Daniyel 2

Daniyel a da a megemir a bəra Əbay

1 I huɗ mive masula ŋana Nevuhadnetsar a ge i mekwere ya ka, sunwa a da aaka. Arəv a da ihər a, mendze are a da ikəka ya. 2 I fata ya ka, Əbay a wiz aà tə zalara, a gà ɓəzla mege dukw mene aà mburma, nda gà mahəram, gà ɓəzla mede, nda gà ɓəzla mipire are, aà tə ɗamar sunwa ana a da aaka ya. Gà mburma ata tə dara, ta hitse aka miɗ Əbay. 3 Əbay a gwaɗa a tar: « Sunwa aka da aka iye, arəv aka da aà iye hinne. Tsikwimìŋ dukw sunwa ata a da dər aka iye ya . » 4 Gà ɓəzla məpera are ata ta gwaɗar aaka a Əbay ndaka ahəm gà Aramiye: « Əbay mandza a bəra aà biybiy, tsik a a mə̀r sunwa ana a da aka kər a. Dite mìi tsikike a a dukw ana sunwa a waya metsikik a . » 5 Əbay a gwaɗa tar aaka: « Dukw ana i tsik a ka, a ndze a kamala tàŋa ya, na kàa tsìkwimìŋ sunwa gà, dite kàa ɗemwimìŋ dukw ana a waya aà megweɗe ya tsəka, i sese a ikaba kurum a, ndzàɗ ndzàɗ, gà ga kurum ta ti ne a ka, təv halaga. 6 Ama kəla ka, na ɗemwime a sunwa ana a da aka iye ya, dite ki ɗifemìŋ a dukw ana a a waya metsikiŋ a ka, i dze kurum a a gà bàba gà dukw taf hinne, dite ki ŋgetwime a gà bàba gà mezlibe. Kinehe kuɗa ka, ɗemwimìŋ sunwa gà, nda dukw ana a waya aà metsikiŋ a . » 7 Gà ɓəzla mipire are ta gwaɗar aaka a Əbay asa: « Əbay mə̀r, ɗama a mə̀r sunwa ana a da aka kər a, dite mìi meyeke a a dukw ana sunwa a waya aà megweɗe ya . » 8 Ama Əbay a gwaɗa a tar aaka: « I sər ka, kà wayum medzeye ka, aà ahər məfara ŋa pəra. Aɗaba kà sərum ka, dukw ana Yàa tsik a ka, i me a dər a dəba tsa. 9 Ama na kàa ɗemimìŋ sunwa gà tsəka, seriye kurum, a ge a ka, ahər ŋa ilik tserdze. Kà dzum akaba ka, ahəm aà metsikeyìŋ gà bazlam parsa, nda mepesìŋ za. Ki bebwimìŋ ka, duwa mə mbəɗ. Tsaatsa ka, i waya na ki ɗemwimìŋ a sunwa ana a da aka iye ya. Kərga taŋa na i sire a ka, ki slwime a à meɗemìŋa dukw ana a waya aà metsekìŋ a . » 10 Gà ɓəzla mipire are ta gwaɗar aaka asa: « Əbay, wura ɗa ika gər ahəɗ aaha a sle a memeke a a duwa aka gər dukw ana kà wiz a tsa. Əbay a riŋ ilik, ku mege batsah ŋa, mala ndzəɗa aka wiz duwa medzibe ŋa biy yak aaha aà gà ɓəzla masəra duwa nda gà ɓəzla məpər a are ilik kamala naha ya tsa. 11 Dukw ana kà wiz a ka, kuɗa ihər hinne. Wura a sle aà məfèfilak a aaka ilik tsa, say gà mbulum. Ama tar ka, tar ɗa mandzaŋa ika magər gà mburma tsa . » 12 I fata ya ka, Əbay a ge matsəɓatsəɓ tur tur hinne. A vəl vatwa aà məbatsa gà ɓəzla masəra dukw ana i Babila ya fit tserdze. 13 Dukw ana Əbay a dan a ka, tàa neye, gà mburma fit tserdze tàa tsaraka ka, ta betse a gà ɓəzla masəra duwa fit kweleŋ. Ti yaha gà Daniyel nda gà masla ŋgar aà məbatsa tar mbaŋa. 