9
1 Yesuw a gwaɗa a tar asa:
«Iye ihər i gweɗe a kurum a nda ndzer:
Gà misle ŋgiɗ ɗa ika magər kurum aaha kinehe ya ka,
ta mete a zukw tsa,
say ta ŋget a a *mekwere Mbulum ana a kwere a ya fit dzekwiŋ.»
Yesuw a mbəɗ ba ŋgiɗ pam
2 I dəba mehinne ndilik a ka,
Yesuw a ndzək gà Piyer nda Zakup,
nda gà Yuhana.
Tə tsəl a gər kwite zubul ŋa duwa à gər tar.
Ti ndzeha a fata ka,
Yesuw a mbəɗ ba ŋgiɗ pam.
3 Petek ŋgar a mbəɗ dər herrè tizlzlè,
a za dər madə̀và gà dukw ana ika gər ahəɗ,
mburma a ŋgeter a herrè ya tserdze.
4 I dəba ŋa ya,
gà ɓəzla mazazama ŋgat aaha makər ŋa ya,
ta fə̀r ikaba ya tsara ka,
ta ŋgat a gà Iliya nda Musa ana tar riŋ ta fèfil a nda gà Yesuw a.
5 Piyer a ŋgatar kataya ka,
a gwaɗa a Yesuw:
«Lele Əbay gà,
na kwa ɗa i faha ya.
Mìi kiriw a kurum a ga makər a faha:
ilik biy yak,
ilik biy Musa,
dite ilik ŋa aaha biy Iliya.»
6 A tsiker kataya ka,
a sər dukw ana a tsik a ya tsa.
Aɗaba gà asiŋ gà mburma aaha nda gà ŋgat ŋa ti zezem a Yesuw a ka,
tə dzadzar hinne,
metsehe tar a riŋ asa tsa.
7 *Ta fə̀r ikaba ya ka,
magùdwagùdwa a tarəra aka gər tar a,
tits a le a tar.
Tə tsarakara iɗəm mifefile i fata ya.
Mbulum a gwaɗa a tarəra:
«Naha ka,
Kəla gà mandərkwasla gà ana i waya hinne ya.
Dzum zləm a dukw ana a tsik a kurum a ya.»
8 Aləka gà mburma ata ta fə̀r ikaba ya ka,
wura a riŋ i təv tar asa tsa,
say Yesuw ilik.
9 I təv ana tar riŋ ti terre a i gər kwite ata ya ka,
Yesuw a gwaɗa a tar:
«Ka ti tsikwim dukw ana kə̀ ŋgatumar mbakum a,
a wura tsidze,
haa a pat ana iye,
*wur ana a dara i təv Mbulum a,
i hitsere a i məməta ya dzekwiŋ.»
10 Gà ɓəzla mazazama Yesuw ata ta gəs bazlam ŋgar ata.
Ama ka,
ta gwaɗaba ika magər tar:
«Na a ne mehitsera i məməta ya dze ana,
là?»
11 *I dəba ŋa ya,
ta gwaɗar asa:
«Aàmala na gà ɓəzla medzeŋge məpala ahəm Mbulum ta gwa,
dukw ata a ge a ba kataya ka,
say Iliya à mère a dzekwiŋ a?»
12 Yesuw a gwaɗa a tar:
«Iliya à mère a dzekwiŋ kaɗəŋ.
Aɗaba à mère a ka,
à lèmbeɗe a à gà dukw ana ti de a ndaka vatwa Mbulum tsiye tserdze.»
Yesuw a gwaɗa a tar asa:
«Aàmala na mewetse ŋa a riŋ i wakita Mbulum mbaŋa ka,
wur ana a dara i təv Mbulum a,
à sèwèr a are hinne,
dite gà misle ŋgiɗ ta ger a matawak hinne asa ya?
13 Seyiŋ tsa,
iye ihər i gweɗe a kurum ŋa:
Iliya ka,
aka mbər medera.
Ama tàa sèwèrer are hinne,
kamala ana gəzləŋ tar a waya ya.
Ta ge dər kamala ana gà ɓəzla məma à guma Mbulum ta wetse aba a wakita ya kaɗəŋ.»
Yesuw a mbəl à kəla duwa mahuruvuv a gasawa ŋgat
14 Aləka ti ndze a təv gà asiŋ gà ɓəzla mazazama Yesuw ŋgiɗ ka,
ta ŋgat a gà mburma a riŋ hinne i təv tar.
Gà ɓəzla medzeŋge məpala ahəm Mbulum duwa tar riŋ ta mbetsebe a ahəm nda gà ɓəzla mazazama Yesuw ata hinne ika magər tar.
15 Gà mburma ata ta ŋgat a Yesuw tsara ka,
tə dzar ba a bəɗ lele,
ta ŋgayar ba hinne.
Ta valaha a təv ŋgar.
Tə daha,
ta geyer wusa.
16 Yesuw a gwaɗa a gà ɓəzla mazazama ŋgat ata:
«Ki tsikwim a aàla,
nda gà tar dze ya?»
