Guma Yesuw ana a tsik agəra məmìyàkà aba gà zal
nda məkəs a
19
1 I dəba ŋa ya,
Yesuw a ndəv à mifefile ŋgar ata ka,
a hitsera ika ahəɗ Galile ya,
a da ndàra aka ahəɗ Yuda,
aka lìdè dulwa Yurdan.
2 Gà mburma hinne tə zazamaha ŋgat a fata.
A daha,
a mbala à gà ɓəzla dukw məməta ana i liwiŋ tar a.
3 Aləka i dəba ŋa ya,
gà *Farisa duwa tə daha a təv ŋgar,
aɗaba a sàs a tar maslàlà à ŋgat i yam a.
Ta gwaɗar:
«Məpala ahəm kwa dze ana,
aka vəl vatwa a mburma aà madalawa məkəs,
agəra gà dukw ana a ge ŋgwala tsa tserdze ya ya?»
4 *Yesuw a gwaɗa a tar aaka:
«Kàa dzeŋgwim dukw ana mewetse ŋa i wakita Mbulum a te tsiye?
Aɗaba akahər ana Mbulum a ge gà dukw tserdze ya ka,
a ge gà asləka nda məkəs,
5 *dite a gwaɗa a tar:
“Aɗaba taŋa na kinehe,
asləka a miyek a à gà tsir ŋgar nda mama ŋgar,
dite ti ndze a nda məkəs ŋgar a.
Tar ata sula ya ka,
ti ne a ba ilik.”
6 Kərga taŋa ya kaɗəŋ,
ba tar ka,
sula asa tsa.
Ama ba tar ka,
aka ne ba ilik kuɗa.
Aɗaba taŋa,
dukw ana Mbulum a gaw akaba kamala taŋa ya ka,
wura ma ta kurə̀zl dər iba ya asa tsa.»
7 *Gà Farisa ata tə tsaraka kataya ka,
ta gwaɗar:
«Na kataya ana,
aàla na Musa a gwa ka,
na aka sàs a wura aà madalawa məkəs ŋgar ka,
ma wetser wakita madalawa ŋgat,
mə vəlar ahər,
dite na a delewe a ya ya?»
8 Yesuw a gwaɗa a tar aaka asa:
«Musa a vəl a kurum vatwa ka,
aɗaba ana gəzləŋ kurum manəsa ŋa,
matsəɓatsəɓ iɗəm hinne ya pəra,
dite na ka dalawum gà məkəs kurum a,
tsəka,
akahər ana piŋŋe Mbulum a ge gà dukw tserdze ya ka,
kataya tsa.
9 Iye ihər i gweɗe a kurum a nda ndzer:
Ku weke na aka miyak à məkəs ŋgar ze melè ahər aka mege muva,
dite aka zla aɗəm biy ŋgiɗ ka,
taŋa ka,
a ge muva.»
10 I dəba ŋa ya,
gà ɓəzla mazazama ŋgat ta gwaɗar:
«Na bazlam gà zal nda məkəs kamala taŋa ya ka,
mazla məkəs a ge a ŋgulum tsa.»
11 Ama Yesuw a gwaɗa a tar aaka asa:
«Aɗaba mburma tserdze ka,
ti sle aà metsereke a bazlam aaha i waya i tsik a kurum a ya tsa.
Say gà na Mbulum a vəl a tar metsehe ya dukw tar.
12 Aɗaba i təv gà dukw ŋgiɗ a riŋ pampam na mburma a sle a aà mazla daala tsiye.
Gà misle ŋgiɗ ka,
daga i təv mewe tar a,
ba tar a waya mazla məkəs tsa.
Gà misle ŋgiɗ asa ka,
mburma tə dadaɗaya tar.
Dite gà misle ŋgiɗ asa ka,
ti zle a məkəs tsa,
kige tsa ti de a a zal tsa,
aɗaba a sàs a tar ka,
mege meslire Mbulum ɗekɗek.
Wur ana aka ŋgat metsehe aà matsaraka bazlam aaha ya ka,
mà dzar zləm lele.»
Yesuw a pise ahəm a gà ɓəza ndirkiz
13 Aləka i dəba ŋa ya,
gà mburma tə daha à gà ɓəza ndirkiz a təv Yesuw,
dite ma tike aka tar ahər te,
ma hama a Mbulum ka,
dite mi pise a tar ahəm.
Gà ɓəzla mazazama ŋgat ata ta ŋgat a gà mburma ata ti dehe a à gà ɓəza ya ka,
ta pala a tar ahəm,
a sàs a tar na ti dehe a à gà ɓəza ata ya tsa.
14 Ama Yesuw a tsaraka məpala ahəm gà mburma ŋgar ata ta pele a a gà tsir gà ɓəza ya ka,
a gwaɗa a tar:
«Mandza,
ka palum a tar ahəm tsa,
tə dara à gà ɓəza a təv ga ya.
Aɗaba mekwere Əbay Mbulum a waya ka,
medzibe gà mburma ana kamala gà ɓəza aaha ya,
na ti de aɗəm a ya.»
15 Dite i dəba ŋa ya,
a daha,
a tike ahər aka gà ɓəza ata,
a pise a tar ahəm.
I dəba ŋa ya asa,
a hitse i fata ya,
a daba kuɗa.
