Daniyel 10

1 Aka mive məmakər ŋana Seriyus ŋgat Əbay gà Perisiya ya ka, Daniyel ana tə zalawar Beltasar a, Mbulum a fafəlar. Wele ata a màr ka, aà gà dukw ana a ta ge a ba ndzer gà bàba ŋa, gà mawùraba ŋa ya. Daniyel a dzala aaka gà gər hinne, dite a tsaraka gà zlərmbə̀ɗ ŋana tə tsikar a ka, agəra sunwa ŋgar ata. 2 akahər ata kuɗa ka, iye Daniyel, i ndza nda gà tuwa i huɗ kwaskwa makər a. 3 I huɗ gà mendze ata ya ka, Yàa zəm ŋgwal dukw mezime duwa tsa. Yàa papəɗ slu tsa, Yàa sa guzum tsa, dite i zliɗewa ambəz gà ɓav tsa. 4 I huɗ malahalah kiye ata, nda mehinne dzik səla gəra faɗ a ka, iye ka, aà guva batsah duluv ana tə zalar Tigìr a. 5 I zla gər aà mbulum, i həndə̀k ikaba are ya ka, i ŋgata a mburma aka dza akaba gà petek ana ta ŋgar nda zlewize kìliɗ kìlfiɗ ŋana a ndza tizlzle herre ya. Madana ba ŋa, nda kanda gura ana za iɗəm tsiye, tiwlik dəmkul. 6 Kamala taŋa ya, ba ŋgar a ndzikiɗ ba ka, kur ana tə zalar kirisulit a. Yemere ŋgar a dəv ka, kamala mewitiɗe mbulum a. Gà are ŋgar ti ndzikiɗ ba ka, nda gà tektsel ana məvata ŋa ya. Gà ahər ŋgar nda gà sik ŋgar, tə dəv kamala ndzemde məvə̀ɗa kur siŋgwe ana mendirìkisle ŋa ya. Gà bazlam ŋgar ana a fefile ya ka, a ɗe dèɗiɗɗè kamala gà mayaha gà mburma ana hinne ya. 7 Iye Daniyel, iye ilik aà gər gà na i ŋgat a a wele ata a petiŋ aba ya. Gà mburma ana mə̀r akaba dze ya ka, tàa ŋgat a a duwa tsa, ku mege kamala taŋa ya tekeɗe ka, tàa ge magəɗa hinne, tàa təz, tàa kaha ba. 8 I zehe ka, ilik aà gər gà, na i fər a aà dukw ata i ŋgatar i sunwa kamala dukw mene à mburma ya. Gà ndzəɗa ana i ba gà ya ilik tar a riŋ asa tsa, yemere gà aka mbəɗ aàba aka iye herre, ndzəɗa aka ndiviŋara i ba ya, guzlàɓ. 9 I tsara ka biye ɗa mefefile wele ata. I təv ana i tsaraka gà mefefile ŋgar ata ya ka, a ndzək aà iye metsehe ya, dite i dəɗ a bəɗ ndup yemere aka ahəɗ. 10 I fata ya ka, ahər a ləm aà iye, a gəs dər iye, akahər ana iye riŋ i medzedzere ya, a kirik a à iye, aka gà gurmits gà nda gà ahər gà. 11 I fata ya ka, wele ata a gweɗiŋ: « Daniyel, kər ana Mbulum a waya kər a, mə̀ba aà ndzəɗa aà kà tsara ka gà bazlam ana i tsikike a ya. Hitse a aà mbulum, aɗaba tə slərra iye ka, a təv yak a, kinehe.» I təv ana i tsaraka taŋa ya ka, i hitse a aà mbulum nda gà medzedzere zlaɓzlaɓ. 12 A gweɗiŋ asa, ki ge magəɗa tsa, Daniyel! Kamala taŋa ya, na ka waya aà matsara dukw ana aka mbər mede a dəba ya. A gər taŋa ka, kàa nikiɗe aba yak ika miɗ Mbulum. Aɗaba taŋa daga aà malahalah pat mandzahərba ŋa ya ka, Mbulum aka tsaraka meheme yak, aɗaba taŋa na i dara aà məmàk aà gà bazlam ŋa ya. 13 Ama gawla Mbulum ana a kesle a mekwere gà Perisiya ya, aka dzəba aà mege a aà ye maàga i huɗ mehinne dzik səla gəra ilik a. I fata ya ka Mikayel ana ilik batsah ŋa ika magər gà gawla Mbulum a, a dara aà mazlaka iye. Akahər ŋa ata kuɗa ka, iye a riŋ mandza ŋa i tsaka gà Əbay gà Perisiya. 14 I fata ya i dara kinehe kuɗa ka, aà meɗifek aà dukw ana a le a aà gà mayahaba gər gà mburma yak mba ya. Haya araha sunwa ŋgiɗ naha, na aka gər gà pat ata ti dere a ya.» 15 I təv ana a riŋ ihər a fefiliŋ a ya ka, i fər ndara aka ahəɗ, dite i sle aà mifèfiler aaka bazlam ilik tsidze. 16 Ama araha i ŋgat a a dukw duwa a ndzikiɗ ba mburma, a ləm aà bazlam gà, i fata ya ka, i sle a aaka mahəndəka ika bazlam a, dite aà mifefile kuɗa. I gwaɗa a wele ana mehitse ŋa ika miɗ gà ya: « Batsah gà ŋa, agəra sunwa aaha ka, aka wìsiŋ aà gər ka, hinne, aka zle a à iye ndzəɗa ya. 17 Iye ka, i sle duwa tsa, dite iye kinehe ka, ndzəɗa gà a riŋ asa tsa, ku mege mesife tekeɗe ya, dite ana meme na i sle a aà mifefile a mburma kamala kər aaha ya Batsah gà ŋa? » 18 I fata ya tsara ka, wele ana a ndzikiɗ ba mburma ya, a mà aka maləm a aà iye asa, aà mimiŋ aba aà ndzəɗa. 19 I dəba ŋa ya, wele ata gweɗiŋ: « Kər ana, Mbulum a waya kər a, ki ge magəɗa tsa! Ndza ba nda zay, arəv mada aà kər a tsa. Gà ndzəɗa yak ta màk aba! » I təv ana a riŋ a fefiliŋ a ya ka, gà ndzəɗa gà ta meyiŋara a ba ya, dite i gwa: « Batsah gà ŋa, ki sle a aà mifefiliŋ a tsik kuɗa, aɗaba kàa meyiŋara aà gà ndzəɗa à ba ya. 20-21 I fata ya ka, a wiz aà iye kuɗa: « Wànà kà sər ana aɗaba la na i dara a təv yak a? I dara ka, aà memek a dukw ana mewetse ŋa a riŋ i huɗ wakita ndzer a. Tsaatsa ka, mìi ta ge a maàga hiywe nda gawla Mbulum ana a kesle a gà Perisiya ya. Akahər ana iye ihər i de a a fata ya ka, Gawla Mbulum ana a kaslawa gà Girek a a ta ndzèhiŋa. Dite wura a zlek a iye aà mege maàga nda gà ɓəzla mene are gà ata sula ya tsa, say Mikayel Gawla Mbulum ana a kesle a gà Isərayel a na a zlek a iye ya.