Mata 20

Bazlam minew wele duwa a ndzək mburma a guvah ŋgar

1 «Aɗaba taŋa, mekwere Əbay Mbulum ana a ta kwere a mba ya ka, a ndzikiɗ ba nda wele duwa ga. Wele ata ka, a wilera i ga ya i mèkwède hedwe aka tuwa guŋgwazl. Aɗaba a yehe a mburma aà megemir a guvah ŋgar. 2 Aləka ka, ta ge tsakala mifìte ŋgar ata nda gà ɓəzla megemir ŋa. A gwaɗa a tar: “I vile a kurum a siŋgwe miveke kamala ana ta pə̀lawa ya.” I dəba ŋa ya, a slər tar aà məfə̀tà guvah ŋgar ata kuɗa. 3 Aləka nda ndzemde tswiɗ ŋa ka, a da a kwaskwa. A daha, a fə̀r ikaba ya ka, aka le aà gà asiŋ gà mburma ŋgiɗ dzìrìkke mehìtsè ŋa, ti ndze a taf masakəŋa, megemir tar a riŋ tsa mbaŋa. 4 Wele ata a gwaɗa a gà mburma ata: “Kurum tekeɗe, dumara, dwimiŋ a guvah ga, i vile a kurum a dukw maya ba kurum lele.” 5 Gà wele ata tə tsaraka kataya ka, tə daha a guvah ŋgar ata. I dəba ŋa ya, mala guvah aaha a mbəɗ gər a kwaskwa nda magər pat asa. Aləka a ge ndzemde makər asa ka, a tsik a gà misle ŋgiɗ kamala taŋa ya asa mbaŋa. A ndzəkara tar a. 6 I dəba ŋa ya, ndzemde ə̀zləm a ge ka, a mbəɗ gər asa. A daha ka, aka le aà gà misle ŋgiɗ i kwaskwa, tar riŋ mehìtsè ŋa, megemir tar a riŋ ɓav tsa asa. A gwaɗa a tar: “Aàla na ki ndzwim a ŋgìɓɓìtte wurwas ka, kwets mege megemir kurum a riŋ tsiye?” 7 Gà mburma ata ta gwaɗar aaka: “Mìi hitse a məfara ŋa ka, aɗaba ana wura aka wiz mə̀r aà megemir tsiye.” Dite a gwaɗa a tar: “Kurum tekeɗe, dumara, dwimiŋ a guvah ga, i vile a kurum a dukw maya ba kurum.”

8 Aləka i dəba ŋa ya, pat a dəɗ ka, mala guvah aaha a gwaɗa a mala megemir ŋgar ana i ga i ma ŋgar batsah ŋa ya: “Zal a gà ɓəzla megemir ata ndeɗiŋa ya tserdze, tə dara, ka vəl a tar dukw maya ba tar. Ki dze ahər a ba ka, nda gà mburma ana tə dara i dəba ya, dite tsikw aà gà mburma ana tə làhara ya.” 9 Zàmma tsəka, gà mburma ana tə da a guvah nda ndzemde ə̀zləm ŋa ya, tə daha ka, ku weke a ŋgat dukw maya ba ŋgar kamala ana a vàk i dala ya. 10 I dəba ŋa ya asa ka, gà mburma ata tə làhəha i mèkwède hedwe ya, tə daha, i tar tə dzala ka, ta gwa: “Mìi ŋget a siŋgwe hinne, à zè a biy gà mburma aaha tə dara i dəba ya.” Ama tsaatsa, tar tekeɗe, ta ŋgat ka, kalkal kamala ana mala guvah aaha a tsik a tar a mbaŋa. 11 Aləka ta fə̀r, tàa ŋgat siŋgwe hinne tsəka, ta ge arəv aà mala guvah aaha hinne nda masàyà ahəm. 12 Ta gwaɗar: “Gà mburma aaha tə dara, tə dza ba aà megemir ka, nda ndzemde ilik pəra ka, kà geye a mə̀r dər akaba kalkal nda gà mə̀r ana, mì sèwèr are ndassà i pat, àvùkw hinne asa ana, meme?” 13 Ama mala guvah aaha a gwaɗa a misle ŋgiɗ ilik ika magər tar ata ya: “Masla gà, iye ka, Yàa gik bakal tsa, aɗaba ka tsikema dukw maya ba yak i huɗ miveke ya ana, kataya tsiye? 14 Ama kinehe ka, zla dukw maya ba yak, ka daba a ma. Aɗaba i waya ka, i vile a a wele ana a dara i dəba yak a ka, kalkal kamala ana i vəlak a mbaŋa.” 15 Dite a gwaɗar asa: “Kù gwa ana, i sle a aà megemir nda siŋgwe ga kamala ana gəzləŋ ga a waya ya tsiye? Ki ge are aka dukw ana i zlak aɗəm ŋgat, i ger ŋgwal ŋa ya kəla ya?”»

16 Yesuw a gwaɗa a tar asa: «Kamala taŋa ya, gà mburma ana kinehe ti tike tar aà ahər tsiye ka, ti ti ne a gà ɓəzla aka miɗ mba ika miɗ Mbulum. Dite gà na kinehe ta gwa, gà mə̀r ŋa ya ka, ti ti ne a gà ɓəzla dəba ika miɗ Mbulum mbaŋa asa.»

