Yesuw a ɗif à ga Mbulum batsah ŋa ana
ti ta mbezle a dər mba ya
24
1 Aləka i dəba ŋa ya,
Yesuw a dara i ga Mbulum batsah ŋa ata ya.
I təv ana a riŋ a de a ya ka,
gà ɓəzla mazazama ŋgat tə daha a təv ŋgar,
aɗaba ta waya meɗifer à ga Mbulum ana tə zlazl ŋgwal ŋa ya.
2 Ama Yesuw a gwaɗa a tar:
«Kurum ihər ki ŋgetwime a a ga ŋgwal ŋa aaha tə zlazl a te tsiye?
Kinehe iye ihər i gweɗe a kurum a nda ndzer:
Pat ŋgiɗ ka,
ki ŋgetwime a a kur ika gər biy ŋgiɗ asa tsa.
Ti ta mbezle a dər mba ka,
leheɗ leheɗ kweleŋ fetite.»
Meme na ki sirekwe a dər ka, gər ahəɗ à ndìv a ya?
3 Aləka i dəba ŋa ya,
Yesuw a tsəl a gər kwite Ndzendzebire.
I təv ana ŋgat a riŋ mandza ŋa i fata ya ka,
gà ɓəzla mazazama ŋgat tə daha a təv ŋgar,
à gər tar.
Tə daha,
ta gwaɗar:
«Tsik a mə̀r te,
ndeɗime na bazlam yak ata kà tsik a,
a ta ge a ba ya,
dite meme na mìi sir a dər ka,
kàa à meslele,
nda gà gər ahəɗ aka à mendìve asa ya?»
4 I dəba ŋa ya,
Yesuw a gwaɗa a tar aaka:
«Gwim metsehe lele,
wura ma ta baza a kurum za tsa.
5 Aɗaba gà mburma hinne ti dere a a təv kurum a,
ti zle akaba a zləm gà,
dite ta gweɗe a kurum a,
ku weke ka,
iye na a ne *Kiristi ya,
tsaatsa pàrsa.
Kamala taŋa ya,
ti dzeye a à gà misle ŋgiɗ hinne.
6 I təv ana kàa tsarakum gà labara gà guvəl a ɗe a bise i təv kurum,
kige tsa,
a ɗere a i təv diriŋ ŋa ya ka,
gwim metsehe,
arəv ma da aà kurum a tsidze.
Aɗaba gà dukw ata ka,
say ti dere a dukw ŋgar.
Ama mandəvandəv gər ahəɗ ka,
aka sle zukw tsa na taŋa ya.
7 *Gà kwite ŋgiɗ pampam ta ge a guvəl nda gà biy ŋgiɗ.
Gà gawla gà Əbay ŋgiɗ ta ge a guvəl nda gà biy ŋgiɗ pam asa.
May a ge a hinne,
dite i gà kwite ŋgiɗ pampam ka,
ahəɗ a ɓezle a wakit wakit.
8 Ama gà dukw ata tserdze ya ka,
a live dər aba ya pəra,
dite na ti sir a dər ka,
gər ahəɗ aka à mendìve ya,
kamala mawà kəla ana à lèh ahər a,
a wir a aà gà məkəs a.
9 I dəba ŋa ya ka,
ta gis a kurum,
tì dze a kurum a ahər a mburma,
tì sèwèr a kurum a are,
dite ta bets a kurum.
Ku weke tserdze a ne a kurum a are,
aɗaba iye.
10 A ndze a a fata ka,
gà misle ŋgiɗ pampam hinne ta gis a iye a gəzləŋ tar asa tsa.
Tì dze a ba ka,
aà megeye aàba ɗaf nda mene ba are.
11 Aka ndze a fata ka,
gà ɓəzla məma à bazlam Mbulum ŋgiɗ pampam nda pàrsa ta hitse a aà medzeye à mburma hinne,
nda pàrsa tar ata.
12 Aɗaba bakal à sìkèh a hinne,
mawàyà ba gà mburma gà asiŋ ŋa əŋgal bagwal ŋa a ta ge a riŋ asa tsa,
akwa à mite a ihər a.
