Məpala ahəm biy mahəna a gər a bəɗ a dukw ana ta ge nda virzegene ya
3
1 Əbay Nevuhadnetsar a ge duwa nda dizl, a ge ahər gura. Zubul ŋa ka, metir dzik makər, zlabatum ŋa ka, metir makər. A hitse dər ika varavada ana tə zalar Dura ya, i huɗ kwite Babila. 2 I fata ya ka, a sləraya gà ɓəzla məma a labara ŋgar aà ti yaha gər a gà mburma ana ta kwere a ahəɗ ata ya, nda gà bàba ŋana ika miɗ gà sliwdze ya. Gà ɓəzla maɗife aà metsehe, gà ɓəzla makasla siŋgwe, gà ɓəzla mewetse gà məpala ahəm, gà ɓəzla mege seriye, nda gà asiŋ gà ɓəzla megemir ŋgiɗ. Gà mburma ata fit tserdze ya ka, tə dara a màgə̀rəva magwalum dukw ata Əbay a papəza a hitse dər a . 3 I fata ya ka, gà mburma ata tserdze ya, ta hitse aka miɗ dukw ata ta ge ya aà màgə̀rəvar. 4 Wele ana a kive a megirive ata ya ka, a wideye nda magala, a gwa: « Gà mburma ana i gà gwala ya, gà mburma ana i gà kwite ŋgiɗ pampam a, gà mburma ana ta fefile gà ahəm ŋgiɗ pampam a. Tsarakum məpala ahəm aaha. 5 I təv ana kàa tsara kum tàa vat mezleliŋ, tàa tsəl a tsitsekw, tàa dze gandzavəl nda gà asiŋ gà dukw megirive ŋgiɗ pampam a ka. I fata ya ka, ki kelwime a gər a bəɗ ndisl aka ahəɗ, dite ki hinwimeer a a gər a bəɗ, zlibwime a à məpapaza dizl ata nda gura Əbay Nevuhadnetsar a hitse dər a. 6 Na wele ana aka hənar a gər a bəɗ tsa, aka zlə̀b dər tsiye ka, ti ye a ŋgat a batsah akwa ana ŋgarŋgara tsara.” » 7 Kərga taŋa ya, i təv ana gà mburma ana i gà gwala ya fit tserdze, gà mburma ana i gà kwite ŋgiɗ pampam a, nda gà mburma ana ta fefile gà ahəm ŋgiɗ pampam a tə tsara ka, gà məvata mezleliŋ, tsitsekw, gà gandzavəl nda gà asiŋ gà dukw megirive ŋgiɗ pampam a ka, ta kal a gər a bəɗ ndisl aka ahəɗ, tə zlə̀b aà dukw ata Əbay Nevuhadnetsar a papaz a ge ahər gura a hitse dər a. 8 I fata ya tsara ka, gà mburma gà Babila gà asiŋ ŋana tə dara tə de a tar ala aà gà mburma gà Yahuda. 9 Ta gwaɗa a Əbay Nevuhadnetsar: « Ndza a bə̀ra aà biybiy Əbay mə̀r. 10 Kər nda ahər yak na kà vəl məpala ahəm aha ya. “ Ku mege weke ka, a həne a a gər a bəɗ a zlibe aà dukw ata ta ge, ta ge ahər gura ya, na i təv ana tàa tsara ka məvata gà mezleliŋ nda gà tsitsìkw nda gà gandzavəl nda gà asiŋ gà dukw megirive ŋgiɗ pampam a. 11 Na wura aka niw mahənar a gər a bəɗ, nda mazləba à dukw ata ta ge ya ka, ti ye a ŋgat bise tsara akwa ana ŋgarŋgara.” 12 Əbay mə̀r, kàa ndzək gà Sadrak, Mesak, aha Abed-Negu ana tar ka, gà Yahuda ya. Aà mege megemir i batsah kwite Babila. Nda ndzer ka, gà mburma ata tàa tike dukw ana kà tsike aà ahər tsidze. Ta gewa megemir ka, a gà mbulum yak tsa. Tàa dza gurmits a bəɗ a dukw ata ka ge ka hitse dər a tsa . » 13 I fata ya ka, a tsəɓ a Nevuhadnetsar turtur hinne. A gwaɗa a gà mburma aà ta ndzə̀kar aaha gà Sadrak, Mesak, Abed-Negu a. Tə ndzək aaha tar tsara aka miɗ Əbay. 14 Nevuhadnetsar a gwaɗa a tar: « Ta mìŋ dər ka, kàa niwìm mege megemir a gà mbulum gà? Kàa zləbum a dukw ata i ge i hitse dər a tsa. Ana ndzer a? 15 Kinehe ka, ki tserekume a meɗe gà mezleliŋ nda gà tsitsìkw, nda gà gandzavəl, nda gà asiŋ gà dukw megirive ŋgiɗ pampam a asa na, wànà taŋa ana kurum mahadzala ba ŋa aà mazləba à dukw ata i ge i hitse dər a ya ya? Na kàa zləbum dər tsəka, mìi dzewe a à kurum akwa ana ŋgarŋgar a. Dite mbulum ŋana awara, na a sle a aà mebeye a kurum i ahər gà ya ya? » 16 Gà Sadrak, Mesak, nda Abed-Negu ta gwaɗar aaka à Əbay Nevuhadnetsar: « Əbay mə̀r məfə̀fəlak aaka ka, a ge a ŋgulum asa tsa. 17 Mbulum mə̀r ana mìi gewer megemir a, ŋgat ka, a sle a mebeye aà mə̀r i akwa ata ŋgarŋgar a, dite i ahər ndzəɗa mekwere yak a. Nda ndzer ka, a beye à