Daniyel 8

Daniyel a ŋgata a gà hagwala nda vugul ta ge a maàga i sunwa ya,

1 Aka mandəvandəv məmakər mive ana Baltasar a ge ika mekwere ya ka, iye Daniyel, sunwa a da aka iye asa, kamala ana a da aka iye malahalah ŋa ya. 2 Araha na dukw ana i ŋgatar i sunwa ya. Iye i batsah kwite Susa, ika ahəɗ Elam aà guva dulwa Ulay. 3 I fata ya ka, i zla gər a mbulum, i pər ikaba ya ə̀bba ka, i ŋgata a hagwala a riŋ mehitse ŋa aà guva dulwa. Gà mbəkum aà gər gà bàba ŋa sula. Ama biy ŋgiɗ ana a sləl masula ŋa ya, ŋgat ka, batsah ŋa ika biy ŋgiɗ aaha ya. 4 I ŋgata a hagwala a riŋ a ŋgwiɗeye a ba, aà malakaya mbəkum aka gà tseke pàt ana a dəɗawa aɗəm a, aka tseke are yam dite aka tseke gular asa. Dukw dala ŋgiɗ a riŋ ilik, na ndzəɗa ihər, a ŋgirizler a a bəɗ a tsa. Wura a sle a aà mibe a aà misle ŋgiɗ i ndzəɗa ahər ŋgar a tsa. A ge be a ka, dukw ana a dar a gər a. Dite ndzəɗa ŋgar a riŋ a sikehe a aka miɗ aka miɗ. 5 Akahər ana iye a riŋ ihər i dzele a gà gər aka dukw ana i ŋgatar a ka, vugul a dara ika tseke pàt ana a dəɗawa a ɗəm a. A ləm a aka gər ahəɗ fit nda mivele bise tsara, aka ləm aà ahəɗ tsa. vugul ata ka, mbəkum ana ihər a ka, kamala dukw mene aà mburma ya, ika magər gà are. 6 vugul ata a riŋ a de a ndara a təv hagwala ata, mbəkum ihər sula i ŋgatar aà guva dulwa ata ya. A ŋgwìɗ ba ndara a təv hagwala ata sah nda ndzəɗa ŋgar fit. 7 I ŋgatar a ndzeha a təv hagwala ata. Duwa aka tsəɓar aà ŋgat, a lakar nda ndzəɗa, a haɓar aà gà mbəkum sula. Hagwala aaha a sle aà meŋgirizler a vatwa asa tsa. I dəba ŋa ya, vugul ata a ye ŋgat a bəɗ, dite a ɓala aaka nda sik. Wura a sle aà mibe a à hagwala ata i ndzəɗa ahər ŋgar a tsa. 8 Ndzəɗa vugul a səkah aka miɗ aka miɗ. Ama akahər ana ndzəɗa ŋgar ata a zaka aà mesikehe hinne ya ka, batsah mbəkum ŋgar ata a həɓ. I təv ata mbəkum ata a həɓ iɗəm a ka, gà asiŋ gà mbəkum ŋgiɗ faɗ gà ndzəɗa ŋa, tə ndzəba aà meslilera, ta pər aka gà tseke gà ahəɗ ana faɗ a. 9 Mbəkum ŋgiɗ kəla ŋa, a sləlara aà mbəkum ŋgiɗ a ilik i liwiŋ gà mbəkum ata faɗ, aà gər vugul ata ya. A gəl ba hinne ndaka tseke gular, nda kadwa, dite ndaka tseke ahəɗ ana matsahəna ŋa hinne ya. 10 Mbəkum ata a gəl ba, a ɗe tsikw aà gà mburma ana mandza ŋa i mbulum i gər ŋa ya. A dzawayara aà gà asiŋa ika magər tar a aka ahəɗ a, nda gà asiŋ gà mawusawus hinne. Dite a ɓala aaka nda sik biriɗek biriɗek kweleŋ. 11 Mbəkum ata a dzəba aà mege maàga, ku mege nda mala aka miɗ gà mburma ana mandza ŋa i mbulum i gər ŋa ya. A mbete aà bazlam məvəl a dukw taf ana kəla wur gà pat ta vəlawa a Mbulum a. I dəba ŋa ya, a ne dukw zlaŋgatsak aà təv tsəɗaŋŋa ŋana. 12 Gà asiŋ gà mburma ana tar mandza ŋa i mbulum i gər ŋa ya ka, tàa ge dukw ana ŋgwal ŋa tsiye, na nda mazàzàma mbəkum ata ya. Asa mbaŋa ka, məvəla dukw taf ana kəla wur gà pat a, a dəɗar akahər ŋgar. A ye mege dukw ana ndzer a dala, dite dukw ana a ge a tserdze ya ka, a ndive a nda zay. 13 I dəba ŋa ya ka, i tsaraka gawla mbulum a fefiliŋ. Gawla mbulum ŋgiɗ ilik a wiz ahər: « Gà dukw aaha kə ŋgatar i sunwa ya ana, a ndze a na hile? Tsikw a ŋga, na məvəla dukw taf ana kəla wur gà pàt a, a ta ge a a riŋ tsiye ? Gà mege gà dukw ana gà ŋgwal