Mata 23

Mege metsehe agəra gà ɓəzla medzeŋge məpala ahəm

Mbulum ana nda pàrsa ya

Markus 12:38-39; Luka 11:43,46; 20:45-46

1 I dəba ŋa ya, Yesuw a fàfəl a gà mburma ata mayaha ba gər ŋa nda gà ɓəzla mazazama ŋgat tserdze ya. 2 A gwaɗa a tar: «Gà ɓəzla medzeŋge məpala ahəm Mbulum, nda gà *Farisa, ti ɗifewa dər a mburma ka, à məpala ahəm Mbulum ana Musa a tsik a. 3 Aɗaba taŋa, dukw ana tàa tsik a kurum a ka, gwim taŋa, gəsum aà tar ahəm lele. Ama kəla ka, ka tə zazamum dukw tar ana ta ge a ya tsa. Aɗaba dukw ana ti ɗif a dər a mburma ya ka, tar ŋa ta ge a ndaka vatwa ŋa tsa. 4 Aɗaba tar ka, ta gewe akaba a mibe dukw ana tserdze ya, ìŋgìɓ aka gər mburma. Ama tar ŋana kuɗa ka, idep tì zlèk ahər a mburma tsidze. Ku mege meme tekeɗe, tì lìm ahər a tsa. 5 Aɗaba megemir tar ana ta ge a ya ka, ika miɗ mburma, dite gà mburma ta fə̀r aà tar, ta gwa ka, tar ka, gà ŋgwal ŋa. Kamala taŋa ya, i təv ana ta heme a a Mbulum a ka, ti ndìwìɗewa gà petek ana slàrra ya a gər, kige tsa aà ahər. Tì dèneye a màdaŋgwàla duwa aka guva petek tar zigwindindiɓɓe, ti ndze a dər kuɗa ka, ŋgakŋgakəkka asa mbaŋa. 6 Tar ka, ku mege i təv ana gà mburma tàa yahaba gər aà dukw mezime ya tekeɗe, a sàs a tar ti ndze a ka, aka təv mendze ana ŋgwal ŋa lele ya. Ku tàa da a gà ga mahàmà a Mbulum mbaŋa ka, ti yahawa i tar ka, say təv mendze ana ŋgwal ŋa ya, aà mendze dər aka miɗ mburma, dite mburma ta fə̀r dər aà tar lele. 7 Na tàa da a liwiŋ mburma ibam, a sàs a tar mburma ta ge a tar wusa ka, say nda mazàmbàɗà à tar ɗekɗek. Ta waya ti zel a ter a ka, gà Əbay gà ɓəzla medzeŋge a mburma.

8 Ama kurum ka, wura ma tə zal a kurum “Əbay medzeŋge a mburma” tə tsa. Aɗaba kurum tserdze ka, nda gà damər. Əbay medzeŋge a kurum ka, ilik, tsəka, sula tsa.» 9 Yesuw a gwaɗa a tar asa: «Ku weke ka, ma tə zal a wura ika gər ahəɗ “tsir gà” tsa. Aɗaba tsir kurum ka, Mbulum Batsah ŋa ana i gər ŋa ya ilik. 10 I dəba ŋa ya asa ka, wura ma ta zal a kurum “batsah mə̀r ŋa i təv mege duwa ya” tsa. Aɗaba batsah kurum ŋa ka, *Kiristi, mala məmbə̀là à mburma ana Mbulum a gwa, i slir a kurumehe a ya ilik pəra. 11 Aɗaba taŋa, na a sàs a wura ika magər kurum aà mene batsah ŋa ka, ma ne mala meslire ika magər kurum tserdze ivaɗ. 12 Aɗaba na wura a sasar tə zalar batsah ŋa ka, Mbulum a ne à ŋgat kəla ŋa ivaɗ. Ama wur ana aka ne à ba ŋgar kwizikw ika miɗ mburma ya ka, Mbulum a ne à ŋgat batsah ŋa asa mbaŋa.»

