŋgat: 2 «Kinehe ka, kà sərum nda gər kurum, *megirive Paska a zeha ka, mehinne sula pəra na a ndze aɗəm a ya. Dite pat ata ka, ta gis a iye, iye, *wur ana a dara i təv Mbulum a, ta vile a iye a ahər a mburma, dite ti ndwendwey a iye aà dizl magə̀làwà ŋa.»

3 Akahər ata ka, gà bàba gà ɓəzla mandəva kuɗa a Mbulum nda gà bàba ŋa ana ta kwere a gà Yahuda ya, ti yahabaha gər a bəra *batsah mala mandəva kuɗa a Mbulum duwa, zləm ŋgar Kayafas. 4 Ta mà akaba à bazlam ika magər tar. I huɗ bazlam tar ata ya ka, ta waya mayaha vatwa aà magəsa Yesuw, aà makə̀ɗà ŋgat nda akəl. 5 Ama ta gwaɗaba ika magər tar asa: «Ki slekwe a aà magəsa màyə̀màyəm aaha a pat megirive tsa, aɗaba gà mburma ta beha hinne, ti ta wise a duwa.»

Məkəs duwa a dzaya wirdè aka gər Yesuw

Markus 14:3-9; Yuhana 12:1-8

6 Akahər ata ka, Yesuw a riŋ mandza ŋa i kwite Betaniya i bəra Simun ana batsah mbəlak ba ihər a. 7 Məkəs duwa a riŋ a daha a təv ŋgar a ga, nda gà wirdè ihər i kwalaba. Wirdè ata ka, a ze hwaŋŋa lele, tsakala ŋa ka, hinne. A daha, a dzaya dər aka gər Yesuw i təv ana tar riŋ mandza ŋa, ti zim a dukw mezime nda gà ɓəzla mazazama ŋgat a. 8 I dəba ŋa ya, gà ɓəzla mazazama ŋgat aaha ta ŋgat a məkəs ata, a dzaya à wirdè aka gər Yesuw a ka, a tsəɓ a tar hinne. Ta gwaɗaba ika magər tar: «Aàmala na a nəs à wirdè ŋgwal ŋa ata taf a? Dukùla na a ger a iɗəm ŋgulum i fata ya? 9 Ŋgulum ma kal dər ndeɗiŋa tsiye, a ŋget a dər siŋgwe hinne, dite à dzèye a a gà ɓəzla matawak a.»

10 Ama Yesuw ka, aka sər a taraha aka bazlam ana ti tsik a. A gwaɗa a tar: «Aàmala na ki wiswim a à gər a məkəs aaha ya? Aɗaba dukw ana a giŋ a ka, ŋgwal ŋa ndzer, a tsahən aà iye lele. 11 Aɗaba gà ɓəzla matawak ka, tar riŋ i təv kurum kəla pat, ki slwim a aà mazlàkà tar, kamala ana gəzləŋ kurum a waya ya. Ama iye ka, ki ndzekwe akaba a nda gà iye kəla pat tsa, i de a aà kurum a mba. 12 Aɗaba wirdè ata məkəs aaha a dzaya dər aka iye ya ka, aka giŋ dukw ana ŋgwal ŋa ya. Taŋa ka, aka mbər mege aà iye wirdè ana ti zle a dər akaba iye a biye ya aka ndəv. 13 Iye ihər i gweɗe a kurum a nda ndzer: A təv ana gà mburma ti ti de aɗəm a aà metsìkè bazlam Mbulum fit dze ya ka, ti ɗemewe aɗəm a dukw ana məkəs aaha a giŋ a, dite mə̀ məts a tar gər tsa.»

A sàs a Yudas mege ɗaf aà Yesuw

Markus 14:10-11; Luka 22:3-6

14 I dəba ŋa ya, misle ŋgiɗ ilik i liwiŋ gà ɓəzla mazazama Yesuw ana kurwa gəra sula ŋa ata ya, zləm ŋgar Yudas Iskariyut, a da i fata ya ka, a da a təv gà bàba gà ɓəzla mandəva kuɗa a Mbulum. 15 A daha, a gwaɗa a tar: «Dukùla na ki vilwimiŋ a ka, dite na i ge a kurum a ɗaf aà Yesuw a?» Tə tsaraka kataya tsara ka, tə ɗamar kur siŋgwe ana miviya ŋa ya dzik makər. 16 A ŋgatar kataya tsara ka, hèlèwrèw a ge metsehe tsara, a dza ba aà mayaha vatwa aà mege ɗaf aà Yesuw.

