Daniyel 11

Masula mandəvandəv sunwa Daniyel

1 I fata ya ka, wele ata a ndzikiɗ ba mburma ya ka, a gwa: iye nda gər gà ŋa, Yàa zlak gawla mbulum Mikayel, dite Yàa və̀lar aba ndzəɗa i malahalah mive ana Dariyus gà Mediya a ne Əbay a. 2 Kinehe kuɗa ka, i tsikik a dukw ana a ti ndzera ika miɗ mba, ndzer parsa iɗəm tsiye: « Gà Əbay makər, ti ta deyere a, ilik nda ilik aà makwara gà Perisiya. Ma faɗ ŋa a dere a i dəba ŋa ya, limana ŋgar a ti ze a gà naha tserdze ya. I təv ana limana ŋgar ata aka vəlar ndzəɗa ya ka, a yeheye a gà vatwa ŋgiɗ pampam aà mege guvəl nda gà Girek. 3 Ama Əbay ŋgiɗ a riŋ a dere a a kwere a gà Girek, ŋgat ka mala mege guvəl. A kwere a nda ndzəɗa hinne, na dite a ge a ka, dukw ana gəzləŋ ŋgar a waya ya. 4 Tsaatsa ka, i təv ana mekwere ŋgar aka ndza a bəɗ lele ya ka. Mekwere ŋgar ata a mbezle a, a sese a ba ikaba ya, təv pampam faɗ, aka gà tseke gər ahəɗ ana faɗ a. Ama kəla ka, ika magər gà ɓəza ŋgar a tsa, na ti te zle a təv mendze ŋgar a. I fata ya ka, mekwere ata ti ti dzeye a aba ka, ika magər gà misle ŋgiɗ. Ama mekwere tar ata a ta ŋgete a ndzəɗa kamala biy ŋgar ata ya tsa mbaŋa. 5 Əbay ana a ta kwere a ndaka tseke gular ka, a ne a mala ndzəɗa. Ama ilik i liwiŋ gà bàba gà sliwdze ŋgar a, a ta ŋgete a ndzəɗa a ze a biy ŋgar. Dite ndzəɗa mekwere ŋgar ata, a kwere a ya ka, a sikehe a a ze a biy ŋgar. 6 I dəba gà mive zaakwa ya ka, ti te dze akaba ahəm. Dəm Əbay ana ika tseke gular a, ti te zle a ba nda Əbay ana ika tseke are yam a, aà mene ndzer aà mandza akaba ahəm tar ata. Ama dəm ata ka, a sle a aà mekesle ndzəɗa mekwere tar ata tsa. Zal ŋgar ŋa, nda gər ŋgar tekeɗe ka, a ndze a aà bəra tsa, dite gà ɓəza tar tekeɗe ti ndze a aà bəra ɓav tsa. Ŋgat ŋa tekeɗe ti ta dzeye akaba fit nda gà mburma ana tə lawara tar a, nda gà tsir ŋgar, nda gà zal ŋgar a ahər ŋa ilik mbaŋa. 7 Ama wura ilik i gwala ŋgar a a zle a təv mendze dede ŋgar, ŋgat a dere a a sle a za a gà sliwdze ana ndaka tseke are yam a, i huɗ gà kwite tar ata malawaraŋa tits lele ya. A ge a guvəl aà gà sliwdze ata dite a mbe a aà teriŋa. 8 A ndzikere a gà dukw ana ta və̀ɗ nda ahər a, ti ne dər gà mbulum tar, nda gà dukw maslawa ana gà ŋgwal ŋa hinne, ta və̀ɗ nda ndzemde məvə̀ɗa kur siŋgwe, dite nda gura ya, ta gewa dər megemir à gà mbulum tar ata ika ahəɗ ata ya, ara a Ezipt ya, kamala gà limana ana tə ndzəkawa ika miɗ guvəl a. I dəba ŋa ya, i huɗ gà mive diŋ a ka, a sle aà meger duwa a Əbay ata ndaka tseke are yam a asa tsa. 9 Tsaatsa ka, Əbay ana ika tseke are yam a, a dere a ge a guvəl aà Əbay ana ndaka tseke gular a, i dəba ŋa ya, a mbə̀ɗebe a gər aka ahəɗ ŋgar. 10 Gà ɓəza Əbay ana ika tseke are yam a, ta hedzele a ba aà mege guvəl, dite ti yaha gər a gà mayahaba gər gà sliwdze hinne. Ilik ŋa ika magər tar a, a de aà guvəl. Nda gà sliwdze ŋgar ata ka, a de a ika kwiye ahəɗ tar a, kamala maazaw ana a rah a dulwa ya. Nda məmbə̀ɗ a gər a kwite ŋgar ata