Daniyel 5

Mewetse dukw ana a ge magəɗa, wura a sər medzeŋge ŋa tsa, a pat aà dəduŋ ga

1 A pat ŋgiɗ duwa ka, Əbay Beltasar a de batsah ɗaf a gà ɓəzla megemir ŋgar ana gà ŋgwal ŋa ya, mburma dəbuw. A dzəba aà masa guzum i təv are tar. 2 I təv ana a məndzər guzum ata ya ka, a gwa tə ndzəkarra gà tsile ana mege ŋa nda gura dite nda ndzemde məvə̀ɗa siŋgwe ya, ana dede ŋgar Nevuhadnetsar a ndzəkara i ga mbulum batsah ŋana i Yeruzalem a. A waya ka, tə sa dər guzum nda gà ɓəzla megemir ŋgar gà ŋgwal ŋa ata. Gà məkəs ŋgar nda gà kəra gà məkəs ŋgar. 3 I fata ya ka, gà ɓəzla meslire ŋgar, tə ndzəkaraha gà kivit nda gà tsile gura ata, dede ŋgar a ndzəkara piŋŋe i ga mbulum batsah ŋa ata i Yeruzalem a. Əbay a ndzək aà masa dər guzum nda gà mburma ata i fata tserdze ya. 4 I təv ana tə ndəv a masa guzum a, tə dzəba aà malaha dimis mazləba aà gà mbulum ana ta ge ye, nda gura, nda dzemde məvə̀ɗa kur siŋgwe, nda virzegene, nda zara, nda dizl, dite naha nda kur. 5 I fata ya tsara ka, a ŋgat a ahər mburma riŋ bise nda təv mandza gà làlàmpà, ahər ata a dzəba a mewetse a duwa aà duduŋ ga zlagam Əbay ana herre ya. Əbay a ŋgat a ahər ata a riŋ ihər a wètsè duwa. 6 I fata ya tsara ka, yemere ŋgar a mbəɗ aba, sàkw sàkw herre, gər ŋgar a wise. A dza a bəra i gər a. Dite ba ŋgar a dzadzar zlàɓ zlàɓ zlàɓ fit i bəɗ a. 7 Əbay a dzəba aà mewedeye nda ndzəɗa, aà tə zalaraha a gà ɓəzla masəra dukw ana i Babila ya. Gà ɓəzla mege dukw mene aà mburma, gà ɓəzla mipire are aha nda gà mburma ana ti dzèŋgewa gà mawusawus a. A gwaɗa a tar: « Na wura a sle a aà medzeŋgè dukw aka mewetse ŋa ya, dite a mere a iɗəm a dukw ana a waya aà megweɗe ya ka, i dze a aaka gà ŋgwal gà petek ana lele ya. I tikere a matsəraɗ gura a ɗa, dite a ne a ŋgat a batsah ŋa, ika magər gà ɓəzla makwara gà ahəɗ ana i mekwere ga ya. 8 I dəba ŋa ya, gà ɓəzla masəra dukw ata, ta ge a megemir i bə̀ra i Əbay ya, tə daha a ga fit tserdze. Ama ti sle aà medzeŋgè mewetse dukw ata, aà məmàr dərra a dukw ana a sasar aà metsike a Əbay a tsa. 9 Əbay Beltasar a ge magəɗa hinne ndeyndey asa, dite yemere ŋgar a mbəɗ aba, sakw sakw herre. Gà ɓəzla megemir ŋgar gà ŋgwal ŋana tekeɗe ka, gər aka wise aka tar mbaŋa. 