Yesuw a be à ɗaf a gà ɓəzla mimbèhè are

Markus 12:40; Luka 11:39-42,44,52; 20:47

13 «A kurum gà ɓəzla medzeŋge məpala ahəm Mbulum aaha nda gà *Farisa ya, kurum ka, gà ɓəzla mimbèhè are. Ama ka, tuwum ba kurum, aɗaba ana kà handakum a vatwa a gà mburma ana ta waya ti de a a *mekwere Mbulum a. Aɗaba kurum kà gəsum mada a fata tsa, dite wur ana a waya mada a fata ya ka, gədzə̀zlzla kurum i vatwa, ki vilwimer a vatwa aà mada aɗəm tsa.

14 A kurum gà ɓəzla medzeŋge məpala ahəm Mbulum aaha nda gà Farisa ya, kurum ka, gà ɓəzla mimbèhè are. Ama ka, tuwum ba kurum. Aɗaba kà ndzakawum duwa aà gà madakwa gà məkəs a nda haram. Dite kàa dzum ba aà mandəva kuɗa a Mbulum ka, vìrìɗìɗɗe, kərga kurum ka, gà ŋgwal ŋa hinne, tsaatsa pàrsa. Aɗaba taŋa, a pat ŋgiɗ ka, ta ge a kurum a sida kurum ka, mawùràba ŋa.

15 A kurum gà ɓəzla medzeŋge məpala ahəm Mbulum aaha nda gà Farisa ya, kurum ka, gà ɓəzla mimbèhè are. Ama ka, tuwum ba kurum. Aɗaba kurum riŋ ihər ki sìweywim a bə̀ba gər ahəɗ aaha dze ya, ku mege aka gər duluv tekeɗe, kà dawum pəra, a sàs a kurum mayaha gà mburma ana ti zezem a kurum a mbaŋa. Dite bəla kàa lwim aà wura ilik ka, mà gəs pàrsa kurum ata kuɗa. Ki niswim a à mendze ŋgar ndeyndey, dite a de a akwa ana a mbete a tsa aà biybiy a mazàkà ŋa.»

16 A gwaɗa a tar asa: «Tuwum ba kurum. Aɗaba kurum kà nwim ka, kalkal gà ɓəzla guluf ana ta gese a ahər a gà ɓəzla guluf ŋgiɗ a. Agəra ana kù gwaɗum asa ka: “Ku weke na aka mbaɗa nda ga Mbulum batsah ŋana, a ge a dukw ata tsa tekeɗe, à lèh a duwa tsa. Ama na ku weke aka mbàɗa nda gura ana i ga Mbulum a ka, aka dàn gər ŋgar.”» 17 A gwaɗa a tar asa: «A kurum ana metsehe kurum a riŋ tsa, slafurnukwnukw, dite kurum gà guluf ŋa asa ya. Dukùla na batsah ŋa i liwiŋ gà dukw ata ya? Ga Mbulum batsah ŋa ata ya, tsəna, gura ata a tsahən aà Mbulum agəra ana i ga ŋgar ɗekɗek a? 18 Dite i dəba ŋa ya, kù gwaɗum asa ka: “Na wura aka mbaɗa nda təv ana ta batsawa aaka duwa i ga Mbulum a, a ge a dukw ata tsa tekeɗe ka, à lèh a duwa tsa asa mbaŋa. Ama na ku weke aka mbàɗa nda dukw ana masakəŋa, ta vəl a Mbulum a ka, aka dàn gər ŋgar.” 19 A kurum ana kà nwim ka, kamala gà ɓəzla guluf a. Dze ana, dukùla na batsah ŋana i liwiŋ gà dukw ata ya? Wànà təv ata ta batsawa aaka duwa a Mbulum a ya? Tsəna, dukw ana ta vəlar, a tsahən ahər agəra ana ta batsawa aaka dukw ata ɗekɗek ivaɗ a? 20 Aɗaba taŋa, na wura aka mbaɗa nda təv ana ta batsawa aaka duwa i ga Mbulum a ka, a mbàɗa dər akaba taŋa ka, nda dukw ata ta batsawar a tserdze. 21 Asa ka, wur ana aka mbaɗa nda ga Mbulum batsah ŋa ata ya tekeɗe, a mbaɗa dər akaba taŋa ka, nda Mbulum ana mandza ŋa iɗəm a fit dze. 22 Dite wur ana aka mbàɗa nda gəza mbulum a tekeɗe, a mbaɗa taŋa ka, nda təv mendze Əbay Mbulum, nda gà Mbulum ŋana a riŋ mandza ŋa ikəka ya fit dze asa mbaŋa.