ŋa tsiye a mbeteye a dər ana a ndze a ana mehinne ndaw? A ndze a ana hile, na təv tsəɗaŋŋa ata nda gà mburma ana mandza ŋa i Mbulum i gər ŋa ti ta ɓele aka ter a ya? 14 Malahalah gawla Mbulum ata a gwaɗar aaka, a da dər ka, mehinne dəduw sula nda dərməka makər gà hawa nda mekwèɗe a de a iɗəm a dzekwiŋ. I dəba ŋa ya kuɗa na, təv tsəɗaŋŋa ata biy Mbulum a ta me a dər aà mege dər megemir a. 15 Iye, Daniyel, i dzəba aà madzala gà gər aà masəra dukw ana sunwa ata a da dər aka iye. I təv ana iye a riŋ ihər i dzele a ya ka, i ŋgata a dukw duwa a ndzikiɗ ba mburma, a dara a hitse aka miɗ gà. 16 I tsaraka meɗe dukw duwa a ɗera i dulwa Ulay a. A wideya a gwa: « Gabriyel, ɗifer a dukw ata Daniyel a ŋgatar a.» 17 I fata ya ka, Gabriyel a sərəkaha a təv ana iye iɗəm mehitse ŋa ya. Magəɗa a giŋ hinne, i dəba ŋa ya, i ye ba a bəɗ, ndup yemere aka ahəɗ. Ama a gweɗiŋ, Daniyel, kər ka, mburma pəra, tsaraka! Dukw aha kə ŋgatar i sunwa ya, sər dər, a ɗif a ka, à mandəvandəv gər ahəɗ . » 18 I təv ana Gabriyel a riŋ a fefiliŋa ya ka, ndùpppa yemere gà ka, ika ahəɗ, a ləm aà iye dite a hitse aà iye a mbulum dzeŋ, a təv ata iye iɗəm a. 19 I dəba ŋa ya a gweɗiŋ: « I ti ɗifeke a à dukw ana a ti ndzere a akahər məpasla ahər ana ti tike ya. Ndeɗime na matsəɓatsəɓ Mbulum a ndive a ya. 20 Hagwala ata kə ŋgatar mbəkum ihər sula ya ka, a ɗife a ka, aà mekwere gà Mediya nda Perisiya. 21 vugul ata ka, mekwere Girek. Batsah mbəkum ana ika magər gà are ŋgar a, a ɗife a ka, aà malahalah Əbay. 22 I təv ana mbəkum ata a həɓ iɗəm a ka, gà asiŋ gà mbəkum ŋgiɗ faɗ tə sləlara a təv ata ya. Gà taŋa ka, gà mekwere ana faɗ, ti ta zle a təv mendze mekwere Əbay malahalah ŋa aaha ya. Ama ti ta ne a, gà ɓəzla ndzəɗa kamala ŋgat a tsa. 23 I təv ana gà mekwere ata a riŋ a bəra asa tsiye, i təv ana gà mburma gà ŋgwal ŋa tsa, tàa rah aà mege bakal tar aka gər ahəɗ a ka, Əbay ŋgiɗ a hitseriŋ a. Maràha nda magəla aà gər, wirwir iba hinne aà məbana dər gà mburma ŋgiɗ. 24 Ndzəɗa ŋgar a ti sikehe a à hinne, ama ndzəɗa ata a dere a ka, i ba ŋgar a tsa. A te mbezleye aka ba aà gà duwa tserdze birim birim nda ndzəɗa ŋgar ata a gewa dər dukw mene aà mburma ya. Dukw ana a waya a ge a tserdze ya ka, a ŋgete a mege gara. A betse a gà ɓəzla ndzəɗa. Asa ka, a betse a gà mayaha ba gà mburma ana ti ne gà biy Mbulum a. 25 A ti rehe a nda mege wirwir hinne, aɗaba taŋa na, a te ngete a vatwa aà məbana gà misle ŋgiɗ a. I huɗ magəla à gər ŋgar ata ya ka, a betse a gà mburma ana ta gweɗe a ka, mə̀r mandza ba ŋa zay ya. A hitse a aà mege guvəl aà batsah Əbay ana ika gər gà Əbay ya tserdze. Akahər ŋa ata kuɗa na, a dzeye ya ka, a behe a ba aà ahər a wura tsiye. 26 Araha na məmàra iɗəm a dukw ana ndzer ŋa ya, a dukw ana kə ŋgatar aka gər gà hawa nda mekwede ya. Ama ka, ka ta fafəl aka gər dukw sunwa aaha kinehe tsa. I dəba ŋa ya, gà dukw ata ti tsik ahər a te geye a ba ya ka, aka miɗ mba diriŋ . » 27 Akahər ata kuɗa na iye Daniyel, ndzəɗa a ndəv aà iye ya, dite i dəba ŋa ya, i dəɗ a dukw məməta, mehinne diŋ. I təv ana i mbəl a ka, i dzəba aà megemir Əbay. Sunwa ata a riŋ hiywe a wisiŋa aà gər, aɗaba ana i sle a aà matsaraka ŋa tsiye.