Daniyel 7

Sunwa a da aka Daniyel nda gà dukw dala faɗ

1 Aka malahalah mive ana Baltasar a ne Əbay gà Babila ya ka, Sunwa a da aka Daniyel, ŋgat mahəna ŋa ika sləlah ŋgar, na dite a ŋgat a à gà dukw ata sunwa a da dər aaka ya. I dəba mendze zaakwa ya ka, a wetse gà dukw ana sunwa ŋgar ata a da dər aaka ya. 2 Daniyel a dzəba aà mifefile a gwa: « Yàa ŋgat a duwa i sunwa ya ndaavəɗ. « Araha himbiɗ a hitsere ika gà təv ana pampam faɗ i gəza mbulum a. A ɓazla aka ba a batsah duluv ata. 3 Gà bàba gà dukw dala ata faɗ a, tə tsalara i duluv ata ya, tar ka, pampam ti ndzìkeɗe ba tsidze. 4 Malahalah ŋana ka, kamala azil a, dite asa ka, gà gwezleviyek ihər kamala zləra ya. Akahər ana iye ihər i semete mba ya ka, tə ndzaha ihər gà gwezleviyek ŋgar a. Tə zla ŋgat a mbulum, ta hitse aà ŋgat aka ahəɗ nda sik ŋgar kamala mburma ya. Dite a ŋgat metsehe kamala mburma ya. 5 Ma sula dukw dala ata ka, a ndzikiɗ ba kamala dukw dala ana tə zalawar Urs a^ª A hitse aka tseke ŋgiɗ nda sik ŋgar ana a mbe a gwaya. A ndzək gà are mibiye gəzləŋ makər a bazlam a gəs nda zlir ŋgar. Ta və̀lar məpala ahəm aaha, hitse a mbulum tsukwaɗ, ka papəɗ slu aha hinne.

6 I dəba taŋa ya ka, i fər ikaba ya ka, i ŋgat a a dukw dala ŋgiɗ pam asa, a ndzikiɗ ba kamala də̀var a. Ŋgat mbaŋa ka, gà gwezleviyek gà ɗiyeŋ ihər faɗ ika dəba. Dite gà gər ikəka faɗ. Ta vəlar ndzəɗa aà makwara gər ahəɗ fit. 7 I dəba taŋa ya ka, i ndiɗik gər aà masamata gà dukw sunwa gà ana a petiŋ dər ndaavəɗ a. Ma faɗ dukw dala ata i ŋgatar a ka, ar ka, dukw magəɗa. Ndzəɗa ŋgar ka, pam aà gà dukw dala ŋgiɗ a. Gà slir ŋgar ka, gà bàba ŋa biy zara. Dukw ana aka le ahər tserdze ya ka, a sese a ikaba ya, dite a pepiɗeŋa. Na aka zeha biy mepepiɗe asa tsiye ka, a ɓele a aka nda sik ŋgar. Ŋgat ka, gə̀rgə̀r nda gà dukw dala ŋgiɗ aaha makər a, dite gà mbəkum aà gər kurwa. 8 I samata gà mbəkum ata ka, araha mbəkum ŋgiɗ a riŋ awiya ŋa a zləlara ndərah kəla ŋa ika magər gà naha ya. Dite mbəkum ata, a dzawa iɗəm aà gà mbəkum a makər. Mbəkum ata ka, gà are nda bazlam ihər kamala mburma ya, dite a tsikeye a dər ka, gà bazlam ana, marahaŋa biy magə̀la aà gər a . »