Gà Yesuw nda gà ɓəzla mazazama ŋgat tə zəm aba

ɗaf Paska ya

Markus 14:12-21; Luka 22:7-14,21-23; Yuhana 13:21-30

17 A pat malahalah *megirive ana gà Yahuda tə zəmawa dukw ata giɗe ikəka tsa, na dite a kwese a tsiye ka, gà ɓəzla mazazama Yesuw tə dara a təv ŋgar a. Tə tsam ihər ahəm a. Ta gwaɗar: «A sàsak mi dek ɗaf Paska aaha ana, a ŋga?» 18 A gwaɗa a tar: «Dumaha a huɗ kwite a təv wele duwa a riŋ ka, gwaɗumar: “Əbay mə̀r a gwa ka, mendze gà a riŋ hinne asa tsa. Aɗaba a sèsiŋ ka, mìi dehe a, mìi zim a ɗaf Paska a ma yak nda gà ɓəzla mazazama iye.”» 19 Yesuw a tsik a tar kataya ka, gà wele ata ta mah ba, tə da. Tə daha, ti de ɗaf megirive ata i bəra wele ata, kamala ana Yesuw a tsik a taraha ya kaɗəŋ.

20 Aləka i dəba ŋa ya, hawa a ge ka, gà Yesuw nda gà ɓəzla mazazama ŋgat aaha kurwa gəra sula ya, tə daha, tə ndza a bəɗ, tə dza ba aà mazəma ɗaf megirive ata kuɗa. 21 I təv ana tar ihər ti zim a ya ka, a gwaɗa a tar: «Iye ihər i tsik a kurum a nda ndzer, pàrsa iɗəm tsa: Wura ɗa ilik ika magər kurum aaha kurwa gəra sula ya, na a ta ge aà iye a ɗaf a.» 22 Gà ɓəzla mazazama ŋgat ata tserdze ya, ta mata i are ya satəttà. Ta gwaɗar aaka ilik ilik tserdze: «Wànà iye ya, Batsah ga ŋa? Na iye tsa.» 23 Yesuw a gwaɗa a tar aaka asa: «Mburma ŋa ɗa ilik ika magər kurum a kurwa gəra sula ŋa aaha, wur ana mì dzak akaba a ahər a səra ŋa ilik a. 24 Taŋa iye, *wur ana a dara i təv Mbulum a, i ta mite a ka, kamala ana wakita Mbulum a tsik a. Ama mesewere are a dere a aka gər wele ana a ta ge aà iye a ɗaf a ka, batsah ŋa hinne. A ta ge a dər kaɗəŋ ana, meme ɗar a? Ŋgulum na ta wa ŋgat tsiye.» 25 Yudas, wele ana a ge ahər a ɗaf a, a tsam ahər, a gwaɗar: «Kù gwa ana, iye kəla ya, Batsah gà ŋa?» Yesuw a gwaɗar aaka: «Haya, kamala ana kà tsik a.»

Yesuw a sasaba ɗaf a gà ɓəzla mazazama ŋgat

Markus 14:22-26; Luka 22:15-20; 1 Kurintiya 11:23-25

26 Aləka i dəba ya ŋa, tar riŋ aà mazəma ɗaf tar ata hiywe. Yesuw a zla ɗaf ata, a ge dərraha kəkaaha a Mbulum, dite a sasa ikaba ya. A dzaya a gà ɓəzla mazazama ŋgat. A gwaɗa a tar: «Ndzəkum, ka zəmum. Aɗaba taŋa ka, slu ba gà.» 27 I dəba ŋa ya, a zla kivit meɗwìtsè mawà dukw duwa iɗəm makwàsà ŋa. A ge dərraha kəkaaha a Mbulum asa, dite a vəl a tar. A gwaɗa a tar: «Sum tserdze. 28 Naha ka, məmbəz ga ana i ti dze a dər a bəɗ, aɗaba məpəla dər à bakal gà mburma ana ika gər ahəɗ hinne ya. Taŋa ka, dukw ana i sir a dər ba à gà mburma nda Mbulum hiywe aà biybiy a. 29 Iye ihər i gweɗe a kurum a nda ndzer: I ti se a meɗwìtsè mawà dukw makwàsà ŋa aaha asa tsidze, haa a pat ana ki ti sekwe a dukw ata awiya ŋa a təv mendze *mekwere Mbulum Tsir gà ya.»

