Yuhana 1

Ŋgwal bazlam ana

YUHANA

a tsik a

Tə zal bazlam Mbulum ka, a Yesuw Kiristi

1 Akahər ata piŋŋe, i təv ana Mbulum aka ge gər ahəɗ zukw tsiye ka, wele ana tə zalar bazlam Mbulum ka, a riŋ dukw ŋgar. Ŋgat ka, a riŋ mandza ŋa i təv Mbulum, dite ŋgat ka, Mbulum mbaŋa. 2 Daga piŋŋe ka, ŋgat a riŋ i təv Mbulum. 3 Mbulum a ge gà dukw tserdze ka, nda ahər ŋgar. Duwa ilik na Mbulum a ge nda ahər ŋgar tsiye ka, a riŋ tsa. 4 Mesife gà duwa tserdze a dara ka, i təv ŋgar a, dite mesife ata ka, a vəlawa təv dzaydzay ŋa a gà mburma mbaŋa. 5 Təv dzaydzay ŋa ata a də̀vawa ika magər luvuŋ, ama ka, luvuŋ a sle aà mimbete dər tsa.

6 Akahər ata ka, Mbulum a slərra mburma ya, zləm ŋgar Yuhana. 7 A dara ka, aà meɗìfè à təv dzaydzay ŋa a gà mburma, dite ka, gà na tàa tsaraka bazlam ŋgar ata tserdze ya ka, ta gəs təv dzaydzay ŋa ata a tsik a ter a ya. 8 Ŋgat tsa na a ne təv dzaydzay ŋa ya. Ama a dara ka, aà meɗìfè à təv dzaydzay ŋa ata pəra. 9 Təv dzaydzay ŋa ata ndzer ŋa ya ka, wele ana tə zalar «Bazlam Mbulum» a. A dara aka gər ahəɗ a ka, aà medìve ika magər gà mburma tserdze.

10 Ŋgat ɗa ika gər ahəɗ. Ama ku mege Mbulum a ge gər ahəɗ nda ahər ŋgar tekeɗe ka, gà mburma ana iɗəm a, tə sər ŋgat tsa. 11 A dara ka, aka ahəɗ ŋgar a. Ama gà mburma ŋgar tàa gəs ŋgat tsa. 12 Ama gà asiŋ ŋa kə̀la ka, ta waya ŋgat, tàa gəs ŋgat nda gəzləŋ tar lele. Tar ka, aka vəl a tar vatwa aà mene gà ɓəza Mbulum. 13 Ti ne gà ɓəza Mbulum ka, a wa tar kamala ana mburma ti dzele a, ta we a ba ya tsa. Ti ne gà ɓəza Mbulum ka, agəra ana a vəl a tar mesife awiya ŋa ya.

14 Ŋgat ana tə zalar «Bazlam Mbulum» a, na a ne mburma ya, dite ka, a ndza ɗa ika magər mə̀r zaakwa ya. Maa ŋgat a ndzəɗa ŋgar ana a za gà dukw tserdze, Mbulum a vəl a Kəla ŋgar ata mifèndèz ŋa, a da dərra i təv ŋgar a. Ŋgat ka, mala ndzer ŋa. A gewa ka, dukw ana ŋgwal ŋa ya ɗekɗek.

15 I təv ana a pàt aba ya ka, Yuhana aka tsik aà ŋgat parakka, a gwa: «Araha na wur ana akahər ata i tsik ahər, i gwa: “A dere a i dəba gà ya mba. Ŋgat ka, a za iye kweleŋ fetite. Aɗaba ŋgat a riŋ daga aà gər ana tàa wa iye zukw tsiye.”»

16 Kwa tserdze kàa ŋgatakwa Əbay ŋgar, dite a pisewa a kwa dər ahəm ka, sik diŋdiŋ màdzànàpa ŋa. 17 Mbulum aka vəl a kwa məpala ahəm nda ahər Musa. Ama a ge a kwa ŋgwal ŋgar, a ɗif a kwa à ndzer ŋgar ka, nda ahər Yesuw Kiristi. 18 Wura aka ŋgat a Mbulum ilik tsidze. Ama Kəla ŋgar ata mifèndèz ŋa tə ndzawa i təv ilik ŋa nda ŋgat a, na a ɗif a kwa dər a.