17 Wele duwa a riŋ ika magər gà mburma ata a gwaɗaraha:
«Iye na i zlakara kəla gà ya,
aɗaba mahuruvuv a riŋ a gasawa ŋgat.
A dànawar aka bazlam.
18 I təv ana aka dza ahər ba ya ka,
a dzawuwa à ŋgat a bəɗ,
mazlə̀mbats pàrpàrpàr a dawarra i bazlam a,
à pèpìɗ a dər zlir,
dite ba ŋgar fit a kwiliŋa.
I gwaɗa a gà ɓəzla mazazama kər aaha,
delewimiŋ ihər a te ka,
ti sle tsa.»
19 Yesuw a gwaɗa a tar akaba tserdze:
«A kurum gà mburma ana kì giswim iye nda gəzləŋ kurum tsiye.
Wànà iye dze ana,
i gesl a aà metsike a kurum dze ana,
hilè,
na dite ki giswim a iye ya?
I ndze a dze ana,
hilè ɓav a,
na i təv kurum a?
A za dumaha,
ka zlwimiŋara kəla ŋa a faha ya kwaŋ.»
20 I dəba ŋa ya,
gà mburma ata tə daha,
tə zlaraha kəla ata.
Sitene ata a ŋgat a Yesuw tsara ka,
a dzadzar à kəla ata nda magala hinne.
Kəla ata a dəɗ dər a bəɗ,
a mbaɗa aba ika ahəɗ,
mazlə̀mbats pàrpàrpàr a dara ihər i bazlam a.
21 Yesuw a gwaɗa a tsir ŋa:
«Dukuməŋa aka ndza ihər dze ana,
hilè?»
Tsir kəla ata a gwaɗar:
«Aka ndza ihər ka,
daga aà gər kəla ndirkiz a.
22 Kəla pat sitene ata a sasar makə̀ɗà ŋgat.
A kalawa à ŋgat a akwa nda yam,
aka à mimìte dər.
Aɗaba na kà sle aà mege duwa ka,
zlak mə̀r te.
Mì ndzek are tsehe te tsiye?»
23 Yesuw a gwaɗar aaka:
«Aàmala na kù gwa ka,
kà sle aà mege duwa ka,
zlak mə̀r te ya?
Ama dukw tserdze ka,
mawùràba ŋa tsa,
na kər riŋ kàa gəs iye nda gəzləŋ yak a.»
24 Tsir kəla ata a ndə̀var kuɗa ŋgar,
a gwaɗar tsara:
«A sèsiŋ magəsa kər te ibam,
aɗaba i sle aà magəsa kər nda ndzəɗa gà tsa,
zlak iye te.»
25 Yesuw a fə̀r ka,
gà mburma a riŋ ihər ti dehe a a təv tar,
tì sìkèhihe a hinne.
A kwara akaba sitene ata nda magala hinne,
a gwaɗar:
«Sitene,
kər ana kà sle mehìndìkè aka bazlam nda zləm a mburma ya.
Iye ihər i kwere a kər:
Dara i ba kəla aaha ya tsəma kinehe,
ka da.
Kà ləm ahər asa tsidze.»
26 Sitene ata a tsaraka kataya tsara ka,
a dza ba aà Mewideye.
A dzadzar à kəla ata nda magala hinne asa,
dite a dara i ba ŋgar a,
a daba.
Kəla ata a wiye ba nday miɓìrìzle.
Gà mburma ata i fata ya ka,
ta gwa:
«Aka mət.»
27 Ama Yesuw a daha,
a gəs ŋgat i ahər a,
a hitse dər aà mbulum.
28 Aləka gà Yesuw nda gà ɓəzla mazazama ŋgat aaha ta mah ba,
tə da a ma.
I təv ana ti ndze a ma à gər tar a ka,
ta gwaɗa a Yesuw:
«Aɗaba la na mə̀r ka,
mì sle aà madalawa gà sitene à kəla ata ya te tsiye?»
29 Yesuw a gwaɗa a tar aaka:
«Say na ki hemwim a a Mbulum a dzekwiŋ,
na dite ki slwim a aà madalawa magwàlà gà sitene ata ya.»
Yesuw a ɗif à məməta ŋgar ana a ta mbilere a i biye ya,
masula ŋa
30 Aləka i dəba ŋa ya,
gà Yesuw nda gà ɓəzla mazazama ŋgat,
ta hitse i fata ya,
tə da ndaka ahəɗ Galile.
A sàs a Yesuw ka,
gà mburma tə sər ahər a riŋ i fata,
ŋgat ana,
i ŋga tsa.
31 Aɗaba a tsikewa bazlam a gà ɓəzla mazazama ŋgat ata ka,
dukw ana a ta ger a ba gər aka miɗ mba ya.
A gwaɗawa a tar ka:
«Iye,
*wur ana a dara i təv Mbulum a ka,
ta gis iye mba.
Ta vile a iye a ahər a gà mburma,
dite ta kiɗ a iye.
Ama i huɗ mehinne makər a ka,
i ta hitsere a i məməta ya a mesife asa.»