30 I dəba ŋa ya, tə zàmbaɗa à Mbulum nda dimis, dite ta màhara ba i fata ya, ti de a aà sik kwite Ndzendzebire.

Yesuw a ɗif à Piyer ana a ta gweɗe aà ŋgat a, i sər ŋgat tsiye

Markus 14:27-31; Luka 22:31-34; Yuhana 13:36-38

31 Aləka aka təv ana ti ndze aà vatwa ya ka, Yesuw a gwaɗa a gà ɓəzla mazazama ŋgat: «I həvəɗ aaha mbakum a ka, kurum aaha tserdze ya, ki tìzwim a aà iye ya, magəɗa a ge a kurum ŋa. Aɗaba a riŋ mewetse ŋa i wakita Mbulum, a tsik aà iye, Mbulum a gwa: “I kiɗ a mala makəva gà təmaŋ, dite gà təmaŋ ata ta wiye a ba bìrìm a dala.”» 32 I dəba ŋa ya, Yesuw a gwaɗa a tar asa: «Ama Yàa ta mimbilera i məməta ya ka, i lèh a kurum a a Galile.»

33 I dəba ŋa ya, Piyer a gwaɗar aaka: «Ku mege gà misle ŋgiɗ tàa miyak à kər tserdze tekeɗe, iye ka, i miyek a à kər tsidze.» 34 Ama Yesuw a gwaɗar aaka: «Iye ihər i gweɗek a nda ndzer, ka bana ba yak nda iye tsa. Ələk guŋgwazl a ta tiwe a i həvəɗ aaha mbakum a ka, kər kàa gwa medzige makər, i sər Yesuw tsa.» 35 Ama Piyer a gwaɗar aaka: «I tsikik a ka, nda ndzer, pàrsa iɗəm tsa: Ama i sər kər tsəka, i gweɗe a tsidze. Ku mege ki meteme a sula məma tekeɗe ka, i tsik a tsa.» Gà asiŋ gà ɓəzla mazazama ŋgat tserdze ibam, ti tsik kataya asa mbaŋa.

Yesuw a hama a Mbulum i təv duwa tə zalar Getsemene

Markus 14:32-42; Luka 22:39-46; Yuhana 18:1

36 Aləka i dəba ŋa ya, gà Yesuw nda gà ɓəzla mazazama ŋgat ti ndze a tə̀vəməŋa a riŋ i dala, tə zalar Getsemene ka, a gwaɗa a tar: «Ndzum a bəɗ a faha, iye ka, i de a aka miɗ, i ta heme a a Mbulum a fata dzekwiŋ.» 37 Aka təv ana a de a ya ka, a ndzək dər gà Piyer nda gà ɓəza Zebede aà ahər. Tə da i təv gà asiŋ gà ɓəzla mazazama ŋgat aaha ya. A təv ana ti ndzeha a fata ya ka, Yesuw a dza ba aà medzedzere nda matsəɓatsəɓ hinne. 38 A gwaɗa a gà ɓəzla mazazama ŋgat aaha makər a: «Gəzləŋ ga ka, aka rah nda məməta ana a ŋgeɗits a iye ya. Ndzum a faha. Ama ki ndzekwe a kəla ka, nda metsehe lele.» 39 A miyak à tar a fata. A da kətsah a zlawak. A daha, a kal aba a bəɗ aka ahəɗ, a dza ba aà mahàmà a Mbulum. A gwaɗar: «Kamkam Tsir gà, aka təv ana mesewere are ata aka ndzera ya ka, ma ta giŋ ba a gər tsa te, na mege a ge a ba ya. Aɗaba kər ka, kà sle aà duwa tserdze. Ama ki ge a kəla ka, kamala ana a sàsak a, tsəka, kamala ana a sèsiŋ a tsa.»