14-15 Ariyuk mala aka miɗ gà mburma ana ta kezle a Əbay a, a da a məbatsa gà ɓəzla masəra dukw ana i Babila ya. Daniyel a fafəl a Ariyuk himme ahəm, nda metsehe a gwaɗar: « Əbay a zla, madzala gà gər ata mawùraba ŋa hinne ya dzena aàla? » Ariyuk kuɗa ka, a ɗamar dukw ana a ge ba ya. 16 Daniyel a da a təv Əbay tsara . A wiz ahər, matikar məpasla ahər zaakwa, na dite a ɗemere a sunwa ŋgar ata ya. 17 I dəba ŋa ya ka, Daniyel a mbəɗ gər a ma ŋgar. A daha a ɗama gà dukw ana a geyaba ya a gà masla ŋgar, gà Hananiya, Mikayel, aaha Azariya. 18 A gwaɗa a tar ka: « Hamum a Mbulum ana i gər ŋa ya, dite i huɗ mege ŋgwal ŋgar a ka, mə patakwa aà sunwa ata mawùra ba ŋa aà masəra ŋa. Kərga tàŋa na ta betse a akaba kwa nda gà asiŋ gà ɓəzla masəra dukw ana i Babila ya tsiye. 19 I dəba ŋa ya, ndaavəɗ ŋana ka, Mbulum a patar à dukw ana i huɗ sunwa ata makaha a da aka Əbay ya. I fata ya kuɗa ka, Daniyel a dzəba aà mazləba a Mbulum ana i gər ŋa ya. 20 Daniyel a gwa: « Lahakwa dimis mazləba a Mbulum kəla wur gà pat. Gà masəra duwa nda ndzəɗa fit ka, i təv ŋgar. 21 Ŋgat na a mbə̀ɗawa aà ahər mendze, gà dukw ana a geye ba ya fit tserdze. Ŋgat na a dzewe iɗəm aà gà Əbay ya, dite ŋgat asa na a dzeye aɗəm a tar a. A və̀lawa metsehe a gà ɓəzla masəra duwa ya. A vile a metsehe, a gà na ti sle a aà metsereke duwa ya. 22 Ŋgat na a ɗifawa aà dukw ana makaha ŋa i huɗ ŋa, a, mawùra ba ŋa hinne ya. A sər dukw ana makaha ŋa i huɗ həvəɗ a. Dzaydzay a də̀vawa ka, i təv ŋgar ilik. 23 « A kər Mbulum gà bàba gà tsir gà, i gək kəkaaha i lehe a dimis mazləba a kər. Aɗaba ana kàa viliŋ masəra duwa nda ndzəɗa ya. Kàa petìŋ à dukw ana mì wiz a kər a. Haya, kàa ɗif a a mə̀r aà masəra dukw ana Əbay a wiz aà mə̀r a . » 24 I fata ya ka, Daniyel a da a təv Ariyuk, ana Əbay a vəlar vatwa aà məbatsa gà ɓəzla masəra dukw ana i Babila ya. A daha a gwaɗar: « Kà bats gà ɓəzla masəra dukw ana ika ahəɗ Babila ya tsa. Leke iye aka miɗ Əbay, dite i ɗemere a sunwa ŋgar . » 25 I fata ya tsara ka, Ariyuk laka Daniyel a təv Əbay, a gwaɗar: « Əbay gà, i liwiŋ gà Yahuda ana kə gasakwara ya ka, Yàa le aà mburma ilik na a sle a aà maɗamàk sunwa yak a. 26 Əbay a a gwaɗa a Daniyel ana ti ɗer, Beltasar a: « Wànà ki sle a aà meɗemiŋa sunwa ana a da aka iye ya, nda memiŋara iɗəm a dukw ana a waya aà metsikiŋ ya?» 27 Daniyel a gwaɗar aaka: « Əbay gà, dukw ana ka waya aà mewize ya ka, wura a riŋ ilik i liwiŋ gà ɓəzla masəra duwa, gà mahəram, gà ɓəzla medzeŋge mawusawus, nda gà ɓəzla mede tekeɗe ka, ti sle a aà meɗifek a à