Daniyel 9

Daniyel a hama a Mbulum

1-2 Dariyus kəla Ahaswerus gà gwala gà Mediya, a ne Əbay gà Babila. Aka malahalah mive ana ŋgat Əbay ya ka, iye Daniyel, i dzeŋge wakita ana pam tsəɗaŋŋa biy Mbulum a. I fata ya ka, i tsaraka zlirmbə̀ɗ mifefile ana BATSAH kwa ŋa a tsik a mala məmà à bazlam Mbulum Yeremiya ya. A fafəl ka, aà maraha mive dzik təsəla ana kwite Yeruzalem a ti ndze a məmbazla ŋa ya. 3 I dzəba aà mege ndəra, i dza akaba petek matuwa məməta, i fata ya ka, i ndaya ba ahəɗ a gər, i dəba ŋa ya i mbəɗ aàba a təv batsah gà ŋa Mbulum, aà mahamar nda meger kamkam. 4 Iye Daniyel, i hamar a BATSAH kwa ŋa Mbulum gà, aà məpàtar à bakal a gà mburma gà: « Da Batsah gà ŋa, Mbulum ana batsah ŋa ika gər gà duwa tserdze biy megik magəɗa ya. Kər ki kesle a magəsa masla ana kə gəs nda gà na ta həna a gər a bəɗ a gà məpala ahəm ka, dite ki gis a ahəm aà gà na ta waya kər a. 5 Maa niw magəsa aà kər ahəm, Maa ge dukw ana ŋgwal ŋa tsiye. Mər ka, gà ɓəzla bakal, maa tsalaba aà segeme a gər nda təv yak, maa mbəɗ dəba a gà məpala ahəm yak, nda gà dukw ana, kà hitse dər aà mezezeme ya. 6 Maa dza zləm à mifefile gà ɓəzla meslire yak, nda gà ɓəzla məma aà guma yak tsa. Tàa mà a bazlam yak a gà Əbay mə̀r, a gà ɓəzla aka miɗ mə̀r, a gà bàba gà tsir mə̀r dite a gà mburma ana ti ne gà biy yak a tserdze fit. 7 A kər BATSAH kwa ŋa, kər ka, mala ndzer, dite mə̀r ka, nda hwarwa ŋa, na ika miɗ yak a. Haya kaɗəŋ, mbakum ka, gà mburma ana tar mandza ŋa i Yeruzalem a, nda gà mburma ana ika mekwere gà Yahuda ya tserdze ka, tar ka nda hwarwa ŋa. Dite asa ka, nda gà Isərayel tserdze, gà na tar bise ya, nda gà na tar diriŋ a. I fata ya ka, gà mburma hinne na ika magər gà mayahaba gər gà mburma mə̀r, tar gà mandzaya ŋa zaakwa zaakwa ika gà ahəɗ ana kà dalawa aɗəm tar a, aɗaba ana tàa gəs aà kər ahəm tsiye. 8 Haya BATSAH kwa ŋa, kamala gà bàba gà tsir mə̀r a ka, mə̀r mandzaŋa ka, nda hwarwa ŋa na ika miɗ yak a. Mər, nda gà Əbay mèr, nda gà ɓəzla aka miɗ mə̀r ka, aɗaba maa ge bakal aka gər yak. 9 Mər ŋa maa tsalaba aà segeme aka gər yak, Batsah mə̀r ŋa Mbulum mə̀r, dite tsaatsa nda mawaya gà mburma yak ka, mìi ŋgete ba məpəla a bakal. 