9 « Iye ihər aà semete a hiywe ka, tàa dzaya gà təv mendze gà Əbay a bəɗ. Wele duwa mandawal ŋa a dara a ndza aaka, petek ŋgar ana ikaba ya ka, a ndza herre kamala slewize ya. Gà ambəz ana i gər ŋgar a tekeɗe ka, a ndza kamala gasgas təmaŋ ana ta bara tizlzle lele ya. Təv mendze Əbay ŋgar ata ka, kamala arah akwa ya, dite gà sik ŋgar ŋa asa ka, kaɗawùrwùr, ta gis a ŋgarŋgar kamala zlir akwa ya. 10 Duluv akwa a dzəba aà mazlala ŋa ika miɗ wele ata mandawal ŋa ya. Gà ɓəzla meger megemir ŋgar ka, dəbuw dəbuw diŋ hinne ti ɗeme a ba tsa. Gà mburma ata dəbuw dəbuw diŋ ŋa ya ka, gà mehitse ya ŋa ika miɗ ŋgar. I dəba ŋa ya ka, gà ɓəzla mege seriye tə dara tə ndza a bəɗ, tar nda gà wakita aà tar mahəndəka ŋa ikaba ya. 11 Iye a riŋ aà məpəra ahər ŋa hiywe ka, aɗaba kəla mbəkum ata a riŋ ihər a ŋgileke a duwa hinne nda metsikeya gà bazlam ana marahaŋa nda aà magə̀la gər a. Akahər ana, iye ihər aà mepəra ahər ŋa ya ka, tàa kəɗ dukw dala məfaɗ ŋana. Ti dzeye à slu ba ŋgar ka nda meye ŋgat a akwa ŋgarŋgar a. 12 Gà asiŋ gà dukw dala ŋgiɗ aaha ka, tàa ndzək aà tar gà ndzəɗa tar a. Ama ti sle a à mendze nda mesife, i huɗ mendze zaakwa ya asa, haa tsikw a pat ana ti tike məpasla ahər ŋa a dze aɗəm a ya. 13 Iye a riŋ aà masamata gà dukw ana a petìŋ aba ndaavəɗ a hiywe. Araha i ŋgat a dukw duwa, a dere a ika magər gà hulɓukw ana aà gəza mbulum a, kamala mburma ya. A riŋ a de a a təv wele ata mandawal ŋa ya, dite tə laka ŋgat, aka miɗ ŋgar. 14 I fata ya ka, ta vəlar ndzəɗa nda mezlibe, dite ta vəlar mekwere Əbay a ahər. I dəba ŋa ya ka, gà mburma ana i gà mayahaba gər gà mburma ana tserdze ya, gà ahəɗ ana tserdze ya, dite ti tsike a gà ahəm ŋgiɗ pampam a tserdze ya, tə dzəba aà meger megemir. Ndzəɗa ŋgar ka, ndzəɗa mekwere ana a ndze a aà biybiy, dite a ndive a tsiye. Mekwere ŋgar ka, wura a sle a aà medzeye a dər asa tsidze . »

