Daniyel 6

Ti ye Daniyel a sləlak gà azil

1 I fata ya kuɗa ka, Dariyus gà Mediya na a zla təv mendze Əbay a, mive ŋgar ka, dzik ndilik gəra sula. 2 A da a gər a Dariyus ka, hinne na a ndzike a gà ɓəzla makwara ahəɗ dərməka nda dzik səla ika mekwere ŋgar a. 3 I fata ya ka, a dza gà ɓəzla aka miɗ makər aka gər gà mburma ata. Aà ta pala ahəm ka, ta ge dukw ana ŋgwal tsiye a Əbay tsa. Gà ɓəzla makwara gà mburma ata ti sle a aà mimeter a a dukw ana ta ge a ika ahəɗ tar a, a gà ɓəzla aka miɗ tar ata. Daniyel ka, ŋgat ilik ŋa ika magər gà mburma ata mbaŋa. 4 Daniyel ata ka, a za gà asiŋ gà ɓəzla aka miɗ aaha sula ya, nda gà asiŋ gà ɓəzla makwara ahəɗ ana ika mekwere ŋgar a fit tserdze, aɗaba ana ŋgat ka, mezite mesife mege gà bàba gà dukw ana wura a sle a mege a tsiye i ba ŋgar. Əbay a dzala aà mene aà ŋgat batsah ŋa, aà makwara ahəɗ ŋgar fit tserdze. 5 I fata ya ka, gà asiŋ gà ɓəzla aka miɗ nda gà ɓəzla makwara ahəɗ, ti yaha vatwa aà məma aà bakal a Daniyel, aka gər mekwere. Ama ka, tàa le a aà bakal duwa ilik i təv ŋgar tsa, ku mege i təv Dukula ya tekeɗe aka dzeye iɗəm a tsa. Aɗaba ana ŋgat ka, mala ndzer a. 6 Gà mburma ata ta gwaɗa ba ika magər tar: Kàa lekwe a a dukw ana ki mekwe a dər a bakal a Daniyel a tsidze. Ŋgatakwa ahər vatwa ka, nda təv megə̀sa ahəm ana, a gəsawa ahəm aà məpala ahəm Mbulum ŋgar a. 7 Gà ɓəzla aka miɗ sula ŋa ata nda gà ɓəzla makwara ahəɗ ata tə da i fata ya tsara a bəra Əbay, tə daha ta gwaɗar: « A kər Əbay Dariyus ndza a bəra ka, aà biybiy. 8 Mər gà ɓəzla aka miɗ ana ika mekwere yak a, gà na ta kwere a gà ahəɗ a, gà ɓəzla mege seriye, dite nda gà na ti ɗifeke a à metsehe ya, maa yaha ba gər. Araha na dukw ana mìi gwa i huɗ mayahaba gər mə̀r ata ya. Ki sle a à mehitse aà məpala ahəm nda megweɗe, i huɗ mehinne dzik makər a ka, wura ilik ma dza gurmits a biye, ma wiz duwa aà mbulum ŋgiɗ, kige tsa a wura tsa say na a kər ilik tsiye. Na wura aka ge dukw ata i huɗ gà mehinne ata ya ka, ti ye a ŋgat a sləlak gà azil. 9 Kinehe ka, a kər Əbay mə̀r, neye məpala ahəm ata, a pala ahər ba ahəm a, dite ka tike aakahər yak. Na kàa ge dər kamala taŋa ya ka, wura a sle a aà mimbiɗere a aà ahər asa tsidze. Aɗaba i huɗ fəla gà Mediya nda Perisiya ya ka, wura a sle a aà mimbiɗe ahər aà məpala ahəm ana aka tike aaka ba ahər a tsa . » 10 I fata ya ka, Əbay Dariyus a tike ahər aka məpala ahəm ata ta wètsè ya. 11 I təv ana Daniyel a tsaraka, Əbay aka tike ahər ŋgar aka wakita məpala ahəm ata ya ka, a da a ga a ma ŋgar. A ga ana ika gər biy ŋgiɗ a, gà biye mendiwek a riŋ mahəndəka ŋa iɗəm a, ser aka kwite Yeruzalem. Kamala ana Daniyel a gewa dər kəla wur gà pat a ka, a dzawa gurmits a bəɗ sik makər kəla wur gà pat, aà mahama a Mbulum ngar nda malaharaha dimis mazləba aà ŋgat. A pat ata kuɗa ka, a ge dər kamala na a gewa dər kəla wur gà pat a. 12 I fata ya tsara ka, gà ɓəzla mene are ŋgar aaha tàa ndzeha a ma ŋgar, ti leha aà Daniyel ka, a riŋ a heme a a Mbulum ŋgar nda meger aaha kamkam. 13 I fata ya kuɗa ka, tə da a bəra Əbay, ta gwaɗar: « Wànà kàa tike ahər aka wakita məpala ahəm ana a pala ahər ba ahəm i huɗ mehinne dzik makər a ka, wura a sle a aà meheme a mbulum ŋgiɗ kige tsa a mburma ŋgiɗ ika gər kər a tsa tsiye? Na wura aka ge kamala taŋa ya ana wànà ki yekwe a a sləlak gà azil tsiye? » Əbay a gwaɗa a tar aaka: « Haya dukw ata ka, kamala taŋa ya na i gwa ya. Dite i təv gà Mediya nda gà Perisiya ka, məpala ahəm ata ka, kamala taŋa ya a sle a mimbiɗere a ba aà ahər tsa . » 14 I fata ya ka, gà ɓəzla mene are Daniyel ta gwaɗar aaka: « Tsaatsa ka, Əbay mə̀r, wura a riŋ ilik ika magər gà na ta gasara tar ika ahəɗ Yahuda