Luka 16

Bazlam minew mala maɗàmà siŋgwe ana

a ge a wirwir hinne ya

1 I dəba ŋa ya,

Yesuw a gwaɗa a gà ɓəzla mazazama ŋgat asa:

«Wele duwa,

mala limana,

mala maɗàmà siŋgwe ŋgar a riŋ.

Gà mburma tə daha a təv ŋgar.

Tə daha,

ta gwaɗar:

“Mala maɗàmà siŋgwe yak aaha ka,

a riŋ a nisek a à siŋgwe.”

2 Wele ata a tsaraka kataya tsara ka,

a zalaraha,

a gwaɗar:

“Dukùla na i tsaraka nda təv yak a?

Ɗemiŋ gà dukw ana ki ge nda siŋgwe ya fit dze.

Aɗaba a sèsiŋ na ki ge a mege megemir aaha ya asa tsa.”

3 Mala maɗàmà siŋgwe aaha a dzala i gər ŋgar ka,

a gwa:

“Naha mala ga gà a zle a aà iye megemir gà aaha ya dze ana,

dite i ge a ana,

meme?

Kwets araha,

ndzəɗa gà a riŋ aà mifìte tsa,

dite hwarwa a giŋ a aà maŋgala duwa aà mburma ya asa ana,

meme kuɗa ya?

4 Yawwa,

ama kinehe ka,

Yàa dzala dukw ŋgiɗ,

i sər dukw ana i ge a ya.

I yehe a gà masla,

dite i təv ana tàa zla iye i megemir aaha ya ka,

ta gis a aà iye a ahər aà mandza i ga i ma tar.”

5 A daha,

a zal a gà mburma ana gwèdèrè mala ga ŋgar ata aà tar a.

Tə daha a təv ŋgar ilik ilik tserdze.

A gwaɗa a wele ana a lah a təv ŋgar a:

“Gwèdèrè mala ga gà aà kər dze ana,

ndaw?”

6 Wele ata a gwaɗar aaka:

“Gùŋguŋ mal dərməka na aà iye ya.”

Mala maɗàmà siŋgwe ata a gwaɗar:

“Wakita gwèdèrè yak naha,

ndza a bəɗ tsəma,

ka wetse aɗəm gùŋguŋ dzik ə̀zləm pəra.”

7 I dəba ŋa ya,

a gwaɗa a misle ŋgiɗ asa:

“Dite biy yak ana,

ndaw?”

Wele ata a gwaɗar aaka:

“Bùhwa daw dərməka na aà iye.”

Mala maɗàmà siŋgwe ata a gwaɗar:

“Wakita gwèdèrè yak naha,

wetse aɗəm dzik tsamakər pəra asa.”

8 Mala ga wele ata a dza zləm aka wirwir ana wele aaha a ge a ihər a ka,

a ge ahər kamala dukw mene aà mburma ya.

A gwa:

“Wele aaha ka,

mala wirwir.

A dzele a dukw ana a da aka miɗ a.”

Aɗaba gà asiŋ gà mburma ana kinehe ika gər ahəɗ tə sər Mbulum tsiye ka,

tə tsah hinne,

ti dzele dukw ana a da aka miɗ a lele,

nda masəra ba ika magər tar ilik ilik tserdze.

Tə tsah ka,

tə za dər gà mburma ana i təv dzaydzay ŋa ya.»

Limana ana kinehe à ndìv a ya, ndəna à ndìv a tsa

i təv Mbulum a

Mata 6:24

9 I dəba ŋa ya,

Yesuw a səkah à bazlam ata asa,

a gwaɗa a tar:

«Ama iye ihər i gweɗe a kurum ŋa:

Gwim ŋgwal ŋa nda siŋgwe lele,

ku mege mì sər,

siŋgwe ka,

ŋgwal ŋa tsa tekeɗe ya.

Aɗaba i təv ana a riŋ aà kurum asa tsa,

aka ndəv a ka,

ki ta ŋgetwime a təv mendze ana à ndìv a tsa aà biybiy i təv Mbulum a.