Məmayara iɗəm a gà dukw ana sunwa a da dər aaka Daniyel a

15 Iye Daniyel, arəv aka da aà iye ka hinne, na aka gər dukw ana i ŋgatar a. I fata ya ka, a dze aà iye magəɗa. 16 I sərəkaha a təv wele duwa a riŋ mehitse ŋa i fata, dite i wiz ahər: « Gà dukw ata tserdze ya ana tə sasar aà megweɗe ana la na nda ndzer a? » Wele ata a mìŋara iɗəm a dukw aaha ya: 17 A gwa: « Gà bàba gà dukw dala ata faɗ a, ta pàt, aà gà Əbay ana faɗ ti ta hitse a ɗa ka, i liwiŋ gà mburma ana ɗa ika gər ahəɗ a. 18 I dəba tar a ka, gà mayahaba gər gà mburma ana, ti ne gà tsəɗaŋŋa biy Mbulum ana i gər ŋa ya ka, ti ta ŋgete a mekwere ata, mekwere ata ka, a ndive tsa, dite a ndze a ka, aà biybiy.» 19 I dəba ŋa ya ka, i waya masəra ikaba aà dukw ana a pete aà dukw dala məfaɗ ŋa ata, ŋgat pam aà gà dukw dala aaha makər a. ŋgat ka, dukw magəɗa gà slir ŋgar ka, biy zara, dite gà gehir ŋgar tekeɗe ka, biy virzegene. Dukw ana aka le ahər tserdze ya ka, a sese a ikaba ya, dite a pepiɗe ŋa. Na aka zeha biy mipepiɗe asa tsiye ka, a ɓele a aka nda sik ŋgar. 20 I wiz asa mbaŋa, dukw ana a pete a aà gà mbəkum kurwa ŋa aaha aà gər dukw dala ata ya? A pete a ana aà Dukula na mbəkum ata a dzəba aà masləlara ya? dite a dzawa iɗəm aà gà mbəkum makər ŋa aaha ya. Mbəkum ata ka, gà are nda bazlam ihər, dite a tsikeye a dər ka, gà bazlam ana, marahaŋa biy magə̀la aà gər a . » Ki gweɗe a kərga a ŋgat ka, batsah ŋa, a za dər gà naha. 21 I təv ana iye a riŋ aà məpəra ahər a mba ya ka, mbəkum ata a riŋ a ge a guvəl aà mayahaba gər gà mburma ana gà tsəɗaŋŋa ŋa, ti ne gà biy Mbulum a. Dite ka, a riŋ a mbe a aà teriŋa. 22 Ama i fata ya ka, wele ata mandawal ŋa ya, a sərəkaha, a ge seriye a gà mayahaba gər gà mburma ana gà tsəɗaŋŋa, ti ne gà biy Mbulum ana i gər ŋa ya, i təv ana aka ndze akahər ŋa ya kuɗa ka, gà mburma Mbulum ana gà tsəɗaŋŋa ya, ti zle a mekwere ata. 23 Wele ata i wiz ahər duwa aà meɗifiŋ dər a ka, a gweɗiŋ: « Məfaɗ dukw dala ata a pete a ka, aà mekwere məfaɗ ana a dere a aka gər ahəɗ a, ŋgat ka, pam aà gà asiŋ a ya fit tserdze. Mekwere ata ka, a ti zim a gà dukw ana ɗa ika gər ahəɗ a fit tserdze. A ti sese a ikaba ya fit tserdze, dite a ɓele a aka nda sik. 24 Gà mbəkum ata kurwa ya, ta pete a ka, aà gà Əbay kurwa mbaŋa. Ti ta ge a ika gər gà mekwere ata ilik nda ilik. Ma kurwa gəra ilik Əbay ka, ŋgat ka, a ti ndzikìɗe a ba gà asiŋ a aaha tsa. A zle a mekwere a ahər ŋgar, dite a dzewe a iɗəm aà gà Əbay, makər ŋa aaha ya. 25 A ti tsike a dukw ana ŋgwal ŋa tsiye, aà Mbulum ana i gər ŋa ya, dite a sewèrè a are a gà mayahaba gər gà mburma ana ti ne gà biy ŋgar a. A ti dzele a aà məmbəɗa aà gà pat megirive nda məpala ahəm gà mayahaba gər gà mburma Mbulum ana gà tsəɗaŋŋa ya. Gà mburma ata ka, ti ta ge a ka, i huɗ mekwere ŋgar, i huɗ gà mendzena mive makər nda mezehe ŋa ya 26 I dəba ŋa ya ka, seriye a ta ge a ba i mbulum i gər ŋa. Ti ti zle a ihər ndzəɗa aà mekwere Əbay ata ya. Kamala taŋa ya na a ti dzeye kweleŋ, dite a ta ge a riŋ asa tsiye. 27 I dəba ŋa ya, Mbulum ana i gər ŋa ya, a ta vile a ndzəɗa a gà mburma ana ti ne gà biy ŋgar a, aà ta kwara. Ti ta kwere a gà Əbay ana ika gər ahəɗ a tserdze, nda ndzəɗa ana batsah ŋa ya. Ndzəɗa mekwere gà mburma ata a ti ndze a ka, aà biybiy, gà Əbay ana ika gər ahəɗ a tserdze ya, ti ta gise a ahər a ahəm, ti ta gere a megemir . » 28 Araha na dukw ana i ŋgatar i sunwa gà ata ya. Ga bazlam ata a ndəv ka, a faha. Iye Daniyel, nda ndzer ka, magəɗa aka gəs iye ka, hinne na i madzala gà gər gà ya. Iye Daniyel, arəv aka da aà iye ka hinne, na aka gər dukw ana i ŋgatar a. I fata ya ka, a dze aà iye magəɗa, yemere gà a mbəɗ aba, sakw sakw herre, ama i kaslawa gà dukw ata i gə̀zlèŋ gà hiywe, Yàa tsik a wura ilik tsidze.