40 I dəba meheme ŋgar ata ya ka, a mbəɗ gər a dəba a təv gà ɓəzla mazazama ŋgat a makər ŋa aaha. A daha ka, a leha à tar aka mendze are. A gwaɗa a Piyer: «Ki ndze a are ya? Wànà ki slwim a aà mendze nda are nda gà iye ler ilik tsidze ya?» 41 I dəba ŋa ya, a gwaɗa a tar asa: «Ndzum nda metsehe, kà hamum a Mbulum, dite ka tə də̀ɗum aka məbàzà za Əbay sitene tsa. Ama kurum ka, kàa wayum lele, ba kurum na a sle a aà magəsa ŋa tsiye pəra.»

42 Aləka a tsik a tar aba ya kataya ka, a mbəɗ gər a zlawak asa. A daha, a hama kamala ana a lah ahər piŋŋe ya. A gwaɗa a Mbulum: «Tsir gà, na mege a ge a ba ka, zla aà iye mesewere are aaha ya, mi miyak à iye te. Ama ŋgulum ka, i sèwèr a are pəra kamala ana a sàsak a, tsəka, ma ti ne kamala ana iye i waya ya tsa.» 43 I dəba ŋa ya, a màha a təv gà ɓəzla mazazama ŋgat asa. A daha ka, tar riŋ ika mendze are mba hiywe, ti sle aà mendze nda are ku ler ilik tsidze.

44 A miyak à tar, a da a zlawak məmakər ŋa asa. A daha, a hama a Mbulum kamala ana ndeɗiŋa ya. 45 I dəba ŋa ya, a mbəɗaha gər a təv gà ɓəzla mazazama ŋgat asa ka, a gwaɗa a tar: «Kurum ana, aà mesifikaba aaha ika mendze are ya mba pəra hiywe ya? Ama kinehe ka, ler ŋa aka sle kuɗa, fə̀rum aà iye, *wur ana a dara i təv Mbulum a, araha ta vile a iye a ahər a gà ɓəzla bakal kuɗa. 46 Hitswim aà mbulum, tàkwa a təv wele ana a ge aà iye a ɗaf a. Araha, aka à mendzera a faha ya.»

Magəsa Yesuw ana ta gəs a

Markus 14:43-50; Luka 22:47-53; Yuhana 18:3-12

47 I təv mifefile Yesuw ata ya tsara ka, Yudas ika magər gà ɓəzla mazazama ŋgat aaha kurwa gəra sula ya, aka slalaha a təv ŋgar. Tə daha ka, nda gà mburma hinne. Gà mburma ata tə daha ka, nda gà dukw ahər aà tar, gà masalama nda gà matakwazum. Na a sləraha tar ka, gà Əbay gà ɓəzla mandəva kuɗa a Mbulum nda gà bàba gà mburma ana ta kwere a gà Yahuda ya. 48 Ama i təv ana tì ti dze a ba aà magəsa Yesuw a ka, Yudas, mala medeɗef ata, aka mbər meɗife a tar aba à wirwir ŋa ya. A gwaɗa a tar: «Araha ki tèkwe a ka, wele ana Yàa ger wusa nda mendzìwìɗèba ahəm a ka, taŋa ka, ŋgat ŋa. Dite ka yàbum aaka, kə̀ gəsum ŋgat tsara.» 49 Aləka Yudas a ndzeha a təv Yesuw tsara ka, a sìrìkaha a təv ŋgar. A daha, a gwaɗar: «Wusa Əbay gà.» Dite a ndzìwìɗer ahəm. 50 Yesuw a gwaɗar: «Masla gà, kinehe ka, ge dukw ana kà da aakara a təv ga ya.» I dəba bazlam ŋgar ata ya tsara ka, gà mburma ata tə daha, ti yabaya aaka, ta gəs ŋgat kuɗa.

51 Mìsle ŋgiɗ ilik aà gà mburma ata ti zezem a Yesuw a mbaŋa. A ndzàhara masalama ŋgar i ga ya. A lak dər a kəla meslire *batsah mala mandəva kuɗa a Mbulum. Pats, a sàs dər ihər zləm a. 52 Ama Yesuw a gwaɗa a wele ata: «Mà à masalama yak a ga tsəka, aɗaba gà na ta ge a guvəl nda masalama ya ka, aka miɗ mba ka, seriye ika gər tar, masalama a sese a ika tar gər a. 53 Wànà kər dze ana, kà sər ti tsiye, na i hama a Mbulum Tsir gà, i gwaɗar ka, mà zlèk iye, dite ka, ma sliriŋara gà gawla ŋgar a, màdzànàpa ŋa à zè a kurwa gər sula tsara ana, a sle a tsiye? 54 Ama na i ge a kataya ana, meme na dukw ana i wakita Mbulum a ne a ndzer kaɗəŋ a? Aɗaba a riŋ mewetse ŋa i wakita Mbulum ka, a gwa, ta ge a à iye kataya.»