ka, a ge a guvəl aà batsah kwite mala mene are ŋgar ana malawaraŋa lele ya. 11 I fata ya ka, Əbay ana ndaka tseke gular a a dzəba aà mege matsəɓatsəɓ, dite a de a mege guvəl aà Əbay ana ika tseke are yam a. Wele ata tekeɗe ka, a yehe a gər a gà sliwdze ŋgar hinne, ama ka, ti dzewe a ahər Əbay ana ndaka tseke gular a. 12 I təv ana Əbay gà mburma ana ika tseke gular a, a ti ne a mala magə̀la aà gər. Dite a ta betse a gà sliwdze lùfuw hinne, a ɗeme a ba tsa. tsaatsa, ku mege kataya tekeɗe ka, ndzəɗa ŋgar a ndze a hinne tsa. 13 Aɗaba Əbay ana ika tseke are yam a ka, a ti yehe a gər a gà sliwdze asa, ti ze a gà naha malahalah ŋa ndeɗiŋa ya hinne. I dəba gà mive ana zaakwa ya ka, ta mbiɗere a gər nda gà batsah gà mayahaba gər gà sliwdze aaha ya, dite nda gà dukw maslawa mege guvəl ana gà ŋgwal ŋa ya. 14 Akahər ŋa ata kuɗa ka, gà mburma hinne ta hitse a aà mege guvəl aà Əbay ana ika tseke gular a. Ku mege gà ɓəzla mayaha ahəm ana ika magər gà mayahaba gər gà mburma yak a, Daniyel, ta hitse a à mege aà ŋgat guvəl. Ta waya aà maraha aà gà dukw ana ta mawak dər i huɗ gà sunwa ŋgiɗ ana kə ŋgatawar a. Ama ka, ti sle a aà mege ŋa tsa. 15 Ama Əbay ana ika tseke are yam a, a deriŋa. A ge ahər aaha batsah dava ahəɗ, aà kwite ata malawaraŋa tits lele ya. Dite a zlebiŋa. Gà sliwdze ana ndaka tseke gular a, ku mege gà mayahaba gər gà sliwdze ŋgar, gà ndzəɗa ŋa tekeɗe ti sle a aà megirizler a vatwa tsa, ta ŋgete a ndzəɗa aà mehitser aka miɗ tsa. 16 Ama Əbay ana nda tseke are yam a, ŋgat a dere a aà mege aà ŋgat guvəl a ka, a ge a ka, kamala ana gəzləŋ ŋgar a waya ya, dite wura a sle megirzler a vatwa tsa. A ti ndze a ka, i təv ana ŋgwal ŋa hinne, ika ahəɗ ata ya, aà medzeye ya aà gà dukw ana tserdze ahər ŋgar a le ahər a. 17 I dəba ŋa ya ka, a dzele gà gər aà mege duwa nda ndzəɗa mekwere ŋgar. A ge a dukw ata ka, kamala ana a ge a ka, dukw ana ndzer a. A ta vilere a dəm ŋgar, a Əbay ata ndaka tseke gular a, Aà vatwa məvə̀lar ba, aà medzeye iɗəm aà ahəɗ mala mene are ŋgar a. Ama madzala gà gər ŋgar ata ka, aka ta ge a ba tsa. 18 I dəba ŋa ya, Əbay ana ika tseke are yam a, a ti tike madzala gà gər ŋgar ka, aka gà ahəɗ ana a mbe aka duluv a, na dite a ti ndzike a bagwal ŋa ya. Ama mala aka miɗ gà sliwdze duwa slele ŋa, a dzeye a aà magə̀la a gər ŋgar a, a ta vilere a mesewere are agəra metikaba ŋgar ata ŋgwal ŋa tsiye. 19 I fata ya ka, Əbay ana ika tseke are yam a, a ti dze are ka, aà gà kwite ŋgar ana gà malawaraŋa ika ahəɗ ŋgar tits lele ya. Gà ɓəzla mene are ŋgar ti ta gere a dukw ana a ta ŋgete a ahər vatwa aà megiŋ a tsiye. Ama ka, mə mət seyiŋ ivaɗ a, təv sik ŋa mege riŋ tsidze. 20 « Wele ana a ti zle a təv mendze Əbay ana ndaka tseke are yam a ka, a ti sləraha mburma ilik, aà mandzə̀ka ihər gà ŋgwal gà dukw ana i mekwere ŋgar a. Ama i dəba mehinne zaakwa ya ka, ta kiɗe a Əbay ata awiya ŋa ya. Ta kiɗe a ka, i təv are mburma tsa, ika miɗ guvəl tsa asa.»

