Yunas 3

Bazlam Mbulum ana Yunas a tsik i kwite Neniwe ya

1 BATSAH kwa ŋa a fafəl a Yunas masula ŋa asa, a gwaɗar: 2 « Hitse, ka da a Neniwe a batsah huɗ kwite ata, daha tsik a tar gà bazlam ana i ta tsikeyeka ya . » 3 Yunas a hitse a da a Neniwe kamala ana BATSAH kwa ŋa, Mbulum a fafəlar a. Tsaatsa Neniwe ka, batsah zlabatum huɗ kwite. Ki tiwlike a nda sik ka, mehinne makər. 4 Yunas a suwaya i huɗ kwite ata wurwas ilik. A gwaɗawa tar: « i huɗ mehinne dzik faɗ a (40) ka, Neniwe a mbezliŋa! » 5 Gà mburma ana mandzaŋa i Neniwe ya, ta gəs bazlam Mbulum nda gəzləŋ tar, dite ta ge ndəra, tə dzaya akaba gà buhwa, gəs aà gà bàba ŋana ya tsikw aà gà ɓəza. 6 Labara ata a ɗeha aà əbay gà Neniwe. A hitse ika təv mendze mekwere əbay ŋgar a, a zla ikaba baramusa əbay ŋgar a, dite a tike akaba buhwa, a ndza dər aka bitekwe. 7 Dite a tike məpala ahəm aaha i Neniwe: « Nda zləm əbay dite nda zləm gà bàba ŋana ta kwere a gà mburma ya. Gà mburma, gà dukw gənaw, gà sla, gà awak nda gà təmaŋ tə zəm dukw mezime tsa, tə sa yam tsa asa mbaŋa! 8 Gà mburma nda gà dukw gənaw, tə dzaya akaba gà buhwa. Ta wiz aha mezleke aà Mbulum nda gà tuwa nda ndzəɗa. Ta mbəɗ dəba a gà dukw tar ana ta gewa ŋgwal ŋa tsiye, dite ta baraya gà dukw bakal ana aà ahər tar a. 9 Weke na sər a, gà biy ŋgiɗ tsa, Mbulum a miseke a aà matsəɓatsəɓ ŋgar ana ika gər kwa zləmana ya, dite na ki metekwe a asa tsiye . » 10 Mbulum a ŋgata a gà dukw ana ta geye ya, a fər ka, tàa məsak aà gà dukw tar ana ta geyewa gà ŋgwal ŋa tsiye ka, Mbulum ama aka madzala gà gər aka dukw ana ndeɗiŋa a ge a ter a zləmana ŋgwal ŋa tsiye, a məsak aà tar.