Luka 9

Yesuw a slər gà ɓəzla mazazama ŋgat ata kurwa gəra sula ya

Mata 10:1,5-15; Markus 6:7-13

1 Aləka i dəba ŋa ya, Yesuw a yaha gər a gà ɓəzla mazazama ŋgat aaha ndeɗiŋa kurwa gəra sula ya. A vəl a tar ndzəɗa aà madalawa gà sitene aà mburma ya, dite aà məmbala à gà ɓəzla dukw məməta asa. 2 I dəba ŋa ya ka, a slər tar aà metsìkè bazlam *mekwere Mbulum a mburma, dite asa, aà məmbala à tar mbaŋa. 3 A gwaɗa a tar: «Dum, ama ka tə zlum dər duwa aà ahər ilik tsa kəla. Ku mege zəva, kige tsa kìywa, nda gà dukw mezime, bəla siŋgwe tsa. Ama ka tə ndzəkum dər petek sula ɓav tsa asa. 4 Aləka a təv ana kàa ndzwim aɗəm, bəla tàa gwaɗa a kurum: “Dumara, ndzum a faha” ya ka, ka tə zazaɗum a təv ŋgiɗ pam tsa. Say a pat ana ki mèhwim a ba i fata ya dzekwiŋ. 5 Na bəla kàa ndzwim a kwite ana ta waya kurum tsiye ka, tatakum a tar aba à ahəɗ tar à tsapà kurum a, dite ka dum ba dukw kurum. Taŋa ka, kamala megweɗe ya: Maa be a kurum à ɗaf, sida ŋa ika gər kurum.»

6 Aləka i dəba ŋa ya, gà ɓəzla mazazama Yesuw ata ta mah ba, tə da aà kwite aà kwite, ti tsikewa bazlam ŋgwal ŋana a mburma. Tə daha, ta mbala à gà mburma ana i dukw məməta tar a, ku mege i ŋga.

Madzala gà gər *Hiridus a mbəɗ aba

Mata 14:1-12; Markus 6:14-29

7 Ama ka, batsah Əbay duwa a riŋ i fata, zləm ŋgar Hiridus. A tsaraka meɗè zləm Yesuw nda dukw ana a ge ba ya tsara ka, a ndzək ihər metsehe ya, a sər dukw ana a ge a ya asa tsa. Aɗaba gà asiŋ gà misle ŋgiɗ ta gwa ahər ka: «Yuhana metsìlwìɓè à mburma a yam aka mbəlara i məməta ya.» 8 Gà misle ŋgiɗ pam, ta gwa i tar ka: «A ge a ka, Iliya ana akahər ata ya, na a dara ya.» Gà misle ŋgiɗ pam asa, ta gwa ahər: «A ge a ka, wura ilik ika magər gà ɓəzla məma à guma Mbulum ana akahər ata ya, na a mbəlara i biye ya.» 9 Ama Hiridus a gwa: «Yuhana ka, Yàa mbər mesèse ikəka gər a dze ana, dite weke na, i tsereke a maɗə̀và zləm ŋa nda təv gà dukw ŋgiɗ a pampam kataya asa ya?» I fata ya ka, a sasar aà maŋgata a Yesuw zləmana.

Yesuw a vəl dukw mezime a gà mburma hinne, ti sle

dəbuw ə̀zləm

Mata 14:13-21; Markus 6:30-44; Yuhana 6:1-14

10 Aləka i dəba ŋa ya, gà ɓəzla meslire Yesuw aaha ndeɗiŋa a slər tar a, tàa mbəɗaha gər a təv ŋgar. Tə daha ka, tə ɗamar dukw ana ta ge riŋ i fata ya fit dze. A sàs a Yesuw na ti de a a kwite ŋa a riŋ tə zalar Betsayida ya, kətsah aà kwite ya zaakwa, à gər tar. A ndzək dər gà ɓəzla mazazama ŋgat ata, tə da akaba tserdze. 11 Aləka gà asiŋ gà mburma aaha tə sər aàba, tàa da ka, tə zazamaha tar a fata mbaŋa. Ti ndzeha a fata tsara ka, Yesuw a gwaɗa a tar: «Dumara a təv ga ya.» Tə daha ka, a tsik a tar bazlam mekwere Əbay Mbulum. A mbala à gà mburma i dukw məməta tar a tserdze.