10 I təv ana məkəs Əbay a tsaraka Mewideye kəla ŋgar, nda biy gà ɓəzla megemir ŋgar gà ŋgwal ŋa ata ya. Məkəs ata a pətsaha a ga mazəma ɗaf, dite a gwaɗa a Əbay: « Dza a bəra à biybiy, a kər Əbay gà! Duwa ma wisek a gər tsa, dite yemere yak mə mbəɗ tsa. 11 I mekwere yak ka, wura a riŋ ilik na mezite gà mbulum tsəɗaŋŋa ana madzàŋa i ba ŋgar a. Akahər ana tsir yak a bəra ya ka, wele ata aka pàt à masəra duwa parakka lele, dite metsehe ŋgar a ndzikiɗ ba ka, metsehe gà mbulum. Aɗaba tàŋa na tsir yak, Əbay Nevuhadnetsar a tike aɗəm ŋgat aà mene mala aka miɗ gà mahəram, gà ɓəzla mege dukw mene aà mburma, gà ɓəzla mipire are, nda gà mburma ana tə dzeŋgèwa gà mawusawus a. 12 Wura a riŋ ilik na a sər megeye a ikaba aà duwa kamala ŋgat a tsa. A sər məmayara iɗəm aà dukw sunwa ya, a sər mefefile aka gà mewize ana məwùra ba ŋa. A ŋgatawa mifefile aka gà dukw ana a lewa aà mburma mawùra ba ŋa ya. Gà dukw ata tserdze ya ka, tar i ba Daniyel. Kinehe ka, zalaraha, a ŋgat ana tsir yak a ɗer zləm Beltasar a. Ŋgat ka, a sle aà mimekere a iɗəm a dukw aaha mewetse ŋa aà duduŋ ga ya. 13 I fata ya ka, tə laka Daniyel aka miɗ Əbay, dite wele aaha a wiz ahər: « Wànà kər na Daniyel gà Yahuda ata dede gà a gəsara, ika ahəɗ gà Yahuda ya ya? 14 Araha na dukw ana i tsarakawa, ta gwaɗawa aka gər yak ka, mezite gà mbulum madzàŋa i ba yak, dite kà ɗifewa a duwa parakka, nda meɗife a à masəra dukw ana mawùra ba ŋa hinne ya. 15 Kinehe ka, tàa ndzikiŋara gà ɓəzla masəra duwa nda gà mburma ana ta gewe gà dukw mene aà mburma ya aka mìd ga ya, aà medzèŋgìŋ dukw ana mewetseŋa aà duduŋ ga ya. I waya ka, ta miŋara iɗəm a dukw ana a waya metsikiŋ a. Ama ka, tàa sle ahər tsa. 16 I tsaraka duwa aka gər yak ka, ki sle a aà mimera iɗəm aà gà dukw ana məwùra ba ŋa ya. Kà sər mifefile aka gà mewize ana məwùra ba ŋa ya. Na ki sle a aà medzeŋgìŋ dukw aaha mewetse ŋa ya, dite ki sle a aà mimere a iɗəm a dukw ana a waya metsike ya ka, i dze aka kər a gà petek ana gà ŋgwal ŋa hinne lele ya. I tikike a tsitsiɓe gura a ɗa, dite ki ne a batsah ŋa i liwiŋ gà bàba ŋana ta kwere a gà ahəɗ ana ika mekwere gà ya. 17 I fata ya ka, Daniyel a fafəlar aaka a Əbay ika miɗ ŋgar: « Gà dukw taf yak tə ndzak, dite ka dza a gà misle ŋgiɗ. Ama kəla ka, i dzeŋge dukw aaha mewetse ŋa ya a Əbay. Dite i merra iɗəm a dukw ana a waya metsiker a. 18 Əbay gà, Mbulum ana mandza ŋa i gər ŋa ya, aka ne a tsir yak Nevuhadnetsar batsah Əbay, ndzəɗa ŋa dite mezlibe ŋgar a riŋ hinne. 19 Agəra batsah ata Mbulum a vəlar a ka, gà mburma ana i gà gwala ya, gà mburma ana i gà kwite ŋgiɗ pampam a, gà mburma ana ta fefile gà ahəm ŋgiɗ pampam a fit tserdze ya, tàa ge magəɗa nda medzedzere hinne ika miɗ ŋgar. A batsawa mburma, kige tsa a miyakawa a tar nda mesife kamala ana a waya ya. A səkahawa aà mburma kige tsa a nikiɗawa aà mburma, kamala ana a waya ya asa mbaŋa. 