23 A kurum gà ɓəzla medzeŋge məpala ahəm Mbulum aaha nda gà Farisa ya, kurum ka, gà ɓəzla mimbèhè are. Ama ka, tuwum ba kurum, aɗaba kurum kà yahawum gər a gà dukw mezime kurum ana i dala ya ka, ku mege dukw ana a ɗe a hinne tsa kwizikw a tekeɗe, ki livwime a kurwa, dite ki vilwim a ihər a Mbulum a ilik. Ama məpala ahəm Mbulum ana ŋgwal ŋa, biy megìse a gəzləŋ nda mezezeme lele ya ka, kà miyakum dər ivaɗ dze ana, meme? Kamala megweɗe ya: Mege dukw ana ndaka vatwa ŋa ya, nda mege dukw ana ŋgwal ŋa ya a mburma, dite magəsa Mbulum nda gəzləŋ. Ana ka, ki gwim a gà taŋa dzekwiŋ, na dite ki gwim a gà naha kuɗa mbaŋa ya.» 24 Yesuw a gwaɗa a tar asa: «Kurum kà nwim ka, kalkal mala guluf ana a gese a ahər a mala guluf ŋgiɗ a. Dite asa ka, gà dukw mese kurum ana kà sawum a ka, ìndits ìndits kà palawum iɗəm gà amime ya, dite ka, dzìbìrim kà miyakawum aɗəm à dukw ana kamala zlìgwèmè ya, ki swim a dər akaba a hitwis.

25 A kurum gà ɓəzla medzeŋge məpala ahəm Mbulum aaha nda gà Farisa ya, kurum ka, gà ɓəzla mimbèhè are. Ama ka, tuwum ba kurum, aɗaba kurum kà sərum are matsakaɗa gà kəzliyam, nda gà tasà kurum ka, lele. Dite aàla na gəzləŋ kurum kataya tsiye? Nda bəra ka, kù gwaɗum, mə̀r gà ŋgwal ŋa, tsaatsa i huɗ ŋana ka, maràhà ŋa nda gà dukw ana ŋgwala tsiye, kamala megweɗe ya ka: Megeye akəl, nda dukw ana ba kurum a waya aà mege ya ɗekɗek. 26 Iye ihər i gweɗekiŋa, a kər Farisa aaha guluf ŋa ya: Barra i huɗ gəzləŋ yak a dzekwiŋ, dite ndaka gər bəra tekeɗe, à pèt a lele kuɗa ya.

27 A kurum gà ɓəzla medzeŋge məpala ahəm Mbulum aaha nda gà Farisa ya, kurum ka, gà ɓəzla mimbèhè are. Ama ka, tuwum ba kurum. Aɗaba kurum kà ndzìkìɗwim ba ka, gà dive ana mburma ta fir ahər a nda bəra ka, herrè lele ya. Ama i huɗ ŋana ka, maràhà ŋa nda gà atasl gà məməta, nda mezè ŋa ana iɗəm sìwìkìke, a ze a ya fit dze. 28 Kurum ka, kamala taŋa ya. Ika miɗ mburma ka, ta gweɗe a, kurum ka, gà ŋgwal ŋa. Ama i huɗ gəzləŋ kurum ka, mimbèhè are, nda mege dukw ana ŋgwala tsiye, na maràhà ŋa iɗəm a.»