12 Aka pat ana à dìɗ a ya ka, gà ɓəzla mazazama Yesuw aaha kurwa gəra sula ya, ti sìrìkaha a təv ŋgar. Ta gwaɗar: «Gwaɗa a gà mburma aaha, tə da, tə ti yahaba gà duwa aà bazlam a huɗ kwite, nda gà a kə̀sà ana a mbera bise ya, ti yaha aàba gà təv mehinne tsəna, meme? Araha, kwa tekeɗe ka, i kusak məfara ŋa asa ya.» 13 Ama Yesuw a gwaɗa a tar: «Kurum ŋa, vəlum a tar dukw mezime.» Ta gwaɗar aaka: «Araha, na aà kwa ka, tapa ɗaf ə̀zləm, nda kilif sula pəra ana, meme? Wànà a sàsak ana, mi da sə̀kəmara dukw mezime aɗaba gà mburma aaha fit a ya?» 14 Ama mburma a riŋ i fata kəla ka, ti sle dəbuw ə̀zləm.

Yesuw a gwaɗa a gà ɓəzla mazazama ŋgat ata: «Ndzakum i ba tar a, dzik ə̀zləm dzik ə̀zləm, ka ndzayum à tar a bəɗ.» 15 Gà ɓəzla mazazama ŋgat ata tə tsaraka ka, tə daha, tə ndzaya à tar a bəɗ. 16 I dəba ŋa ya, Yesuw a daha, a ndzək gà ɗaf aaha tapa ə̀zləm a, nda kilif aaha sula ya, akahər ŋgar. A fə̀r dər a gəza mbulum, a ge dərraha kəkaaha a Mbulum. Aləka a sàs ikaba gà ɗaf ata nda kilif a, a vəl a gà ɓəzla mazazama ŋgat ata. Dite gà mburma ata ibam, tə dzaya a gà asiŋ gà mburma ana i fata ya tserdze. 17 Tar ata tserdze ya, tə zəm ɗaf ata ka, a sleye a tar lele. Ti yaha gər a mezehe ŋa ana a zeha aà tar a ka, a raha a gà tàkwasa kurwa gəra sula.

Piyer a ɗe à zləm Yesuw, dite Yesuw a ɗif à məməta ŋgar ana

a ta mbilere a i biye ya, malahalah ŋa

Mata 16:13-19; Markus 8:27–9:1

18 A pat duwa Yesuw a riŋ a heme a a Mbulum à gər ŋgar ilik. I təv ana a riŋ a heme a ya ka, gà ɓəzla mazazama ŋgat ata tə daha a təv ŋgar. Ti ndzeha a təv ŋgar ka, Yesuw a gwaɗa a tar: «Gà mburma ta gwa dze ana, iye ana, weke?» 19 Ta gwaɗar aaka: «Gà misle ŋgiɗ ta gwa: Kər ka, Yuhana metsìlwìɓè à mburma a yam. Gà misle ŋgiɗ pam asa ta gwa: Kər ka, Iliya ana akahər ata ya. Dite gà misle ŋgiɗ ibam, ta gwa, i tar ka: Kər ka, misle ŋgiɗ ilik i liwiŋ gà ɓəzla məma à guma Mbulum ana akahər ata ya, aka mbəlara i biye ya.» 20 Yesuw a gwaɗa a tar i dəba ŋa ya asa: «Dite kurum a ge, kù gwaɗum dze ana, iye ana, weke?» Piyer a gwaɗar aaka: «Kər ka, *Kiristi, mala məmbala à mburma ana Mbulum a gwa, i slir a kurumehe a ya.»

21 Yesuw a tsaraka taŋa ka, a gwaɗa a tar: «Ndzer kaɗəŋ, ama ka, ka ti tsikwim a wura a tsa kəla.» 22 I dəba ŋa ya, Yesuw a gwaɗa a tar asa: «Iye, *wur ana a dara i təv Mbulum a, say i ti sèwèr a are aka miɗ mba hinne. Gà bàba gà mburma ana ta kwere a gà Yahuda ya, nda gà Əbay gà ɓəzla mandəva kuɗa a Mbulum, nda gà ɓəzla medzeŋge məpala ahəm Mbulum tserdze, ti ti lìmiŋ a aba ya, dite ta kiɗ a iye. Ama i huɗ mehinne makər a ka, i ta mbilere a i məməta ya asa.»

