Yunas 2

Yunas a hama a Mbulum i hitwis kilif

1 Tsam ka, BATSAH kwa ŋa a sləraha batsah kilif, aà mende Yunas. Yunas a ge i hitwis batsah kilif ata, gà həpat makər, gà həvəɗ makər. 2 Yunas a hamara a BATSAH kwa ŋa Mbulum ŋgar a, i hitwis batsah kilif ata ya. 3 I fata ya ka, a gwa: « I təv ana iye i huɗ mesewere are gà ya ka, yàa zalak aàba Batsah gà ŋa, dite ka, kàa ŋgemiŋ aakara. Ara i təv mendze gà məməta ya ka, yàa zalak aàba aà mezleke iye, dite kàa tsarakara biye ɗa gà ya. 4 Kàa ye iye a batsah biye, a huɗ batsah duluv, yam aka kaha iye. Gà himbiɗ nda gà yam tserdze tàa da ika gər gà ya. 5 I fata ya ka, iye i dzala i gər gà ka, kàa dalawa iye diriŋ i təv are yak a. Ama tsaatsa i fər ikaba ya asa ka, i waya maŋgata a ga yak ana tsəɗaŋŋa ya . » 6 Yam aka ndziŋ kwiye nda ɗa, yam aka kaha iye, gà meziwtitel tàa ndeweɗiyiŋ ba aà gər. 7 Yàa tar ndisl aà sik kwite, iye ka, i təv mendze gà məməta, dite gà beliŋ tàa handakaha ba aka iye, aà biybiy. Ama kər Batsah gà ŋa, Mbulum gà, Kàa hitsera aà iye i biye ata kwitsikw a, nda mesife. 8 Akahər ana mesife gà riŋ à ndive ya ka, i məbara à Batsah gà ŋa a gər a, dite meheme gà aka ndzeha ndisl a təv yak, a huɗ batsah ga mbulum yak ana tsəɗaŋŋa ya. 9 Gà mburma ana ti zlibe a à gà mbulum ana gà ndzer ŋa tsiye ka, mege gara tar a te ge a riŋ aà mimbile tsa. 10 Ama iye ka, i lehe a dimis mazləba à kər, i dzeke a gà dukw matawala fəla dite i reheye a à gà dukw ana i tsik i sida ya ya, i gwa i vileke a ya. Haya kaɗəŋ ndzer vatwa mimbile ka, i təv BATSAH kwa ŋa. 11 BATSAH kwa ŋa a fafəl a kilif ata: « Vənahara à Yunas aka ahəɗ a . » Kilif ata a vənahara Yunas aka ahəɗ a.