Yunas
Yunas a val aà meslire Mbulum a
1
1 A pat duwa BATSAH kwa ŋa a fafəl a Yunas kəla Amitay, a gwaɗar: 2 « Hitse da a Neniwe a batsah huɗ kwite ata, ka pala a tar ahəm nda magala, a gà mburma ana mandza ŋa i huɗ kwite ata ya, aɗaba mege dukw tar ana ta gewa ŋgwal ŋa tsiye ka, aka ndzera tsim aà iye ya . » 3 Ama i fata ya ka, Yunas a hitse, a vele a ba diriŋ ika are BATSAH kwa ŋa ya, a Tarsis. A ndze a Yafa ka, aka le aà muta yam ana a de a a Tarsis a. I fata ya ka, a pəl siŋgwe mede ŋgar, a tsəl a muta yam, tə da akaba nda gà mburma ana, ti de a a Tarsis a, diriŋ ika are Batsah kwa ya. 4 Ama BATSAH kwa ŋa a sləraha batsah himbiɗ aka gər batsah duluv ata, himbiɗ a tsala akaba aà yam ata kamala ana muta yam ata a heɓe a ikaba ya ya. 5 Gà ɓəzla məpaka muta yam ata ta ge magəɗa, ku mege weke a zal aba a Mbulum ŋgar, tə dzawara aà gà dukw ana i muta yam ata ya, ara a batsah duluv ata ya, aà mibe asa tsa. Yunas ŋgat ka, aka tar a huɗ muta yam, aka həna ba, dite aka dəɗ aka mendze are. 6 I fata ya ka, mala aka miɗ gà ɓəzla məpaka muta yam a sərəkaha a təv ŋgar a gwaɗar: « Ki ge a naha ana megemir là, na ika mendze are ya? Hitse hama a Mbulum yak! Gà biy ŋgiɗ tsəka a dzele aka kwa gà gər, ki dzeyekwe a asa tsiye . »7 I fata ya ka, gà ɓəzla məpaka muta yam, ta gwaɗa ba ika magər tar: « Dumara gekwa tsetse, aà masəra wele na a zla aka kwa ara mesewere are aha ya . » Ta ge tsetse ata, tsetse ata a dəɗ aka Yunas. 8 Tsam ka, ta gwaɗar: « Tsik a mə̀r, mesewere are aaha a da aka kwa ara ana i ŋga ya? Megemir yak ana awara na i faha ya ? Dite ka dara ana ika ahəɗ kwite wara ya? Dite kər na gà gwala wara? » 9 Yunas a gwaɗa a tar: « iye ka, gà Ibəranikwa. Dite BATSAH kwa ŋa, Mbulum ana a geye gà bàba duluv nda gà bàba ahəɗ fit tserdze ya na Mbulum gà ya . » 10 Magəɗa a gasa gà mburma ata hinne, dite ta gwaɗar: « ki ge dzena Dukula? » Gà mburma ata tə da mesire aba a vele a, ika are BATSAH kwa ŋa ya ka, agəra gà dukw ana a ɗama a tar a. 11 I dəba ŋa ya, ta gwaɗar asa: « Mìi ge a kər dzena meme na yam aaha a tsele a akaba asa tsiye? » Taŋa ka, yam riŋ a sikehe aà matsala akaba hiywe. 12 Yunas a gwaɗa tar aaka: « Zlum iye, dite kà ywim iye a duluv, tsam ka, yam aaha a tsele akaba asa tsa. Aɗaba i sər ka, agər iye na batsah himbiɗ aaha a dara aka gər kurum a ya . » 13 Gà mburma ata, ta waya mada ndara aà gigize ŋa ana ka, ama ti sle tsa. Aɗaba yam ata ka, a riŋ a tsele akaba hiywe pəra. 14 I fata ya ka, gà mburma ata ta hamaha a BATSAH kwa ŋa, ta gwa: « Batsah mə̀r ŋa, ka bats mə̀r agəra mesife wele aaha tsa, bakal məmbəz ŋgar mege ika gər mə̀r aaha màa sər aba aà duwa ya tsiye tsa te. Aɗaba kər Batsah mə̀r ŋa, ki ge ka dukw ana ka waya ya . » 15 I fata ya ka, tə zla Yunas, ti ye ŋgat a batsah duluv ata dite himbiɗ a hitse . 16 Tsam ka, gà mburma ata ta ge magəɗa a BATSAH kwa ŋa hinne, tə dzayar gà dukw matawala fəla a BATSAH kwa ŋa, dite tə tsik i sida ya, ti dzeyewera gà duwa hiywe.