Yesuw a ɗif à sida gà ɓəzla mimbèhè are

Luka 11:47-51

29 «A kurum gà ɓəzla medzeŋge məpala ahəm Mbulum aaha nda gà *Farisa ya, kurum ka, gà ɓəzla mimbèhè are. Ama ka, tuwum ba kurum. Aɗaba kurum riŋ ihər kà zlazlawum aà dive gà ɓəzla məma à guma Mbulum, ŋgewwè ki lèmbeɗwim a dive gà mburma ana ti zezem a Mbulum nda ndzer ŋa ya ka, lele. 30 Dite kù gwaɗum asa ka: “Na mì ge riŋ akahər ana gà tsir mə̀r ta batsawa ɗa gà ɓəzla məma à guma Mbulum a ka, mìi gewe a ba nda gà tar aà məbatsa mburma ata tə tsa.” 31 Kamala taŋa ya, kurum nda gər kurum kà sərum, kù gwaɗum: Mər ka, gà ɓəza gà mburma ata ta batsawa ɗa gà ɓəzla məma à guma Mbulum ana akahər ata ya.» 32 Yesuw a gwaɗa a tar asa: «Kà ndiɗikwime gər à bakal ana gà tsir kurum ta gewa akahər ata ya pəra.» 33 I dəba ŋa ya, a gwaɗa a tar asa: «A kurum gà bàba gà mesiwiɗ nda gà ɓəza gà mesiwiɗ aaha. Aləka dze ana, meme na ki ta beywimere a i akwa ana a mbete a tsa aà biybiy a ɗara? 34 Aɗaba taŋa, araha, i slirehe a gà ɓəzla məma à guma Mbulum nda gà ɓəzla metsehe, dite nda gà ɓəzla medzeŋge məpala ahəm Mbulum a təv kurum tserdze, dite ka, ki ta betswim a gà misle ŋgiɗ, gà biy ŋgiɗ ibam, ki ndwendweywim a tar aà dizl magə̀làwà ŋa. Gà misle ŋgiɗ asa ka, ki gezlwimere a tar i gà ga mahàmà a Mbulum kurum a. Ki sèwèrwim a ter a are aà kwite aà kwite. 35 Aɗaba taŋa, gà mburma ata kà batsum tar masakəŋa taf, bakal tar a riŋ tsiye tserdze, bakal ŋa ika gər kurum. Daga aà məməta Abel, mala mazazama Mbulum nda ndzer ŋana ta kəɗ akahər ata ya, tsikw aà məməta Zakari kəla Barakiya ana kə̀ kəɗum ika magər gà ga mahàmà a Mbulum batsah ŋana, nda təv ana ta batsawa aaka gà duwa a Mbulum a. 36 Ama ka, iye ihər i tsik a kurum a nda ndzer, pàrsa iɗəm tsa: Gà dukw ata kì gwim tserdze ya ka, bakal ŋa à mère a ka, aka gər gà mburma aaha kinehe ya.»

Yesuw a tuwa, aɗaba gà mburma ana i Yeruzalem a

Luka 13:34-35

37 I dəba ŋa ya, Yesuw a dza ba aà matuwa kwite Yeruzalem. A gwa: «A kurum gà mburma ana a riŋ i Yeruzalem a, i Yeruzalem a. Kurum ana kà batsawum gà ɓəzla məma à guma Mbulum, dite kə̀ kalawum gà na Mbulum slərawaha tar a təv kurum a nda kur a. Wànà sik ndaw na a sèsiŋ magəsa aàba gər a gà mburma kurum, kamala məmər mendzikwir ana a yehe a gər a gà ɓəza ŋgar aà huɗ gwezleviyek a? Ama ka, a sàs a kurum dər akaba ɓav tsa asa. 38 Aɗaba taŋa, gà ga kurum ti ti ne a rəŋga hùhwayhwayyà, wura a ge a iɗəm tsa. 39 Aɗaba iye ihər i gweɗe a kurum a nda ndzer ŋa: Ki ta ŋgetwimiŋ a asa tsa, daga aà kinehe ya, haa a pat ana i ta mère a ya ka, dite ki gweɗwim a: “Mipise ahəm ika gər wur ana Mbulum a slərra ŋgat a faha ya.”»