Gà mekwere nda gà mesewere are Antiyusus Epefan

21 « Wele ana a ti dere a i dəba ŋgar a ka, ti tike a ŋgat aà ahər tsa. A sle a aà meŋgete a vatwa, aà maŋgata təv mendze mekwere Əbay tsa. Ama a ti zle a təv mendze ata ka, nda mege dukw ana ŋgwal ŋa tsa nda wirwir, akahər ana gà mburma tar mandza ŋa nda zay a. 22 Gà mayahaba gər gà sliwdze ŋgiɗ, a riŋ na ta mbe ahər a ya tsa. Ti dere a nda gà mayahaba gər gà sliwdze ŋgar a kamala maazaw a, dite a ndzike a, gà mburma ana ta hitsere a a vatwa, ta ge ahər a guvəl a, dite a dzeye iɗəm a tar a. A ti dzeye a aà mala aka miɗ gà mburma Mbulum^ª ana a gəs masla nda tar a, kamala taŋa ya, mbaŋa. 23 Agəra magəsa masla ana gà asiŋ a, ta gəs aà ŋgat masla ya ka, a dze a ba aà məbana gà misle ŋgiɗ. Ku mege gà mburma ŋgar ndaw tsa tekeɗe ka, a mbe ter a kuɗa. 24 I təv ana gà mburma ana ika ahəɗ ata i mendze zay ya ka, ŋgat a de a aka mekwere gà ahəɗ ana gà limana iɗəm hinne ya. I fata kuɗa na a ta ge a a riŋ dukw ana gà bàba gà tsir tàa ge diydiy tsiye. A ndzekere a gà duwa ika gà ahəɗ ata ya nda ndzəɗa, dite a dzeye a linama ata tə ndzəkara nda akəl a, dite a dzeye a gà mburma ŋgar ana ti zleke a ŋgat a. Madzala gà gər ŋgar ata asa mbaŋa ka, aà məmbazlaya, aà gà ga na gà ŋgwal ŋa, gà ndzəɗa ŋa ya. Ama taŋa a ti ndze a ka, i huɗ gà mendzena zaakwa ya pəra. 25 A ti dzele a gà gər ka, aka gà ndzəɗa, nda məma aàba arəv ŋgar. aɗaba taŋa na ti de a ka, nda gà batsah mayahaba gər gà sliwdze na ta ge a guvəl aà Əbay ana ndaka tseke gular a. Wele aaha ŋgat a hedzèle a ba aà mege guvəl nda gà mayahaba gər gà sliwdze ana hinne ya, dite tar gà ndzəɗa ŋa hinne ya. Ama ti sle a aà megirizle a aka miɗ Əbay ana ndaka tseke are yam a tsa. Aɗaba ana ti ta hedzele a ba aà mandza akaba ahəm aà ŋgat. 26 I fata ya ka, gà mburma ana tə zəmawa akaba ɗaf a, na ti ta pize a ŋgat a mbulum a. Ti ta mbe a aà gà sliwdze ŋgar. Ika magər gà sliwdze ŋgar a ka, bagwal ŋa na ti ta mete a ya. 27 Gà Əbay ata sula ya ti ta zime akaba ɗaf a təv ilik ŋa. Ama i huɗ gà gəzləŋ tar ka, ti ti yeheye aàba vatwa aà megeye aba dukw ana ŋgwal ŋa tsiye. Ti ta seseye aàba ka, gà parsa məfara ŋa. Ŋgwal duwa ilik a dere a i gà bazlam tar ata ya tsa. Aɗaba ana aka ndze akahər mandəvandəv ŋa zukw tsiye. 28 Əbay ana ika tseke are yam a, a mbəɗara gər aka ahəɗ ŋgar a nda gà limana ya hinne. I təv ana a de a ya ka, a ge a kamala ana a dzala i madzala gà gər ŋgar a, aà gà mayahaba gər gà mburma ana Mbulum a gəs masla nda gà tar a. I dəba ŋa ya kuɗa ka, a mbə̀ɗaba gər a ma ŋgar.