20 Ama i təv ana a ne mala magə̀la a gər a, magəla a gər ŋgar ata a kular aà gəzləŋ. I fata ya kuɗa na tə ləmar ika təv mendze mekwere Əbay ŋgar a, na dite mezlibe ŋgar a ge ihər asa tsiye. 21 I fata ya ka, tə dalawa ŋgat ika magər gà mburma ya, dite na a ne kamala gà dukw dala ya. A ndzawa i liwiŋ gà hezweŋe ana i dala ya, a zəmawa ka, kwizir kamala gà sla ya. Ba ŋgar a ndzawa ka, sleɓirtsekke nda mə̀rah. Dukw ata a ndza ka, haa tsìm a pat ana a sər dər ka, Mbulum ana mandza ŋa, i gər ŋa ya, na batsah ŋa ika gər gà mekwere gà mburma ya, dite ŋgat asa na a vile a Əbay a mburma kamala ana ŋgat a waya ya. 22 Dite a kər ana Beltasar kəla ŋgar a, ka sər gà dukw ata ka, lele. Tsaatsa ka, magə̀la a gər yak aka nikìɗ tsa. 23 Ama kàa gəl a gər yak nda təv BATSAH kwa ŋana mandza ŋa i Mbulum i gər ŋa ya. Aɗaba ana kər, kà ndzəkara gà tsile ana tsəɗaŋŋa pam biy Mbulum, tə ndzəkara i ga BATSAH kwa ŋa batsah ŋa ata ya. Kà ndzukumara, ka sum dər guzum, kurum nda gà ɓəzla megemir yak ana gà ŋgwal ŋa ya, gà məkəs yak, nda gà asiŋ gà məkəs yak gà kəra ŋana. Asa ka, kàa lahum dimis mazləba à ga mbulum ndzemde məvə̀ɗa kur siŋgwe, nda gura, nda vizegene dite nda zara, biy ana ta ge nda dizl a, dite nda kur a. Tsaatsa ka, gà mbulum ata ka, ta ŋgat a vatwa tsa, zləm a tar ama tə tsara ka duwa tsa, tə sər duwa tsidze. Kàa vəl mezlibe a Mbulum ana a gis a mesife yak, nda gà vatwa yak tserdze ka, i ahər ŋgar a tsa. 24 Aɗaba tana na Mbulum a slərra ahər aà mewetse gà bazlam ata kə ŋgatar a. 25 Araha na gà bazlam ana a wètsè ya. MENE, MENE, TEKEL nda PARSIN. 26 Kamala taŋa ya, araha na a waya aà megweɗe ya: MENE kamala megweɗe ya, “ maɗama duwa ”: Mbulum aka ɗama gà pat yak ana ki ge ika mekwere ya, dite aka tsik pat mandəvandəv ŋa asa. 27 TEKEL: Kamala megweɗe ya, “ meeke duwa ”: Mbulum a ke ke, kər ika kiliww a, a samata, ka be ka, hinne tsa. 28 PERES: Kamala megweɗe ya, “ mandzə̀ka ikaba duwa ya ”: Mbulum aka ndzək ikaba mekwere yak a, aka dza ahər a gà Mediya nda Perisiya . » 29 I fata ya tsara ka, Beltasar a gwa: dzum gà ŋgwal gà petek aka Daniyel, dite ka tikwimer tsitsirɓe gura a ɗa. A slər gà mburma aà mèneye ka, Daniyel aka ne məmakər ŋa, ika magər gà ɓəzla makwara gà ahəɗ ana ika mekwere ŋgar a. 30 I huɗ həvəɗ ŋa ata ya tsara ka, ta kəɗ Beltasar Əbay gà Babila.