dukw mawùraba ŋa makaha ŋa ya tsa. 28 Ama Mbulum a riŋ ilik i gər ŋa i mbulum ŋgat na a ɗife a à dukw ana makàhaŋa ya, na dite a ɗif a dər a Əbay Nevuhadnetsar, aà dukw ana a ta ge a ba i huɗ gà mendzena mba ya. Araha na gà sunwa, nda dukw ana kə ŋgatar, kər mahəna ŋa ika təv mehinne yak, ika mendze are ya: 29 Akahər ana kər a riŋ mahəna ya ka, Əbay gà, kà dzəba aà madzala aka dukw ana a dere a ika miɗ ya. Wele ana a patawa aà dukw ana makaha ŋa ya, na a ɗifek dərra. 30 Iye ka, Yàa ŋgat dukw ana sunwa yak ata mawùraba ŋa a waya a metsikik a. tsaatsa iye ka, i sər duwa i za dər gà misle ŋgiɗ tsa. Ama nda ndzer ka, a da dər mburma meɗifek à dukw ata makaha ŋa i sunwa yak ata ya. Dite ka sər dukw ana a wiseke a à a madzala gà gər yak a. 31 Əbay gà, araha na dukw ana kə ŋgatar i sunwa yak a. Məvəɗa dukw ata kamala mburma ya, a dara a hitse aka miɗ yak. Ar ka, batsah ŋa, zubul ŋa hinne, dzaydzay a wewisle are, dite asa ka, a ge magəɗa. 32 Gər ŋgar ka, biy gura ana za iɗəm tìye, gà gəzləŋ ŋgar nda gà ahər ŋgar ka, mege ŋa nda dzemde məvə̀ɗa siŋgwe, gà huɗ ŋgar nda gà gus ŋgar ka, mege ŋa nda virzegene. 33 Gà ndzekwndzekw ŋgar ka, mege ŋa nda ndzemde, dite gà ɓəza sik ŋgar ka, ar əŋgal nda ndzemde, əŋgal nda dwaɗwa ana madula ŋa ya. 34 I təv ana kər a riŋ ihər ki pire a aà məvə̀ɗa dukw ata ya ka, gurum a tapaslara ba i gər kwite ya, nda ahər ŋgar. A dara a lak a gà ndzekwndzekw ŋgar aaha mege ŋa əŋgal nda ndzemde əŋgal ŋa aaha nda dwaɗwa ana madula ŋa ya, a kərə̀ɗ. 35 i fata ya ka, a kərə̀ɗ dər akaba gà ndzemde, nda gà dwaɗwa ana madula ŋa ya, nda gà virzegene nda gà ndzemde məvə̀ɗa sìŋwè , dite nda gà gura aaha fit akaba. Ti ne ka, metirfeneh ahəɗ. Kamala slisla daw ana ta veveye daw ka, himbiɗ a ndzeke a a dala i təv magəzla daw a, himbiɗ a ndzeke a ka, təv sik ŋa a riŋ tsiye. Dite gurum ana a dara a lak a à məpapaza dukw ata mehitse ŋa ndeɗiŋa ya ka, a gə̀l ba batsah ŋa kamala kwite ya, a rah aka gər ahəɗ fit. 36 Araha dukw ana kə ŋgatar i sunwa ana a da aka kər a Əbay gà. Kinehe ka, dukw ana a waya aà megweɗe ya ka, araha asa mbaŋa. 37 Kər ka, batsah hinne aà gà asiŋ gà Əbay fit tserdze . Mbulum ana i gər ŋa i gəza a mbulum a aka vəlak ndzəɗa mekwere, gà ndzəɗa dite nda mezlibe. 38 A dzak gà mburma ana fit tserdze ika gər ahəɗ a, gà dukw gənaw, nda gà ɗiyèŋ ana aà gəza mbulum a, ku mege i ŋga fit tserdze ya ahər yak. A ne a kər batsah ŋa, aka gər gà dukw ata fit tserdze. Gər ata nda gura ya ka, kər. 39 I dəba yak a ka, mekwere ŋgiɗ a deriŋa, ndzəɗa a ge ihər kamala biy yak a tsa. dite mekwere məmakər ŋana, a ndzikiɗ ba virzegene ya ka, a kwere a gər ahəɗ fit tserdze. 