10 Maa niw mandza zləm a gà mifefile yak, BATSAH kwa ŋa Mbulum mə̀r. Maa gəs ahəm aà gà məpala ahəm yak ana kà vəl a mə̀r nda ahər gà ɓəzla meslire yak ana, ti ne gà ɓəzla məma aà guma yak a tsa. 11 Gà mayahaba gər gà Isərayel tserdze ka, tàa niw magəsa ahəm aà məpala ahəm yak. Tàa sasək i təv yak a diriŋ, ta waya mandza zləm a mesinike a a dukw yak tsa. Maa ge bakal aka gər yak Mbulum mə̀r, aɗaba taŋa na mezelme ana mewetse ŋa i huɗ gà wakita məpala ahəm Musa mala meslire yak, a məmər a gər a. 12 Kà rah ka, a bazlam ana kà tsik, aka gər mə̀r, dite nda gà ɓəzla makwara ahəɗ mə̀r ana ta kwere a mə̀r a. Kàa slərra gà bàba mesewere are aka gər mə̀r a Yeruzalem a. Wura aka ŋgata medzibe mesewere are kamala taŋa ya ilik tsa na ku mege i ŋga ika gər ahəɗ a. 13 Gà mesewere are ata tserdze a le aà mə̀r ka, kamala ana mewetse ŋa a riŋ, i huɗ wakita məpala ahəm Musa ya. Dite mə̀r kuɗa ka, BATSAH kwa ŋa Mbulum mə̀r, maa gək kamkam aà menikiɗe a aà matsəɓatsəɓ yak tsa, maa sərək vatwa a mege dukw bakal mə̀r ata tsa. Aka mətsa a mə̀r gər na dukw ana kàa gwa, ki ge a ka, ki ge nda ndzer kaɗəŋ a. 14 Aɗaba taŋa, na ka zla madzala gà gər aà mazla aka mə̀r ara gà mesewere are ata ya. Kamala taŋa ya, BATSAH kwa ŋa Mbulum mə̀r, kə̀r ka, mala ndzer na i təv gà megemir yak ana ki ge a tserdze ya, ama maa dzak aaka zləm tsa. 15 Kinehe ka, Batsah mə̀r ŋa Mbulum mə̀r, nda ndzəɗa yak na kà ndzəkara gà mburma yak ika ahəɗ Eziptiy a. Agəra taŋa na zləm a ɗe hinne haa mbakum a. Ama mə̀r ka, maa niw magəsa aà kər a ahəm, mì ge ka, dukw ana ŋgwal ŋa tsiye. 16 Batsah mə̀r ŋa, kər ihər ki pete a à mə̀r a ka, aà ndzer yak ana ki gewa ya hiywe, kinehe ka, miyak aà matsəɓatsəɓ yak ana hinne ki ge aka gər Yeruzalem huɗ kwite yak ana tsəɗaŋŋa pam biy yak a. Kamala taŋa ya, agəra gà bakal mə̀r nda bakal gà bàba gà tsir mə̀r a ka, gà na tserdze tə lawara mə̀r a ka, ti ndeveye a a kwite Yeruzalem nda gà mburma yak. 17 Ama kinehe kuɗa ka, batsah mə̀r ŋa Mbulum mə̀r, dza zləm a gà meheme nda gà mewize ana, i wize a aà kər a nda kamkam a. Kər nda gər yak ŋa ka, batsah mə̀r ŋa, pər aà təv mendze yak ana tsəɗaŋŋa məmbazla ŋa ya, nda are mendze are tsehe. 18 Dzar zləm nda metsehe Mbulum gà, həndə̀k ikaba are yak a, kà pər aà kwite mə̀r ana məmbazla ŋa kweleŋ a, huɗ kwite ata ka, biy yak. I təv ana mì patawak aà gà mewize mə̀r a ka, mì patawak dər kamala taŋa ya ka, aɗaba gà megemir mə̀r ana mìi gewa ya ka ndzer a tsa. Ama aɗaba meweye yak ana kà waya mə̀r a ka, a ndive a tsa. 19 Batsah mə̀r ŋa, dza mə̀r aaka zləm. Batsah mə̀r ŋa, pəl a mə̀r aà bakal mə̀r. Batsah mə̀r ŋa, dza mə̀r aaka zləm nda metsehe, aɗaba kər ŋa, Mbulum gà, ge aaka megemir tsəmma, aka gər kwite aaha a ne biy yak a, nda gà mburma ana ti ne gà biy yak a .»

