Daniyel 4

1 Iye Nevuhadnetsar, iye mandzaŋa ŋa ka, nda maŋgayaba ŋà, nda zay lele na i ga mekwere ana iye mandza ŋa iɗəm a ya. 2 Ama i huɗ həvəɗ duwa, i təv ana iye mahə̀naŋa ika təv mehinne gà ya ka, sunwa aka da aka iye, aka dze aà iye magəɗa. I fata ya ka, dukw ana i ŋgatar a ka, aka giŋ magəɗa hinne. 3 I dəba ŋa ya ka, i vəl məpala ahəm a gà ɓəzla masəra dukw ana i Babila ya fit tserdze, ti yaha ba gər a təv gà. Aà ta mìŋara iɗəm a dukw ana sunwa a da dər aka iye. 4 I təv ana gà mahəram, nda gà ɓəzla mege dukw mene aà mburma, gà ɓəzla mipire are, nda gà ɓəzla medzeŋge mawusawus, ta ndzera, i ɗama a tar sunwa gà, ama ka, tàa ɗifìŋara iɗəm dukuməŋa ya tsa. 5 I dəba ŋa ya ka, Daniyel aka ndzera a ma gà ya. Wele ata ka, na ti ɗer zləm Beltasar a. Zləm ata ka, biy mbulum gà. Ŋgat ka, marahaŋa nda mezite gà mbulum ana tsəɗaŋŋa ya. I ɗamar dukw ana sunwa a da dər aka iye ya, dite i gwaɗar: 6 « Beltasar, mala aka miɗ gà mahəram . I sər ka, mezite gà mbulum ana tsəɗaŋŋa i ba yak. Dite dukw mene a mburma riŋ na a zeke a ndzəɗa ya tsa. Mìŋara iɗəm a dukw ana sunwa a da dər aka iye ya. 7 akahər ana iye mahəna ika sləlah gà ya ka, araha na dukw ana i ŋgatar a: Dizl zubul ŋa a sləlara ika magər ahəɗ a, ar ka zubul ŋa gìɗgìɗ hinne. 8 Dizl ɗaf ata a ɗe, dite a ŋgat ndzəɗa a. Zubul ŋa a ləm à mbulum. Ku mege ara ika tseke gər ahəɗ waraya ka, ta sle a aà meŋgetere a tserdze. 9 Gà slambah ŋgar ka, gà matsahəna ŋa, mawaŋa gwatsik gwatsik hinne. A sle aà mevile a dukw mezime a gà mburma nda gà dukw dala tserdze. Gà dukw dala tə ndzawa aà huɗ seseye ŋgar. Gà ɗiyeŋ ta gewa gà mandzwafkwa tar aka gà ɓəza ahər ŋa. Zləma gà dukw ana mesife iɗəm a, fit tserdze ka, ti zime a dukw mezime ka, i təv ŋgar a. 10 Iye ka, mahəna ŋa hiywe ika təv mehinne gà, i ŋgat a gwala Mbulum ana a kèsle a gər ahəɗ a, a tarəra i Mbulum a. 11 A wideye nda magala hinne, a gwa: “Sasum dizl aaka, kà sasum gà ɓəza ahər ŋa, sutarùm ihər gà slambah ŋgar a, Kə gwitswim ihər à mewe ŋgar a dala. Gà dukw dala, ta taz aà huɗ seseye ŋgar a, dite gà ɗiyeŋ tekeɗe ta beye ika ɓəza ahər ŋgar a. 12 Ama kəla ka, məsakum aà dwiŋgwìzl ŋa, nda gà slile ŋa a biye, aka magər gà kwizir ana i dala ya. Ndiwiɗwimar tsitsirɓe ndzemde nda virzegene. Dite mə̀ràh məbara ŋgat i bəɗ a. Ma zəmawa kwizir kamala gà dukw dala ya. 13 Madzala gà gər ŋgar mə mbəɗ, mene kamala mburma asa tsa. Mene kamala biy dukw dala ya, mandza kamala taŋa ya, i huɗ mive tə̀səla. a 14 Gà gawla Mbulum ana ta kèsle a gər ahəɗ a, na ti ɗif à madzala gà gər ata ya. Kərga tàŋa ya ka, gà dukw ana tar a riŋ nda gà mesife ya fit tserdze, ta sər ka, Mbulum ana i gər ŋa ya, na batsah ŋa ika gər mburma ya. A vile a ndzəɗa mekwere a wele ana a waya a vilere ya, dite a vile a wele ŋgat mburma məfaraŋa i liwiŋ gà mburma ya na aka waya mbaŋa. 