Yunas 4

Matsəɓatsəɓ Yunas

1 Taŋa ka, a wur aà Yunas hinne, a dzəba aà mege matsəɓatsəɓ. 2 A hama a BATSAH kwa ŋa, a gwa: « Da, Batsah gà ŋa, araha na dukw ana i ge magəɗa akahər ana iye ika ahəɗ kwite gà mba ya, dite aɗaba taŋa na i waya mivele a Tarsis a. Yàa mbər mesire ka, kər ka, Mbulum ana kə gewa ŋgwal, marahaŋa nda himme ahəm a, dite ki gewa mehinnekw aà matsəɓatsəɓ yak a, mburma a ndzak are tsehe, dite kà mawara aà gà gər aka madzala matsəɓatsəɓ yak a bise. 3 Batsah gà ŋa, kinehe ka, zla mesife gà, aɗaba i gà ka, ŋgulum məməta na nda mandza aà bəra ya . » 4 BATSAH kwa ŋa a gwaɗar: « matsəɓatsəɓ yak ata ki ge ya ana ndaka vatwa ŋa ya? » 5 Yunas a dara i huɗ kwite ata ya, a hitse nda kadwa i kwite ata ya. A ge dzawadzawa a ndza à huɗ sisiye ŋa. A waya aà maŋgata a dukw ana a ge a ba i huɗ kwite ata ya. 6 BATSAH kwa ŋa, Mbulum a sləl aà kəla dizl ɗaf, a gəl ba aà mandza sisiye ŋa aka gər Yunas, dite mibe aà ŋgat i mesewere are ŋgar a. Yunas a ŋgayaba hinne, agəra dizl ɗaf ata. 7 Ndidwe ŋana i mekwede hedwe ka, Mbulum a sləraha metinwe, a təm dizl ɗaf ata, a kula. 8 Akahər ana pat a mbizera ya ka, Mbulum a sləraha himbiɗ umukw ara ndaka tseke pat ana a mbəzawara ya. Pat a zla ikəka ya ŋgwulakəkka, a lak a dala gər a Yunas. A wiser aà gər, a wiz məməta a gwa: « Ŋgulum məməta na nda mandza aà bəra ya . » 9 Tsam ka, Mbulum a gwaɗa a Yunas, matsəɓatsəɓ yak ata ki ge ya ana ndaka vatwa ŋa ya, na aka gər a dizl ɗaf aaha ya? Dite Yunas a gwaɗar aaka: « Haya, i ge matsəɓatsəɓ ka, haa aà məməta . » 10 BATSAH kwa ŋa a gwaɗar: « Dizl ɗaf ata ka, kàa ger megemir duwa tsidze, na a dzəv ka, kər tsa, a gəl ba ka, i huɗ mehinne ilik a, dite a mət i huɗ mehinne ŋgiɗ a. 11 Dite kər kà waya ka, Neniwe mendziŋ are tsehe tsa, na batsah huɗ kwite ata mburma iɗəm dəbuw dərməka nda dzik səla ya, (120 000) tə sər ika ba aà dukw ana ŋgwal ŋa, nda ana ŋgwal tsiye ya, dite gà dukw gənaw iɗəm hinne asa ya . »