32 Ama gà ɓəzla mazazama ŋgat ata,
tə tsaraka dzəba bazlam ata kataya ya tsa,
magəɗa a ge a tar aà mewize ahər hinne asa.
Meme na mene batsah ŋa ika miɗ Mbulum a?
33 Aləka gà Yesuw nda gà ɓəzla mazazama ŋgat ti de a a Kafarnahum.
I təv ana ti ndzeha a fata ya ka,
tə dza ba a ga duwa a riŋ i fata.
Yesuw a gwaɗa a tar:
«Kà tsikwim ndeɗiŋa aà vatwa dze ana,
əla?»
34 Gà mburma ata ta gəs mifèfiler aaka tsa,
aɗaba mimbètsèba ahəm tar ata ta mbetseba,
ta gwa:
«Weke na batsah ŋa ika magər kwa ya ya?»
35 Yaw,
Yesuw a ndza a bəɗ.
A zal a gà ɓəzla mazazama ŋgat aaha kurwa gəra sula ya.
A gwaɗa a tar:
«Na aka sàs a wura aà mene mala aka miɗ i magər mburma ka,
say ma ne à ba ŋgar mala dəba mburma tserdze,
dite ma ne mala meslire tar asa.
Wur ana aka ge dər kataya ya ka,
a sir a dər,
aka ne mala aka miɗ ndzer ŋa ana ika miɗ Mbulum a.»
36 I dəba ŋa ya,
Yesuw a zal a kəla ndirkiz ana kwizikw a.
A hitse dər aka magər tar.
A gəs aàba ə̀ŋgəts.
A gwaɗa a gà ɓəzla mazazama ŋgat ata:
37 «Ku weke na aka gəs aà mege gər a kəla ndirkiz kamala kəla aaha ya aɗaba iye ya ka,
a ge gər taŋa ka,
a iye.
Ama ka,
a iye ɗekɗek tsa.
A ge gər ka,
a wur ana a slərra iye ya mbaŋa.»
Wur ana a ge aà kwe a guvəl tsiye ka, wur kwa
38 I dəba ŋa ya,
Yuhana a gwaɗa a Yesuw:
«Əbay,
maa le aà wele duwa,
a delewe a gà sitene i ba mburma ya nda zləm yak.
Ama mì palar ahəm,
aɗaba ana ŋgat ka,
mburma kwa tsiye.»
39 Yesuw a tsaraka kataya ka,
a gwaɗa a tar aaka:
«Ka palumar ahəm tsa,
aɗaba wura a ge a dukw mene aà mburma nda zləm gà ka,
aləka aka miɗ ka,
a sle a aà metsike aà iye dukw ana ŋgwala tsiye tsa.
40 Aɗaba taŋa,
wur ana a ge aà kwa a guvəl tsiye ka,
wur kwa.
41 Iye ihər i gweɗe a kurum a nda ndzer:
Ku weke na aka tə̀f a kurum yam,
aɗaba ana kurum gà mburma gà ya ka,
a ta ŋget a dukw maya ba ŋgar ndzer,
a dzeye a tsidze.»
Mege metsehe a dukw bakal
42 Yesuw a gwaɗa a tar asa:
«Wur ana a bene a medzibe gà ɓəza aaha ta gəs iye ya,
a bakal ka,
ŋgulum tə̀ danar batsah zal kur a ɗa,
dite tì yè a dər akaba ŋgat a duluv batsah ŋana,
ndəna seriye Mbulum a le ahər a ya.
43-44 Na ahər yak à gis a kər a bakal ka,
ə̀ndats sàs aba ya.
Ŋgulum na ki ŋget a mesife i təv Mbulum nda gà ahər yak ilik a,
na ndəna ki de a akwa ana ŋgarŋgar a mbete a tsa aà biybiy nda gà ahər yak sula ya.
45-46 Kige tsa na sik yak a de a à kər a bakal ka,
sàs aba ya.
Ŋgulum na ki ŋget a mesife i təv Mbulum nda gà sik yak ilik a,
na ndəna tì yè a kər a akwa nda gà sik yak sula ya.
47 Kige tsa asa,
na are yak a bene a kər a bakal ka,
ùndzuɗ ndzàhara aba ya.
Ŋgulum ki de a,
ki ndze a ika gər ahəɗ ana Mbulum a ge awiya ŋa ya,
nda gà are yak ilik a tsiye,
ndəna ti ye a kər a akwa nda gà are sula ya,
48 *i təv mawùràba ana à ndìv a tsa,
metinwe mazəma mburma à mite a tsiye,
dite zlirkwa a mbete a tsa asa ya.
49 Ku weke a simehe a a mesewere are kamala sluwəl ana a dəɗ a gəzləŋ a tsəka,
a miyek a à bazlam gà.»
50 Dite a gwaɗa a tar asa:
«Liwir ka,
dukw ŋgwal ŋa.
Ama na aka və̀ɗ tsəna,
ki ge a dər ana,
meme na dite à vìɗ a ya?
Say nwim ka,
kamala ana a və̀ɗ a.
Metsehe kurum ŋgwal ŋana mə̀ pàt à ba lele.
Ndzum zayzay ilik ilik tserdze.»