15 Araha na sunwa ana a giŋ a, iye Əbay Nevuhadnetsar, kər Beltasar, kinehe ka, mìŋara iɗəm a dukw sunwa ata a giŋ a. Wura a riŋ ilik ika magər gà ɓəzla masəra dukw ana ika mekwere gà ya, tàa sle aà meɗifìŋ a dukw ana a waya megweɗìŋ a tsa. Ama kər ka, ki sle ŋa. Aɗaba ana mezite mesife gà mbulum ana tsəɗaŋŋa marahaŋa i ba yak a . » 16 I dəba mendze zakwa ya ka, Daniyel ana tə zalar Beltasar mbaŋa ya ka, a ge magəɗa hinne, dite madzala gà gər ŋgar a wise. Əbay a gwaɗar: « Beltasar, kà məsak à ba, sunwa aaha nda dukw ana a waya aà metsikik ka, mà wisek a gər tsa. Beltasar a gwaɗar; « Batsah gà ŋa, i waya ndzer, sunwa ata mene ka, biy gà ɓəzla mene are yak. dite dukw ana a ɗife a dər a ka, a pər ka, aà gà ɓəzla mene are yak. 17 Kàa ŋgat a dizl ɗaf ana a riŋ a ɗe ŋa, dite ka, a ŋgat ndzəɗa ya. A ləme a aà mbulum, dite gà mburma ana ika gər ahəɗ a tserdze ya ka, ti sle a aà meŋgeteriŋa. 18 Gà slambah ŋgar ka, gà matsahəna ŋa, mewe ihər gwetsìkw gwetsìkw. A sle aà mevile a dukw mezime a gà dukw ana nda mesife ya tserdze. Gà dukw dala, tə ndzawa aà huɗ sisiye ŋgar, dite gà ɗiyiŋ ta geyewa gà mandzwafkwa aka gà ɓəza ahər ŋgar. 19 Nda ndzer ka, kər na dizl ata ya, Əbay gà! Kàa ne ka, batsah ŋa mala ndzəɗa. Batsah yak ka, aka ndze a mbulum. Dite mekwere yak ka, aka ləm aka kwiye gər ahəɗ fit. 20 I dəba ŋa ya ka, kàa ŋgat a a gawla Mbulum ilik, na a kaslawa gər ahəɗ a, a tarəra i Mbulum a, a gwa: « Sasum dizl ata ŋa dite kà dzeyum dər. Ama kəla ka, məsakum aà dwiŋgwìzl ŋa, nda gà slile ŋa a biye, aka magər gà kwizir ana i dala ya. Ndiwiɗwimar tsitsirɓe ndzemde nda virzegene. Dite mə̀ràh məbara ŋgat i bəɗ a. Ma zəmawa kwizir kamala gà dukw dala ya haa mive tə̀səla. 21 Araha na dukw ana a waya megweɗe ya Əbay gà. Mbulum ana i gər ŋa ya, aka zla madzala gà gər aka gər yak, araha: 22 Ti ta delewe a kər ika magər gà mburma ya. Ki ta ndze a ka, ika magər gà dukw ana i dala ya. Ki zemewe a ka, kwizir kamala gà sla ya. Mərah a berewe a kər, taŋa a ti ndze a ka, mive təsəla. Aka mandəvandəv mendze ata ka, ki ta sire a à dukw aha. Mbulum ana i gər ŋa ya, na batsah ŋa ika gər mekwere gà mburma dite ŋgat na a vile a ndzəɗa mekwere a wele ana a waya ya. 23 Mala ndzəɗa ata, dite ŋgat ka, tsəɗaŋŋa asa ya, a tarəra i Mbulum ka, aka mbər mivile məpala ahəm a aha a bəɗ a, a gwa: « Məsakum a dwiŋgwìzl dizl ata nda slile ŋa dze a ahəɗ. Taŋa na a waya aà megweɗe, ki ta me a aka mekwere Əbay yak ka, i təv ana ki tə tsereke a ka, Mbulum ana i gər ŋa ya na a kwere a gà duwa tserdze ya. 24 