Wur ana a zezem a Yesuw a ka, ma dzala ba ŋgar asa tsa

Mata 10:33,39; 16:20-28; Yuhana 12:25

23 I dəba ŋa ya, a gwaɗa a mburma a tserdze kuɗa: «Na aka sàs a wura aà madə̀ɗà aka iye ka, ma dzala ba ŋgar asa tsa. Ma zla dizl magə̀làwà ŋana kəla pat, kamala ana iye, i ti zle a mba ya, dite ma dara, ma zezem iye kuɗa. 24 Aɗaba wur ana aka sasar məmbə̀là à mesife ŋgar ɗa ika gər ahəɗ a ka, a dzeye a dər seyiŋ ivaɗ. Ama wur ana a dzeye a à mesife ŋgar, aɗaba iye ya ka, a mbil a dər ivaɗ asa. 25 Na wura aka ŋgat dukw gər ahəɗ tserdze, a ŋgayar ba i gəzləŋ, dite a dzeye a à gər ŋgar, à mite a asa ana, duwa a riŋ a ger a ŋgulum a? Awaŋ. 26 Na wura a gweɗe a ika miɗ mburma, i sər Yesuw tsa, nda bazlam gà ana i tsik a ya ka, iye, *wur ana a dara i təv Mbulum a tekeɗe, i ti tsik a kataya mbaŋa. I ti niw a ŋgat i təv ana i dere a nda Əbay ga, nda ndzəɗa Tsir gà ana ti zlibe a dər a, dite nda biy gà gawla Tsir gà ana a ndzək tar a. 27 Iye i gweɗe a kurum a nda ndzer: Gà misle ŋgiɗ ɗa ika magər kurum gà mburma ana kinehe ya ka, ta mete a zukw tsa, say ta ŋget a a *mekwere Mbulum ana a kwere a nda ndzəɗa ya fit dzekwiŋ.»

Yesuw a mbəɗ ba ŋgiɗ pam

Mata 17:1-9; Markus 9:2-9

28 A ge kwaskwa ilik i dəba mifefile ŋgar ata ya ka, Yesuw a ndzək gà Piyer nda Yuhana, nda gà Zakup. Tə tsəl a kwite aà meheme riŋ i fata. 29 I təv ana tar riŋ ta heme a ya ka, Yesuw a mbəɗ ba ŋgiɗ pam. A mbəɗ i are ya. Petek ŋgar ibam, a mbəɗ dər herrè, wùzlwùzl a wìtiɗ a are. 30 Zàmma tsəka, gà mburma sula tə daha a təv ŋgar, tə daha, tə dza ba aà mifefile nda gà ŋgat. Gà mburma ata ka, gà Musa nda Iliya ana akahər ata ya. 31 Mede tar ata tə daha a təv Yesuw a ka, nda gà ndzəɗa Əbay Mbulum ana a vəl a tar a. Gà mburma ata sula ya, ta fàfəl ka, aka gər megemir Yesuw ana a ti ndìv a dər a Yeruzalem, dite meme na à mite a ya ya.

32 Ama gà Piyer nda gà màndàla ŋgar ka, tàa mata aka mendze are fit. Aləka i dəba ŋa ya, ta piɗeke tsara ka, ta ŋgat a Əbay Yesuw ata a wìtiɗ a are ya. Tar riŋ nda gà mburma ata sula mandza ŋa i tsaka ŋgar a. 33 Aləka i təv ana gà mburma ata sula tə dza ba aà mede i təv Yesuw a ka, Piyer a gwaɗa a Yesuw: «Əbay, lele na kwa ɗa i faha ya. Mìi kiriw a kurum a ga makər a faha, ilik biy yak, ilik biy Musa, ilik ŋa aaha biy Iliya.» Piyer a tsiker kataya ka, aɗaba a sər dukw ana a tsik a ya tsa.

34 I təv ana a tsiker kataya ya tsara ka, magùdwagùdwa a tarəra aka gər tar a, tits a le a tar. I fata ya ka, gà mburma ata ta ge magəɗa hinne. 35 Tə tsarakara iɗəm mifefile i fata ya. Mbulum a gwaɗa a tarəra: «Naha ka, kəla gà ana i zla ya. Dzum zləm a dukw ana a tsik a kurum a ya.» 36 Aləka i dəba mifefile ata ya ka, gà wele aaha ta ŋgat ka, a Yesuw ilik na a zeha i fata ya. Tar ibam, tàa tsik aba dukw ana ta ŋgatar ndeɗiŋa ya, a wura ya zukw tsa, tə ndzaba dər ɗikɗik.