mə̀riŋa Əbay mə̀r. 18 Dite ku mege ata beye aà mə̀r tsa tekeɗe ka, ki ta ŋgeteriŋa, Əbay mə̀r, mìi ge meslire a gà mbulum yak tsa. Mìi zlibe a aà gà dukw ata ka ge kà baha ahər gura, ka hitse dər a tsa . » 19 I fata ya ka, Nevuhadnetsar a dzəba aà mege matsəɓatsəɓ turtur ana hinne a hərdəs a yemere aka gà Sadrak, Mesak, aaha Abed-Negu a. A gwa ta ge akwa a bəɗ sik təsəla ma za na piŋŋa ya. 20 I fata ya ka, a vəl vatwa a gà sliwdze ŋgar ana gà ndzəɗa ŋa ya, a gwaɗa a tar: « Ŋgeywim gà Sadrak, Mesak nda gà Abed-Negu, dite kà dzawum a tar a akwa ŋgarŋgar ŋa ata. 21 I dəba ŋaya tsara ka, gà sliwdze tə ŋgeye gà mburma ata makər a, tə dzawa a tar akwa ata ŋgarŋgara, nda gà petek tar ana ika ba, nda gà na i huɗ ŋa ya . Nda gà felere tar nda gà tsapa tar fit tserdze aka ba. 22 Biy mazazama mə̀làpà ahəm Əbay ata a zla mawùraba ŋa ya ka, ta ŋgangəɗ akwa ata hinne, i təv ana gà sliwdze ana ti dzewe a à gà Sadrak, Mesak, nda gà Abed-Negu a ka, arah akwa ata wànà tar. 23 Gà Sadrak, Mesak, aaha Abed-Negu a ka, tə dzawa akwa ata ka, tar gà meŋgeye ŋa. 24 Tsara ka, Əbay Nevuhadnetsar a hitse a mbulum. A ge a ŋgat kamala dukw mane a mburma ya. A wiz aà gà ɓəzla meslire ŋgar a gwa: « Wànà kàa dzawakwa aà gà mburma makər meŋgeye ŋa akwa tsiye? » Gà ɓəzla meslire ŋgar ata ta gwaɗar aaka a Əbay: « Kaɗəŋ ndzer kà dzawakwa aɗəm a tar. » 25 Əbay a gwaɗa a tar aaka: « Ama ka, araha i ŋget a ka, a gà mburma faɗ, madzawa ya ŋa tsa, tar a riŋ ihər ti seweye a i huɗ akwa. Mbəlak a tar tsidze, məfàɗ mburma ka, a ndzikiɗ ba ka, wele ana a dara i mbulum a » 26 I fata ya ka, Nevuhadnetsar a sərəkaha aka biye ahəm akwa ata, a wideye a gwa: « Sadrak, Mesak Abed-Negu, gà ɓəzla meslire Mbulum ana i gər ŋa ya, tsalumara, kà dumara . » Tar ata makər a, tə tsalara i akwa ata ya. 27 Gà bàba ŋana ika miɗ gà mburma ya, gà bàba ŋana ika miɗ gà sliwdze ya. Gà ɓəzla maɗife aà metsehe, ti yahaba gər aà masamata gà ɓəza gà gawla ata makər a, kizlìɗ kizlìɗ. Akwa aka ləm aà ba tar tsa. Gà həmbaz tar, gà petek tar ka, aka ləm ahər tsa, dite ku mege meze hədzək aà tar tsidze. 28 I fata ya ka, Əbay a gwa: « Gekwa kəkaaha a Mbulum gà Sadrak, Mesak aha Abed-Negu. Gà ɓə̀zle meslire ŋgar ti tike ŋgat ahər a, dite ti niw magəsa ahəm a gà məpala ahəm gà ya. Ta vəl ba tar aà akwa ma wànà tar na nda ana, ta ge a megemir, dite ti zlibe a a mbulum ŋgiɗ ana pam a biy tar a. Aɗaba taŋa na Mbulum ata a slərra gawla ŋgar aà mebeye aà gà ɓəzla meslire ŋgar a. 29 Araha kinehe ka, i vile a məpala ahəm ana a fər aà gà mburma ana tserdze i gà gwala ya, gà mburma ana i gà kwite ŋgiɗ a, dite gà mburma ana ta fefile gà ahəm ŋgiɗ pampam a fit tserdze. Araha na dukw ana i tsike a ya: « Na wura aka tsik dukw ana ŋgwal ŋa tsa, a Mbulum gà Sadrak, Mesak aha Abed-Negu a ka, ti sese a ikaba ya ndzàɗ ndzàɗ, dite ga ŋgar, a ne a təv halaga. Nda ndzer ka, gà mbulum ŋgiɗ riŋ na a sle a aà mebeye a à gà mburma kamala taŋa ya tsa.» 30 I fata ya ka, Əbay a dza gà ŋgwal gà təv mezlibe a gà Sadrak, Mesak, aha Abed-Negu, ika ahəɗ Babila. 31 Əbay Nevuhadnetsar a sləraya mefefile aha a gà mburma ana i gà gwala ya, gà mburma ana i gà kwite ŋgiɗ pampam a, gà mburma ana ta fefile gà ahəm ŋgiɗ pampam a fit tserdze ya, a gwaɗa a tar: « mandza zayzay kurum ma səkah. 32 A diŋ a gər lele na i me a kurum a dukw mene a mburma ana wura aka ŋgatar ilik tsiye. Mbulum batsah ŋana i gər ŋa ya na a giŋ a. 33 Gà dukw mene a mburma ata ka, tar gà bàba ŋa, gà ndzəɗa ŋa hinne. Mbulum ata ka, a ne a Əbay aà biybiy. Mekwere ŋgar a ndze aà bəra ka, wa ahər kəla wa ahər kəla.