ya, wele ata ka, Daniyel aka patak aà mahəna aà gər ŋgar a bəɗ tsidze, ku mege a wakita məpala ahəm ana ka tike aaka ahər yak a tekeɗe ya. Ŋgat a riŋ a hamawa ba à Mbulum ŋgar sik makər kəla wur gà pat. 15 I təv ana Əbay a tsaraka bazlam ata ya ka, a ndza ba are tsehe hinne. I madzala gà gər ŋgar ka, a waya mebe aà mesife Daniyel, dite haa pat a dəɗ ahər ka, a riŋ aà mayaha metsehe ana a be a dər a ŋgat a. 16 Ama gà ɓəzla mene are Daniyel, ta mbəɗara gər a bəra Əbay ya bise tsara , dite ta gwaɗar: « Əbay mə̀r, kər ka sər ka lele, kamala məpala ahəm gà Mediya nda Perisiya ya na a gwa ya, wura a sle aà məmbəɗa ahər a dukw ana ta pala ahər ahəm, kige tsa a məpala ahəm ŋgiɗ ana mewetse ŋa, Əbay aka tike a aakahər ŋgar a tsa. 17 I fata ya ka, Əbay a gwa: « Gə̀sumara Daniyel a, dite ka ywim ŋgat a sləlak gà azil! » Əbay a gwaɗa a Daniyel: « Bəla na a be a a kər a ka, Mbulum yak ana kə gewer meslire ndzer ndaka vatwa ŋa ya ilik.» 18 Gà mburma tə tapaslara batsah bèliŋ, ta həndək dər aka biye sləlak ata. Əbay a wètse duwa aka gər bèliŋ ata nda ahər ŋgar. Asa ka, gà asiŋ gà ɓəzla megemir ŋgar gà ŋgwal ŋana ta wètse aaka mbaŋa. I fata ya ka, wura a sle aà mimbiɗere a aà ahər a a mesle dukw ana a le a aà Daniyel a tsa. 19 I fata ya tsara ka, Əbay a mbə̀ɗa ba gər a təv mendze mekwere ŋgar. I huɗ həvəɗ ŋa ata ya ka, a niw mezəma dukw mezime. A həna ba ka, aà gər ŋgar ze məkəs, dite aka sle aà mendze are ɓav tsa. 20 I mekwede hedwe ŋa ana tsara ka, Əbay a hitse a mbulum, a mba aba tsəmma a da aka sləlak gà azil 21 I təv ana aka mendzèha bise nda sləlak a ka, a zal a Daniyel nda gà tuwa aà are, a gwa: Daniyel, mala meslire Mbulum ana mandzaŋa nda mesife ya, kər ana kə gewar meslire ndzer nda magəsa ahər ahəm a. Wànà Mbulum yak ata ana, aka sle mibe a aà kər aà gà azil a dər a. 22 I fata ya ka, Daniyel a ŋgamar aakara. « Kər Əbay dza a bəra a biybiy. 23 Haya Mbulum gà aka slərra gawla ŋgar a, aka handaka aka bazlam aà gà azil. Aɗaba tàa giŋ dukw ana ŋgwal ŋa tsiye tsa. I fata ya ka, Mbulum a ge sèrìye gà ka, Yàa ge duwa tsa. Ku mege ndaka tseke yak Əbay gà, Yàa gik bakal duwa tsidze.» 24 I fata ya ka, Əbay a rah nda maŋgayaba. Dite a vəl vatwa aà tə zlara Daniyel i sləlak a. I təv ana Daniyel a tsə̀lara iɗəm a tsara ka. Gà mburma ta pər ahər ka, gìnèh mbəlak duwa ihər tsa. Aɗaba ana aka gəs ahəm a Mbulum ŋgar nda gəzləŋ a. 25 I dəba ŋa ya, Əbay a vəl vatwa aà magasa gà mburma ana ta ma a bakal a Daniyel a. Tə dza aà tar a sləlak gà azil, akaba nda gà məkəs tar, dite nda gà ɓəza tar ŋa dze. Aha ŋana tə dzawa aaha aɗəm a tar a ka, gà azil ta katsawa tar aà gəza mbulum a, tseɓek tseɓek ta papaɗa tar nda atàsl ŋa dze, tàa ndze a bəɗ tsa. 26 I fata ya ka, Əbay Darius a wetseha wakita a gà mayahaba gər gà mburma tserdze. A gà na ika gà kwite ŋgiɗ pampam, dite ta fefile a gà ahəm ŋgiɗ pampam, tar gà mandza ya ŋa ika gər ahəɗ tserdze ya, a gwa: « Gə gər a gwa, mandza zay zay kurum masəkah! 27 Araha dukw ana i tsike a a gà mburma ana ika gà mekwere ana ika ahəɗ gà tserdze i kwere tar a, ta ge magəɗa nda mendzedzere ika miɗ Mbulum ana Daniyel a gəs ahər ahəm a tserdze. Ŋgat na Mbulum ana mandza ŋa nda mesife ya. A ndze a a bəra a biybiy. Ŋgat ka, Əbay aà biybiy, mekwere ŋgar ka, a ndive a tsa. 28 Ŋgat na a mbil a à kər a ya, dite a be a à kər a ya. A gewa gà dukw ana wura a sle à mege ŋa tsiye, nda gà dukw mene a mburma, i Mbulum i gər ŋa, dite ika gər ahəɗ asa mbaŋa. Ŋgat na a be a aà Daniyel i ahər gà azil a. 29 Daniyel a ŋgat batsah megemir ana ŋgwal ŋa ya, akahər ana Dariyus i Əbay ya, dite asa ka, akahər Seriyus ana ŋgat Əbay gà Perisiya ya.