40 Makwere məfaɗ ŋana ka, ndzəɗa ŋa kamala ndzemde ya, a dere i dəba ŋa ya. Ndzemde a batsawa duwa, a ləgərawa, dite a kirɗiŋa duwa fit a. Kərga taŋa ya mbaŋa na mekwere ata məfaɗa ŋa a dere a a betse a, a ləgəra a kirɗe a gà asiŋ mekwere ŋgiɗ aaha fit kweleŋ. 41 Kamala ana kà ŋgat a à gà sik nda gà ɓəza sik dukw ata mehitse dər ŋa ya ka, əŋgal ka, nda dwaɗwa ana tə dul a, əŋgal asa ka, nda ndzemde. Taŋa ka, kamala megweɗe ya ka, mekwere ata a sese a ba ikaba ya. Tseke ŋgiɗ a ŋgete a ndzəɗa, kamala ndzemde ya. Kərga na kə ŋgatar gà ndzemde ta gaw ba akaba nda dwaɗwa ana madula ŋa ya. 42 Ama aka gər gà ɓəza sik ŋgar, əŋgal nda ndzemde dite əŋgal nda dwaɗwa ya ka, tàŋa kamala magweɗe ya ka, mekwere ata əŋgal ka, ndzəɗa a ge a ihər, biy ŋgiɗ ka, ndzəɗa a ge a ihər tsa. 43 Kàa ŋgat a a ndzemde nda dwaɗwa ata i təv ilik ŋa. Taŋa a riŋ a pete a dər ka, gà mekwere ata sula ya ka, ti ləme akaba i huɗ masla ya. Ama tàŋa ka, a ndze a tsa. Kamala gà ndzemde nda dwaɗwa madula ŋa ata ya ka, ti sle aà mendze akaba tsiye. 44 I təv ana gà Əbay ata sula ta ŋgete a mekwere ya ka, Mbulum ana i gər ŋa ya a ta tike a mekwere ilik, dite mekwere ata ka, wura ti ta mbazle a dər tsidze. A ta ləgire a gà asiŋ gà mekwere ŋgiɗ aaha fit, a dzeye aà tar ŋa. Ama ŋgat ka, a ndze a a biybiy. 45 Kàa ŋgat a a gurum ana a tapaslara ba i kwite ya a gər ŋgar ilik a. A dara a ləgər gà ndzemde, virzegene, dwaɗwa ata madula ŋa, ndzemde məvə̀ɗ siŋgwe dite gura ata ta baha dukw ata ta papəza. Nda ndzer ka, ŋgat na a ne mekwere ata ya. BATSAH kwa ŋa Mbulum a patak ka, aà dukw ana a te ge a ba mba aka miɗ a. Sunwa yak ata ka, ndzer, dite dukw ana i màk dərra iɗəm a ka, ndzer parsa iɗəm tsa. 46 I fata ya ka, Əbay Nevuhadnetsar a kal agər a bəɗ aka miɗ Daniyel, aà məvəlar mezlibe. A tsik a gà ɓə̀sla meslire ŋgar tə dulayar gà dukw taf nda gà wirde. 47 I dəba ŋa ya ka, Əbay a gwaɗar: « Nda ndzer ka, Mbulum kurum ka, Mbulum ana batsah ŋa ika gər gà Mbulum a fit tserdze. Ŋgat na batsah ŋa ika gər gà Əbay ya. Ŋgat ka, a pete a aà dukw ana makaha ŋa ya a mburma, aɗaba ana kà mìŋara iɗəm a dukw makaha ŋa ata i sunwa ga ya . » 48 I fata ya ka, Əbay a vəl mezlibe a Daniyel. A dzayar gà dukw taf hinne, gà ŋgwal gà dukw taf. A ne a ŋgat batsah ŋa i huɗ kwite Babila ata, dite mala aka miɗ gà ɓəzla masəra dukw ana i Babila ya asa. 49 Daniyel a wiz aà Əbay ka, madzaya a gà Sadrak, Mesak, nda Abed-Negu a gà bàba megemir ana i huɗ batsah kwite Babila ya. Daniyel ŋgat a ndza ka, i huɗ ga i bəra Əbay.