Luka 17

Mege metsehe à dukw bakal

Mata 18:6-7,15,21-22; Markus 9:42

1 I dəba ŋa ya, Yesuw a gwaɗa a gà ɓəzla mazazama ŋgat: «Gà duwa a riŋ kəla pat na ta bene a gà mburma a bakal a dukw ŋgar. Ama wur ana a ne madəŋ bakal ŋa ya ka, waya ba ŋgar a. 2 Seriye Mbulum ana a le ahər a ya ka, ŋgulum tə̀ danar batsah zal kur a ɗa, dite tì yè a dər akaba ŋgat a batsah duluv, ndəna a bene a medzibe gà ɓəza aaha ta gis iye ya, a bakal a. 3 Ama kinehe ka, gwim metsehe lele, kaslum ba kurum.

Na wele ana aka ne damər yak, bəla aka ge bakal ka, tsiker ahər, ɗifer à ndzer ŋana. Na kà samata ka, aka mbəɗ à madzala gà gər ŋgar, aka miyak à bakal ata ka, pə̀lar à bakal ŋgar. 4 Na bəla aka gek bakal sik təsəla i huɗ mehinne ilik a tekeɗe ibam ka, dite i dəba ŋa ya a dere a təv yak a hiywe, a wiz aà kər a məpala à bakal a ka, ki pìlewer a dər pəra.»

Magəsa Yesuw nda gəzləŋ ilik

Mata 17:20

5 Aləka i dəba ŋa ya, gà ɓəzla meslire Yesuw ta gwaɗar: «Batsah mə̀r ŋa, səkah a mə̀r à megìse a gəzləŋ te.» 6 Batsah tar ŋa a gwaɗa a tar aaka: «Na mege kàa gəsum iye a gəzləŋ kurum kwizikw, kamala wur meserek a tekeɗe, ki slwim aà megweɗe a a batsah kàvə̀ra aaha: “Ndzàh ba i faha ya, ka tə dzəv ba a batsah duluv aaka” ka, à gis a ahəm kurum.»

Mege megemir mala meslire

7 «Ama na bəla wura ilik ika magər kurum a, ɓele ŋgar a riŋ à fìter a guvah, kige tsa, a riŋ à kìver a gà duwa ana, aləka, aka màra a ma ya ana, wànà mala ga ata a gweɗere a: “Dara tsəma, zəməma ɗaf” a? 8 A riŋ tsa. Ama a gweɗere a ivaɗ ka: “Daha, yehiŋ vatwa aà medè ɗaf gà. I dəba ŋa ya, kà mbəɗ akaba petek ana ŋgwal ŋa ya. Ka daha, kà ndzikiŋara ɗaf a. Kər ŋa ka ndza a faka tə̀ma. Ki giŋere a gà meslire ana a sèsiŋ aà mege ya. Na Yàa zəm aba ya ka, dite ki dze a ba aà mazəma biy yak kuɗa.” 9 Ka dzalum dze ana, mala ga ata a riŋ a ge a kəkaaha a ɓele ŋgar aaha ndeɗiŋa a gwaɗar ka: “Giŋ megemir” a ya? Awaŋ, a riŋ tsa. 10 Kamala taŋa ya, i təv kurum tekeɗe, kataya mbaŋa. I təv ana kàa gwim aba gà megemir ana Mbulum a gwaɗa a kurum: Gwim tserdze ya ka, gwaɗum: “Mər ka, gà ɓəzla meslire ana məfara ŋa ya pəra. Aɗaba mì ge ka, megemir ana ta gwaɗa a mə̀r a ɗekɗek pəra.”»

Yesuw a mbala à gà ɓəzla bàba mbəlak ba kurwa

11 Aləka i təv ana Yesuw a riŋ a de a ndàra a Yeruzalem a ka, a da ndaka liwiŋ gà ahəɗ Samariya nda Galile. 12 Aka à mendze a kəla kə̀sà duwa ka, gà ɓəzla bàba mbəlak ba duwa kurwa, tar riŋ i dala ŋana. Ta ŋgataha a Yesuw ka, tə daha, ta hitse aà guva vatwa ana a de a dərra ya dzìrìk. 13 Tə zalaraha aàba nda magala, ta gwaɗaraha: «Yesuw Əbay, mì ndzek are tsehe te tsiye?» 14 Yesuw a fə̀raha aà tar ka, a gwaɗa a taraha: «Dum, ta patum à ba kurum a gà ɓəzla mandəva kuɗa a Mbulum, tə̀ samata kurum, tə sər dər ka, wànà meme na kà ndzum kinehe kuɗa ya.» Gà mburma ata ta mah ba, tə da.

I təv ana tar riŋ ti de a ya ka, ta mbala aà vatwa tsara. 15 Mìsle ŋgiɗ ilik ika magər tar a, a samata ba ŋgar ana a mbəl a ka, a mbəɗ gər a dəba, a təv Yesuw, nda mazàmbàɗà à Mbulum ŋgarra. 16 A daha ka, a kal aba aka miɗ Yesuw, luz a tike yemere a bəɗ, dite a ger kəkaaha. Ama wele ata ka, gà Samariya. 17 Yesuw a gwaɗar: «Gà mburma kurwa ŋa ata ana tàa mbala fit tsiye? Gà tswiɗ ŋa aaha dze ana, i ŋga? 18 Wànà wura ilik aka màra a dəba aà mege kəkaaha a Mbulum ika gər slele aaha ya te tsiye?» 19 I dəba ŋa ya, Yesuw a gwaɗa a wele ata: «Hitse, ka daba. Megìse yak ana kì gis iye i gəzləŋ yak a, aka mbəl à kər.»