Aɗaba taŋa i gək kamkam Əbay gà, aà kə gəs metsehe gà, məsak aà mege bakal, dite ki ge dukw ana ŋgwal ŋa ya. Gà ɓəzla matawak tə ndzek are tsehe. Məsak a dukw ana kə gawa ŋgwal ŋa tsiye. Kərga tàŋa ya, bìleme na ki ti ndiɗɗike a ɗa gər aà mendze barbarərra ya. 25 Dukw ana tserdze fit Daniyel a tsikeye a a Əbay ya ka, aka geye ba. 26 Aka mandəvandəv mive ilik ka, Əbay a riŋ a seweye a ika gər ga ana ŋgat, Əbay mandza ŋa iɗəm i Babila ya. 27 A gwa: « Batsah kwite Babila aaha ŋgwal ŋa ya ka, wànà iye tsiye na a zlazl a. Aà mane batsah huɗ kwite mekwere gà. I zlazl ka, agəra ndzəɗa mekwere gà ana batsah ŋa ya, dite meviliŋ mezlibe agəra batsah ga. » 28 I təv ana Əbay ata aka ndəv aà mifefile ŋgar ata zukw tsiye ka, mifefile a ɗera i Mbulum i gər ŋa ya a gwa: « Əbay Nevuhadnetsar, dza zləm a mifefile aaha: Mekwere Əbay yak aaha ka, tàa zla aà kər a. 29 Ti ta delewe a kər ika magər gà mburma ya. Ki ta ndze a ka, ika magər gà dukw ana i dala ya. Ki zemewe a ka, kwizir kamala gà sla ya. Tàŋa a ti ndze a ka, mive təsəla. Aka mandəvandəv mendze ata ka, ki ta sire a à dukw aha. Mbulum ana i gər ŋa ya, na batsah ŋa ika gər mekwere gà mburma dite ŋgat na a vile a ndzəɗa mekwere a wele ana a waya ya . » 30 Bazlam ata a ge ba tsara . Tə dalawa Nevuhadnetsar ika magər gà mburma ya. A zəmawa ka, kwizir kamala gà sla ya. Mərah a barawa ŋgat. Ambəz ŋgar a slil kamala ŋgùz zləra ya, gà gehir ŋgar tekeɗe ndzavalàŋlàŋ kamala gehir gà ɗiyeŋ a. 31 Aka mandəvandəv mive təsəla ŋa ata ka, Nevuhadnetsar a gwa: « I zla gər a mbulum, i fər ndara a gəza a mbulum dite metsehe gà a mara. I fata ya ka, i ge kəkaaha a Mbulum ana i gər ŋa ya. I lah dimis mazləba aà ŋgat, dite i zlə̀b a wele ana a ndze a aà biybiy a. Ndzəɗa mekwere ŋgar ka, a ndìve a tsa. Əbay ŋgar a ndze a ka, wa ahər kəla wa ahər kəla. 32 Gà mburma ana tar mandzaŋa ika gər ahəɗ a ka, ti sle duwa tsa na ika miɗ ŋgar a. A ge a à gà mburma ana i Mbulum a ka, kamala ana a waya a ge a aà gà mburma ana mandza ŋa ika gər ahəɗ a.Wura riŋ ilik na a dzike a aàba aà mazla mekwere ŋgar, nda gà a gweɗere a, ki ge a naha ana əla tsa? 33 akahər ŋa ata kuɗa na i ŋgat metsehe ya. I ŋgat asa ka, mezlibe nda batsah biy ana a ɗife a aà batsah mekwere gà ya. Gà ɓəzla meslire gà nda gà ɓəzla megemir gà ana gà ŋgwal ŋa ya, ta dara a ti yaha iye. I mà aka maŋgat a mekwere gà, dite i ŋgat mezlibe a za dər na a da a dəba ya asa. 34 Agəra tàŋa na kinehe iye Nevuhadnetsar, i lehe a dimis mazləba aà Əbay ana i Mbulum i gər ŋa ya. I mewe aà guma ŋgar dite i zlibewe a à ŋgat. A gewa gà duwa tserdze ka, nda ndzer, dite ndaka vatwa ŋa hiywe. Ndzəɗa ŋgar a riŋ aà məma aà gà ɓəzla zlapa à bəɗ.