13 Ama wur ana ədəts aka gəs gəzləŋ,
aka simeraha haa a pat ana mesife ŋgar à ndìv a ya ka,
Mbulum a mbil a dər.
14 Ama gər ahəɗ à ndìv a kəla ka,
ti tsik a bazlam *mekwere Mbulum aaha ŋgwal ŋa ya a gà slala gà mburma ika gər ahəɗ pampam tserdze dzekwiŋ,
ku weke a sle a aà metsereke,
na dite à ndìv a ya.»
Mala mene are a Mbulum à pèt akabiŋa
15 *Yesuw a gwaɗa a tar:
«Aka miɗ mba ka,
ki ŋgetwime a a wele ana ta gwa ahər,
swalwa ŋa ŋgwala tsa hinne,
dite a ne dukw zlaŋgatsak na i təv Mbulum a.
Wele ata a ndze a ka,
a ga Mbulum batsah ŋana,
kamala ana Daniyel,
mala məmà à bazlam Mbulum ana akahər ata a tsik a,
a gwa,
wele ata a dere a,
a ndze a ka,
a fata.
Ama wur ana a dzeŋge a dukw aaha ya ka,
say mà dzar zləm lele.
16 Na gà mburma ana ika ahəɗ Yuda ya,
tàa ŋgat a gà dukw ata aka ndzera ka,
tə̀ təz ihər ndàra a kwite ya.
17 Wura aka ge ika galak ka,
ma tarəra a bəɗ a,
mə val,
tsəka,
ma da a huɗ ga a ma ŋgar aà mandzə̀kàra iɗəm gà dukw ŋgar a asa dzekwiŋ tsa.
18 Wur ana i guvah ŋgar a tekeɗe ka,
ma ta mbəɗ gər a ma aà mandzə̀kàra gà petek ŋgar a asa tsa mbaŋa.
19 A pat ata ka,
mesewere are batsah ŋana ka,
biy gà məkəs ana nda gà huɗ i gər a,
kige tsa,
mawur ŋana gà ɓəza aà tar a asa mbaŋa.
20 Hamum a Mbulum,
ələk gà dukw ata ti ndzere a ka,
duwa ma ta ŋge a kurum aà sik kamala mivele ana i dùluɓ a tsa,
kige tsa a pat mesifikaba ya tsa.
21 *Aɗaba mesewere are ata ka,
à zè a dər biy na daga Mbulum a ge gər ahəɗ haa kinehe ya.
Mesewere are ŋgiɗ a riŋ à zè a taŋa ka,
a riŋ asa tsa.
22 Na mege Mbulum mà nikiɗ ihər à pat mesewere are ŋa ata ya tsa asla ka,
ana ka,
wura ilik a mbil a tsidze.
Ama a nikiɗ à pat ŋa ka,
agəra gà mburma ŋgar ana a pala tar a.
23 Na bəla wura aka gwaɗa a kurum:
“*Kiristi naha”,
kige tsa:
“Ar aaka” ka,
ka ta gəsum bazlam ŋgar tsa.
24 Aɗaba taŋa ka,
gà na ti ne aba Kiristi ya,
nda gà na ti ne aba gà ɓəzla məma à guma Mbulum nda pàrsa ya,
ta hitsiŋa.
Ta ge a gà dukw mene aà mburma pampam hinne,
aà məbàzà dər za a gà na Mbulum a pala tar zləmana,
na mege ti sle a ya.
25 Taŋa ka,
Yàa tsik a kurum aba ya daga aà kinehe ya,
ndzum dər i zləm lele.
26 Aɗaba taŋa,
na bəla tàa gwaɗa a kurum:
“Kiristi naha i dala i kusak” ka,
ka tə dum tsa.
Kige tsa,
na tàa gwaɗa a kurum:
“Araha i ga i faha” ka,
ka ta gəsum bazlam tar tsa mbaŋa.
27 Dukuməŋa a ge a ba ka,
kamala mewìtìɗè mbulum ana ndiɗèy à wìtiɗe a aà gəza mbulum a.
A dze ahər a ba ka,
ara ndaka dwa ya,
dite à wìtiɗe a nda gwa asa mbaŋa.