Mege metsehe a mazazama Mbulum agəra
limana ana hinne ya
16 Aləka i dəba ŋa ya,
wele duwa gawla ŋa a daha a təv Yesuw,
a gwaɗar:
«Əbay ga,
i ge a dze ana,
meme,
na dite i ŋget a mesife ana à ndìv a tsa aà biybiy a?»
17 Yesuw a gwaɗar aaka:
«Aàmala na ki wiz a aà iye a dukw ana ŋgwal ŋa ya?
Ama wura a riŋ ilik na ŋgwal ŋa ya tsa,
say Mbulum ilik.
Na a sàsak mesife ana à ndìv a tsiye ka,
say ki gis a məpala ahəm ŋgar.»
18 Aləka wele ata a tsaraka kataya ka,
a gwaɗar:
«I gis a dze ana,
məpala ahəm awara?»
Yesuw a gwaɗar aaka:
«Məpala ahəm Mbulum ka,
araha.
A gwa ka:
“Kə̀ kəɗ mburma tsa,
ki ge muva tsa,
ki ge akəl tsa,
ka tə sàs pàrsa aà mburma tsa.
19 *Ama zàmbaɗa à gà dede yak nda mama yak.
Dite ka waya mburma kamala ana kà waya ba yak a.”»
20 Wele ata a gwaɗar aaka:
«Iye ka,
Yàa mbər megìse gà dukw ata kà tsikiŋ a tserdze,
dite dukùla na a ziŋaha asa ya?»
21 Yesuw a gwaɗar:
«Na a sàsak magəsa Mbulum nda ndzer ka,
daha,
ka dzawa à gà dukw yak fit,
dite kà dzaya siŋgwe ŋa a gà ɓəzla matawak.
Na kàa ge dər kataya ka,
ki ŋget a limana ana batsah ŋa,
à ndìv a tsa i təv Mbulum a.
I dəba ŋa ya ka dara,
ka zezem iye kuɗa.»
22 Ama wele ata a tsaraka bazlam ŋgar ata tsara ka,
tsùkwaɗ a daba i fata ya tsara nda gà matsəɓatsəɓ,
aɗaba ana ŋgat Əbay ŋa hinne ya.
23 Aləka i dəba ŋa ya,
Yesuw a gwaɗa a gà ɓəzla mazazama ŋgat:
«Iye ihər i tsik a kurum a nda ndzer:
Mawùràba aà mada a mekwere Əbay Mbulum gà ɓəzla limana kaɗəŋ.
24 Kinehe iye ihər i tsik a kurum a asa:
Ndəna gà ɓəzla limana ti de a mekwere Əbay Mbulum a ka,
ŋgulum zlìgwèmè ma da nda biye lepìrè.»
25 Gà ɓəzla mazazama ŋgat ata tə tsaraka bazlam ŋgar ata tsara ka,
dùwaɗ a zla aà tar arəv a hinne.
Ta gwa:
«Na kataya ana,
weke a sle a aà mimbile i təv Mbulum a?»
26 Ama Yesuw a fə̀r aà tar,
a gwaɗa a tar:
«I təv mburma ka,
mawùràba ŋa,
ama i təv Mbulum ka,
mawùràba ŋa tsa,
a sle a aà duwa tserdze.»
27 I dəba ŋa ya,
Piyer a gwaɗar aaka tsara:
«Araha,
mə̀r ka,
maa miyak aba à gà dukw mə̀r a tserdze,
maa dara,
maa zazam kər ana,
dukùla na a ge a mə̀r a ŋgulum kuɗa ya?»
28 Yesuw a gwaɗa a tar:
«Iye ihər i tsik a kurum a nda ndzer,
iye,
*wur ana a dara i təv Mbulum a ka,
a pat ana Yàa ŋgat Əbay nda ndzəɗa gà ana ti zlibe a dər à iye,
i kwere a dər gər ahəɗ ana awiya ŋa ya ka,
kurum ana kà zazamum iye ya tekeɗe,
ki ŋgetwime a Əbay mbaŋa,
na kurum aaha kurwa gəra sula ya.
Ki ta ŋgetwime a təv mendze Əbay.
Dite ki gwim a seriye a gà gwala gà Isərayel ana kurwa gəra sula ya mbaŋa.»
29 Yesuw a gwaɗa a tar asa:
«Ku weke na aka miyak aba à ga ŋgar a,
kige tsa à gà damər ŋgar,
nda gà tsir ŋgar,
nda gà mama ŋgar,
nda gà ɓəza ŋgar,
dite nda gà guvah ŋgar agəra iye ka,
a ŋget aɗəm a,
à zè a taŋa a miyak dər aba kinehe ya medzige dərməka.
Dite a ta ŋget a mesife ana à ndìv a tsa aà biybiy a asa mbaŋa.
30 Ama gà mburma ana kinehe ta gwa,
gà mə̀r ŋa ya ka,
gà asiŋ ŋa hinne ti ti ne a gà ɓəzla dəba mba ika miɗ Mbulum.
Dite gà na kinehe ti tike tar aà ahər tsiye ka,
gà asiŋ ŋa ibam hinne,
ti ti ne a gà ɓəzla aka miɗ mbaŋa asa.»