Bazlam minew təmaŋ ana a dzeye ya
15
1 A pat duwa ka,
gà ɓəzla duwan nda gà asiŋ gà mburma ana i liwiŋ tar,
meɗè zləm tar ŋgwala tsiye hinne,
tə daha a təv Yesuw.
Tə daha ka,
aà medzè zləm a dukw ana a tsik a ya.
2 Aləka gà *Farisa nda gà ɓəzla medzeŋge məpala ahəm Mbulum ta ŋgat a tar kataya tsara ka,
ta ge arəv hinne,
tə dza akaba bazlam ŋgùra ŋgùra ŋgùra hinne ika magər tar.
Ta gwa:
«Wele aaha à gis a aba gà ɓəzla bakal lele,
naha ti zim akaba a dukw mezime ana,
meme?»
3 I dəba ŋa ya,
Yesuw a sər a taraha aka bazlam ata ka,
a fàfəl a tar ndaka bazlam minew.
A gwaɗa a tar:
4 «Na bəla wura ika magər kurum aaha kinehe ya,
gà təmaŋ ŋgar a riŋ dərməka,
i dəba ŋa ya,
ilik aka dzeye ana,
a ge a ana,
meme?
A miyek a à gà dzik tswiɗ gəra tswiɗ ŋa aaha à gər tar tə̀ma,
dite a de a a mayaha ilik ŋa aaha a dzeye ya,
haa a təv ana aka ŋgat a dzekwiŋ tsiye?
5 Na bəla aka ŋgat ka,
a ŋgeye a ba hinne kuɗa.
A tikere a təmaŋ ata aka ɗa ya,
6 a de a dərra a ma ya.
Aka dara ka,
a zelewe a a gà masla ŋgar,
nda gà ɓəzla hərmaga ŋgar,
a gweɗe a ter a:
“Ŋgayakwa ba,
aɗaba Yàa ŋgat təmaŋ gà ata a dzeye ya kuɗa.”
7 Iye ihər i gweɗe a kurum ŋa:
Kamala taŋa ya mbaŋa,
maŋgayaba a ta ge a i təv Mbulum i gər ŋa hinne,
agəra wur ana a miyak à bakal ŋgar,
a mbəɗ à gəzləŋ ŋgar a.
Maŋgayaba ka,
a zè a biy gà mburma ana dzik tswiɗ gəra tswiɗ,
ta fə̀r aàba ka,
kamala ana bakal i təv tar tsa,
tsaatsa tàa mbəɗ à gəzləŋ tar tsidze ya.»
Bazlam minew kur siŋgwe ana a dzeye ya
8 I dəba ŋa ya,
Yesuw a gwaɗa a tar asa:
«Kige tsa kamala məkəs ŋa a riŋ kur siŋgwe ŋgar a riŋ hinne.
Ama ka,
aka dzeye ihər a ilik dze ana,
a ge a ana,
meme?
A dehe a,
à vèt a akwa a lalampa ŋgar,
a feɗere a i ga ya fit,
dite a yehe a iɗəm a,
haa a təv ana aka ŋgat a dzekwiŋ tsiye?
9 Na bəla aka ŋgat ka,
a zele a a gà masla ŋgar,
nda gà məkəs ana ta mberehe ya,
a gweɗe a ter a:
“Ŋgayakwa ba,
aɗaba Yàa ŋgat kur siŋgwe ga ana a dzeye ya kuɗa.”
10 Kamala taŋa ya mbaŋa,
iye ihər i gweɗe a kurum ŋa:
Maŋgayaba a ta ge a riŋ ika magər gà gawla Mbulum i gər ŋa,
agəra wur ana ilik a miyak à bakal ŋgar,
a mbəɗ à gəzləŋ ŋgar a.»
Bazlam minew kəla ana a dzeye ya
11 I dəba taŋa ya ka,
Yesuw a gwaɗa a tar:
«Wele duwa,
gà ɓəza ŋgar a riŋ sula.
12 Dìy kəla ŋana a daha,
a gwaɗa a tsir ŋgar:
“Tsir gà,
dziŋ ihər limana gà ana,
zləmana ki ti dze a mə̀r a aba ya.”
Tsir tar ata a daha,
a dza a tar aba limana ata.
13 I dəba mehinne zaakwa ya ka,
kəla ata a daha,
a dzawa à gà dukw ata fit,
a yaha gər a siŋgwe ŋa.
A mah ba tsara,
a da a kwite ana diriŋ a.
A daha a fata ka,
a dza dər ba aà mege dukw ana gəzləŋ ŋgar a waya ya,
a gwitse à dukw ata fit.
14 I təv ana siŋgwe ŋgar ata a ndəv ihər a ka,
batsah may a dza ba aà mege ika ahəɗ ata asa.
Gərəŋ gərəŋ a səraha dukw ana a ge a ya asa tsa.
15 I dəba ŋa ya,
aka ŋgat megemir i təv wele duwa a riŋ i fata ya.
Wele ata a slər ŋgat aà makəva gà wèdèlìŋ ŋgar a dala.
16 I təv ana a de a à tar a dala mba ya ka,
tə dzawa a tar dukw mezime a bəɗ dzekwiŋ,
ti zimiŋa.
Kəla aaha ka,
a waya mazəma dukw ana gà wèdèlìŋ aaha ti zim a ya mbaŋa,
aɗaba may ana a wir ahər a ya.