55 I dəba ŋa ya, Yesuw a gwaɗa a gà mburma ata ta gəs ŋgat a: «Kà dumara naha kataya nda gà masalama, nda gà matakwazum ana, aà megìse iye ya? Wànà kamala ana, iye ka, mala akəl a ya? Kəla pat iye riŋ i təv kurum, i tsikewa a kurum guma i ga Mbulum batsah ŋana ka, wàlaa kàa gəsum iye tsa. 56 Ama taŋa ka, aɗaba dukw ana i wakita Mbulum a tsik a gà ɓəzla məma à guma ŋgar a ka, məpaslà ahər ŋa aka ndze aɗəm kaɗəŋ a, tsəka, ki slwim a aà magəsa iye tsa.»

I dəba ŋa ya, gà ɓəzla mazazama ŋgat tə tsaraka kataya tsara ka, tə təz ihər a fit, swiyèh swiyèh a dala ya kaɗəŋ.

Yesuw i seriye ika miɗ gà bàba gà Yahuda

Markus 14:53-65; Luka 22:54-55,63-71; Yuhana 18:12-14,19-24

57 Aləka gà mburma ata ta gəs Yesuw a, tə da à ŋgat a bəra *batsah mala mandəva kuɗa a Mbulum duwa, zləm ŋgar Kayafas. I fata ka, gà ɓəzla medzeŋge məpala ahəm Mbulum, nda gà bàba gà mburma ana ta kwere a gà Yahuda ya, ti yahaba ahəraha gər a fata tserdze. 58 I təv ana ta gəs Yesuw, ti de a dər a ka, Piyer a zazam ŋgat i sik a i sik a, i dəba ya diriŋ, tsìm a bəra batsah mala mandəva kuɗa a Mbulum ata. A daha, a pəts a ga, a ndza a bəɗ aka varavada i huɗ ga, a təv gà ɓəzla makaslà ga wele ata. Aɗaba a sasar məfə̀rà aà dukw ana ta ge a à Yesuw a.

59 Gà bàba gà ɓəzla mandəva kuɗa a Mbulum, nda gà asiŋ gà mburma ana ta kwere a gà Yahuda ya tserdze, ti yaha vatwa aà mege seriye aà Yesuw i fata kuɗa. Tə sasaya ahər pàrsa hinne, aɗaba a sàs a tar makə̀ɗà ŋgat. 60 Ama gà mburma ata hinne tə sasaya ahər pàrsa pampam tekeɗe ka, tàa ŋgat aɗəm bakal ŋa ana ta kiɗ ahər a ŋgat a ɓav tsa. I dəba ŋa ya ka, gà mburma ta hitse aà Mbulum sula, tə daha, 61 ta gwa: «Wele aaha a gwa ka: “I mbezle a à ga Mbulum batsah ŋa aaha, dite i huɗ mehinne makər a ka, Yàa zlazl aɗəm biy ŋgiɗ asa” dze ana, taŋa ana, meme?»

62 I dəba ŋa ya, batsah mala mandəva kuɗa a Mbulum ata a hitse aà mbulum, a gwaɗa a Yesuw: «Kà fàfəl a tar aaka tsəna, meme, na kà ndza ɗikɗik a? Dukùla na ti tsik aà kər a ya?» 63 Ama Yesuw aka fàfəlar aaka tsidze, a ndza ba ɗikɗik. I dəba ŋa ya, batsah mala mandəva kuɗa a Mbulum ata gwaɗar asa: «Iye ihər i wiz aà kər a duwa nda zləm Mbulum ana a riŋ nda gà mesife aà biybiy a, tsikiŋ wur bazlam ilik kwaŋ: Wànà kər ana, *Kiristi Kəla Mbulum kaɗəŋ a?» 64 Yesuw a gwaɗar aaka: «Kataya, kamala ana kà tsik a. Ama aka miɗ zaakwa ka, ki ŋgetwimiŋ a, a iye, *wur ana a dara i təv Mbulum a, iye mandza ŋa ika tseke ahər mezime Mbulum ana a za gà dukw tserdze ya. Ki ŋgetwimiŋ a asa ka, aà gəza mbulum tirwenihhe, i dere a nda hulɓukw a.»