Yesuw a mbəl à kəla duwa, mahuruvuv a gasawa ŋgat

Mata 17:14-20; Markus 9:14-29

37 Ndidwe ŋana ka, gà Yesuw nda gà ɓəzla mazazama ŋgat tə tarəra i kwite ata ya. Ta ŋgat a tar tsara ka, gà mburma hinne ta ŋgəzlaha aka Yesuw. 38 Wele duwa a riŋ i magər gà mburma ata a fàfəlaraha nda magala. A gwaɗar: «Əbay, i gek kamkam, fìriŋ aà kəla gà aaha ilik a te. 39 Sitene a gasawa ŋgat. I təv ana aka dza ahər ba ya ka, a wideyiŋa. A dzedzer a à ŋgat hinne, mazlə̀mbats a dawarra i bazlam a. A sèwèrer a are hinne, a ndalawa ikəka ya ka, gireŋ. 40 I hama a gà ɓəzla mazazama kər, i gwa, ti delewiŋ ihər a te ka, kwets ti sle ɓav tsa.»

41 Yesuw a gwaɗa a tar: «A kurum gà mburma ana ki giswim iye nda gəzləŋ kurum tsa, dite kurum kà tsarakum zləm tsa asa ya. Wànà iye dze ana, i gesl a aà metsìkè a kurum dze ana, hilè, na dite ki giswim a iye ya? I ndze a dze ana, hilè ɓav a, na i təv kurum a? A za, daha, zlara kəla ŋa a faha ya kwaŋ.» 42 I təv ana tə daha à kəla ata ya ka, sitene ata i ba ŋgar a, a kal à ŋgat a bəɗ. Iŋgwits ìŋgwits ìŋgwits a dzadzar akaba à kəla ata hinne. Ama Yesuw a kwara akaba sitene ata nda magala hinne, a dalawa ihər a, a mbəl à kəla ata, dite a mà dər a tsir ŋa kuɗa. 43 Ama batsah ndzəɗa Mbulum ata Yesuw a pàt dər a ka, a ge aà gà mburma ata i fata tserdze ya, kamala dukw mene aà mburma ya.

Yesuw a ɗif à məməta ŋgar ana a ta mbilere a i biye ya,

masula ŋa

Mata 17:22-23; Markus 9:30-32

I təv ana gà mburma ata tserdze ya, tar riŋ ti dzele a gà gər aka dukw ana Yesuw a geye mba ya ka, Yesuw a gwaɗa a gà ɓəzla mazazama ŋgat ata: 44 «Tikwim dukw ana i tsik a kurum a kinehe ya, a gər kurum lele. Iye, *wur ana a dara i təv Mbulum a ka, ta gis a iye mba. Ta vile a iye a ahər a gà mburma.» 45 Ama gà ɓəzla mazazama ŋgat ata tàa tsaraka dukw ana a sasar aà metsike ya tsidze. Tə samata bazlam ata ka, makàhà ŋa i huɗ ŋa. Magəɗa a ge a tar aà metsème ahər bazlam ata asa.

Meme na mene batsah ŋa ika miɗ Mbulum a?

Mata 18:1-5; Markus 9:33-37

46 Aləka i dəba ŋa ya, gà ɓəzla mazazama Yesuw ata tə dza ba aà mimbètsè ba ahəm ika magər tar hinne. Ta gwa: «Weke na a ne batsah ŋa ika magər kwa ya?» 47 Yesuw a sər a taraha aka dukw ana tə dzala i gər tar a tsara. A daha, a zla kəla duwa, a ndza dər a təv ŋgar. 48 A gwaɗa a tar: «Ku weke na aka gəs aà mege gər a kəla ndirkiz kamala kəla aaha ya aɗaba iye ya ka, a ge gər taŋa ka, a iye. Dite wur ana aka giŋ gər a ka, a ge gər taŋa ka, a wele ana a slərra iye ya mbaŋa. Aɗaba wur ana aka həna à gər a bəɗ ika magər kurum aaha tserdze ya ka, ŋgat na a ne batsah ŋa i təv Mbulum a.»