Yesuw a ɗif à məməta ŋgar ana a ta mbilere a i biye ya,

məmakər ŋa ya

Markus 10:32-34; Luka 18:31-34

17 Aləka i təv ana gà Yesuw tar riŋ ika vatwa ti de a Yeruzalem a ka, a zalawa iɗəm a gà ɓəzla mazazama ŋgat ata kurwa gəra sula ya, aà ta mberaha. A gwaɗa a tar: 18 «Tsarakum, araha, kwa ihər ki tèkwe a a Yeruzalem. Aləka, aka təv ana kàa ndzekwaha a fata ya ka, iye, *wur ana a dara i təv Mbulum a, ti ta gis a iye, dite ta vile a iye a ahər a gà bàba gà ɓəzla mandəva kuɗa a Mbulum, nda gà ɓəzla medzeŋge məpala ahəm Mbulum. Ta giŋ a seriye mekìɗe. 19 Ama ta vile a iye a ahər a gà slele ana i fata tə sər Mbulum tsiye. Gà mburma ata ti sewle aà ìyeŋa, ta gìzl a iye nda megwiymbiɗ hinne mbaŋa asa. Dite ti ndwendwey a iye aà dizl magə̀làwà ŋa kuɗa. Ama i huɗ mehinne makər a ka, i mbilere a i məməta ya.»

Gà Zakup nda Yuhana ta wiz təv mendze aà Yesuw zləmana

Markus 10:35-45; Luka 22:24-27

20 I dəba ŋa ya, məkəs Zebede a da a təv Yesuw, tar nda gà ɓəza ŋgar. A daha ka, a dza gurmits a bəɗ aka miɗ ŋgar, a hamar hinne, a sasar mewize ahər duwa. 21 Yesuw a gwaɗar: «Ki wiz a dze ana, là?» Məkəs aaha a gwaɗar aaka: «I wiz aà kər a ka, aləka aka təv ana kàa da a Əbay a ya ka, ka vəl vatwa a gà ɓəza gà aaha, ta mbekehe a ilik aka tseke ahər mezime yak, dite ilik ŋa aaha aka tseke ahər gula yak, ti ne a gà ɓəzla sik yak te, na i gwa ya.» 22 Ama Yesuw a gwaɗa a tar aaka: «Kurum ka, kà sərum dukw ana ki wizwim a ya tsa. Wànà ki slwim a aà masà mesewere are gà ana i ti sèwèr a mba ya ya?» Ta gwaɗar aaka: «Haya, mìi sliŋa.» 23 Yesuw a gwaɗa a tar: «Kaɗəŋ ndzer, kurum ka, ki ti sèwèrwim a are kamala ana i ti sèwèr a are ya mbaŋa. Ama kəla ka, mandza aka tseke ahər mezime gà, kige tsa aka tseke ahər gula gà ka, iye tsa na i tsik a taŋa ya. Aɗaba təv mendze ata ka, biy gà mburma ana Mbulum Tsir gà a pala tar a dukw tar.»

24 Aləka gà asiŋ gà ɓəzla mazazama Yesuw kurwa ŋa aaha tə tsaraka bazlam ata ka, ta ge arəv aà gà damər tar aaha sula ya. 25 I dəba ŋa ya, Yesuw a zal a tar akabaha a təv ŋgar tserdze. A gwaɗa a tar: «Kurum kà sərum ka, gà bàba gà Əbay gər ahəɗ na tar riŋ ta kwere a mburma nda ndzəɗa, ta ge a ter a magəɗa ya. Gà wele ana mburma a ge a ter a magəɗa, ti slir a mburma ka, ti niw a tsiye. 26 Ama taŋa ka, a de a tsa na ika magər kurum a. Na aka sàs a wura aà mene batsah Əbay i təv Mbulum ka, say ma ne mala meslire i liwiŋ kurum ivaɗ. 27 Na aka sàs a wura i liwiŋ kurum mene mala aka miɗ ka, say ma ne ɓele ika miɗ kurum tserdze i təv magəsa ahəm a. 28 Aɗaba iye, *wur ana a dara i təv Mbulum a tekeɗe, i dara ka, aà mazlàkà mburma ya, tsəka, mburma na mà zlak iye ya tsa. Iye i dzeye a à mesife gà ka, aà mumbùruɗà dərra mburma i bakal a.»

Yesuw a mbala à gà ɓəzla guluf duwa sula

Markus 10:46-52; Luka 18:35-43

29 Aləka i təv ana gà Yesuw nda gà ɓəzla mazazama ŋgat, ti dere a i kwite Yeriko ya ka, gà mburma hinne tə dəɗ aakara i fata ya. 30 I təv ana ti dere a ya ka, tàa le aà gà ɓəzla guluf duwa sula, mandza ŋa aà guva vatwa. Tə tsaraka miɓizle Yesuw ana a riŋ a dere a ndaka vatwa ata ya ka, tə dza ba aà Mewideye hinne, nda magala. Ta gwa i huɗ Mewideye tar ata ya ka: «Əbay Yesuw, gwala Dawda, mì ndzek are tsehe te tsiye? Zlak mə̀r te.» 31 Ama mayahaba gər gà mburma ata dìhhwe, ti de a ya ka, ta pala a tar ahəm. Ta gwaɗa a tar: «Ndzum ɗikɗik.» Ama gà wele ata ta gəs bazlam tar ata tsa. Tə səkah à Mewideye hinne nda magala ŋgəlakəkka ivaɗ asa. Ta gwa: «Əbay Yesuw, gwala Dawda, mì ndzek are tsehe te tsiye?» 32 Yesuw a tsaraka bazlam tar ata ka, a hitse dzeŋ, a zal a tar. A gwaɗa a tar: «I ge a kurum dze ana, dukùla, na a sàs a kurum a?» 33 Ta gwaɗar aaka: «Əbay, a sàs a mə̀r ka, hə̀ndə̀k a mə̀r ika are ya te.» 34 Yesuw a tsaraka taŋa ka, ti ndzer aɗəm are tsehe hinne. A daha, a ləm aà are tar, dite are tar a handaka ba tsara. I dəba ŋa ya ka, gà wele ata tə dəɗ aka Yesuw.