29 « Akahər məpaslà ahər ana a ndze aɗəm a ka, Əbay ana ndaka tseke are yam a, a ta mbiɗe a gər aka mekwere Əbay ana ndaka tseke gular a asa. Ama taŋa kuɗa kəla ka, gà duwa ti ta geye a ba kamala gà dukw ana malahalah ŋa ya tsa. 30 Gà mburma ana ndaka tseke pat ana a dəɗawa aɗəm a, ti dere a nda gà muta yam a, aà mege ahər guvəl. Ndzəɗa ŋgar a ge a riŋ tsa, a mbiɗebe a gər a ma. Duwa a tsiɓere a hinne, dite a me a aà matsəɓatsəɓ ŋgar aka gər gà mburma ana Mbulum a gəs masla nda tar a. Ama ti ta gise a aàba ahəm nda gà mburma ana ta miyak aà magəsa masla tar ana, nda gà Mbulum a. 31 A ti slire a gà sliwdze aka miɗ zlagam ata a lawara batsah ga mbulum a. Dite nda mada a təv ata tsəɗaŋŋa biy mbulum a ka, gà sliwdze ata ti ta ne a dər ka, dukw zlaŋgatsak, ti ta pele a ahəm aà məvəla dukw taf ana kəla wur gà pat, a Mbulum a. Ti ta tike a dukw ata ta gwa dukw zlaŋgatsak a, aka təv ana ta vəlawa aaka dukw taf a Mbulum a, aà medzeye dər ŋa ”. 32 Əbay nda gər ŋgar ŋa, nda metsike a dukw ana a tsik i sida ya, ndaka vatwa ŋa tsiye, a mbiɗe a aà madzala gà gər a gà mburma aà ta mbəɗ dəba a magəsa masla ana ta gəs nda gà Mbulum a. Ama gà asiŋ gà mburma ana, tə sər Mbulum tar a ka, ta mire a aba aà magəsa ahəm a Mbulum nda ndzəɗa. 33 Gà ɓəzla masəra metsiɗike gər a gà metsehe ana ika magər gà mayahaba gər gà mburma ata ya, ti ɗifeye aà gà duwa a gà asiŋ gà mburma hinne. Ama i huɗ mendze zaakwa ya ka, gà asiŋ ŋa, ika magər tar a, ta betse a tar, gà asiŋ a ti veke a tar nda akwa, gà asiŋ a aaha ibam ti ndzike a à tar gà limana tar a, dite ti dze a tar a daŋgay. 34 Akahər mesewere are ata ka. ta ŋgete a mezleke hinne tsa. Kamala tàŋa ya, gà misle ŋgiɗ ti deha aà magawuba nda gà tar ka, biy wirwir. 35 Ika magər gà ɓəzla mesəra duwa ya ka, bagwal ŋa ta metiŋa, dite məməta tar ata ka, a ge a ŋgulum aà mene aà gà mayahaba gər gà mburma tsəɗaŋŋa, dite aà mahadzala ba akahər mandəvandəv ana a ndzeɗime a ya. Ahər mandəvandəv ŋa ata ka, aka ndze aɗəm zukw tsa. 36 Əbay a te ge a ka, dukw ana gəzləŋ ŋgar a waya ya. A rehe a nda magə̀la aà gər, a pire a aà ba ŋgar ka, batsah ŋa ika gər gà mbulum tserdze. A ti tsikeye a gà dukw ana, biy metsike tsiye, aka gər Mbulum ana ika gər gà mbulum a tserdze ya. A te ŋgete a mege gara haa a pat ana matsəɓatsəɓ Mbulum a ana a ta le ahər a ya. I fata ya kuɗa ka, Mbulum a ta rehe a aà dukw ana a tsik i sida ya. 37 Əbay ata ka, a ta gise a ahəm aà gà mbulum gà bàba gà tsir ŋgar tsa, ku mege aà gà mbulum gà məkəs ana ta waya ya tekeɗe ya. Nda ndzer ka, a ti pire a ba ŋgar ka, batsah ŋa ika gər gà Mbulum tserdze, dite a ta gise a ahəm aà Mbulum ŋgiɗ ilik tsidze. 