Gawla Mbulum Gabriyel a fafəl aka gər dukw ana makaha ŋa, i huɗ mive dzik təsəla ya

20 Akahər ana iye a riŋ ihər i heme a mba ya ka, i ndiɗik gər aà məpəla aà bakal nda məpəla aà bakal gà mburma gà, gà Isərayel. I hama a BATSAH kwa ŋa Mbulum gà, aka gər kwite ana tsəɗaŋŋa pam biy ŋgar a. 21 Daga ana iye a riŋ aà meheme mba ya ka, Gawla Mbulum ana tə zalar Gabriyel a, Yàa mbər meŋgeter i huɗ sunwa ana a da aka iye, a da a dəba ya. A sərəkara a təv gà ya ka, a bera mibe tsəmma tsara. Taŋa ka, aka ndze ahər məvəla dukw taf ana ta vəlawa a Mbulum ndaàwa ya. 22 A miŋara iɗəm aà gà dukw ata ya, a gwa: « Daniyel, i dara kinehe ka, aà məvəlak aàba ndzəɗa, aà masəra gà dukw aaha. 23 I təv ana kà ndzəba aà mahama a Mbulum a ka, mifefile aka dara i təv ngar a, dite i dara ka, aà meɗifek dər ŋa, aɗaba Mbulum a waya kər. Tsaraka a zləm lele a dukw ana i tsikik a ya, aka gər dukw ana kàa mbər meŋgeter i huɗ sunwa ya ya. 24 Mbulum aka mbər metike məpasla ahər mive dzik təsəla haa sik təsəla, aka gər gà mburma yak nda huɗ kwite ana tsəɗaŋŋa pam biy Mbulum a. Ahər ata a ndze a aɗəm a ya ka, a ge a ŋgulum ka, biy bakal ana a hitse a ya. Na dite bakal a ta ge a riŋ asa tsiye. Aà dite ka, ta ŋgete a məpəla aà bakal a. Ahər ata a ge a ŋgulum asa ka, aɗaba ndzer Mbulum ana a ta pete a aàba ya, dite asa ka, gà sunwa nda gà bazlam gà ɓəzla məma guma Mbulum a ti ne a ndzer ŋa kuɗa. Aà dite asa ka, gà təv ata tsəɗaŋŋa ndeyndey i ga mbulum batsah ŋa ata ya, ta me a dər aka mandza tsəɗaŋŋa pam biy Mbulum ndeyndey asa. 25 Araha na dukw ana ki sir a dər ndzer, dite ki tsereke a lele ya: Daga i huɗ mendzena a da a dəba ya, tàa mbər metsike a aba bazlam ŋa, aka gər məmbə̀ɗara gər gà mburma ana i kwite medwiŋè ya, nda məma aà kwite Yeruzalem aà mbulum. A gər a pat ata ya ka, haa tsikw aà madara Əbay ana Mbulum a zla ya, gà mendze a riŋ gər gər təsəla, mive təsəla təsəla. I dəba ŋa ya asa ka, gà mendze a riŋ gər gər dzik ndilik gər ŋgar sula, mive təsəla təsəla, akahər ata kuɗa ka, gà mburma ana tə ndzək tar aka ahəɗ meduŋè ya, ta mbiɗere a gər a, ta me a à mazlazla huɗ gà kwite nda gà zlagam ŋa aà mbulum. Ama ka, gà mendze ata ti ta ge a ka, gà mawùraba ŋa. 26 Aka mandəvandəv gà mendze ata dzik ndilik gər sula ya ka, ta kiɗe a wele ana ta mbə̀ɗar mal a gər a. Dite wura a geye a ikəka ya tsa. I dəba ŋgar a ka, Əbay ŋgiɗ a dere a nda gà sliwdze ŋgar a, aà məmbazla aà kwite ata nda təv ana tsəɗaŋŋa biy Mbulum a. Tsaatsa ka, Əbay ata a ti dzeye ka, Mbulum na a lekere a i huɗ matsəɓatsəɓ ŋgar a. Ama haa a təv məməta ŋgar, a ge a guvəl, a ta mbezleye a aà gà dukw ata tserdze ya, kamala ana tə dzala ahər piŋŋe a ge ba ya. 27 Mandəvandəv gà mendze a ndze aɗəm, ar ka, mive təsəla hiywe, akahər ata kuɗa ka, Əbay ata a ti tike a balaari aà gà mburma hinne aà mege dukw ana ta waya aà mege tsiye. I dəba mive makər nda mezehe ŋa ya ka, a hitse a à dukw ana ta kəɗawa a Mbulum , nda məvəlar dukw taf a. Wele ata mala medzeye a à duwa ya ka, a ge a gà dukw bakal ŋgar ata ŋgwal ŋa tsiye, bise ŋa tsara. A ndze a tsikw aà na ŋgat ŋa, a dzeye a nda gər ŋgar kamala ana tàa mbər metsike ahər a.