Kamala taŋa ya,
na iye,
*wur ana a dara i təv Mbulum a,
i dere a ka,
parakka,
i təv are mburma tserdze.
28 *Kərga taŋa ya,
dukw ata a ge a ba ka,
kalkal dukw ana aka mət ku mege i ŋga ka,
gà kwatsamba ti diŋa,
ti yehehebe aaka a gər a.»
Meme na *wur ana a dara i təv Mbulum a, a dere a ya?
29 Ama Yesuw a gwaɗa a tar asa:
«I təv ana gà mesewere are ata tàa ndəv iɗəm a tsara ka,
gà pat nda kiye tì div a asa tsa,
a ndze a ziŋziŋ fit kweleŋ.
Gà mawusawus ibam,
ti dzewere a aà mbulum a.
Dite gà dukw ana riŋ madzàvà ŋa aà gəza mbulum a,
ti lekeye a aba à gà gər ŋgwir ŋgwìr ŋgwir ŋgwir.
30 *A pat ata ka,
gà mburma ta ŋgetiŋŋa,
a iye,
wur ana a dara i təv Mbulum a ka,
gà mburma ana ika gər ahəɗ a tserdze,
sùwwa ti tiwe akabiŋa,
aɗaba ana ta ŋgetiŋehe a,
a iye,
wur ana a dara i təv Mbulum a,
i dere a ka,
nda hulɓukw a,
nda ndzəɗa Mbulum a hinne,
dite nda mezlibe gà ana tì zlibe a à iye ya.
31 Dite aləka mezleliŋ aka ɗe hinne ka,
i slirre a gà gawla gà ya.
Ti dere a ka,
aà mayaha gər a gà na i pala tar a,
daga ara aà zlile mbulum a tserdze.»
Bazlam minew guruv ana a wiɗe a ya
32 Yesuw a gwaɗa a tar asa mbaŋa:
«Tsarakum bazlam minew guruv aaha kwaŋ.
Aɗaba dizl ɗaf guruv ka,
à gègìriŋa,
dite à dze a ba aà mibìzè,
nda mewiɗe.
Agəra taŋa,
kurum tekeɗe,
ki sirwim a dər ndzer,
viye aka à mege.
33 Kamala taŋa ya mbaŋa,
na kàa ŋgatum a gà mesewere are nda gà dukw ata pampam tàa ndzera tserdze ka,
ki sirwim a dər ndzer,
iye,
*wur ana a dara i təv Mbulum a,
Yàa à meslele bise.
34 Iye ihər i gweɗe a kurum a kinehe,
nda ndzer,
pàrsa iɗəm tsa:
Gà mburma ana kinehe ya ka,
ta mete a zukw tsa,
say gà dukw ata tàa ndzera dzekwiŋ,
dite ta metiŋa.
35 Gà kuvəl mbulum nda gər ahəɗ ka,
tì ndìviŋa.
Ama bazlam gà ka,
à ndìv a tsa,
a ndze a aà biybiy.»
Mbulum ilik na a sər pat ana gər ahəɗ à ndìv a ya
36 Aləka Yesuw a gwaɗa a tar i dəba ŋa ya asa:
«Ama wura a sər pat ŋa,
nda ler ŋa ana gà dukw ata ti ndzere a ya tsidze.
Ku mege gà gawla Mbulum tekeɗe,
tə sər tsa.
Ku mege iye ana Kəla ŋgar a tekeɗe,
i sər ɓav tsa asa.
Say Mbulum Tsir gà à gər ŋgar ilik na a sər a.
37 Aɗaba dukw ana a ge ba akahər Nuhu ata ya ka,
a ta ge a ba aka təv ana iye,
*wur ana a dara i təv Mbulum a,
i mère a ya mbaŋa.
38 Aka təv ana yam ata aka dza ahər ba zukw tsiye ka,
gà mburma a riŋ ihər ti zimeye a gà dukw mezime,
ti seye a gà dukw mese,
tar riŋ ihər ti zleye a gà daala,
gà dəm ibam,
ti dzeye a tar a zal,
haa a pat ana Nuhu a pəts a ga ŋgar ata a làmbaɗa,
a suwayawa dər ika gər yam a.