10 Taŋa,

wur ana a ge a megemir gà ɓəza gà dukw ana kwizikw kwizikw a,

ndaka vatwa ŋa ka,

a ge a gà bàba ŋana tekeɗe,

ndaka vatwa ŋa mbaŋa.

Ama wur ana a ge a mege megemir gà ɓəza gà duwa nda mehimbire iɗəm a ka,

a ge a gà bàba ŋana tekeɗe,

kataya mbaŋa asa.

11 Na kàa sərum are megemir limana ana kinehe ika gər ahəɗ a ndaka vatwa tsəna,

weke na a sle a aà mivile a kurum ŋgwal limana ana à ndìv a tsa i təv Mbulum a?

12 Kamala taŋa ya,

na kàa sərum are a mege gər a dukw mburma tsəna,

dite meme na Mbulum a sle aà mivile a kurum a dukw ŋgwal ŋana a gwa:

A ne a biy kurum a?

13 Wura ilik a sle medze a ba aà megemir gà mburma sula aà ler ilik ŋa ka,

a ge a ba tsa.

Aɗaba pat ŋgiɗ ka,

a ge a swalwa a misle ŋgiɗ,

a weye a biy ŋgiɗ lele,

kige tsa,

à gis a ahəm aà biy ŋgiɗ aaha lele,

i ŋgiɗ ka,

à gis ahər a tsa,

kùrtìtìk a niw a bazlam ŋgar.

Kamala taŋa ya,

kurum tekeɗe,

ki slwim a aà megemir a Mbulum,

dite ka,

aà siŋgwe asa sula sula tsa.»

Məpala ahəm Mbulum, nda mendze ana aà biybiy a

Mata 5:18,32; 11:12-13; Markus 10:11-12

14 Gà *Farisa tə tsaraka bazlam ata Yesuw a tsik a ka,

tə sawla ahər hinne,

aɗaba ana tar ta waya siŋgwe hinne ya.

15 Ama Yesuw a gwaɗa a tar aaka:

«Kurum ka,

gà mburma ana ta ge a duwa ka,

ika are mburma ya ɗekɗek a.

Ama Mbulum ka,

a sər gà gəzləŋ kurum.

Aɗaba dukw ana gà mburma ta fir ahər a ŋgwal ŋa lele ndzer a ka,

i təv Mbulum ka,

ŋgwal ŋa tsa ndeyndey.

16 Tə zazam məpala ahəm Musa nda bazlam gà ɓəzla məma à guma Mbulum,

haa a təv ana Yuhana metsìlwìɓè à mburma a yam a dza ahər ba ya.

Daga aà gər ata ya,

ti tsikewa bazlam ŋgwal ŋana biy mekwere Əbay Mbulum ana a ta kwere a ya a mburma,

dite i dəba ŋa ya,

ku weke tekeɗe,

gə̀də̀bəllà ta waya mada a *mekwere Mbulum ata nda ndzəɗa.

17 Aɗaba ŋgulum gà gər ahəɗ nda gəza mbulum ka,

tì ndìviŋa.

Ama məpala ahəm Mbulum ka,

à ndìv a tsa.

Ku mege dukw ana mewetse ŋa iɗəm kwizikw hinne tsiye tekeɗe,

à nikiɗ a ihər a tsa,

a ndze a aà biybiy.

18 Kamala taŋa ya mbaŋa,

wur ana aka miyak à məkəs ŋgar,

dite aka zla aɗəm biy ŋgiɗ a ka,

a ge muva.

Na wura aka zla məkəs ana ta miyak dər a tekeɗe,

a ge muva mbaŋa asa.»

Bazlam minew gà Lazar nda wele ana

limana ŋgar a riŋ hinne ya

19 I dəba bazlam ata ya ka,

Yesuw a gwaɗa a tar asa:

«Wele duwa a riŋ,

ŋgat mala limana,

gà dukw ŋgar a riŋ hinne.

A dùwayawa ba ka,

nda petek ana ŋgwal ŋa hinne,

à sìkim a ba tsiye.

Dite kəla pat a zəmawa tekeɗe,

dukw mezime ana ŋgwal ŋa ya mbaŋa.

