Bazlam mandəvandəv sunwa Daniyel
12
1 Gawla Mbulum a gweɗiŋ asa, akahər ŋa ata ka, Mikayel mala aka miɗ gà gawla Mbulum ana ta kezle a gà mayahaba gər gà mburma ya ka, a ta petiŋa abiŋa asa. A ge a ka, ahər batsah mesewere are, Daga a gər ana gà mayahaba gər gà mburma a bəra ya, dite haa a pat ŋa ata ka, pat ŋgiɗ a riŋ ilik a ndzikiɗ ba taŋa tsidze. I fata ya ka, zləma gà na i liwiŋ gà mayahaba gər gà mburma yak, zləm tar a riŋ gà mewetse ŋa i wakita Mbulum a ka, ta mbeliŋa. 2 Gà mburma ana hinne tar mendzeye are ŋa i huɗ metirfeneh ahəɗ i dive ya ka, ti ta peɗeke a riŋ a. Gà asiŋ a ta hitsere a ka, aà mandza a bəra aà biybiy nda gà Mbulum. Gà asiŋ ŋa ibam ta hitsere a ka, nda hwarwa ŋa, dite ti sewèrè are aà biybiy. 3 Gà mburma ana tə sər duwa ya ka, ti ta dive a kamala gà dukw ana aà gəza mbulum tə dəvawa aka gər kwa ya. Ta pat dər a gà misle ŋgiɗ ka, meme na ta gəs ahəm aà Mbulum a, dite ti ta dive a kamala gà mawusawus a aà biybiy. 4 « Daniyel gà bazlam aaha ka, kaha biy metsike tsa. Kà ta ɗif aà wakita aaha a mburma mandəvandəv ŋa ze mendzere tsa. akahər ŋa ata kuɗa, gà mburma hinne ti ta dzeŋgèyiŋa, masəra dukw tar a sikehiŋ a.» 5 Akahər ata ka, iye, Daniyel, iye ihər i fire a à sukw ana sunwa ata a da dər aka iye ya ka, gà mburma sula ta pat aba, tar gà mehitseya ŋa ika gà tseke gà duluv. Wele ana a tike akaba petek ata maŋgaraŋa nda slewize kilifiɗ kilifiɗ herre ŋa ya, a hitse aka guva duluv yam ata. 6 Ilik ŋa i liwiŋ gà mburma ata tar sula ya, a wiz aà ŋgat: « Akahər wara na gà dukw ata kamala dukw mene aà mburma ya ti ta ndisl a ya. 7 Wele ata a tike akaba petek ata maŋgaraŋa, nda slewize kilifiɗ kilifiɗ herre ŋa ya, a ndzək gà ahər ŋgar à mbulum sula, dite i tsara ka a gwa: « I zəm mimbeɗe, nda zləm Mbulum ana ŋgat mandza ŋa, aà biybiy ya. Gà dukw ata ti ta ndze a ka, mive makər nda mezehe ŋa. Dite ti ta ndive a ka, akahər ana ndzəɗa gà mayahaba gər gà mburma Mbulum aka ndive a a tar a, kweleŋ fetite ya . » 8 Iye Daniyel, i tsaraka gà bazlam ata ka, ama i tsaraka dukw ana a gwa ya tsa. I fata ya ka, i wiz: « Batsah gà ŋa, meme na gà dukw ata tserdze ti ta mendìve a ya? » 9 A gweɗìŋ aaka, da nda zay, Daniyel. Gà bazlam aaha ti ndze a ka, makaha ŋa kweleŋ fetite biy metsike tsa, haa aka mandəvandəv gər ahəɗ. 10 Gà mburma hinne na ti ta ne a gà tsəɗaŋŋa, gà mesewere are tàa baraya tar. Gà mburma ana ta gewe gà dukw ana ŋgwal ŋa tsiye ka, ti sle aà metsereke a tsa, dite ti ndiɗike a gər ka, aà mege dukw tar ata gà ŋgwal ŋa tsiye hiywe pəra. Ama gà mburma ana tar gà ɓəzla metsehe ya ka, ti ta sire a dukw ana a ta ge a ba, aka miɗ mba ya. 11 Daga a pat ana, wura a a ti sle a aà məvəla dukw taf a Mbulum, biy ana ta kəɗawar kəla wur gà pat a, dite ti ta hitse a à dukw mege dukw zlaŋgatsak ata biy manəsa a duwa ya, aka təv ana ta vəlawa aaka duwa a Mbulum a, a ti ndze a ka, mehinne (1290) dəbuw nda dərməka sula nda dzik tswiɗ a de a iɗəm a dzekwiŋ. 12 Maŋgayaba a ta ge a ika gər gà mburma ana ta mire a aba a, ti dze a zləm a mehinne (1335) dəbuw nda dərməka makər nda dzik makər gər a əzləm a de a iɗəm a ya. 13 Dite kər ka, Daniyel, ndza nda magəsa Mbulum nda gəzləŋ haa aka mandəvandəv mesife yak. Dite ki ŋgete mesifikaba kuɗa. I dəba ŋa ya ki ta hitsere a i biye ya aà maŋgata nuba dukw megemir yak, aka mandəvandəv gà pat ana a ndive a ya . »