39 Aɗaba gà taŋa ti ndiɗik gər aà taŋa ya ka,
tàa sər aàba tsa.
Dukw ana Nuhu a tsikewa a tar a tekeɗe,
tàa dzar zləm tsidze,
haa yam batsah ŋa ata a dara kuɗa,
a rah aka gər ahəɗ fèɗìɗe,
a dzeye à gà asiŋ gà mburma ata fit.
Ama a pat ana iye,
wur ana a dara i təv Mbulum a,
i ta mère a ya tekeɗe,
dukuməŋa a ta ge a ba ka,
kamala taŋa ya mbaŋa asa.
40 A pat ata ka,
bəla gà wura sula i guvah ŋa ilik ta fìt a ka,
ti zle a ihər a ilik,
ta miyek a dər ilik.
41 Na bəla gà məkəs sula tì lìgir a ika bur ŋa ilik ibam ka,
ti zle a ihər a ilik,
ta miyek a dər ilik asa mbaŋa.
42 Aɗaba taŋa,
ndzum ka,
nda metsehe,
tsəka,
ki sirwim a pat ana Batsah kurum ŋa a dere a ya tsa.
43 Ama ka,
tsarakum dukw aaha i tsik a kurum a ya lele:
Na bəla mala ga a sər mala akəl a dere a,
a time a ga ŋgar ka,
a ndze a are a pat ata tsa.
A viler a vatwa aà mada a ga a ma ŋgar tsidze.
44 Aɗaba taŋa,
kurum tekeɗe,
hadzalum ba kurum mbaŋa.
Ndzum ka,
nda metsehe lele,
tsəka,
iye,
wur ana a dara i təv Mbulum a,
i mère a ka,
a pat ana kurum ihər ki vevwim a iye ya tsa.»
Mala megemir ana a ge a ika are ŋa ya, ndəna a ge a
ika are ŋa ya tsiye
45 I dəba ŋa ya,
Yesuw a gwaɗa a tar asa:
«Nwim ka,
kamala mala megemir ana ndzer ŋa,
a ge a megemir ka,
nda metsehe lele ika are ŋa ya tsiye.
Na bəla mala ga ŋgar a de a a təv ŋa ka,
a ɗifer a à ga ŋgar a ahər,
a vile a ɗa dukw mezime a gà mburma ana i ma ŋgar a ka,
tits ndaka vatwa ŋa lele.
46 Aɗaba wele ana aka ge megemir kataya ka,
a ŋget a maŋgayaba i gəzləŋ,
a pat ana mala ga ŋgar aka dara,
aka le aà ŋgat,
a ge a megemir kamala taŋa ya ya.
47 Iye ihər i tsik a kurum a nda ndzer,
pàrsa iɗəm tsa:
Na mala ga ata aka màra ka,
a miyeker a à gà dukw ga ŋgar a ahər tserdze,
a kweriŋa.
48 Ama wele ana a ge a megemir ika are mburma ya ɗekɗek a ka,
a dzele a i gəzləŋ ŋgar,
a gweɗe a:
“Mala ga gà ka,
à mère a bise tsa,
i gebe a dukw ana gəzləŋ ga a waya ya.”
49 I dəba ŋa ya ka,
a ge a matawak a gà asiŋ gà ɓəzla megemir mala ga ŋgar aaha.
Tsam ka,
a dza ba aà mazəma gà dukw mezime pampam hinne,
ti se akaba a guzum nda gà ɓəzla mekweye ana tə sawa guzum hinne ya kuɗa.
50 Aləka i təv ana mala ga ŋgar ata à mère a ya,
mala megemir aaha a sir a ka,
à mère a və̀ɗəna tsa,
mala ga a wiyere a ŋgat ka,
paf kataya,
ze mesire aàba.
51 Na mala ga ŋgar ata aka màra ka,
a viler a mesewere are hinne,
à yè a ŋgat a təv ana gà ɓəzla mimbèhè are ti ti sèwèr a iɗəm are nda gà tuwa,
ta pèpìɗ a dər zlir hinne ya.»