20 Ama wele ŋgiɗ a riŋ mbaŋa,

zləm ŋgar Lazar.

Ŋgat ka,

matawak ŋa,

dukw ŋgar a riŋ tsa.

Ba ŋgar fit ka,

mbəlak ɗekɗek.

A dawa aka hərmaga wele ata limana ŋgar a riŋ hinne ya.

A hənawa i fata.

21 A waya mazəma bàtutukw ɗaf ana a dzawuwa aà mala ga ata a bəɗ a.

I təv ana a dzawuba aà məpala ŋa ya ka,

gà kəra tə dawaha,

ta wiser a gər hinne,

tə ndàkàɗawa ihər mbəlak ŋgar ata ya ivaɗ.

22 Aləka i dəba ŋa ya,

mala matawak ata a mət ka,

gà gawla Mbulum tə daha,

tə zla ŋgat a təv Abəraham a gər ŋa.

Ama mala limana aaha tekeɗe ka,

a mət asa,

ti le ŋgat ka,

a biye.

23 A sèwèrewa are hinne i təv ana gà məməta iɗəm a.

A zla gər aà mbulum,

a fə̀r ikaba ya ka,

aka ŋgataha a gà Abəraham mandza ŋa nda Lazar i təv ilik ŋa diriŋ nda gà ŋgat i gər ŋa,

ti ndze aàba tsa.

24 A zalaha a Abəraham.

A gwaɗaraha:

“Abəraham,

tsir gà,

i ndzek are tsehe ti tsiye?

Kamkam,

slərra Lazar a təv ga ya,

mà lìmiŋara à yam aà kəla ahər a,

ma dara,

ma tikwiŋ dər aka arah zayya te.

Aɗaba iye ihər i sèwèr a are i akwa i faha,

a ndez a iye hinne.”

25 Ama Abəraham a gwaɗarra:

“Kəla gà,

i sər dər ka,

kàa zəm riŋ mandza aà bəra yak i bəɗ ka,

hinne.

Ama Lazar aka sèwèr riŋ are ka,

hinne.

Kinehe ka,

a ndze a barbarərra i faha,

a zim a biy ŋgar kuɗa te.

Ama kər ka,

ki sèwèr a are mbaŋa te,

na kinehe ya.

26 Dite asa ka,

biye a riŋ batsah ŋa kwitsikw ika magər kwa nda kər,

kərga taŋa ya,

ku mege gà mburma ana i faha,

a sàs a tar madaha a təv kurum tekeɗe,

ti sle a tsa.

Dite gà na a riŋ i faka ya tekeɗe,

ti sle a aà madàra a faha ya tsa asa mbaŋa.”

27 Mala limana ata a tsaraka taŋa ka,

a gwaɗaraha:

“Na kataya ka,

kamkam,

i hemekiŋa tsir gà:

Slər Lazar a rəŋga tsir gà,

28 aɗaba gà damər gà a riŋ iɗəm ə̀zləm,

ma daha,

ma tsik a tar aba ya dzekwiŋ te,

mi be a tar à ɗaf,

dite ka,

tar tekeɗe,

tə ta wiyera aba a təv mesewere are gà aaha ya asa tsa te.”

29 Abəraham a gwaɗar aakara:

“Gà damər yak ka,

tə sər bazlam gà Musa nda biy gà ɓəzla məma à guma Mbulum ana ti tsik i wakita ya,

tə̀ dza zləm ka,

a mifefile tar ata pəra.”

30 Wele ata a gwaɗar aakaha asa:

“Taŋa ka,

a sle tsa,

Abəraham tsir gà.

Na wura aka mbəlara i məməta ya,

tsìm aka da a təv tar,

dite na ta mbìɗ a à gəzləŋ tar kuɗa ya.”

31 Ama Abəraham a gwaɗar:

“Na tàa dza zləm a mifefile gà Musa nda biy gà ɓəzla məma à guma Mbulum ata tsəka,

ku mege wur ana a mbəlara i məməta ya a mesife ya,

ma da a təv tar tekeɗe ibam ka,

ta gis a bazlam ŋgar ɓav tsa.”»