Daniyel 1

Daniyel

1 Akahər ana Yuyakim a ge ika makwara gà Yahuda mive makər a ka, Nevuhadnetsar əbay gà Babila a dara a dza maŋgwaɓa a lawara kwite Yeruzalem tits aà mege a a tar guvəl. 2 Mbulum Batsah kwa ŋana, a vəl Yuyakim əbay gà Yahuda ahər a Nevuhadnetsar, na dite a məsak à ŋgat, aà mandzək, gà kazlaŋa megemir ana pam ta gewa dər megemir i ga mbulum batsah ŋana ya əŋgal. Nevuhadnetsar a ndzək tar aà ɓele a Babila, dite a dza gà kazlaŋa ata a ndzəkaha ya, a dza a gà mbulum ŋgar, a ga ana tə dzawa aɗəm gà limana ŋgar a. 3 I fata ya ka, Əbay a gwaɗa a Asepanas, wele ana a kwere a gà mburma ana ta gewa akaba megemir nda gà əbay ya. « məpala gà ɓəza gà gawla, ika magər gà Isərayel a, gà na i gwala əbay ya, nda gà na i gwala gà mburma ana gà bàba ŋa ya. 4 Ga ɓəza gà gawla ata ka, təv mendeve mege aà tar tsa. Ta ge ka, gà matsahəna ŋa lele. Tar gà maraha nda masəra duwa, tàa sinike à duwa lele ndaka vatwa ŋa. Ta ge asa ka, gà mburma ana metsehe aà tar a, ti sinike a à duwa bise ya. I fata ya ka, ti sle a aà mede a a megemir, a huɗ ga, əbay. Ti ta sinike a ter a à mewetse dukw gà Babila, nda məfafəla ahəm tar . » 5 Kəla aà wur gà pat ka, Əbay a vəl vatwa aà ta vəlawa a tar gà ŋgwal gà dukw mezime, nda gà guzum ana a sawa ya. Dukw ata a ndze a ka, mive makər. Aka mandəvandəv mive ata kuɗa ka, ti sle a aà mede a megemir gà. 6 I liwiŋ gà ɓəza gà gawla ata ta pala tar a ka, gà gwala gà Yahuda a riŋ iɗəm, gà Daniyel, Hananiya, Mikayel aha Azariya. 7 Wele ana a kwere a gà ɓəzla megemir Əbay ya ka, a ɗeye tar gà zləm awiya ŋa. Ti ɗe a Daniyel ka, Beltasar, biy Hananiya ka, Sadrak. Ti ɗe a Mikayel ka, Mesak, dite biy Azariya ka, Abed-Negu 8 I fata ya ka, Daniyel a dàn i madzala gà gər ŋgar ka, a waya mege a aba aruwaŋ nda mazəma gà ŋgwal gà dukw mezime nda masa guzum ana Əbay a se a ya tsa. Kərga taŋa ya ka, a wiz a wele ana a kwere a gà ɓəzla meslire Əbay ya, ma ta tike a aaka balaari aà mege à ŋgat aruwaŋ tsa. 9 Mbulum a vəl a vatwa a mala makwara gà ɓəzla megemir ana i bəra Əbay ya, aà magəs mewize Daniyel ata, meger ŋgwal nda mendzer are tsehe. 10 Ama ka, mala makwara gà ɓəzla megemir ana i bəra Əbay a, a gwaɗa a Daniyel: « Əbay nda ahər ŋgar ŋa, na a vəl ahər vatwa aà gà dukw mezime kurum, nda gà dukw mese kurum aaha nda gà masla yak a. Magəɗa a riŋ ihər a giŋ a ka, ba kurum a ta pete a ŋgwal ŋa lele kamala gà asiŋ gà ɓəza gà gawla ŋgiɗ ana mive kurum ilik a tsa. Na Əbay aka ŋgat a ba kurum kataya ka, a biytsa a sese a ika iye gər a, aɗaba kurum . » 11 I dəba ŋa ya ka, Daniyel a gwaɗa a mala meslire ana batsah mala makwara gà ɓəzla megemir ata a tike aɗəm aà makasla gà Daniyel, nda Hananiya, Mikayel, aha Azariya ya. Daniyel a gwaɗar: 12 « I gik kamkam dzik a mə̀r dzekwiŋ i huɗ mehinne kurwa ya. Vəlawa a mə̀r dukw mezime ka, ala slambah nda masa ka, yam pəra . » 13 I fata ya ka, ki fire a aà bà mə̀r, nda biy gà asiŋ gà ɓəza gà gawla ana tə zəmawa gà ŋgwal gà dukw mezime ana Əbay a zəmawa ya. akahər ŋa ata kuɗa ka, ki ge a kamala dukw ana kə ŋgatar aà mə̀r a . » 14 Kamala taŋa ya, mala makwara gà mburma ata, a gəs mewize gà Daniyel nda gà masla ŋgar ata, a dzik à tar i huɗ mehinne kurwa ya. 15 Aka mandəvandəv mehinne kurwa ŋa ata ka, gà Daniyel nda gà masla ŋgar ka, gà magala ŋa, aà gà asiŋ gà ɓəza gà gawla ana, tar tə zəm gà ŋgwal gà dukw mezime ana Əbay a zəmawa ya. 16 I fata ya kuɗa ka, mala meslire ata a ndzəkawa aà tar gà ŋgwal gà dukw mezime nda gà guzum ana Əbay ata a vəlawa tar a kəla pat. A dzawa tar ka, gà ala slambah pəra. 17 Mbulum aka vəl masəra duwa nda metsehe a gà ɓəza gà gawla ata faɗ a. A vəl a tar ndzəɗa a masəra duwa, a vəl a tar matsaraka duwa biy masəra mewetse duwa nda mege duwa nda metsehe fit tserdze. Asa ka, Daniyel a sər məmaya aà gà sunwa nda gà dukw mene a mburma. 18 Aka mandəvandəv pat məpaslà ahər ana Əbay Nevuhadnetsar a tike biy məpatar aà gà ɓəza gà gawla ata ta pala tar a, a ndze aɗəm ka, a pat ŋa ata na, mala makwara gà ɓəzla megemir Əbay a ndzəkaha tar aka miɗ ŋgar a. 19 I fata ya ka, gà Əbay ta fafəl akaba nda gà tar fit tserdze, ama ka, wura a riŋ ika magər tar a ilik kamala gà Daniyel a, Hananiya ya, Mikayel a nda gà Azariya ya tsa. Aɗaba taŋa na ta ŋgat vatwa aà mandzəba a megemir i bəra Əbay ya. 20 Əbay a wizeye aà tar gà bazlam aka gər gà dukw ana a pər a metsehe nda masəra duwa ya. I fata ya ka, Əbay a le a bazlam ana ta fafəlàwar aaka ya ka, a za dər biy gà ɓəzla mahəram nda gà ɓəzla mege dukw mene aà mburma ana ika ahəɗ ŋgar ata ya kweleŋ fetitte. 21 Kərga taŋa ya na Daniyel a mətsa a riŋ aà megemir Əbay Nevuhadnetsar haa tsikw ahər ana Serus a ne Əbay, a kwara gà Babila ya.