Ama wura a gəs miviler ɓav tsa asa.
17 I fata ya ka,
a dza ba aà madzala gà gər aka mendze ŋgar ana a ndzawa i təv tsir ŋgar a.
A gwa:
“Ama gà ɓəzla meslire tsir gà ka,
tar riŋ ti zim a dukw mezime lele,
a sle a ter a hinne,
dite a zehe aà ter a asa.
Ama iye kuɗa ka,
i mite a ɗa aà may i faha.
18 Ŋgulum kinehe ka,
i meh a ba,
i diŋa,
i mbìɗ a gər a təv tsir gà.
Yàa da ka,
i gweɗere a:
Tsir gà,
Yàa ge bakal ika miɗ Mbulum a,
dite ika miɗ yak a asa.
19 Ama iye ka,
kamala na kəla yak a asa tsa.
Ne à iye ka,
kamala gà ɓəzla megemir yak a pəra.”
20 I dəba ŋa ya,
a mah ba,
a da,
à mbìɗ a gər a təv tsir ŋgar.
I təv ana a ndze aà vatwa,
aka à mendze a ma,
a riŋ diriŋ aà ga ya mba ya ka,
tsir ŋgar a ŋgataraha tsara ka,
a valaha a təv ŋgar.
A daha,
a samata ka,
a ndzer are tsehe hinne.
A yab aaka.
A ger wusa,
a gəs aàba ŋgat nda gəzləŋ ilik.
21 Kəla ŋgar ata a gwaɗar:
“Tsir gà,
Yàa ge bakal ika miɗ Mbulum a,
ika miɗ yak a asa mbaŋa.
Iye kinehe ka,
kamala ana kəla yak a asa tsa.”
22 Ama tsir ŋgar a zalaha a gà ɓəzla meslire ŋgar a təv ŋgar.
Tə daha ka,
a gwaɗa a tar:
“Dumaha tsəma,
zlumara ŋgwal andiw ana a tsahən lele ya,
ma tike akaba.
Dite ka zlumara matsərəɗ a,
ka tikwimer a kəla ahər.
I dəba ŋa ya,
kà ndzəkumara tsapà ya,
kà dzùmar a sik.
23 Kə̀ gə̀sumara sla ana magəla ŋa lele,
məŋgəl ihər a,
kə̀ kə̀ɗumar.
Dite ki dekwe a ala ŋa,
ki gìrìvekwe a dər,
ki ŋgeyekwe a ba.
24 Aɗaba kəla gà aaha ka,
kamala ana aka mət a,
ama kinehe ka,
aka mbəlara a riŋ nda mesife.
Aka dzeye kweleŋ,
ama kinehe ka,
Yàa ŋgat asa.”
I dəba ŋa ya,
tə dza ba aà megirive nda maŋgayaba hinne kuɗa.
25 I təv ana tar riŋ ta gìrìv a i ma ya ka,
batsah kəla wele ata ŋgat a riŋ i dala i guvah.
A màharaba i dala ata ya.
I təv ana a ndze aà vatwa,
a de a a ma ya ka,
aka tsarakara megirive ata mburma ta gìrìv a i ma ya.
26 Kəla ata a zal a mala meslire tsir ŋgar ilik,
a wiz ahər.
A gwaɗar:
“Dukùla na ti ɗeme a i ma huwwa dze ya?”
27 Mala meslire ata a gwaɗar:
“Ta gìrìv a ka,
a damər yak ana a màra a ma ya.
Tsir ŋgar a gəs sla ana magəla ŋa lele ya,
a kə̀ɗar,
aɗaba ana aka ŋgat kəla ŋgar nda mesife lele ya.”
28 Kəla batsah ŋa ata a tsaraka kataya ka,
a dza ba aà mege arəv hinne.
A sasar məpə̀ts a ga asa tsa.
I dəba ŋa ya,
tsir ŋgar a dara a bəra ya.
A dara,
a hamar hinne.
A waya ma da a ga.
29 Ama kəla ata a gwaɗar:
“Tsaraka dukw ana i tsikik a ya.
Ama kinehe Yàa ge ka,
mive diŋ,
na iye ihər i gek a mege megemir a,
Yàa niw mifefile yak ilik tsidze.
Ka viliŋ dze ana,
là,
na a iye ɗara?
Ku mege kəla vugul zaakwa,
aà maŋgayaba nda gà masla gà tekeɗe ka,
kàa viliŋ tsiye?
30 Araha kəla yak ana a gwitsek à limana yak fit a mege muva nda gà məkəs a,
a màra ka,
kə̀ kə̀ɗar sla ana kə̀ gəlakwa,
məŋgəl ihər hinne ya tsəna?”
31 Ama tsir ŋgar a gwaɗar aaka:
“Kəla gà,
aɗaba kər ka,
mandza ŋa ɗa i təv ga,
gà dukw ana i ga i ma gà tserdze ya ka,
gà biy yak.
32 A da dər na ki gìrìvekwe a nda maŋgayaba ya tsəna,
aɗaba damər yak aaha ka,
kamala ana aka mət a,
ama kinehe ka,
aka mbəlara i məməta ya.
Aka dzeye kweleŋ,
ama kinehe ka,
aka ŋgat ba asa.”»