Bazlam ana Yuhana metsìlwìɓè à mburma a yam a tsik a

Mata 3:1-12; Markus 1:1-8; Luka 3:1-18

19 A pat duwa ka, gà bàba gà Yahuda ana i Yeruzalem a, tə slər gà asiŋ gà ɓəzla mandəva kuɗa a Mbulum ana i gwala Levi ya, nda gà asiŋ tar a təv Yuhana, aà megweɗer ka: «Kər ana, weke?» Tə daha a təv ŋgar, ta wiz ahər. Bazlam ana Yuhana a tsik a tar a ka, araha. 20 A tsik a tar parakka ika miɗ mburma tserdze, a gwaɗa a tar: «Iye ka, *Kiristi, mala məmbala à mburma ana Mbulum a gwa, i ti slir a kurumehe a ya tsa.» 21 Tə tsaraka bazlam ŋgar ata kataya ka, ta gwaɗar: «Kər ana, weke? Kər ana, Iliya ana akahər ata ya ya?» Yuhana a gwaɗa a tar aaka asa: «Iye ka, ŋgat tsa.» Ta gwaɗar aakaha asa mbaŋa: «Kər ana, mala məmà à bazlam Mbulum ata Mbulum a gwa, i ti slir a kurumehe a ya ya?» A gwaɗa a tar aaka: «Awaŋ, iye ka, ŋgat tsa.» 22 Ta gwaɗar: «Dite kər dze ana, weke kəla ya? Ɗe a mə̀r aba te. Ki gweɗe a aà ba yak dze ana, weke? Na dite mìi ta me a dər a gà mburma ana tə slərra mə̀r a ya.» 23 Yuhana a gwaɗa a tar aaka: «Iye ka, wele ana Ezaya, mala məmà à bazlam Mbulum ana akahər ata a tsik aà iye, a gwa:

“Mburma ŋa a riŋ i kusak,

à fèfil a ŋgəlakəkka, a gweɗe a:

Làmbaɗum aba vatwa a BATSAH kwa ŋa

a gəzləŋ kurum a fehhè lele.”»

24 I liwiŋ gà mburma ata tə daha a təv Yuhana, ta wiz ahər bazlam a ka, gà *Farisa iɗəm. 25 Tə daha, ta gwaɗar: «Na kər Kiristi tsa, dite kər Iliya tsa, nda gà kər mala məmà à bazlam Mbulum ata tsidze ana, aàmala na ki tsilwiɓ a à mburma a yam a?» 26 Yuhana a gwaɗa a tar aaka: «Aɗaba iye ka, i tsilwiɓ a à mburma ka, a yam pəra, ama wele ŋgiɗ a riŋ, ika magər kurum, kà sərum ŋgat tsa. 27 Ŋgat ka, a dere a i dəba gà ya mba. A za iye nda ndzəɗa kweleŋ fetite. I sle a aà mesirikaha a təv ŋgar, aà məpəla à liɓir tsapà ŋgar tsidze.»

28 Gà dukw ata tserdze ta ge ba ka, i kwite Betaniya, ika lìdè dulwa Yurdan, i təv ana Yuhana a tsilwiɓewa iɗəm à mburma a yam a.

Yesuw a ne kəla təmaŋ Mbulum

Mata 3:13-17; Markus 1:9-11; Luka 3:21-22

29 Ndidwe ŋana ka, Yuhana a ŋgat a Yesuw a riŋ a dehe a a təv ŋgar. A gwaɗa a gà mburma ana i fata ya: «Kəla təmaŋ ana Mbulum a vəl, ta kiɗ a aɗaba məpəla à bakal a mburma ya ka, araha, a deriŋa. 30 I fàfəl ka, aà ŋgat, na i gwa: “Wele ŋa a riŋ a dere a i dəba gà ya ka, à za iye nda ndzəɗa kweleŋ fetite, na ŋgat a. Aɗaba ŋgat ka, a riŋ daga aà gər ana tàa wa iye zukw tsiye.” 31 Iye piŋŋe tekeɗe, i sər ŋgat ana weke tsa. Ama iye, i dara aà metsìlwìɓè à mburma a yam ka, dite gà mburma Isərayel tə sər ŋgat.»

32 Yuhana a tsik ahər asa, a gwaɗa a tar: «Yàa ŋgat a Mezite Mesife Mbulum a riŋ a tarəra i gər ŋa ya, zərawwa kamala maadagwar a, a dara, a ndza a bəɗ aka gər ŋgar. 33 Akahər ata Yàa sər ŋgat ana weke zukw tsa, ama Mbulum ana a slərra iye, aà metsìlwìɓè à mburma a yam a, a gweɗiŋ: “Ki ta ŋget a Mezite Mesife a terre a aka wele ŋa a riŋ a, dite a ndze a aka gər ŋgar.” A gweɗiŋ asa ka: “Wele ata na a ti tsilwiɓ a à mburma a Mezite Mesife Mbulum a.”» 34 Yuhana a gwa asa ka: «Yàa ŋgat a gà dukw ata ndzer, pàrsa iɗəm tsa. Aɗaba taŋa, na iye ihər i tsik a kurum a parakka, ŋgat na Kəla Mbulum a.»