Meme na Mbulum a ta kwere a gər ahəɗ a

Mata 24:23-28,37-41

20 I dəba ŋa ya, gà *Farisa duwa ta gwaɗa a Yesuw: «Mekwere Əbay Mbulum ana a ta kwere a ya dze ana, ndeɗime?» Yesuw a gwaɗa a tar aaka: «Mekwere Əbay Mbulum a dere a ka, gà mburma ta ŋgeter a tsa. 21 Ti sle aà megweɗe a ka: “Araha i faha,” kige tsa: “Ar aaka” tsa mbaŋa. Aɗaba sərum dər ka, mekwere Əbay Mbulum ɗa ika magər kurum kinehe.»

22 I dəba ŋa ya, Yesuw a gwaɗa a gà ɓəzla mazazama ŋgat: «A pat ŋgiɗ a ndzere a ka, mendze ana kinehe i ndze a ika magər kurum, iye, *wur ana a dara i təv Mbulum a ka, a kiv a kurum ŋa. Ku mege pat ilik kà wayum meŋgetwimiŋ tekeɗe, ki ŋgetwimiŋ a tsa. 23 Ti ta gweɗe a kurum a: “Araha i faha,” kige tsa: “Ar aaka i faka.” Ama ka, ka dum, kà gəsum ahəm tar tsa. 24 Aɗaba pat ŋa aka ndzera ka, iye, wur ana a dara i təv Mbulum a, i dere a ka, parakka, i təv are mburma tserdze, kamala mewìtìɗè mbulum ana ndiɗèy à wìtiɗ a ika tseke ŋgiɗ ka, tsikw a ndze a dər aka tseke ŋgiɗ asa ya. 25 Ama ka, say i sèwèr a are hinne, gà mburma ana kinehe ya, ti lìmiŋ a aba ya dzekwiŋ.

26 Ama dukw ana a ge ba akahər Nuhu ata ya ka, a ta ge a ba a pat ana iye, wur ana a dara i təv Mbulum a, i mère a ya mbaŋa. 27 Akahər ata ka, gà mburma ta mətsa aà maŋgayaba, mazəmaya gà dukw mezime, nda masàyà gà dukw mese. Tə ndzakawa daala, tə dzayawa gà dəm tar a zal, haa a pat ana Nuhu a pəts a ga ŋgar ata a làmbaɗa aà masuwaya dər ika gər yam a. Dite i dəba ŋa ya, yam batsah ŋa a dara kuɗa, a rah aka gər ahəɗ fèɗìɗe, a dzeye à gà asiŋ gà mburma ata fit. 28 Kige tsa, a ta ge a ka, kərga biy Ludu ana akahər ata ya mbaŋa. Gà mburma ta mətsa aà maŋgayaba mazəmaya gà dukw mezime, nda masàyà gà dukw mese. Tə dzawuwa à gà duwa, tə sakamawa gà duwa, dite ti sligeyewa gà duwa, ta gewa gà ga. 29 Ama a pat ana Ludu a hitse, a da i Suduma ya ka, zlir akwa bàtutukw ŋa a ndàra aka gà asiŋ gà mburma ana i fata ya, nda dukuməŋa a riŋ a wene a wàfùfùffa, a dzeye a tar fit. 30 A ta ge a ka, kataya mbaŋa, na a pat ana iye, wur ana a dara i təv Mbulum a, pəzlàŋ i ti slele a ya. 31 A pat ata, wura aka ge ika galak ka, ma tarəra a bəɗ a, mə̀ məts aà mandzə̀kàra gà dukw ŋgar ana i huɗ ga ya tsa. Wur ana i guvah ŋgar a tekeɗe ka, ma ta mbəɗ gər a ma tsa mbaŋa. 32 Məkəs Ludu ata ka, mə̀ məts a kurum gər tsa. 33 Wur ana aka sasar məmbə̀là à mesife ŋgar ɗa ika gər ahəɗ a ka, a dzeye a dər seyiŋ ivaɗ. Ama wur ana a dzeye a à mesife ŋgar aɗaba iye ya ka, a mbil a dər ivaɗ asa.

34 Iye ihər i tsik a kurum ŋa: A pat ata ndaavəɗ ka, gà mburma ana mahə̀nà ŋa ika slə̀làh ilik ŋa ya ka, ilik ti zle a ihər a, ilik ŋa aaha a dziŋa. 35 Gà məkəs sula tì lìgir a i zlaŋgwaɗ ibam ka, ilik ti zle a ihər a, ilik ŋa aaha a ndze a mbaŋa. 36 Dite gà mburma ana sula i guvah ŋa ilik ta fìt a tekeɗe, ilik ti zle a ihər a, ilik ŋa aaha a ndze a mbaŋa asa.»

37 Gà ɓəzla mazazama ŋgat ta gwaɗar aaka: «Gà dukw ata ti ta ge a ba dze ana, i ŋga, Batsah mə̀r ŋa?» I fata ka, a gwaɗa a tar: «Duwa aka mət, ku mege i ŋga ka, gà kwatsamba ti diŋa, ti yehebe aaka a gər.»