38 Avukw taŋa ka, a ta vile mezlibe ka a mbulum ana a kesle a gà huɗ gà bàba gà kwite ana malawaraŋa tits lele ya, mbulum ata ka, na gà bàba gà tsir ŋgar tə sər ŋgat tsiye. A ti dzere a gà dukw taf gà gura nda ndzemde məvə̀ɗa kur siŋgwe, dite nda gà kur ana tsakala ŋa hinne a sikime a ba tsiye nda gà asiŋ gà dukw ana gà ŋgwal ŋa ya. 39 A ta ge a guvəl aà gà huɗ gà kwite ana gà malawaraŋa tits lèle ya, nda mezleke mbulum gà slele ata. A ti zlibeye a aà gà na tàa gəs ahəm aà mbulum gà slele ata ya, kamala na ŋgat batsah ŋa ya. A ta dzeye a tar kamala gà ɓəzla aka miɗ a, aka gər gà mburma hinne. dite a ta dzeye a ter a gà ahəɗ aà dukw mayaba tar a. 40 Akahər mandəvandəv mekwere ka, Əbay ana ndaka tseke gular a, a ge guvə̀la aà Əbay ana ndaka tseke are yam. Ama, Əbay ata ka, a keɗe a aka Əbay ana ndaka tseke gular a, nda gà muta piris ŋgar, nda gà ɓəzla matsala aka piris, dite nda gà muta yam ŋgar hinne. Ti deye aka gà ahəɗ ŋgiɗ pampam, nda gà sliwdze ŋgar. A teweɗe ika gà kwiye ya ka, kamala màazaw ana a rah a dulwa a de a zləməŋa pəra ya. 41 A de a aka ŋgwal ahəɗ ana i liwiŋ gà kwite ata ya. I fata ya ka gà mburma hinne na ti ta mete ya. Ama tsaatsa ka, gà mburma ana tar mandza ŋa i Edum, gà na i Muwab a, dite nda gà Əbay gà Amuniya ti ta beye a ihər a. 42 Əbay ana ndaka tseke are yam a ka, a ti lime a à mekwere ŋgar aka gà asiŋ gà ahəɗ ŋgiɗ. Ku mege gà Ezipt tekeɗe ka, ti ta beye a ihər a tsa. 43 A ti ndzike a gà limana gà Ezipt. Gura, ndzemde mə̀və̀ɗa kur siŋgwe, nda gà dukw ana gà ŋgwal ŋa hinne ya. Gà Libiya nda gà Etiyupi ti ta hənere a aà gər a bəɗ. 44 Ama gà labara a ti ɗere a ndaka tseke are pat ana a mbizere a ya, dite ndaka tseke are yam a, ti ta dzehər a magəɗa hinne. A ti dze a ba aà mege matsəɓatsəɓ hinne. a te betse a gà mburma hinne. 45 A ta hitseye a aà gà bàba gà mekiriweye gà ga Əbay nda gà mburma ŋgar, aka magər gà duluv nda kwite ana tsəɗaŋŋa biy Mbulum, ŋgwal ŋa ndeyndey ika magər gà ŋgwal gà kwite ya. dite a fata na mandza a bəra ŋgar a dive a wura a ti zleke a ŋgat tsiye.