Gà ɓəzla mazazama Yesuw gà malahalah ŋana

35 Ndidwe ŋana ka, Yuhana a riŋ nda gà asiŋ gà ɓəzla mazazama ŋgat sula i fata asa. 36 A ŋgat a Yesuw ana a riŋ ihər a de a ya ka, a gwaɗa a tar: «Naha ka, wele ana a ne kəla təmaŋ, Mbulum a vəl, ta kiɗ a ya.» 37 Gà ɓəzla mazazama Yuhana ata sula ya, tə tsaraka dukw ana a tsik a ka, tə zazam Yesuw. 38 Wudəgə̀r Yesuw a mbəɗ à ba ka, aka ŋgat a a taraha, tar riŋ ti zezemehe a ŋgat. I dəba ŋa ya, a gwaɗa a tar: «Ki yehwim a là?» Ta gwaɗar: «Kər ana, mandza ŋa ana, i ŋga, Rabi?» Rabi ka, kamala megweɗe ya, mala medzeŋge duwa a mburma. 39 A gwaɗa a tar: «Dumara, tàkwa, dite ki sirwim a təv ga ana iye iɗəm a.» Tə da. Tə daha ka, ta ŋgat a təv ana ŋgat mandza ŋa iɗəm a. Tə ləm akaba pat ata, tə ndza akaba ka, aà gər ndzemde faɗ a, haa həvəɗ a ge.

40 Mìsle ŋgiɗ a riŋ ilik i liwiŋ gà mburma ata sula tə tsaraka bazlam Yuhana, dite tə zazam Yesuw a ka, zləm ŋgar Andire. Ŋgat ka, damər Simun Piyer. 41 A le aà damər ŋgar Simun tsara ka, a gwaɗar: «Maa ŋgat a *Masihu, kamala megweɗe ya ka, *Kiristi, mala məmbala à mburma ana Mbulum a gwa, i slir a kurumehe a ya.» 42 I dəba ŋa ya, a laka Simun a təv Yesuw. Dite Yesuw a fə̀r ahər, a gwaɗar: «Kər ka, Simun, kəla Yuhana. Ti ta mbìɗek a à zləm, ti zelek a Kayfas», kamala megweɗe ya ka, Piyer. Taŋa ka, kuvəl.

Yesuw a zal a gà Filip nda Nataniyel

43 Ndidwe ŋana ka, Yesuw a waya à mbìɗ a gər aka ahəɗ Galile. I təv ana a riŋ a de a ya ka, tə lə̀ma nda Filip. A gwaɗar: «Zezem iye, kà tama.» 44 Filip a dara ka, i kwite Betsayida ana gà Andire nda Piyer tə ndzawa iɗəm a. 45 I dəba ŋa ya, gà Filip tə lə̀ma nda Nataniyel. A gwaɗar: «Maa ŋgat a wele ana Musa a tsik ahər i wakita məpala ahəm ŋgar a, dite gà ɓəzla məma à guma Mbulum ti tsik ahər mbaŋa ya. Zləm wele ŋa ka, Yesuw, kəla Yasufa ana i kwite Nazaret a.» 46 Nataniyel a gwaɗar: «Kà dzala ana, duwa a sle a aà medera ŋgwal ŋa lele i kwite Nazaret a ya?» Filip a gwaɗar aaka: «Dara, fə̀r ahər.» Ta mah ba, tə da.

47 Aləka Yesuw a fə̀r Nataniyel a riŋ a dehe a a təv ŋgar ka, a gwa aà ŋgat: «Araha na kəla gà Isərayel ana ndzer, wirwir i ba tsidze ya.» 48 Nataniyel a tsaraka taŋa ka, a gwaɗar: «Ge, kà sərara iye dze ana, i ŋga ya?» Yesuw a gwaɗar aaka: «Yàa ŋgatak aà huɗ guruv duwa aka na Filip aka zalak, kàa màhum ba zukw tsiye?» 49 Nataniyel a gwaɗar: «Batsah mala mesìnèkè à duwa a mburma, kər ka, Kəla Mbulum. Kər ka, batsah Əbay gà Isərayel.» 50 Yesuw a gwaɗar aaka: «Kə̀ gəs iye kamala Kəla Mbulum a ana, aɗaba ana i gwaɗak, Yàa ŋgatak aà huɗ guruv a ya? Yaw, na kataya ka, araha, ki ta ŋget a a gà dukw gà bàba ŋana hinne, tì zè a taŋa ya.» 51 A gwaɗar asa: «Iye ihər i tsik a kurum a nda ndzer, pàrsa iɗəm tsa. Ki ta ŋgetwime a a kuvəl Mbulum ndzayìya mandə̀zlà ŋa ikaba ya, gà gawla Mbulum ti tsil aɗəmiŋa, dite gà asiŋ ŋa, ti terre a aka gər gà, iye, *wur ana a dara i təv Mbulum a mbaŋa.»