65 Batsah mala mandəva kuɗa a Mbulum ata a tsaraka kataya ka, a tsəɓar hinne. A tayara ikaba petek ŋgar a kwìyeɗ kwìyeɗ fit. A gwaɗa a gà mburma ŋgar ata: «Bazlam a riŋ asa tsa, kàa tsarakum bazlam ŋgar ata a tsik aà Mbulum ŋgwala tsiye te tsiye? Ki yehekwe a ana, əla na à gà ɓəzla sida asa ya? Kàa tsarakum mezelme bazlam ŋgar ata a ndavayar a te tsiye? 66 Kù gwaɗum aaka i kurum dze ana, meme, na aka bazlam ata ya?» Gà mburma ata tserdze ya, ta gwaɗar aaka: «Na kataya ka, bazlam a riŋ asa tsa. Ŋgat ka, mala bakal ndzer, say makə̀ɗà ŋgat ilik pəra na a zeha ya.» 67 Gà misle ŋgiɗ ika magər gà mburma ata ya, ŋgùɗàsl ŋgùɗàsl tə dza ba aà metìfèyè ahər tìzle tsara. Ta gə̀zl ŋgat, tə lakayar waŋwaŋ aka mahalum. 68 I dəba ŋa ya, ta gwaɗar: «Weke na a lakayak a, na kù gwa i sər duwa, iye ka, Kiristi, mala məmbə̀là à mburma ana Mbulum a gwa, i slir a kurumaha a ya?»

Piyer a ɗe bərakə̀zam a Yesuw

Markus 14:66-72; Luka 22:56-62; Yuhana 18:15-18,25-27

69 Piyer ka, ŋgat a riŋ mandza ŋa i bəɗ ika varavada i ga ata hiywe mba. Zàmma tsəka, daala duwa a riŋ ilik a gewa megemir i bəra *batsah mala mandəva kuɗa a Mbulum ata. A ŋgataha a Piyer, a gwaɗaraha: «Kər tekeɗe ka, mburma Yesuw aaha a dara i Galile ya dìgiy?» 70 Ama Piyer a ɗe bərakə̀zam a Yesuw ika miɗ gà mburma ata tserdze ya. A gwaɗa a məkəs ata: «Lalala, iye ka, i sər dukw ana a sàsak aà metsikiŋ a tsa.» 71 I dəba ŋa ya, a daha, slip a ndza aà guva biye hərmaga madàra a bəra ya ka, məkəs ŋgiɗ duwa a ŋgataraha a fata asa. A daha, a gwaɗa a gà mburma ana i fata ya: «Wele aaha ka, mburma Yesuw aaha a dara i Nazaret a mbaŋa.» 72 Ama Piyer a tsaraka taŋa ka, a mbaɗa, a gwaɗa a tar: «I gwaɗa a kurum ka, i sər ŋgat tsa tiye gà welè.» 73 Zàkwayiya ka, gà mburma ata i fata ya, ta gwaɗa a Piyer asa: «Kər ka, ki sle aà megweɗe a ka, iye ka, mburma ŋgar tsəka, ki sle a tsa. Aɗaba bazlam yak ana ki fèfilere a ika arah a ka, aka mbər meɗife à kər, kà dara ka, i Galile ya mbaŋa.» 74 Ama Piyer a gwaɗa a tar: «Mbulum ma sèwèriŋ are na ki ge i sər ŋgat a. Taŋa i mbaɗa ka, nda ndzer ŋa, i sər wele aka kinehe ki tsikwim ahər a ya tsidze.»

I fata ya tsara ka, guŋgwazl a dza ba aà tuwa. 75 I dəba ŋa ya, Piyer a dzala aka bazlam Yesuw ana a gwaɗar ka, ələk guŋgwazl a ti tiwe a ka, kàa gwa medzige makər, i sər Yesuw tsiye ka, aka màrəra a gər a. A dara i ga ya, a dza ba aà tuwa hinne.