Wur ana a ge aà kurum a guvəl tsiye ka, wur kurum

Markus 9:38-40

49 I dəba ŋa ya, Yuhana a dza ba aà mifefile, a gwa: «Əbay, maa le aà wele duwa, a delewe a gà sitene i ba mburma ya nda zləm yak. Ama mì palar ahəm, aɗaba ana ŋgat ka, mburma kwa tsiye.» 50 Yesuw a tsaraka kataya ka, a gwaɗa a tar: «Ka palumar ahəm tsa, aɗaba wur ana a ge aà kurum a guvəl tsiye ka, wur kurum.»

A sàs a gà mburma ŋgiɗ duwa ika ahəɗ Samariya ka, Yesuw

ma daha a ma tar tsa

51 I təv ana Mbulum aka à mezle Yesuw a gər ŋa ya ka, Yesuw a gwa: «A sèsiŋ ka, i de a a Yeruzalem dzekwiŋ.» 52 I dəba ŋa ya, a slər gà ɓəzla meslire ŋgar aka miɗ, aà mayahar aba gà təv a bəɗ a. Gà mburma ata tə da tsara. Tə daha, tə da a kwite ŋa a riŋ ika ahəɗ Samariya. Ti yaha təv ata i fata. 53 Ama gà mburma ana i fata ya, ta waya na Yesuw a dehe a a ma tar a tsa, aɗaba ana a de a ndàra a Yeruzalem a. 54 Gà ɓəzla mazazama Yesuw, gà Yuhana nda Zakup tə tsaraka bazlam gà mburma ata kataya tsara ka, ta gwaɗa a Yesuw: «Batsah mə̀r ŋa, a sàsak ana, wànà mi gwaɗa, akwa ma tarəra i mbulum a, ma wànà iɗəm tar a fit kitè kəla ya?» 55 Yesuw a tsaraka bazlam tar ata ka, a mbəɗ aba a təv tar, a kwara akaba tar. A gwaɗa a tar: «Kà sərum tsiye, na bazlam ata kà tsikwim ka, a da ndaka vatwa ŋa tsiye? 56 Aɗaba iye, *wur ana a dara i təv Mbulum a, i dara ka, aà medzeye à mesife mburma tsa. I dara ka, aà məmbala à tar a ivaɗ.» I dəba ŋa ya, ta mah ba i fata ya, tə da a kwite ŋgiɗ pam.

Gà mburma ana a sàs a tar mazazama Yesuw nda ndzer tsiye

Mata 8:19-22

57 I təv ana gà Yesuw nda gà ɓəzla mazazama ŋgat riŋ ika vatwa ti de a mba ya ka, wele duwa a gwaɗa a Yesuw: «I waya ka, i zezem a kər a təv ana ki de aɗəm a ya, ku mege a ŋga.» 58 Yesuw a tsaraka kataya ka, a gwaɗa a wele ata: «Dzala dzekwiŋ, aɗaba ŋgulum gà mbayakà ka, biye tar a riŋ, gà ɗiyeŋ tekeɗe ibam, ga tar a riŋ mbaŋa, na ta hinne a iɗəm a. Ama iye, *wur ana a dara i təv Mbulum a ka, ga gà a riŋ, na i hinne a iɗəm, dite i sifik a ba ya tsa.»

59 I fata ya ka, Yesuw a gwaɗa a misle ŋgiɗ pam: «Dara, zezem iye.» Ama wele ata a gwaɗar aaka: «Əbay, iye ka, viliŋ vatwa, a təv ana tsir gà aka mət a ka, i le a aba ya dzekwiŋ.» 60 Yesuw a gwaɗar aaka: «Sifek məsak à gà məməta, ti leye ba tar dukw tar. Ama kər ka, ti tsik bazlam *mekwere Mbulum a gà mburma.»

61 Mìsle ŋgiɗ pam asa a gwaɗar: «I zezem a kər, Əbay. Ama kəla ka, viliŋ vatwa, i ta ge a wusa a gà mburma ana i ma gà ya dzekwiŋ.» 62 Yesuw a gwaɗar: «Wur ana à fit a nda gà sla, dite à fir a ndàra a dəba ya ka, a ge a ba tsa. Kamala taŋa ya mbaŋa, gà na a sàs a tar ti zezem a iye, dite ka, ta fir a aà dukw ana ndàra a dəba ya ka, ti sle a aà megemir i mekwere Əbay Mbulum tsa mbaŋa asa.»